Hebreos 5

1Kotaj tol junjun cꞌal yaawil yakꞌomal xaambꞌal ebꞌ Israel tet Dios, jaꞌ xol ebꞌ yet animail sicꞌbꞌil el ebꞌ. Ocnaj yopiso ebꞌ yakꞌomaloj xaambꞌal tet Dios yu spenail ebꞌ ánima. 2Laan ánima cꞌal ebꞌ yutol cꞌam pax stecꞌanil ebꞌ. Yu jun tuꞌ, yuxan chi skeꞌ yin camcꞌulalil chi yute sbꞌa tet ebꞌ cꞌam chi naꞌcha el yu, cꞌal ebꞌ chi oc yin spenail. 3Jaꞌ ebꞌ yaawil yakꞌomal xaambꞌal ebꞌ Israel tet Dios tuꞌ, ánima cꞌal ebꞌ, yuxan sowalil chi yakꞌ xaambꞌal ebꞌ yu spenail, catuꞌ chi yakꞌon pax ebꞌ xaambꞌal yu spenail ebꞌ ánima. 4Man yul oj cꞌal yet ebꞌ chi oc junoj ebꞌ yin jun mulnail tuꞌ. Asanne ebꞌ awtebꞌil oc yu Dios chi skeꞌ yoc yin jaxca yunnaj naj Aarón, yet jix awtele naj yu Dios yet peyxa tuꞌ. 5Quey pax tuꞌ Cristo, man yul oj yet jix yaoc sbꞌa yin yakꞌomaloj xaambꞌal tet Dios. Jaꞌ Dios jix alon tet jaxca tiꞌ:

Jaꞌ tinaniꞌ, jin Cꞌaal jaach an.

Jaꞌ yet jun cꞌu tiꞌ jix wakꞌ ja kꞌinal an, ẍi yul An Juun.#Salmos 2:7.

6Ey bꞌey yalnaj can yul An Juun jaxca tiꞌ:

Jaach ton tiꞌ, ey ja wopiso yin tobꞌalkꞌinal ja wakꞌon xaambꞌal ebꞌ ánima jaxca naj Melquisedec, ẍi Dios tet Naj.#Salmos 110:4.

7Jaꞌ yet eecꞌ Jesucristo bꞌey yul yibꞌankꞌinal tiꞌ, jix txali, jix skꞌanon tzettaj yetal tet Dios. Jix txali yin masanil scꞌul, masantaꞌ jix okꞌi. Yutol jaꞌ Dios chi skeꞌ scolwa yin Naj yin scamichal. Catuꞌ jix abꞌle xa Naj Cristo tuꞌ, yutol jix yiꞌey sbꞌa sattaj Dios. 8Caxcꞌal Cꞌaale yeoc yu Dios, jix cuycha cꞌal el Naj yin jijemal yu jun syaꞌilal jix ecꞌ el yibꞌan Naj tuꞌ. Yu jun tuꞌ jix oc Naj yin tzꞌajanil. 9Jaꞌ yet jix lawi wan tuꞌ xin, catuꞌ jix akꞌle yopiso Naj yakꞌon kꞌinale yin tobꞌalkꞌinal tet ebꞌ chi jijen tzet chi yalaꞌ. 10Catuꞌ jaꞌ Dios jix akꞌon yopiso Naj yin yaawil yakꞌomal xaambꞌal jaxca naj Melquisedec yet peyxa.

Caw Ey Smey Ta Chi Cu Meltzo Kintaj Junelxa

11Caw eyto tzet chi woche chi waltoj ey jex yin jun tiꞌ an, tol ian yaꞌtaj oj yun snaꞌcha el je yu, yutol lalan scawxi el je naꞌbꞌal. 12Ilaꞌ, tol peyxa tax jix je yaoc je cꞌul yin Dios. Smoo jaex xa chex cuywa tinaniꞌ, sowalil pax ey junojxa mactxequel oj jex cuyon junelxa yin wan scuybꞌanil Dios cuybꞌilxa je yu yin sbꞌabꞌelal. Caw laan jexto cꞌal jaxca junoj yaliẍ unin, chi tocꞌal txutxwi, junoj cꞌamto chi loꞌon niꞌoj tzettaj yetal caw. 13Laan wan cuybꞌanile tuꞌ jaxca lech, yuxan quey jex tuꞌ, jaxca cꞌal neneꞌ unin jexto. Jaꞌ wan cuybꞌanile chi alon ey jon, yet watxꞌ chi waꞌxi oc cu bꞌeybꞌal, cꞌam chi naꞌcha el je yu. 14Jaꞌ wan cuybꞌanile yaꞌtaj snaꞌcha eloj laan jaxca tzet chi sloꞌ icham ánima. Yuxan asanne ebꞌ chi cuyon wan tuꞌ otajneni. Yotaj xa ebꞌ tzet utbꞌil chi yun yotajne eloj, bꞌeytet watxꞌ, bꞌeytet man watxꞌoj.

Currently Selected:

Hebreos 5: knj

Highlight

Copy