Hebreos 10

Jaꞌ Wan Xaambꞌal Jix Akꞌlei, cꞌam Chi El Cu Penail Yu

1Jaꞌ sley naj Moisés, asan txꞌoxbꞌanile yeoc yu wan tzetyetal jaꞌcaw. Yutol jaꞌ jun ley tuꞌ, cꞌam chi skeꞌ swaꞌxi oc snaꞌbꞌal ebꞌ chi yoche chi apni sattaj Dios yu wan xaambꞌal chi akꞌle junjun abꞌil tuꞌ. 2Kꞌinaloj ta chi waꞌxi oc snaꞌbꞌal ebꞌ yu wan xaambꞌal tuꞌ, cꞌamxam sowalil wanojxa xaambꞌal. Kꞌinaloj ta yel chi sajbꞌi el ebꞌ yin spenail yet chi yakꞌon xaambꞌal ebꞌ tuꞌ, manxam penawom oj ebꞌ chi yabꞌe. 3Jal xin, jaꞌ wan xaambꞌal ebꞌ tuꞌ chi akꞌon snaꞌontej spenail ebꞌ yin junjun abꞌil. 4Yutol jaꞌ ẍiqꞌuil noꞌ icham wacax tuꞌ, cꞌal yetoj ẍiqꞌuil noꞌ achꞌe chiw tuꞌ, cꞌam chi skeꞌ yiꞌon el cu penail. 5Yu jun tuꞌ, yuxan jaꞌ yet jix jul Cristo bꞌey yul yibꞌankꞌinal tiꞌ, jix yal tet cu Mam Dios jaxca tiꞌ:

Cꞌam cha woche xaambꞌal, cꞌal wan noꞌ noꞌ chi akꞌle ey jaach. Yuxan jix ja wakꞌ waꞌxoj jun jin mimanil an.

6Cꞌam chi tzala ja cꞌul yetoj wan xaambꞌal chi yakꞌ ebꞌ yu spenail.

7Yuxan jix wal ey jaach jaxca tiꞌ: “Ti ey jin an jaach Dios, yet watxꞌ chi wakꞌ ja naꞌbꞌaloj, jaxca jix yun stzꞌibꞌelecan jin kꞌaneal yul An Juun,” ẍi Cristo.#Salmos 40:6-8.

8Jaꞌ yet sbꞌabꞌelal, jaxca tiꞌ jix yute yaloni, tol cꞌam chi yoche Dios wan xaambꞌal tuꞌ, cꞌal wan noꞌ noꞌ chi akꞌle tet tuꞌ, cꞌal wan noꞌ noꞌ chi yakꞌ tzꞌaꞌ ebꞌ yu spenail tuꞌ. Caxcꞌal chi yal ley, tol chi akꞌle wan tuꞌ tet Dios, ma pax tzala scꞌul yetoj ebꞌ. 9Catuꞌ jix yalon pax Cristo tuꞌ jaxca tiꞌ: “Ti ey jin an, jaach Dios, yet watxꞌ chi wakꞌ ja naꞌbꞌaloj an,” ẍi Cristo tuꞌ. Chi yal yeloc apnoj tol jix lawi yopiso wan xaambꞌal tuꞌ. Catuꞌ jix yakꞌon junxa xaambꞌal yin sqꞌuexeloj wan tuꞌ. 10Yutol jaꞌ Jesucristo tuꞌ, yu jix yun jaxca snaꞌbꞌal Dios, yuxan chi el cu penail, yutol jaꞌcaw smimanil Naj Jesús jix yakꞌ yin xaambꞌalil yin junelne. 11Masanil ebꞌ yakꞌomal xaambꞌal ket conobꞌ tet Dios, jaxca cꞌal tiꞌ yilon yopiso ebꞌ junjun cꞌu, yet chi yakꞌon wan xaambꞌal ebꞌ tuꞌ. Jal pax wan xaambꞌal tuꞌ, cꞌam chi skeꞌ yiꞌon el cu penail. 12Jal Naj Jesucristo xin, jun chꞌan xaambꞌal jix yakꞌ yu cu penail yin junelne. Jix lawi jun tuꞌ xin, catuꞌ jix too ey chotan Naj bꞌey swatxꞌ kꞌabꞌ Dios. 13Jaꞌ tituꞌ lalan yechbꞌanen Naj masantaꞌcꞌal chi cancan ebꞌ scajat yalan yu Dios. 14Yu jun xaambꞌal jix yakꞌ Naj tuꞌ, yuxan jix cu tzꞌajna el yin junelne, yutol jix iꞌle el cu penail yu. 15Chi yakꞌ sbꞌa Santo Espíritu testigoal ey jon yin wan tiꞌ. Yutol jix yal yin sbꞌabꞌelal jaxca tiꞌ:

16Jaꞌ yet oj lawoj jun tiempoal tuꞌ. Oj jin waꞌne jun acꞌ wa kꞌane yetoj ebꞌ an. Oj waoc jin chejbꞌanil yin spixan ebꞌ an, ẍi Naj Kaawil tuꞌ yul An Juun.#Jeremías 31:33.

17Catuꞌ jix yalon pax jaxca tiꞌ:

Cꞌamxa bꞌakꞌin oj jin naꞌtej smul ebꞌ, cꞌal spenail ebꞌ an, ẍi Naj.#Jeremías 31:34.

18Yuxan, jaꞌ yet chi akꞌle lawoj cu penail yu Naj tuꞌ, cꞌamxa sowalil chi kakꞌ cu xaambꞌal yu cu penail tuꞌ. 19Yuxan, manche cu xiw koctoj, jex wuẍtaj, jex wanabꞌ bꞌey jun lugar Asan Dios Ey Yet Xꞌojli. Yutol yu ẍiqꞌuil Naj Jesucristo chi skeꞌ koctoj. 20Chi skeꞌ cu too yul jun bꞌe yet kꞌinale jix sjaj can Naj ey jon yet jix tzilchatoj jun an kꞌap. Jaꞌ jun an kꞌap tuꞌ, laan jaxca smimanil Cristo. 21Ey jun yaawil yakꞌomal cu xaambꞌal tet Dios, jaon uninale jon xa tiꞌ. 22Yuxan cu jitzwej toj cu bꞌa scꞌatan Dios tuꞌ yin masanil cu cꞌul. Kawej oc yin cu cꞌul sicꞌlebꞌil. Yutol sajbꞌanebꞌilxa cu pixan yu, yet watxꞌ cꞌamxa tzet man watxꞌoj eyoc yin cu naꞌbꞌal. Catuꞌ sajbꞌanebꞌilxa cu mimanil yetoj jun jaꞌ jaꞌ caw saj. 23Tecꞌan chi kute kaon oc jun cu cuybꞌanil tiꞌ yipoj cu cꞌul. Cꞌam ojabꞌ cu caabꞌcꞌulal, yutol jaꞌ Dios, oj yun cꞌaltaꞌ tzet jix yal can ey jon. 24Cu sey tzet chi kute kiptzelen cu bꞌa, yet watxꞌ chi chꞌibꞌ cu camcꞌulal, catuꞌ chi waꞌxi oc cu bꞌeybꞌal. 25Manche cu bꞌejcan cu yambꞌan cu bꞌa, jaxca sbꞌeybꞌal wanojxa ebꞌ. Sowalil chi kiptzelewej cu bꞌa. Kakꞌwej kip, yutol lalan kilon wan txꞌoxbꞌanile chi xꞌoxa sbꞌa tol jayebꞌxane cꞌual catuꞌ oj jul Naj Kaawil. 26Jaꞌ tinaniꞌ, kotajxa jun cuybꞌanile caw yel. Yuxan ta jacꞌalaꞌ chi el kunen tzetyetal tol kotaj tol man watxꞌoj, cꞌamxa junojxa xaambꞌal chi skeꞌ scam yu cu penail tuꞌ. 27Ta jaxca tuꞌ, asanxane jun syaꞌilal ey smey chi kechbꞌane, chi yal tuꞌ, cꞌal kꞌakꞌ kꞌakꞌ chi nilxi xaj. Smoo chi cu xiw tet. Jaꞌ jun kꞌakꞌ kꞌakꞌ tuꞌ oj akꞌon lawoj el ebꞌ cajat oc yin Dios. 28Ta ey mac cꞌam chi jijen sley Moisés, catuꞌ ta ey pax cawanoj ma oxwanoj testigo chi iloni, tol cꞌam chi sjije, tol tꞌinan cꞌal scam ebꞌ. Cꞌam mactxequel chi skeꞌ yokꞌ scꞌul yin ebꞌ. 29Jaxa tinaniꞌ, ta chi kintajne can el Naj Scꞌaal Dios, ta cꞌam yeloc apnoj ẍiqꞌuil Naj yul cu sat, ta chi kiꞌel sqꞌuixwil Yespíritu Dios chi cu camcꞌulneni, ¿jantaj to syaꞌilal oj cu chaꞌ yintaj ebꞌ ma jijen sley Moisés tuꞌ? Yutol yu ẍiqꞌuil tuꞌ, yuxan jix yakꞌ swa kꞌane Dios ketoj. Yuxan tzꞌajan jix el cu penail kibꞌan. 30Kotaj tol jaxca tiꞌ yalon can Naj Kaawil, “Jain ey walon wet waon oc syaꞌilal ebꞌ. Jain oj wakꞌ spaj tet ebꞌ an,” ẍi Naj.#Deuteronomio 32:35. Catuꞌ chi yalon pax jaxca tiꞌ: “Oj jin naꞌoc yin jin conobꞌ, jain Yaaw jin tiꞌ an,” ẍi Naj.#Deuteronomio 32:36; Salmos 135:14. 31Caw ey smey snaꞌle oc kin yu cu penail yu jun Dios iquis. 32Yuxan naꞌwejtej yet yalantoj, yet jix je chaꞌon sajkꞌinal yin je pixan yin sbꞌabꞌelal. Caw tecꞌan jix je yute je bꞌa xol syaꞌtajilal. 33Ilaꞌ tol ey jex jix jex bꞌuchlei, ey jex jix jex etnele sattaj conobꞌ. Ey jex, yet jix je yil yoc syaꞌtajilal yibꞌan ebꞌ. Jun laan jix yun je yabꞌen syaꞌilal yetoj ebꞌ. 34Caw jix okꞌ je cꞌul yin ebꞌ jix oc preso. Jix techa je yu yet jix iꞌle ecꞌ je tzettaj yetal. Jix tzala a je cꞌul yet jix je yabꞌeni, tol ey je tzettaj yetal bꞌey satcan tol txꞌojxa wal swatxꞌil tet tzet jix iꞌle ecꞌ ey jex tuꞌ. Catuꞌ cꞌam chi lawi eloj. 35Yu jun tuꞌ, yuxan tecꞌan cꞌal che yute je bꞌa, yutol oj je chaꞌ mimej spaj. 36Sowalil miman che yute je cꞌul, yet watxꞌ oj skeꞌ je yunen masanil tzet chi ẍaꞌ scꞌul Dios. Catuꞌ oj je chaꞌon tzet yalnaj can ey jex tuꞌ. 37Yutol chi yal yul An Juun jaxca tiꞌ:

Txenxane wal, catuꞌ chi jul jun mac sowalil oj juloj, cꞌam chi ecꞌ tiempo sjuli.

38Jaꞌ ebꞌ jichan chi yute sbꞌa, oj eecꞌ ebꞌ yutol chin yaoc ebꞌ yin scꞌul an. Ta chi meltzo pax ebꞌ yintaj, cꞌamxa chin tzala yetoj ebꞌ an, ẍi yul An Juun.#Habacuc 2:3, 4.

39Jal jon jaon tiꞌ, manaj jon chi cu meltzo kintaj jaxca ebꞌ chi meltzo yintaj tuꞌ, catuꞌ chi qꞌueycan el ebꞌ yin junelne. Yutol jaon tiꞌ, chi kaoc yin cu cꞌul, yuxan colchanaj jon xa.

Currently Selected:

Hebreos 10: knj

Highlight

Copy