Génesis 42

Jix Apni Oc Ebꞌ Yuẍtaj Naj José Smanon Tiriw Bꞌey Txꞌotxꞌ Egipto

1Jaꞌ yet jix yabꞌen skꞌumal naj Jacob tol jaꞌ bꞌey Egipto caw ey ixim tiriw. Yuxan jix yal naj tet ebꞌ yuninal jaxca tiꞌ: ¿Tzet che yunne, tucꞌal che yil-le oc je bꞌa? 2Jix wabꞌ skꞌumal an tol ey abꞌ ixim tiriw bꞌey Egipto. Asiꞌwej man tzet chi cu loꞌ yet watxꞌ cꞌam chi cu cam yu wail, ẍi naj Jacob tuꞌ.

3Jix lawi tuꞌ xin, catuꞌ jix too ebꞌ laonwan yuẍtaj naj José yu smanon tiriw bꞌey txꞌotxꞌ Egipto. 4Jal naj Benjamín, yuẍtaj José, ma chaꞌletoj naj yu Jacob yetoj ebꞌ yuẍtaj tuꞌ, yutol jix snaꞌ naj Jacob tala cꞌuxan ey tzet chi iꞌon naj jin cꞌaal tiꞌ, ẍi naj. 5Ecꞌal to wanxa ebꞌ ánima jix apni oc yu smanon tiriw yetoj ebꞌ naj scꞌaal naj Israel tuꞌ, yutol caw jow yakꞌon wail yul yet Canaán tuꞌ.

6Jaꞌ naj José, yaaw yeoc bꞌey Egipto tuꞌ; jaꞌton chi aon eltej ixim tiriw tet ebꞌ manwom chi apni ocoj. Jaꞌ yet jix apni oc ebꞌ naj yuẍtaj sattaj, jix ey noan ebꞌ naj sat txꞌotxꞌ tet naj. 7Yin eymanil jix yotajne el José ebꞌ yuẍtaj yet jix apni oc ebꞌ, ma yotajne el ebꞌ ta tol yuẍtaj sbꞌa yetoj ebꞌ, jow jix yute kꞌanabꞌ sbꞌa naj tet ebꞌ:

—¿Bꞌeytuꞌ jix jex titoc jaex tiꞌ? ẍi José tet ebꞌ.

—Jix cu tit bꞌey Canaán, tol chi jul cu man cu tiriw jon, ẍi ebꞌ naj.

8Jaꞌ naj José jix yotajne el ebꞌ yuẍtaj naj, jal pax ebꞌ naj xin, ma naꞌcha el yu ebꞌ. 9Catuꞌ jix snaꞌontej sweyich naj José tuꞌ ocnaj yin ebꞌ naj yet peyxa, jix yalon jaxca tiꞌ:

—Jaex tiꞌ ilwawom jex, tucꞌal chi jul je yilaꞌ, ta ey bꞌey subꞌotaj chi yun yoctej ebꞌ pena snaꞌbꞌal yin jun conobꞌ tiꞌ, ẍi naj tet ebꞌ.

10—¡Cꞌamaj jaach yaaw! tol chi jul cu man cu tiriw jon. 11Jaon tiꞌ junne cu mam jon, kuẍtaj cꞌal cu bꞌa jon, watxꞌ cꞌal cu naꞌbꞌal jon, cꞌam bꞌey chi kute cu bꞌa yin ilwawomal jon, ẍi ebꞌ naj.

12—Man yeloj che yal jaex tiꞌ, tucꞌal chi jul je yiltoj ta ey bꞌey subꞌotaj chi yun yoctej ebꞌ pena snaꞌbꞌal titiꞌ, ẍi naj José tet ebꞌ.

13Jix takꞌwi ebꞌ naj jaxca tiꞌ:

—Cꞌamaj, jaon tiꞌ tol chejbꞌil jontej, ey lacawan cu bꞌisil jon, kuẍtaj cꞌal cu bꞌa jon, junne cu mam jon, jatuꞌ caan jon bꞌey Canaán. Ey jun naj kuẍtaj tzunan unin xa jon, ey can naj yetoj naj cu mam tuꞌ jon, ey junxa naj xin, camnajxa naj, ẍi ebꞌ naj.

14Jix yalon José jaxca tiꞌ tet ebꞌ:

—Caw wal yel chi walaꞌ, tol jaex tiꞌ tucꞌal chi jul je yilecꞌoj. 15Oj yal sbꞌa tzet oj jex elocoj: Yin sbꞌi naj rey Faraón chi walon ey jex, man oj jex jajle eloj, masantaꞌ chi jul naj je yuẍtaj tzunan unin tuꞌ. 16Jaꞌ tinaniꞌ chex too junoj jex je yiꞌ naj; jal jex jaex tiꞌ, chex cancan preso titiꞌ, yet watxꞌ chi kilaꞌ ta yel che yalaꞌ. Ta tol tucꞌal che yalaꞌ, ilwawom jex chi yal tuꞌ, yin sbꞌi naj rey chi walon ey jex, ẍi naj tet ebꞌ.

17Yu jun tuꞌ xin, oxebꞌ cꞌu jix ale oc ebꞌ preso yu naj José. 18Yet yox cꞌual jix yalon José tet ebꞌ naj jaxca tiꞌ:

—Jain tiꞌ chin xiw tet Jehová; ta che jije jun chi wal ey jex tiꞌ, oj jex colcha eloj. 19Ta yel watxꞌ jex, junxane jex chex can yul preso tiꞌ, jal jaywanoj jex chex too bꞌey je conobꞌ tuꞌ, catuꞌ che yiꞌontoj ixim tiriw tiꞌ, yet watxꞌ chi low ebꞌ je yetbꞌi cꞌal ebꞌ je yuninal tuꞌ, yutol caw ey wail. 20Chi lawi tuꞌ, catuꞌ che yiꞌontej naj je yuẍtaj tzunan unin tuꞌ; catuꞌ oj wiloni ta yel che yalaꞌ. Ta tucꞌal che yal xin, sowalil oj jex camoj, ẍi naj José tet ebꞌ.

Yun ojabꞌ jaxca tuꞌ, ẍi ebꞌ naj. 21Catuꞌ jix yalon ebꞌ tet junjun jaxca tiꞌ:

—Caw wal yel pena kutenaj cu bꞌa yin naj kuẍtaj José, yet jix yilon cuscꞌulal, ma cu chaꞌwej kabꞌ tzet jix yalaꞌ, ma kiloc cu cꞌul yin yet jix yalon sbꞌa ey jon. Caw wal yu jun tuꞌ, yuxan chi kil jun syaꞌtajilal tinaniꞌ, ẍi ebꞌ naj.

22Jix yalon Rubén tet ebꞌ yuẍtaj jaxca tiꞌ:

—¿Tumi ma wal ey jex an xin, cꞌam ojabꞌ che loc je penail yin naj achꞌe tiꞌ, ma je chaꞌ pax je yabꞌ tzet jix walaꞌ? Jaꞌ tinaniꞌ chi tit kibꞌan yu scamichal naj, ẍi naj.

23Ma naꞌcha el yu ebꞌ naj, ta tol lalan yabꞌen José tzet chi yal ebꞌ, yutol jaꞌ yin stiꞌ ebꞌ a Egipto chi kꞌanabꞌi, txꞌoj mactxequel chi aon oc stiꞌ ebꞌ tet naj. 24Jix el naj José tuꞌ scꞌatan ebꞌ, catuꞌ jix michꞌcha scꞌul naj yokꞌi; catuꞌ jix meltzo pax tej junelxa, catuꞌ jix kꞌanabꞌ yetoj ebꞌ. Jix lawi tuꞌ, jix iꞌle el Simeón xol ebꞌ, sattaj ebꞌ jix kꞌal-le ey naj, catuꞌ jix toocan naj yul preso. 25Jix lawi tuꞌ, jix yalon José tol chi akꞌle no scoẍtal ebꞌ naj yu tiriw, jix akꞌle pax meltzo chꞌen stumin ebꞌ naj stool ixim tiriw tuꞌ, jix ale eytoj chꞌen yul stiꞌ scoẍtal ebꞌ naj, catuꞌ jix aletoj sloꞌbꞌe ebꞌ naj yet chi bꞌeelwi ebꞌ naj, jaxca tuꞌ jix yun yetoj ebꞌ. 26Jix lawi tuꞌ xin, jix yaon oc yijatz noꞌ sbꞌuru ebꞌ, catuꞌ jix too ebꞌ.

27Jaꞌ yet jix apni oc ebꞌ bꞌey jix can ebꞌ wey yul-laj bꞌe, ey jun naj jix sjaj stiꞌ scoẍtal, jix yiꞌatej stiriw sbꞌuru naj. Jaxa jix yiloni tol eeytoj chꞌen tumin yul stiꞌ scoẍtal tuꞌ, chꞌen jix yakꞌbꞌalne naj yet jix smanon stiriw tuꞌ. 28Jix yalon naj tet ebꞌ yuẍtaj jaxca tiꞌ:

—Ilwej ton abꞌi, jix yakꞌ meltzo chꞌen jin tumin ebꞌ naj, eeytoj chꞌen tumin tiꞌ yul stiꞌ jin coẍtal tiꞌ an, ẍi naj.

Jaꞌ yet jix yilon ebꞌ naj, caw jix qꞌueya scꞌul ebꞌ naj yiloni, catuꞌ jix bꞌilwi a masanil ebꞌ naj yu xiwcꞌulal, jix yalon ebꞌ jaxca tiꞌ:

—¿Tzet yuxan queytuꞌ chi cu yute Dios? ẍi ebꞌ naj.

29Jaꞌ yet jix apni oc ebꞌ naj yul sconobꞌ bꞌey Canaán, jix yalon ebꞌ naj tet Jacob jaꞌton smam ebꞌ, yu masanil tzet jix ecꞌ el yibꞌan ebꞌ, jix yalon ebꞌ jaxca tiꞌ:

30—Jaꞌ naj winaj eyoc yin gobernadoral bꞌey Egipto tuꞌ, caw jow jix yute kꞌanabꞌ sbꞌa naj ey jon, catuꞌ jix yalon naj tol abꞌ tucꞌal chi bꞌet kilecꞌ sconobꞌ tuꞌ yaloni. 31Catuꞌ jix kalon tet naj jon: Caw wal watxꞌ cu naꞌbꞌal jon, man penaoj cu naꞌbꞌal jon, man tucꞌal oj chi cu ecꞌ ilwal jon. 32Catuꞌ jix kalon jon tol lacawan cu bꞌeyi, junne cu mam jon; ey jun naj kuẍtaj jon camnajxa naj, jal junxa naj tzunan unin xin, ey can naj yetoj cu mam jon, cu chi tet. 33Catuꞌ jix yalon naj syaawil jun conobꞌ tuꞌ jaxca tiꞌ: Ta yel watxꞌ je naꞌbꞌal, can ojabꞌ junoj naj je yuẍtaj titiꞌ, catuꞌ che yiꞌontoj ixim tiriw tet ebꞌ je yuninal tol lalan scam yu wail tuꞌ. 34Chi lawi tuꞌ, che yiꞌontej naj je yuẍtaj tzunan unin che yal tuꞌ wil titiꞌ; queytuꞌ oj yun wotajne eloj tol watxꞌ je naꞌbꞌal. Masantaꞌcꞌal chi jul junxa naj je yuẍtaj tzunan unin tuꞌ, catuꞌ oj jin jajon el naj je yuẍtaj chi cancan preso tiꞌ; catuꞌ chi skeꞌ xacꞌal je yeqꞌui, ẍi naj, ẍi ebꞌ naj.

35Jix sjajon stiꞌ scoẍtal ebꞌ naj tuꞌ, jix yilon ebꞌ naj tol eeytoj chꞌen tumin yetoj xꞌuyal yul stiꞌ scoẍtal junjun ebꞌ naj, jaꞌton chꞌen jix yakꞌ ebꞌ naj stooloj ixim tiriw tuꞌ; jix akꞌle meltzo chꞌen junelxa tet ebꞌ naj. Caw jix xiwa ebꞌ naj, catuꞌ jix xiw pax a naj Jacob, smam ebꞌ naj tuꞌ. 36Jix lawi tuꞌ, jix yalon naj jaxca tiꞌ:

—Caw pena chin je yute chi wabꞌe. Cꞌamxa junoj jin cꞌaal chi cancan je yu. Naj José, cꞌamxa naj eyecꞌoj, naj Simeón, jix can naj preso, catuꞌ che yoche che yiꞌon pax toj naj Benjamín. Jaꞌ mactxequel chi yabꞌ syaꞌil, jain ton tiꞌ, ẍi naj Jacob.

37Catuꞌ jix yalon naj Rubén tet smam tuꞌ jaxca tiꞌ:

—Manche jaach xiw mamin, chaꞌtoj naj kuẍtaj tzunan unin tiꞌ ketoj jon, jain chi wakꞌ jin bꞌa yin naj, ta tol cꞌamxa chi meltzo naj wu, caxcꞌal cha makꞌ cam cawan jin cꞌaal tiꞌ syaꞌiloj naj, ẍi naj.

38Jix takꞌwi naj Jacob jaxca tiꞌ:

—Man oj toj naj jin cꞌaal tiꞌ je yetoj, asanxane naj eyecꞌ wetoj. Ilaꞌ jun naj je yuẍtaj xax cami, tala cꞌuxan ey pax tzet chi iꞌon junxa naj tiꞌ yul-laj bꞌe, jaex ton chi oc je penail, catuꞌ chin cam xacꞌal yu cuscꞌulal chi wabꞌe, ẍi naj.

Currently Selected:

Génesis 42: knj

Highlight

Copy