Génesis 43

Jix Iꞌletoj Naj Benjamín Bꞌey Txꞌotxꞌ Egipto

1Caw jow yakꞌon wail yul conobꞌ Canaán. 2Jaꞌ yet jix lawi el ixim tiriw jix bꞌet yiꞌtej ebꞌ naj bꞌey Egipto tuꞌ, jix yalon naj Jacob tet ebꞌ yuninal jaxca tiꞌ:

—Asiꞌwej junelxa bꞌey Egipto yet chi too je manontej cu tiriw chi cu loꞌ, ẍi naj.

3Catuꞌ jix takꞌwi naj Judá jaxca tiꞌ:

—Caw watxꞌ jix yute naj txonom tiriw tuꞌ yaloni: Ta tol cꞌam che yiꞌtej naj je yuẍtaj tzunan unin tuꞌ, cꞌamxa chex jin chaꞌ jul titiꞌ, ẍi naj. 4Yu jun tuꞌ xin, ta tol cha chaꞌtoj naj kuẍtaj tiꞌ ketoj jon, chi too cu man tiriw tuꞌ jon. 5Ta cꞌam cha chaꞌtoj naj xin, cꞌamxa chi cu too jon, yutol jaxca tuꞌ jix yun yalon naj txonom tiriw tuꞌ: Ta tol cꞌam che yiꞌtej naj je yuẍtaj tzunan unin tuꞌ, cꞌamxa chex jul jin sattaj tiꞌ an, ẍi naj.

6Yuxan jix yalon naj Israel jaxca tiꞌ:

—¿Tzet yuxan jix je yal tet jun naj winaj tuꞌ ta tol ey junojxa je yuẍtaj? Caw chin je yaoc yin bꞌiscꞌulal chi wabꞌe, ẍi naj.

7Jix takꞌwi ebꞌ naj jaxca tiꞌ:

—Jix skꞌanle el naj tzet keoc jon, mactxequel ey jon yuninal jon, jix skꞌanlen pax ey jon jaxca tiꞌ jon. ¿Iquis tom ecꞌ naj je mam? ¿Ey tom pax junojxa je yuẍtaj? ẍi. Yu jun tuꞌ, jix kalon tet naj jon, tol eyto ecꞌ cu mam jon. Eyto pax junxa kuẍtaj, cu chi jon. ¿Tumi wal kotaj jon xin, ta tol chi yal naj tol chi kiꞌtoj naj kuẍtaj tiꞌ jon? ẍi ebꞌ naj.

8Jix yalon pax naj Judá tet smam jaxca tiꞌ:

—Ta tol cꞌam chi yoche ja cꞌul chi cu cam yu wail cu masanil, chaꞌtoj naj kuẍtaj tiꞌ ketoj jon, ti chi cu too yin eymanil jon. 9Jain chin waoc jin bꞌa wilon naj; ta cꞌamxa chi jul naj wu, caw wal pena chin can yul ja sat. 10Ta ma ecꞌ cu tiempo titiꞌ, xax mi cu bꞌetecꞌ caeloj tinaniꞌ, ẍi naj.

11Catuꞌ jix takꞌwi naj mame tuꞌ jaxca tiꞌ:

—Cꞌamxa tzet watxꞌ chi kute, yun ojabꞌ jaxca che yal tuꞌ, asiꞌwej, iꞌwejtoj niꞌoj saꞌbꞌeal che yakꞌ tet naj. Wan saꞌbꞌeal caw watxꞌ, tol ey stool, jaꞌ che yiꞌtoj tet: Jaxca bálsamo, noꞌ yal awcabꞌ, yanil xil jolome, teꞌ mirra, nueces, cꞌal teꞌ almendro. 12Iꞌwejtoj je tumin yet che manon ixim tiriw tuꞌ, catuꞌ che yiꞌon meltzo chꞌen tumin jix yakꞌ meltzo ebꞌ naj yul-laj stiꞌ je coẍtal tuꞌ, tejan tucꞌal jix qꞌuey scꞌul ebꞌ naj. 13Iꞌwejtoj naj je yuẍtaj tiꞌ, catuꞌ chi too je yilon naj yaaw tuꞌ. 14Jaꞌ Jehová, Naj miman yeoc Yipalil, jaꞌ oj mulna oc yin snaꞌbꞌal naj, catuꞌ oj jajle el naj je yuẍtaj Simeón tuꞌ, yet watxꞌ chi yun smeltzotej naj Benjamín tiꞌ je yetoj. Jal jin jain tiꞌ xin, chin can yin cꞌam junoj jin cꞌaal chi can wetoj, ¿tzet to wal chi wute? ẍi naj Israel.

15Jix lawi tuꞌ xin, catuꞌ jix yaon eytoj saꞌbꞌeal ebꞌ naj tuꞌ yul-laj scoẍtal, cꞌal chꞌen tumin. Jix yiꞌontoj naj Benjamín ebꞌ yetoj, jix too ebꞌ naj bꞌey Egipto. Jix apni oc ebꞌ sattaj naj José, 16jix yilon naj José tol jaꞌjun naj Benjamín yetoj ebꞌ; jix yalon naj tet yilomal sna jaxca tiꞌ:

—Iꞌtoj wan ebꞌ naj tiꞌ bꞌey jin na, catuꞌ cha waloni tol chi makꞌle cam junoj noꞌ wacax, catuꞌ chi waꞌxi junoj loꞌbꞌe, tol oj low ebꞌ naj wetoj yet chuman tiꞌ, ẍi naj José tuꞌ.

17Jix lawi tuꞌ, jix iꞌletoj ebꞌ naj yu naj yilomal na tuꞌ, jix sjije naj tzet jix yal José. 18Caw jix xiwa ebꞌ naj, yutol jix iꞌletoj ebꞌ bꞌey sna naj, catuꞌ jix yal-len ebꞌ tet junjun jaxca tiꞌ:

—Caw pena jun oj tit kibꞌan tiꞌ, tejan yu chꞌen tumin jix yakꞌ meltzo ebꞌ naj ey jon, yuxan chi cu iꞌletej bꞌey sna naj tiꞌ, tejan oj cu yaoc ebꞌ naj yin ẍejabꞌoj yetoj noꞌ cu bꞌuru tiꞌ, ẍi ebꞌ naj.

19Yu jun tuꞌ xin, jaꞌ yet jix apni oc ebꞌ naj bꞌey smajil stiꞌ na tuꞌ, jix apni xacꞌal oc ebꞌ naj scawilal naj eyoc yilomaloj na yu naj José tuꞌ, 20catuꞌ jix yalon ebꞌ naj jaxca tiꞌ:

—Jaach wuẍtaj, ja wotaj jun tiꞌ, jaꞌ yet jix cu jul mano tiriw yet junel; 21jaxa yet jix cu meltzotoj jon, jix cu wey yul-laj bꞌe. Jaꞌ yet jix cu jajon stiꞌ cu coẍtal jon, jix kilon jon tol tzꞌajan yeeytoj chꞌen tumin jix kakꞌbꞌalne cu manon cu tiriw yul-laj stiꞌ cu coẍtal. Yu jun tuꞌ, jix kiꞌtej chꞌen tumin tiꞌ junelxa tinaniꞌ jon, catuꞌ chi kakꞌon can chꞌen yin tzꞌajan ey jaach.

22Txꞌoj jix kiꞌ pax tej stool ixim oj cu man tinaniꞌ jon. Man kotajoj jon, mactxequel jix aon eytoj chꞌen tumin tiꞌ yul stiꞌ cu coẍtal tuꞌ jon, ẍi ebꞌ naj.

23Jix yalon naj eyoc yilomaloj na tuꞌ tet ebꞌ naj jaxca tiꞌ:

—Cꞌam tzet che naꞌ yu jun tuꞌ, cꞌam chex xiwi. Jaꞌ sDiosal je mam cꞌal je Diosal jaex tiꞌ, jaꞌ jix aon eytoj chꞌen yul je coẍtal tuꞌ junelxa. Jain jix jin chaꞌ chꞌen je tumin jix je yakꞌ stooloj ixim tiriw jix je man tuꞌ, ẍi naj tet ebꞌ.

—Jix lawi tuꞌ xin, jix iꞌle eltej naj Simeón yul preso tuꞌ yu naj, catuꞌ jix elol naj bꞌey eyecꞌ ebꞌ yuẍtaj naj tuꞌ. 24Catuꞌ jix iꞌle octoj ebꞌ naj masanil yul sna naj José, jix yakꞌon jaꞌ naj tet ebꞌ yet chi xꞌaon el yajan ebꞌ, jix akꞌle pax sloꞌbꞌe noꞌ sbꞌuru ebꞌ naj. 25Jix lawi tuꞌ xin, jix yiꞌon xacꞌal atej saꞌbꞌeal ebꞌ naj yul-laj scoẍtal oj yakꞌ tet José yet oj apnoj oc yet chuman; yutol yotaj xa ebꞌ naj tol oj low ebꞌ yetoj.

26Jaꞌ yet jix apni oc José bꞌey sna tuꞌ, jix yakꞌon saꞌbꞌeal ebꞌ tuꞌ tet, jix ey noan ebꞌ naj sat txꞌotxꞌ sattaj José tuꞌ. 27Jix lawi tuꞌ, jix skꞌanlen José tet ebꞌ naj, ta tol tzalacꞌulal yeoc ebꞌ, jix yalon pax jaxca tiꞌ tet ebꞌ:

—¿Watxꞌ mi cꞌal scꞌul naj je mam, naj icham winaj je yalnaj ey jin? ¿Iquis tom ecꞌ naj? ẍi tet ebꞌ.

28Catuꞌ jix ey noan ebꞌ naj, jix yalon ebꞌ jaxca tiꞌ:

—Jaꞌ naj cu mam tuꞌ jon, iquisto ecꞌoj, caw watxꞌ cꞌal scꞌul naj, ẍi ebꞌ naj.

29Jaꞌ yet jix oc tꞌanan naj José yin naj Benjamín, jaꞌton naj yuẍtaj naj, junne xutx yetoj, jix yalon jaxca tiꞌ:

—¿Jam naj je yuẍtaj tzunan unin jix je yal ey jin tiꞌ? ẍi. Jaꞌton naj, ẍi ebꞌ. Yakꞌ ojabꞌ syaaxilal Jehová ja wibꞌan, ẍi José tet naj Benjamín.

30Yet jix lawi yalon José jaxca tuꞌ, caw wal jix oc pitzꞌan yin spixan yilon oc yin jun yuẍtaj tuꞌ, jix oc wal pitzꞌan yin spixan, catuꞌ jix octoj jininoj yul sna, jaꞌ tituꞌ jix okꞌ wal sicꞌlebꞌil. 31Jaꞌ yet jix lawi yokꞌi, jix xꞌaon el sat, catuꞌ jix eltej junelxa; jix yalon jaxca tiꞌ tet ebꞌ chi akꞌon servil: Iꞌwej eltej cu loꞌbꞌe tinaniꞌ, ẍi naj.

32Jun smeẍa José tuꞌ xꞌojli txꞌoj junxa meẍa bꞌey jix low ebꞌ naj yuẍtaj tuꞌ, catuꞌ txꞌoj pax junxa meẍa bꞌey chi low ebꞌ a Egipto chi low cꞌaltaꞌ yetoj José tuꞌ, yutol jaꞌ ebꞌ naj a Egipto tuꞌ ey sowalil ta junne chi low ebꞌ naj yetoj ebꞌ naj Hebreo. 33Jaꞌ ebꞌ naj yuẍtaj José tuꞌ, yin xolilal jix yun yey chotan ebꞌ yu, jatacꞌalaꞌ yabꞌilal junjun ebꞌ, naj bꞌabꞌel winaj, masantaꞌcꞌal naj tzunan unin. Caw jix qꞌueya scꞌul ebꞌ naj, catuꞌ chi yil-len oc sat junjun ebꞌ naj. 34Jaꞌ sloꞌbꞌe José eey sat smeẍa, jaꞌ jix akꞌle tet ebꞌ naj, jal pax naj Benjamín xin, joebꞌto tujan ecꞌbꞌan yet naj jix akꞌle yintaj yet wanxa ebꞌ naj tuꞌ. Jaxca tuꞌ jix yun slow ebꞌ yetoj José, cꞌal yuqꞌuen jaꞌ ebꞌ yuẍtaj tuꞌ yin tzalacꞌulal.

Currently Selected:

Génesis 43: knj

Highlight

Copy