1 Kolinte 3
3
Vangamba va Njambi
1Oloni vakwetu, kunjasele kwendeka neni ngwe njendeka kuli vanu vaje vali na Munzinzime, njendekele kuli yeni ngwe mu vaka-kaye, ngwe vanike vaje kanda vakole mu vuYesu. 2#VaHe 5:12-13 Njamilisile na mavele, kesi ngwe na vyakulya vyakukola, omwo te kanda mwete a simbu yakuvilya. Co nambe vene ololo kanda mucipweo kuvilya, 3omwo mucili nakuyoya ngwe vaka-kaye kano. Omwo akati keni ali lifuwa, co mulinakulizunga umo na mukwavo, kuma eci kucimwesa ngeci munapu vaka-kaye kano nakuyoya ngwe ku futisi ya kaye ndi? 4#1 Koli 1:12 Omwo umo endeka ngwendi, “Yange nji muka-Paulu,” weka lalo ngwendi, “Yange nji muka-Apolo” kuma kumwalifwile ngwe muvakalingi vanu va ano a kaye ndi?
5Apolo ikeye iya? Co Paulu ikeye iya? Tunapu vangamba va Njambi, ali yetu vene yeni mwakulaelele. Yetu tulinakupanga vipangi vije vyatwanene Mwene ngeci tuvilinge, 6#Vil 18:4-11,24-28 yange njakunine mbuto, Apolo watukumwinine, oloni Njambi ikeye wakulisile mbuto. 7Ngecivene, uje akuna nambe uje atukumwina kuvesi na vulemu vwai. Oloni vulemu vuli kuli Njambi, omwo ikeye muka-kumenesa mbuto. 8Kukwesi lyangununo akati ka uje akuna na uje atukumwina, Njambi akaana cikandelela ku munu na munu ngwe ku vipangi vyendi vyanalingi. 9Omwo tulinakupangela amo kuli Njambi, co yeni munapu lihya lya Njambi.
Co lalo munapu kutunga kwa Njambi. 10Akupangesa vwana vuje vwanjanene Njambi, njalingile vipangi vya muka-kutunga wa vutongwe nakujala luvula, co munu weka lalo alinakutungilao. Oloni munu na munu napande kunyanyama omo alinakutungila a luvula luje. 11Omwo Njambi naaka laja Yesu Kilistu kupwa luvula lumo, co kukwesi lalo luvula lweka vasa kujala lwai. 12Vamo vapangesa ngolinde nambe siliva nambe mamanya a seo yakama mukutungila a luvula luje, vamoco vapangesa mavaya nambe mwila nambe vishati. 13Co vipangi vya munu na munu vikasholoka a Litangwa lya Kilistu lije likavisholola. Omwo a Litangwa omwo vakavimwesa lije tuhya tukasholola vipangi vya munu na munu, tuhya tukavyeseka nakusholola seo yavyo. 14Nga vipangi vije vyanatungila munu a luvula vikasholoka mwamuvwa ku tuhya, co muka-kutunga akatambula cikandelela. 15Oloni nga vipangi vyove vikenya, co nacimo cai ukatambula, oloni yove vavenya ni ukovoka, ngwe unaputumuka mu tuhya.
16 #
1 Koli 6:19; 2 Koli 6:16 Mwa vushunga mwazivuka ngeci munapu Njuvo ya Shukulu Kalunga na Munzinzime wa Njambi alinakuyoya muli yeni! 17Nga umo anyongesa Njuvo ya Shukulu Kalunga, nendi Njambi akamunyongesa. Omwo Njuvo ya Shukulu Kalunga yapwa yakujela, co yeni lalo munapu Njuvo ya Shukulu Kalunga.
18Kesi ulikwise yove vavenya. Nga umo akati keni aliyongola ngwendi ali na mana a ano a kaye, co pwa cilema, ngeci ukale na mana. 19#Yom 5:13 Omwo vije vayongola vaka-kaye ngwavo vinapu vya mana, ku mesho a Njambi vinapu vya vulema. Ngwe muvyendeka visoneka ngwavyo, “Njambi akakwata vaka-mana mukunyanyama kwavo”, 20#Mya 94:11 co lalo visoneka vikwavo vyendeka ngwavyo, “Shukulu Kalunga azivuka ngeci viyongola vya vaka-mana vinapu vyangoco.” 21Ngecivene, naumo wai alishashe a vije vivalinga vanu. Omwo vyuma vyoshe vinapu vyeni, 22nambe Paulu nambe Apolo nambe Petulu nambe kaye kano nambe mwonyo nambe kutsa nambe vyuma evi viliko nambe vije vikaija kulutwe, vyoshe evi vinapu vyeni, 23co yeni munakundama kuli Kilistu, co Kilistu nakundama kuli Njambi.
Currently Selected:
1 Kolinte 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006