Génesis 44

Chꞌen Scopa Naj José

1Jix lawi tuꞌ, jix yalon naj José tet naj eyoc yilomaloj sna:

—Akꞌ no scoẍtal ebꞌ naj tiꞌ yetoj ixim tiriw, yal cꞌal jantaj chi skeꞌ yiꞌontoj ebꞌ naj, catuꞌ cha waon pax eytoj chꞌen tumin yul stiꞌ junjun scoẍtal ebꞌ naj. 2Catuꞌ cha waon eytoj jun jin chꞌen copa yetoj chꞌen tumin yul stiꞌ scoẍtal naj tzunan unin tuꞌ, jaꞌton chꞌen jix yakꞌbꞌalne naj smanon stiriw, ẍi naj. Catuꞌ jix sjijen naj yilomal mulnail tuꞌ tzet jix yal José. 3Jaꞌ yet jix sajbꞌi eloj yet jix aol yajan cꞌu yet skꞌinibꞌalil, jix chejle meltzo ebꞌ naj bꞌey sconobꞌ yetoj cꞌal noꞌ sbꞌuru ebꞌ. 4Txenne to wal chi too ebꞌ naj, catuꞌ jix yalon naj José tet naj yilomal na tuꞌ jaxca tiꞌ:

—Asiꞌ tzajan yintaj wan winaj tuꞌ, jaꞌ yet chi michꞌcha ebꞌ naj ja wu, cha walon tet ebꞌ jaxca tiꞌ: ¿Tzet yuxan pena jix je yute je pajtzen can swatxꞌcꞌulal naj chi wakꞌ servil, caw pena jix je yute je bꞌa tet naj? ¿Tzet yuxan jix je yelkꞌanetej chꞌen scopa naj, 5jun scopa naj bꞌey chi yucꞌ yal uva, chi skꞌanbꞌalne pax naj yet chi snaꞌon el junoj kꞌane? ¡Caw pena chi el je yunen jaex tiꞌ! ja chi tet ebꞌ, ẍi naj José.

6Jaꞌ yet jix michꞌcha ebꞌ naj yu naj yilomal mulnail tuꞌ, jix yalon tet ebꞌ jaxca jix yute yalon naj José tuꞌ. 7Jix takꞌwi ebꞌ naj tet naj:

—¿Tzet yuxan queytuꞌ cha wute kꞌanabꞌ ja bꞌa ey jon, jon? ¡Jaon tiꞌ jon, caw cꞌam bꞌey chi cu elkꞌanwi jaxca ja walon tuꞌ! 8Yutol jata cꞌal bꞌey Canaán jix cu meltzotej yu jul kakꞌon can chꞌen tumin eeytoj yul stiꞌ cu coẍtal jon, jix jul kakꞌon cꞌal pax chꞌen junelxa jon. ¿Tumi jato wal junoj copa tol oro xacꞌal eloj chi jul kelcꞌanetoj bꞌey sna naj cha wakꞌ servil tuꞌ? 9Ta jaꞌ jun copa tuꞌ chi ilcha el kin junoj jon ma yul cu coẍtal tiꞌ jon, watxꞌ tol chi makꞌle camoj, jaxa cu masanil jon, chi cu oc can ja chejabꞌoj, ẍi ebꞌ naj.

10Catuꞌ jix takꞌwi naj yilomal mulnail tuꞌ jaxca tiꞌ:

—Jaxca ojabꞌ tuꞌ chi yun jaxca je yalon tuꞌ, asanne naj bꞌey oj ilcha atej jun copa tuꞌ wu, jaꞌ naj chi oc can jin chejabꞌoj, jal jex je masanil chi skeꞌ je pax toj, ẍi naj.

11Yin eymanil jix yun yaon ey scoẍtal ebꞌ, catuꞌ jix sjajon stiꞌ scoẍtal ebꞌ naj. 12Jix seyon yil naj masanil yul-laj coẍtal tuꞌ; jix seyle il yet naj bꞌabꞌel winaj yin sbꞌabꞌelal, masantaꞌcꞌal jix apni oc seyon yil yet naj tzunan unin, ¡jaxa jix yunne, jaꞌ tituꞌ jix ilcha atej jun copa tuꞌ yul scoẍtal naj tzunan unin, jaꞌton naj Benjamín! 13Jaꞌ yet jix yilontej ebꞌ naj yuẍtaj José tuꞌ, jix cꞌoli stzilontoj spichil ebꞌ naj yet chi xꞌoxon el scuscꞌulal ebꞌ naj; jix lawi tuꞌ, jix yaon pax oc yijatz sbꞌuru ebꞌ naj, catuꞌ jix meltzo ebꞌ naj bꞌey conobꞌ bꞌey sna naj José. 14Eyto wal ecꞌ José tuꞌ bꞌey sna, jix apni oc naj Judá yetoj ebꞌ yuẍtaj tuꞌ, catuꞌ jix ey noan ebꞌ sattaj naj sat txꞌotxꞌ. 15Jix yalon naj tet ebꞌ naj jaxca tiꞌ:

—¿Tzet yuxan queytuꞌ che yute je bꞌa? ¿Tumi man je yotaj oj tol jaꞌ junoj winaj ey yopiso jaxca jin tiꞌ, tol chi skeꞌ snaꞌcha el junoj tzetyetal yu? ẍi naj. 16Jix takꞌwi naj Judá jaxca tiꞌ:

—¿Tzet to wal chi yun cu takꞌwi ey jaach jon, jaach yaaw? ¿Tzet to wal chi yun kalon jon ta tol watxꞌ jon? Caw jix oc cu penail yul sat Jehová, yuxan ey jon ecꞌ ja sattaj tiꞌ, chi skeꞌ chi cu oc ja chejabꞌoj yetoj naj bꞌey jix ilcha atej jun ja copa tiꞌ, ẍi naj.

17Jix yalon naj José jaxca tiꞌ:

—Cꞌamaj, asan naj bꞌey jix ilcha atej jin copa tuꞌ, asan naj chi can jin chejabꞌoj. Jal jex jaex tiꞌ xin, chi skeꞌ chex meltzo yin tzalacꞌulal bꞌey je conobꞌ, bꞌey sna je mam, ẍi José.

Jix Oc Tean Naj Judá Yu Benjamín

18Jix lawi tuꞌ, jix sjitzontoj sbꞌa Judá scꞌatan José, jix yaloni:

—Chin oc wal tean ja win jaach yaaw, toloj wal chi ẍaꞌ ja cꞌul tzet oj wal ey jaach, yuwal dios ey jaach, cꞌam ojabꞌ chi tit ja jowal win, jaxca wal tol laan ja wopiso jaxca naj rey Faraón. 19Jaach jix ja kꞌanle el ey jon ta eyto ecꞌ cu mam jon, catuꞌ ta eyto junojxa kuẍtaj jon. 20Yu jun tuꞌ xin, jix kalon ey jaach tol eyto ecꞌ cu mam jon, asan xin, caw icham winajxa naj, ey cawan scꞌaal naj jix ali yetoj yistil. Naj bꞌabꞌel unin camnajxa naj, jaxa cꞌal naj tzunan unin eyto ecꞌoj, caw icham winajxa cu mam tuꞌ jon yet jix ali jun scꞌaal tuꞌ. Yu jun tuꞌ xin, caw chi tzala naj cu mam tuꞌ yetoj naj, yutol asanxane naj ey canoj. 21Jaach jix ja walaꞌ tol chi kiꞌtej naj jon, yet watxꞌ cha wotajne el naj. 22Jix kalon ey jaach jon, tol jaꞌ naj cu mam tuꞌ jon, ian xacꞌal chi cam naj yu cuscꞌulal chi yabꞌe, ta tol chi el naj kuẍtaj tiꞌ scꞌatan naj cu mam tuꞌ jon. 23Jaach tiꞌ, jix ja wal ey jon ta tol cꞌam chi jul naj kuẍtaj tiꞌ ketoj jon, cꞌamxa chi cu jul ja cꞌatan ja waloni.

24Jaꞌ yet jix cu apni oc bꞌey cu na tuꞌ jon, jix kalon tet naj cu mam tuꞌ jon tzet jix ja walaꞌ. 25Jaꞌ cu mam tuꞌ jon, jix alon pax ey jon tol chi tit cu man pax cu tiriw tiꞌ junelxa. 26Catuꞌ jix cu takꞌwi tet naj jaxca tiꞌ: Cꞌam chi cu too jon, ta tol cꞌam chi kiꞌtoj naj kuẍtaj tzunan unin tiꞌ jon, yutol ta cꞌam chi too naj ketoj jon, cꞌam chi skeꞌ kapni oc sattaj jun naj yaaw tuꞌ, cu chi tet naj jon. 27Jix yalon naj cu mam ey jon jaxca tiꞌ jon: Je yotaj tol cawan chꞌan jin cꞌaal jix ali yetoj ix camom wistil. 28Jun naj junelne jix toocan naj, cꞌamxa bꞌey jix wil sat naj, ey mi junoj noꞌ xol-laj teꞌal noꞌ jix chiꞌon eytoj naj. 29Ta che yiꞌ pax toj junxa naj tiꞌ, ta ey pax tzet chi iꞌon junxa naj tiꞌ, je yu cꞌal wal bꞌian chin cam yu cuscꞌulal, ẍi naj ey jon.

30Yu jun tuꞌ xin, jaxca wal tol yu naj achꞌe tiꞌ yuxan iquis ecꞌ jin mam tuꞌ chi yabꞌe, ta cꞌamxa chi meltzo naj ketoj tinaniꞌ jon, 31jaꞌ naj cu mam tuꞌ jon chi cam naj ta cꞌamxa chi apni naj kuẍtaj tiꞌ ku jon. Jaon tiꞌ jon chi oc cu penail tet naj cu mam tuꞌ jon, ta chi cam naj yu cuscꞌulal yu naj kuẍtaj tiꞌ jon. 32Jain jix wal tet jin mam tol chin teyne naj wuẍtaj tiꞌ, catuꞌ jix walon pax an, ta cꞌamxa chi jul naj wu, caw wal pena chin can yul ja sat yin junelne, jin chi tet naj. 33Yu jun tuꞌ xin, chi wal ey jaach, ta chi skeꞌ xin, jain chin can sqꞌuexeloj naj wuẍtaj tiꞌ, chin oc ja chejabꞌoj, catuꞌ chi skeꞌ ja jajontoj naj yetoj ebꞌ naj wuẍtaj tuꞌ. Jain xa chin cancan sqꞌuexeloj naj an. 34Ta cꞌamaj, ¿tzet to wal chi yun jin to bꞌey sna jin mam, ta tol cꞌam chi too naj wuẍtaj tiꞌ wetoj an? Caw cꞌam chi yal jin cꞌul chi waoc jin mam tuꞌ yin cuscꞌulal, ẍi naj Judá.

Currently Selected:

Génesis 44: knj

Highlight

Copy