1 Kolinte 4
4
Miluwa va Kilistu
1Munapande kutuyongola ngwe tu vangamba va Kilistu, vaje vaka-kunyunga vya mu vushweke vya Njambi. 2Cuma cishakiwako kuli vangamba vangacije cinapu eci, vakevo vanapande kupwa va kulongwa kuli shukulu yavo. 3Oloni kunjesi na cishota-mbunge akunjisompa yeni nambe vanu, yange kunjesi kulisompa yange vavenya. 4Citaku-taku cange cinapu cakulumbunuka, oloni kucimwesa ngeci njinapu wakujeneka mulonga. Mwene ikeye anjisompa. 5Ngecivene, kesi musompe munu omwo simbu kanda yete. Kusompa kwakumanesela kunavandamena noo Mwene akaija, ikeye akaka a litanya vyuma vyakushweka mu lisusulungu nakusholola vizango vya mu vimbunge vya vanu. Asinoni voshe vakatambula kushangala kuli Njambi kuje kunavapande.
6Omwo ali yeni, vavusamba vange, vyuma evi njinavyetesa kuli Apolo na kuli yange vavenya, mukupangesa yetu tuvavali ngwe cimweso, ngeci mulilongese muvinalumbunukila vyendeka evi ngwavyo, “Nyungeni mashiko amavwa.” Naumo wai akalyalesela ali munu umo nakushaula mukwavo. 7Omwo iyajo namilingisa ngeci muhyane vakweni? Kuma Njambi kamyanene vyuma vyoshe mulinavyo ndi? Nga mwavitambwile, omwo vika mulishashela ngwe kumwavitambwile vyavwana?
8Muli na vyuma vyoshe vimushaka ndi? Munafuku laja ndi? Munapu mu vimyene nameme yetu kanda tufwemo ndi? Oloni njashakele ngeci mupwe mu vimyene, ngeci netu tupwe tu vimyene amo neni. 9Omwo njamono ngeci Njambi naana mwela wakumanesela kuli yetu miluwa, ngwe vanu vaje vavanasompela kutsa ku mesho a voshe, ngwe kalikengelo ka kaye koshe ka tungelo na vanu. 10Omwo Kilistu yetu tunapu vilema, oloni munapu vaka-mana muli Kilistu! Yetu tunapu vakuzeya, oloni yeni muli na nzili! Yetu valinakutushaula, oloni yeni valinakumisingimika. 11A simbu ino vene, tuli na njala na lihwila, tunazala vyakutavozoka, valinakutupupa, twendangana kutunda ku mutambela umo nakuya ku mutambela ukwavo, 12#Vil 18:3 co tunajuka na vipangi vya vikalu. Omo vatusinga, co yetu tuvezikisa, omo vatuyandesa, co tukakateya, 13omo vatushaula, co tukumbulula na majwi a ngozi. Vanatupwisa vishwashwa vya ano a kaye, tunapu mazilo a asi kweta na ku simbu ino vene.
14Njinasoneka evi vyuma, kesi ngwe njimizivise shwamwa embwe, oloni kumilongesa ngwe vana vange vanjazema. 15Omwo nameme muli na valongisi vakupwa 10,000, muli Yesu, oloni muli na ishweni umolika. Omwo mukuyoya kweni muli na Kilistu Yesu yange njinapu nji ishweni akuminenela Vin̄anda Vyavivwa. 16#1 Koli 11:1; Fili 3:17 Njimilomba ngeci munjitembunwine. 17Omwo a cuma eci njilinakutuma Timateo kuli yeni, uje napu munange wa kulongwa injazema muli mwene. Ikeye akumyanukisa vilongesa vije njilinakukava mu mwonyo wauha muli Kilistu Yesu, vije vinjikalongesa mu vikungulukilo mwoshe kwoshe-ikwoshe.
18Vamo veni muli na kulyalesa omwo munayongola ngweni amo kunjikaija kuli yeni. 19Nameme ngoco, nga Mwene natava, njilinakwija vwasi kuli yeni, asinoni njakuwane yange vavenya nzili muka valinayo ava vanu vaka-kulyalesa, co kesi lika vije vivalinakwendeka. 20Omwo Vumwene vwa Njambi kesi vwa majwi lika oloni na nzili. 21Vikajo mushaka? Mushaka njiije kuli yeni na likote, indi na mbunge ya cizemo na kulikeesa?
Currently Selected:
1 Kolinte 4: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006