Hebreos 9

Jun Stemplo Dios Sat Txꞌotxꞌ Tiꞌ Cꞌal Jun Bꞌey Satcan

1Jaꞌ jun bꞌabꞌel wa kꞌane tuꞌ, ey wan chejbꞌanile chi yal yu tzet chi yun yoc ebꞌ yin eyilal bꞌey stemplo Dios yul yibꞌankꞌinal tiꞌ. 2Quey tiꞌ jix yun swaꞌxi jun stemplo Dios tuꞌ. Jaꞌ jun bꞌabꞌel lugar bꞌey chi bꞌabꞌi oc apnoj ebꞌ, chi yij yet Dios. Ey jun tzejtebꞌal eyoctoj tituꞌ, jujebꞌ skꞌakꞌal. Ey jun meẍa yetoj wan ixim pan yet Dios yei. 3Jaxa yintaj octoj junxa an kꞌap yet scaabꞌ smajil. Jaꞌ tituꞌ ey junxa lugar tol Asan Dios Ey Yet Xꞌojli junxa tuꞌ. 4Ey jun neet tituꞌ, oro cꞌal eloj. Jaꞌ tituꞌ chi nusle tzettaj yetal sukꞌukꞌi sabꞌ. Jaꞌ tituꞌ ey pax octoj scaẍail bꞌey eyoc laonebꞌ ẍejbꞌanil Dios. Jaꞌ jun caẍa tuꞌ, chi yij Scaẍail Swa kꞌane Dios. Bꞌonbꞌil masanil yetoj oro. Eeytoj oro xi yul. Eeytoj maná yul jun xi tuꞌ. Catuꞌ eeytoj teꞌ skꞌojoch naj Aarón. Jaꞌ jun skꞌojoch naj tuꞌ jix woli yet peyxa tuꞌ. Catuꞌ ey pax eytoj chꞌen chemteꞌ, chꞌen bꞌey tzꞌibꞌebꞌilcan oc wan laonebꞌ ẍejbꞌanil Dios tuꞌ yul jun caẍa tuꞌ. 5Eyatoj wan yechel Querubín yibꞌan jun caẍa tuꞌ, yet watxꞌ chi txeclo el tol eyecꞌ Dios bꞌey tituꞌ. Jenantoj xicꞌ ebꞌ yibꞌan bꞌey chi akꞌle xaambꞌal yu spenail ebꞌ ánima. Cꞌam wal jin tiempo walontej ey jex wanojxa yin wan tiꞌ tinaniꞌ. 6Jaꞌ yet chi oc yopiso wan tiꞌ, junjun cꞌal cꞌu chi octoj ebꞌ yakꞌomal xaambꞌal bꞌey jun lugar bꞌey chi bꞌabꞌi oc apnoj ebꞌ. Catuꞌ chi bꞌet yakꞌon servil Dios ebꞌ. 7Jal bꞌey junxa lugar yintaj octoj jun bꞌey chi bꞌabꞌi oc apnoj tuꞌ xin, asan jun yaawil yakꞌomal xaambꞌal chi octoj. Asan jun cꞌual chi octoj yin junjun abꞌil. Jaꞌ yet chi octoj tuꞌ, sowalil ey ẍiqꞌuil noꞌ noꞌ iꞌbꞌil oc yu, yu yakꞌon yin xaambꞌalil yu spenail, yetoj cꞌal yu spenail ebꞌ ánima. 8Jal pax Naj Santo Espíritu chi akꞌon naꞌcha el junxa tiꞌ ku. Tol jaꞌ yet chi oc yopiso jun lugar bꞌey chi bꞌabꞌi oc apnoj ebꞌ tuꞌ, majan to jun lugar tuꞌ ey jon, jun Asan Dios Ey Yet Xꞌojli tuꞌ. 9Jaꞌ wan tiꞌ, txꞌoxbꞌanile cꞌal yeoc ebꞌ ey jon tinaniꞌ. Jaꞌ wan saꞌbꞌeal cꞌal wan xaambꞌal chi akꞌle tet Dios tuꞌ, cꞌam chi skeꞌ swaꞌxi oc snaꞌbꞌal ebꞌ chi akꞌon tuꞌ. 10Yutol jaꞌ wan chejbꞌanile tuꞌ, asan yu tzet chi loꞌlei, cꞌal yu tzet chi ucꞌlei chi yaltej. Catuꞌ chi yal pax tej yu sajbꞌaneleal el tzettaj yetal. Jaꞌ wan chejbꞌanile tuꞌ, yet cꞌal mimanile yeoc ebꞌ. Jix oc yopiso wan chejbꞌanile tuꞌ yu ebꞌ masantaꞌcꞌal jix qꞌuexi ebꞌ yu Dios. 11Jaꞌ yet jix julecꞌ Cristo tinaniꞌ. Yuxan, jaꞌ Naj eyoc yaawiloj yakꞌomaloj xaambꞌal tet Dios. Caw watxꞌ tzetyetal akꞌbꞌil ey jon. Yutol jaꞌ stemplo Dios bꞌey chi mulna Naj tuꞌ, caw watxꞌ, caw tzꞌajan masanil. Jaꞌ jun lugar tuꞌ man ánima oj jix waꞌneni, yuxan man a sat txꞌotxꞌ oj. 12Jix octoj Cristo bꞌey jun lugar asan Dios ey yet xꞌojli tuꞌ tinaniꞌ. Man ẍiqꞌuil oj junoj achꞌe wacax jix yakꞌ Naj yin xaambꞌalil. Tol jaꞌcaw ẍiqꞌuil Naj jix yakꞌ yin xaambꞌalil. Yu jun tuꞌ, yuxan asan junel jix octoj. Yuxan jix jul cu colbꞌanil yu Naj tol ey cꞌal yin tobꞌalkꞌinal. 13Yel toni, chi yal sley Moisés tol ja ẍiqꞌuil noꞌ icham wacax yetoj ẍiqꞌuil noꞌ achꞌe chiw, cꞌal staanil noꞌ kꞌopo wacax chi tzꞌaꞌtoj, jaꞌ chi txiletoj yibꞌan ebꞌ tzꞌiltaj sattaj Dios. Yuxan chi waꞌxi el ebꞌ sattaj Dios yu, jaxca tol chi sajbꞌi el ebꞌ yu. 14Ta jaxca tuꞌ yopiso ẍiqꞌuil noꞌ noꞌ tuꞌ, jajxam wal ẍiqꞌuil Naj Cristo. Yu Naj Espíritu tol ey cꞌal yin tobꞌalkꞌinal, jix yakꞌ sbꞌa Cristo yin xaambꞌalil tet Dios, jaxca junoj xaambꞌal tzꞌajan yei. Yuxan chi sajbꞌanele el cu naꞌbꞌal yu ẍiqꞌuil Naj yin tzetyetal cꞌam swatxꞌil cꞌal wanoj costumbre cꞌam tzet chi oqui. Yuxan jaꞌ tinaniꞌ, chi skeꞌ kakꞌon servil cu Diosal iquis. 15Yuxan, jaꞌ Naj Jesucristo yalomal jun acꞌ wa kꞌane tiꞌ, jun chi yij testamento ma jun yuunal. Jaꞌ Naj jix waꞌnen canoj, yuxan awtebꞌil jon yu Dios yu koc can yetoj. Yuxan chi skeꞌ cu chaꞌon tzetyetal jix yalaꞌ, tol oj yakꞌ ey jon, jaꞌton cu kꞌinal ey cꞌal yin tobꞌalkꞌinal. Jaꞌ yet jix cam Naj tuꞌ, jix akꞌle lawoj spenail ebꞌ eyoc yalan jun bꞌabꞌel wa kꞌane tuꞌ yu Naj. 16Yutol jaꞌ yet ey junoj yuunal, sowalil chi txeclo eloj ta camnaj jun jix waꞌnen can jun juun tuꞌ. Yuxan chi skeꞌ yoc yopiso jun juun tuꞌ. 17Yutol jaꞌ junoj juun, cꞌamto yopiso ta iquisto mac jix waꞌnen can tuꞌ. Jato yet chi cami, jato tuꞌ chi oc yopiso. 18Yuxan, jaxca tuꞌ jix yun yu jun bꞌabꞌel wa kꞌane tuꞌ. Jaꞌ yet jix oc yopiso tuꞌ, ey chicꞌ jix eli. 19Catuꞌ jix yawte a naj Moisés masanil ẍejbꞌanil ley yabꞌ ebꞌ kichmam. Catuꞌ jix yiꞌon a niꞌan noꞌ cajin lana naj, yetoj jun skꞌabꞌ teꞌ hisopo. Catuꞌ jix slabꞌan eytoj naj xol ẍiqꞌuil noꞌ achꞌe wacax, yetoj xol ẍiqꞌuil noꞌ achꞌe chiw calan yetoj jaꞌ, catuꞌ jix xiontoj naj yibꞌan an ley, yetoj yibꞌan ebꞌ ánima tuꞌ. 20Jix lawi tuꞌ xin, catuꞌ jix yalon naj snan xol ebꞌ jaxca tiꞌ: “Jaꞌ jun chicꞌ tiꞌ, jaꞌ chi akꞌon can oc jun swa kꞌane Dios jix yakꞌ can ketoj, jun jix yal tol sowalil chi cu jije,” ẍi naj Moisés tuꞌ.#Éxodo 24:8. 21Catuꞌ jix sicꞌon pax toj chicꞌ naj Moisés yin Kꞌap Na yet Dios, cꞌal yibꞌan wan mitxꞌkꞌabꞌe chi kꞌanle yet chi oc eyilal tet Dios. 22Ian chi skeꞌ kaloni, tol jatacꞌalaꞌ yalon sleyal, tol sowalil chi sajbꞌanele masanil tzettaj yetal yetoj chicꞌ, catuꞌ cꞌam pax junoj mac chi skeꞌ yelcan spenail ta cꞌam chicꞌ chi maltoj yu spenail. 23Sowalil chi yakꞌ wan xaambꞌal tuꞌ ebꞌ yu sajbꞌanele wan tzettaj yetal tuꞌ. Tol jaꞌ wan tuꞌ, txꞌoxbꞌanile yeoc ebꞌ yu tzetyetal ey satcan. Jaꞌ tzet ey satcan tuꞌ, sowalil chi sajbꞌanele yu jun xaambꞌal yel miman yeloc apnoj tuꞌ. 24Yutol manaj yul jun templo waꞌnebꞌil yu ánima bꞌey jix octoj Cristo. Yutol jaꞌ jun tuꞌ txꞌoxbꞌanile yeoc yu jun jaꞌcaw stemplo Dios. Jaꞌ bꞌey satcan, jatuꞌ jix octoj Naj. Jaꞌ tinaniꞌ, jaꞌ sattaj Dios eyecꞌ Naj yu yaon oc cu tiꞌ Naj tet Dios. 25Jaꞌ Naj yaawil yakꞌomal xaambꞌal tet Dios, junjun cꞌal abꞌil chi octoj naj bꞌey jun lugar Asan Dios Ey Yet Xꞌojli, yu yakꞌon chicꞌ yin xaambꞌalil, manaj pax caw ẍiqꞌuil Naj jix yakꞌ yin xaambꞌalil. Jal Naj Cristo, ma cam jayeloj Naj yin xaambꞌalil jaxca wan xaambꞌal chi yakꞌ ebꞌ tuꞌ. 26Kꞌinaloj ta man asan juneloj jix yakꞌ sbꞌa Cristo yin xaambꞌalil, ecꞌal el xam chi cam yet tax cꞌal swaꞌxi yul yibꞌankꞌinal tiꞌ. Yutol jaꞌ yet jun slawubꞌal tiempo tiꞌ, asan junel jix julecꞌ Naj. Jaꞌcaw Naj jix yakꞌ cam sbꞌa yin xaambꞌalil yu yiꞌon el cu penail. 27Junjun ánima sowalil junel chi cami. Chi lawi jun tuꞌ xin, catuꞌ chi naꞌle oc yin ebꞌ. 28Jacꞌalaꞌ pax Naj Cristo, junel chꞌan akꞌbꞌil cam Naj yin xaambꞌalil, yet watxꞌ ecꞌal jon chi iꞌle el cu penail yu Naj. Jaꞌ yet oj jul yet scaelal, manxa yu oj yiꞌon el cu penail, yuxan oj juloj, tol yu scolon el mac lalan yechbꞌanen sjul Naj junelxa.

Currently Selected:

Hebreos 9: knj

Highlight

Copy