Hebreos 11
11
Skꞌaneal Ebꞌ Jix Yaoc Scꞌul Yin Dios
1Jaꞌ yet chi kaon oc yin cu cꞌul, chi yal yeloc apnoj, tol caw chi kaoc yipoj cu cꞌul tol oj cu chaꞌ tzettaj yetal lalan kechbꞌaneni. Catuꞌ caw kotaj tol jaꞌ wan tzettaj yetal cꞌam chi kil yin tuꞌ, eyecꞌ ebꞌ. 2Jaꞌ ebꞌ kichmam, jix oc ebꞌ watxꞌil sattaj Dios yutol jix yaoc scꞌul ebꞌ yin Dios. 3Yutol chi kaoc Dios yin cu cꞌul, yuxan kotaj tzet utbꞌil jix yun swaꞌxi jun yul yibꞌankꞌinal tiꞌ yetoj masanil wan tzettaj yetal chi ecꞌ satcan. Asan tucꞌal jix yal Dios catuꞌ jix waꞌxi ebꞌ. Jaꞌ wan tzetyetal chi kil tinaniꞌ, ma yetoj wan tzettaj yetal txequel yei, jix waꞌnelei. Yetoj cꞌal pax tzettaj yetal man txequeloj jix waꞌnelei. 4Jaꞌ naj Abel tuꞌ, jix yaoc Dios naj yin scꞌul, yuxan jaꞌ xaambꞌal naj jix yakꞌ tet Dios, yel watxꞌ tet yet naj Caín. Yuxan jix yal Dios, tol watxꞌ naj Abel tuꞌ yul sat.#Génesis 4:4. Yuxan jix chaꞌle xaambꞌal naj tuꞌ. Caxcꞌal camnajxa naj Abel tuꞌ tinaniꞌ, jacꞌalaꞌ cꞌal skꞌanabꞌ naj ey jon tinaniꞌ yutol jix yaoc Dios naj yin scꞌul. 5Quey pax tuꞌ naj Enoc, jix yaoc Dios yin scꞌul, yuxan iꞌbꞌiltoj naj yu Dios yin yiquis animail. Ma xa ilchaoj, yutol iꞌbꞌiltoj naj yu Dios.#Génesis 5:22, 24. Chi yal yul An Juun, tol jaꞌ yet cꞌamto chi iꞌletoj naj, caw chi tzala Dios yetoj naj. 6Ta cꞌam chi kaoc Dios yin cu cꞌul, cꞌam chi skeꞌ stzala Dios ketoj, yutol jaꞌ mactxequel chi yoche chi sjitzoc sbꞌa scꞌatan Dios sowalil chi yaoc yin scꞌul, tol ey Dios, catuꞌ tol chi spajtze Dios tet mactxequel chi seyon ecꞌ Dios tuꞌ. 7Jaꞌ naj Noé, jix yaoc Dios naj yin scꞌul. Yuxan jaꞌ yet jix yalon Dios tuꞌ tet naj jaxca tiꞌ, tol oj jul jun cꞌamto chi il-le oc yin juneloj. Yet jix al-le tet naj tuꞌ, jix sjije naj tzet jix yal Dios tuꞌ. Jix swaꞌne jun teꞌ barco naj bꞌey chi scol sbꞌa naj yetoj ebꞌ yetbꞌi naj.#Génesis 6—9. Jaꞌ yet jix sjijen naj Noé tuꞌ tzet jix yal Dios jix xꞌoxel naj tol cꞌam chi yaoc scꞌul wanxa ánima yin Dios, yuxan jix qꞌueyle el ebꞌ yu Dios. Catuꞌ jix yalon Dios, tol watxꞌ naj Noé tuꞌ yul sat yu jix yaoc Dios naj yin scꞌul. 8Quey pax tuꞌ naj Abraham, jix yaoc Dios naj yin scꞌul. Yuxan jaꞌ yet jix awtele naj yu Dios tuꞌ, jix sjije naj. Catuꞌ jix too naj bꞌey jun lugar bꞌey yakꞌnaj can stiꞌ Dios tol oj yakꞌ tet. Caxcꞌal man yotaj oj naj bꞌey chi toocoj, jix cꞌal sbꞌejcan xꞌotxꞌal naj, catuꞌ jix too naj. 9Yu jix yaoc yin scꞌul, yuxan jix too caey ecꞌ bꞌey jun txꞌotxꞌ txꞌotxꞌ yalnaj Dios tet naj tol yet naj yeoc jun txꞌotxꞌ tuꞌ. Jix caey ecꞌ naj yul jun kꞌap na bꞌey tituꞌ.#Génesis 11:26—12:9. Quey pax tuꞌ jix yute sbꞌa naj Isaac, catuꞌ quey pax tuꞌ jix yun naj Jacob. Yutol queytuꞌ yalon Dios tet junjun ebꞌ, tol yet ebꞌ jun txꞌotxꞌ tuꞌ. 10Jaꞌ naj Abraham tuꞌ, chi yechbꞌane naj jun conobꞌ tol ey cꞌal yin tobꞌalkꞌinal. Jaꞌ Dios jix naꞌon tzet oj yun swaꞌxi jun conobꞌ tuꞌ, catuꞌ jaꞌ jix waꞌnen pax oj. 11Jaꞌ ix ixnam Sara, jix yaoc Dios ix yin scꞌul. Caxcꞌal caw ixnamil ix xa ix sicꞌlebꞌil, jix tocꞌal akꞌle yip ix yuneꞌwi. Yuxan eyto jun yuneꞌ ix jix ali.#Génesis 21:1, 2. Yutol jix yaoc ix yin scꞌul tol jaꞌ jun alnen tet ix tuꞌ chi cꞌal yun tzet chi yalaꞌ. 12Yu tuꞌ xin, caxcꞌal caw icham winajxa naj Abraham tuꞌ sicꞌlebꞌil, caw ecꞌal tocꞌal yicꞌaal naj jix eli. Jaxca sbꞌisil weycan bꞌey satcan, ma jaxca sbꞌisil yarenail stiꞌ jaꞌ mar, tol cꞌamxa chi bꞌischa ebꞌ. 13Jaꞌ junjun ebꞌ jix waltej skꞌaneal tiꞌ an, cꞌamto chi ẍaꞌ ebꞌ tzet yalnaj Dios oj yakꞌ tet ebꞌ yet jix cam ebꞌ tuꞌ. Jaxca tol jix yiltoj ebꞌ yin wan tzetyetal albꞌil tet ebꞌ tuꞌ, yuxan chi tzala ebꞌ yu. Queyton tuꞌ jix yun yaon oc sbꞌa ebꞌ yin testigoal, tol man sconobꞌoj ebꞌ jun yul yibꞌankꞌinal tiꞌ, tucꞌal ecꞌabꞌwom yeoc ebꞌ titiꞌ. 14Yutol jaꞌ ebꞌ chi alon jaxca tiꞌ, chi xꞌoxon el ebꞌ sicꞌlebꞌil, tol lalan seyon ecꞌ ebꞌ junoj conobꞌ yel cꞌal watxꞌ. 15Kꞌinaloj ta jacꞌalaꞌ snaꞌontej xꞌotxꞌal ebꞌ bꞌey jix tita, jix skeꞌ spaxtoj ebꞌ bꞌey jix tit tuꞌ. 16Jix yoche pax ebꞌ junojxa conobꞌ yel cꞌal watxꞌ, jaꞌton jun conobꞌ bꞌey satcan. Yuxan cꞌam chi qꞌuixwi Dios yalon oc sbꞌa sDiosaloj ebꞌ, yutol watxꞌ xa ye jun conobꞌ tet ebꞌ. 17Jaꞌ naj Abraham, jix yaoc Dios naj yin scꞌul, yuxan jaꞌ yet jix akꞌle porobꞌal naj yu Dios tuꞌ, jix yiꞌtoj naj Isaac yu yakꞌon yin xaambꞌalil tet Dios. Jaꞌ naj Abraham tuꞌ, tꞌinan yakꞌon jun qꞌuetxan scꞌaal naj yin xaambꞌalil. Caxcꞌal jix yal Dios tet naj jaxca tiꞌ: 18“Oj pitzcꞌu el ja wicꞌaal yu naj Isaac,” ẍi Dios tet naj. 19Jaꞌ naj Abraham tuꞌ, yotaj naj sicꞌlebꞌil tol chi cꞌal skeꞌ yu Dios spitzcꞌunele a naj Isaac tuꞌ junelxa. Yuxan chi skeꞌ kaloni jaxca tol jix pitzcꞌu a naj Isaac xol ebꞌ camnaj junelxa, catuꞌ jix akꞌle naj tet naj Abraham tuꞌ junelxa.#Génesis 22:1-16. 20Jaꞌ naj Isaac, jix yaoc Dios naj yin scꞌul. Yuxan eyojto cꞌal jix yalon can naj tzettaj swatxꞌilal tꞌinan ẍaꞌon naj Jacob yetoj naj Esaú.#Génesis 27:1—28:7. 21Jaꞌ naj Jacob tuꞌ, jix yaoc Dios naj yin scꞌul, yuxan jaꞌ yet tuxa chi cam naj tuꞌ, catuꞌ jix yalon can naj tzettaj swatxꞌilal tꞌinan oj ẍaꞌ junjun ebꞌ yuninal naj José. Jix bꞌet yakꞌ eyilal tet Dios, catuꞌ jix ey noan naj yibꞌan sjolom skꞌojoch.#Génesis 47:31. 22Jaꞌ naj José jix yaoc Dios naj yin scꞌul, yuxan jaꞌ yet tuxa chi cam naj tuꞌ, catuꞌ jix yalon can naj tol oj eltoj ebꞌ bꞌey txꞌotxꞌ Egipto tuꞌ. Catuꞌ jix yalon pax naj tol sowalil chi iꞌletoj sbꞌajil naj yet chi too ebꞌ naj tuꞌ.#Génesis 50:24-25; Éxodo 13:19; Josué 24:32. 23Jaꞌ ebꞌ smam xutx naj Moisés tuꞌ, jix yaoc Dios ebꞌ yin scꞌul, yuxan jaꞌ yet jix ali naj Moisés tuꞌ, jix ewbꞌale el naj yin oxebꞌ xꞌaaw yu ebꞌ. Yutol chi yil ebꞌ, tol caw watxꞌ yili, cꞌam chi xiw ebꞌ tet jun sley naj yaaw tuꞌ, tol chi yalaꞌ, tol chi makꞌle cam ebꞌ winaj unin chi ali.#Éxodo 1:16—2:10. 24Jaꞌ naj Moisés tuꞌ, jix ya cꞌal pax oc Dios naj yin scꞌul, yuxan jaꞌ yet icham winajxa naj, cꞌamxa chi yoche chi al-le oc yuneꞌ oj ix scutzꞌin naj yaaw bꞌey Egipto tuꞌ. 25Ma yoche jix yakꞌ tzalabꞌoj scꞌul yin tzetyetal man watxꞌoj. Yutol jaꞌ wan tuꞌ, chi qꞌueyeloj. Jix ẍaꞌ scꞌul yabꞌen syaꞌil yetoj ebꞌ sconobꞌ Dios. 26Catuꞌ jix snaꞌon pax oj, caxcꞌal chi yabꞌ syaꞌil sbꞌuchlei syaꞌiloj Cristo, watxꞌ cꞌal yet naj yintaj masanil wan sbꞌeomal jun Egipto tuꞌ, cꞌam yeloc apnoj wan tuꞌ yul sat naj. Yutol eyoc snaꞌbꞌal naj yin spajtzebꞌal oj akꞌle yu Dios. 27Jix yaoc Dios naj yin scꞌul yuxan jix el naj bꞌey Egipto tuꞌ. Ma xiw niꞌoj naj yu sjowal scꞌul naj yaaw tuꞌ. Junxane jix yute snaꞌbꞌal naj jaxca tol chi yiloc yin naj, jun mac cꞌam chi skeꞌ kilon oc yin, jaꞌton Dios.#Éxodo 21:11-22. 28Jaꞌ naj Moisés tuꞌ, yu jix yaoc Dios naj yin scꞌul, yuxan jix yal naj tet ebꞌ yet Israelal, tol chi tzicle oc ẍiqꞌuil noꞌ meꞌ yinlaj smajil stiꞌ sna ebꞌ, yet watxꞌ cꞌam chi michꞌcha oc sbꞌabꞌel yuninal ebꞌ yu jun ángel ey yopiso yin makꞌo cam ánima. Queytuꞌ jix yun sjijen naj ẍaꞌon el yich jun chi yij Pascua.#Éxodo 11:1—12:51. 29Jaꞌ ebꞌ Israel tuꞌ, jix yaoc Dios ebꞌ yin scꞌul, yuxan jix ecꞌtoj ebꞌ snan jun jaꞌ Cajin Mar jaxca chi yun yecꞌ sat tajin txꞌotxꞌ. Jaꞌ yet jix yochen ebꞌ a Egipto yecꞌtoj ebꞌ jaxca ebꞌ a Israel tuꞌ, masanil ebꞌ jix jiꞌwi yu jaꞌ.#Éxodo 13:17—14:31. 30Yu jix yaoc Dios ebꞌ yin scꞌul, yuxan jaꞌ yet jix lawi sjoyon sbꞌa ebꞌ yin jujebꞌ cꞌual yinlaj smuroal jun conobꞌ Jericó, catuꞌ jix ey wejna jun muro tuꞌ.#Josué 6:1-21. 31Jaꞌ ix Rahab, amul ix, jix yaoc Dios ix yin scꞌul, yuxan ma cam ix yetoj ebꞌ pit jix yute sbꞌa tuꞌ. Watxꞌ jix yun ẍaꞌle ebꞌ Israel yu ix, ebꞌ jix bꞌetecꞌ ilon jun conobꞌ tuꞌ.#Josué 2:1-24; 6:22, 23. 32Ecꞌal tocꞌal tzetyetal chi woche chi waltoj ey jex, cꞌamxa pax tiempo walontoj skꞌaneal naj Gedeón yetoj Barac, cꞌal Sansón, cꞌal Jefté, cꞌal David, cꞌal Samuel, yetoj cꞌal ebꞌ profeta Dios. 33Jaꞌ ebꞌ jix jin txoltej sbꞌi je yabꞌ tiꞌ an, jix yaoc Dios ebꞌ yin scꞌul, yuxan ey ebꞌ jix yakꞌ ganar wanxa nación. Jix can yalan ebꞌ yet jix yakꞌlen jowal ebꞌ yetoj. Ey ebꞌ watxꞌ cꞌal jix yute yakꞌon yaawil. Ey ebꞌ jix chaꞌon jun tzet bꞌey yakꞌnaj can stiꞌ Dios. Ey ebꞌ jix majchen stiꞌ noꞌ bꞌalam. 34Catuꞌ ey ebꞌ jix tan mimej kꞌakꞌ yu. Ey ebꞌ jix colwa yin ebꞌ yet lalan scam ebꞌ yu espada. Jaꞌ ebꞌ cꞌam taꞌ yip jix akꞌle yip ebꞌ, catuꞌ jix akꞌle pax yip ebꞌ yakꞌon jowal. Yuxan jaꞌ ebꞌ soldado jix yakꞌle jowal yetoj ebꞌ, jix cancan ebꞌ yalan yu ebꞌ. 35Ey ebꞌ ix ix yu jix yaoc Dios ebꞌ yin scꞌul, yuxan jix pitzcꞌunele a scamom ebꞌ, catuꞌ jix ẍaꞌon ebꞌ junelxa. Ey wanxa ebꞌ jix yabꞌ syaꞌil masantaꞌ jix cami, yutol ma yal scꞌul ebꞌ chi sbꞌejcan ebꞌ yaon oc scꞌul yin Dios. Jix yun jaxca tuꞌ, yet watxꞌ oj pitzcꞌu aoj. Catuꞌ oj ẍaꞌon ebꞌ jun kꞌinale txꞌojxa sakꞌalil. 36Ey wanxa ebꞌ jix yabꞌ syaꞌil sbꞌuchlei, cꞌal smakꞌlei. Catuꞌ ey ebꞌ jix pixle ey yetoj cadena catuꞌ jix oc ebꞌ yul preso. 37Ey ebꞌ tol jix kꞌojchꞌennele camoj. Ey ebꞌ tol jix cꞌuple ey snan yetoj serrucho. Ey ebꞌ caw jix akꞌle porobꞌal sicꞌlebꞌil. Ey ebꞌ jix cam yu espada. Ey ebꞌ jix ecꞌ yin ecꞌabꞌwomal, asanxane stzꞌuumal noꞌ meꞌ ma stzꞌuumal noꞌ chiw chi yaoc ebꞌ spichiloj. Jix yil mebꞌail ebꞌ, miman syaꞌilal jix el yilon ebꞌ. Jix etnele ebꞌ. 38Man smoo oj ebꞌ a yul yibꞌankꞌinal tiꞌ tol chi ecꞌ wan ánima watxꞌ tiꞌ xol ebꞌ. Caxcꞌal watxꞌ ebꞌ, ma cꞌaltaꞌ chaꞌle ecꞌ ebꞌ xol ebꞌ a yul yibꞌankꞌinal tiꞌ, yuxan sowalil jaꞌ bꞌey cusiltaj txꞌotxꞌ cꞌal tzalquiltaj bꞌey jix ecꞌ ebꞌ. Jix ecꞌ ebꞌ yul-laj nachꞌen, cꞌal bꞌey yul-laj jolan. 39Masanil ebꞌ tuꞌ, jix oc ebꞌ watxꞌil yul sat Dios yutol jix yaoc Dios ebꞌ yin scꞌul. Caxcꞌal watxꞌ ebꞌ, ma tocꞌal pax ẍaꞌ ebꞌ masanil tzet bꞌey yakꞌnaj can stiꞌ Dios tet ebꞌ. 40Yutol naꞌbꞌilxa yu Dios tol ey jun tzetyetal yel watxꞌ chi yoche chi yun ku. Chi yoche tol chi oc ebꞌ yin tzꞌajanil ketoj.
Currently Selected:
Hebreos 11: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
