Hebreos 4

1Jaꞌ yet yalnaj can Dios tol chi tocꞌal skeꞌ koctoj xew yetoj, yuxan caw chi kaoc cu naꞌbꞌal yin, yet watxꞌ cꞌam ojabꞌ junoj jon cꞌam chi cu octoj xew yetoj Dios. 2Yutol jix al-le cꞌal pax wan kꞌane yet colbꞌanile ey jon jaxca jix yun yal-le tet ebꞌ yet peyxa tuꞌ. Jal pax xin, cꞌam yopiso yu ebꞌ yet jix yabꞌen ebꞌ, yutol ma yaoc scꞌul ebꞌ yin tzet chi al-le tet ebꞌ. 3Jal jon jaon tiꞌ xin, oj cu oc xewoj, yutol jix kaoc cu cꞌul yin wan kꞌane chi al-le tuꞌ. Yalnaj can Dios yin ebꞌ yet peyxa tuꞌ jaxca tiꞌ:

Jix tit jin jowal yin ebꞌ an, catuꞌ jix walon can an, tol cꞌam bꞌakꞌin oj octoj ebꞌ xew wetoj an, ẍi Dios.#Salmos 95:11.

Jix yalon can jaxca tiꞌ, caxcꞌal lawinajxa smulnail Dios yin swaꞌnen yul yibꞌankꞌinal tiꞌ. 4Ey bꞌey chi yal An Juun Tzꞌibꞌebꞌilcanoj yin jun sjuj cꞌual. Chi yal jaxca tiꞌ:

Jix xew Dios yet sjuj cꞌual yin masanil smulnail, ẍi yul An Juun.#Génesis 2:2.

5Catuꞌ chi yalon pax jaxca tiꞌ:

Cꞌam bꞌakꞌin oj octej ebꞌ xew wetoj an, ẍi Dios yul An Juun.#Salmos 95:11.

6Jaꞌton ebꞌ bꞌabꞌel jix abꞌen wan kꞌane yet colbꞌanile tiꞌ, ma octoj ebꞌ xew yetoj Dios yutol ma yaoc scꞌul ebꞌ yin. Eyto cꞌal pax ebꞌ chi skeꞌ yoctoj xew yetoj Dios jaxca jix yun yalon can tuꞌ. 7Yutol ey jun tiempoal txequel ye can yu Dios, jaꞌton jun tiempoal tiꞌ, tinaniꞌ. Yutol peyxa yalnaj can Dios yu jun xewbꞌanile tuꞌ yet jix akꞌle yal naj David jaxca tiꞌ yul An Juun:

Jaꞌ yet jun tiempoal tiꞌ xin, ta che yabꞌ tzet chi yal Dios, man cawoj che yute je naꞌbꞌal tet Dios, ẍi naj yul An Juun.#Salmos 95:7, 8.

8Ta tol jix oc pax toj ebꞌ a Israel tuꞌ yin jun xewbꞌanile tuꞌ yu naj Josué, ma xam yalte Dios junelxa. 9Yutol ma octoj ebꞌ, yuxan ey jun cu xewbꞌanil chi yakꞌ Dios jaon yet jon xa tiꞌ, jaxca jix yun xew Dios yet sjuj scꞌual. 10Yutol jaꞌ yet oj jon xew yetoj Dios chi cu xew yin cu mulnail, jaxca jix yun xew Dios yin smulnail. 11Yuxan kakꞌwej kip koctoj bꞌey jun xewbꞌanile tuꞌ. Jaxca tuꞌ cꞌam ojabꞌ junoj jon chi kun jaxca ebꞌ ma yaoc yin scꞌul yet peyxa tuꞌ. 12Yutol jaꞌ skꞌane Dios iquis cꞌal yin tobꞌalkꞌinal, chi cꞌal skeꞌ yu masanil, laan jaxca junoj chꞌen machit eel scaabꞌ paqꞌuil. Chi skeꞌ ẍꞌele octoj masantaꞌ chi apni yin cu pixan cꞌal cu naꞌbꞌal. Chi skeꞌ yapni yin masanil cu pixan cꞌal cu naꞌbꞌal, catuꞌ chi txeclo el masanil tzettaj yetal ey tituꞌ. 13Cꞌam junoj mac chi skeꞌ yewbꞌan el sbꞌa sattaj Dios. Masanil tzettaj yetal ey, chi cꞌal yil Dios. Jaꞌ sattaj Dios tuꞌ, txequelxa yeoc masanil tzettaj yetal chi kunne, ma tzettaj yetal chi cu naꞌ.

Jaꞌ Jesús Yakꞌomaloj Cu Xaambꞌal Tet Dios

14Ey pax jun yaawil yakꞌomal cu xaambꞌal tet Dios caw miman yeloc apnoj. Jaꞌton Naj Jesús, Scꞌaal Dios. Paxnaj a Naj scꞌatan Dios. Yuxan tecꞌan cꞌal chi kute cu bꞌa yet watxꞌ cꞌam chi cu bꞌejcan tzet jix kaoc yin cu cꞌul. 15Kotaj, tol chi okꞌ scꞌul Naj Syaawil yakꞌomal cu xaambꞌal kin yutol cꞌam kip, yutol jix akꞌle porobꞌal Naj yin masanil jaxca jaon tiꞌ, cꞌam cꞌal juneloj jix oc spenail Naj. 16Yu jun tuꞌ, yuxan chi skeꞌ kapni sattaj Dios yin cꞌam xiwcꞌulal bꞌey chi xꞌoxel swatxꞌcꞌulal, yet watxꞌ chi okꞌ scꞌul Dios kin, catuꞌ chi xꞌoxon swatxꞌcꞌulal kin yet ey tzetyetal tol chi oc ku.

Currently Selected:

Hebreos 4: knj

Highlight

Copy