Génesis 45

Jix Yalel Sbꞌa José Tol Yuẍtaj Sbꞌa Yetoj Ebꞌ

1Caw ma xa techa yu José, yet cꞌam chi okꞌa sattaj masanil ebꞌ naj chi mulna bꞌey yul sna tuꞌ, yuxan jix yalon yin ipeal jaxca tiꞌ: Elanwejtoj je masanil titiꞌ. Cꞌamxa junoj ebꞌ naj mulnawom tuꞌ eyoctoj yet jix yalon xacꞌal el sbꞌa José tuꞌ, tol yuẍtaj sbꞌa yetoj ebꞌ.

2Catuꞌ jix okꞌa naj yin ipal sicꞌlebꞌil, masanil ebꞌ naj a Egipto jix abꞌeni. Jix apni oc skꞌaneal jun tuꞌ bꞌey yul sdespacho naj rey. 3Jix yalon José tet ebꞌ yuẍtaj tuꞌ jaxca tiꞌ:

—Jain ton José jin tiꞌ. ¿Yel mi wal iquisto ecꞌ naj cu mam tuꞌ? ẍi naj.

Caw jix xiwa ebꞌ yuẍtaj naj tuꞌ sattaj. Cꞌamxa chi skeꞌ skꞌanabꞌ ebꞌ yu xiwcꞌulal. 4Jix yalon naj José tet ebꞌ jaxca tiꞌ:

—Chi wal ey jex an, jitzwejtej je bꞌa jin cꞌatan, ẍi tet ebꞌ. Jaꞌ yet jix sjitzontoj sbꞌa ebꞌ, jix yalon tet ebꞌ jaxca tiꞌ:

—Jain ton José jin, kuẍtajwej cu bꞌa. Jain ton tiꞌ, txonbꞌil jintoj je yu tet ebꞌ naj Ismaelita, ebꞌ txonwom bꞌey Egipto tiꞌ. 5Cꞌam ojabꞌ chi tac je cꞌul, cꞌam ojabꞌ chi tit je jowal je yin junjun jex, yutol jix jin je txontoj, snaꞌbꞌal Jehová jaxca tiꞌ, tol jix jin bꞌabꞌitej je sattaj, yet watxꞌ ecꞌal ánima oj colcha el wu an. 6Caabꞌ abꞌil xa yel yich wail bꞌey yul yibꞌankꞌinal tiꞌ, joebꞌto abꞌil oj yakꞌa, yin tol cꞌam chi skeꞌ awo, caxcꞌal ey mactxequel chi yaw yawo, tutun cꞌam niꞌoj sat oj yakꞌa. 7Bꞌabꞌel jix jin chejletej yu Jehová, yet watxꞌ cꞌam chi qꞌueyel kicꞌaalwej bꞌey sat txꞌotxꞌ txꞌotxꞌ tiꞌ, yet chex jin colon el tet jun miman wail tiꞌ. 8Yu jun tuꞌ xin, jaꞌ Jehová jix jin aontej bꞌey jun conobꞌ tiꞌ, catuꞌ man jaex oj jix jin je yatej titiꞌ. Jaꞌ Jehová jix jin aon oc yin yaawilal bꞌey masanil yul yet Egipto tiꞌ, cꞌal wakꞌon naꞌbꞌale tet naj rey. 9Jaꞌ tinaniꞌ xin, meltzaanwej yin eymanil bꞌey caan naj cu mam, catuꞌ che yalon tet naj jaxca tiꞌ: Jaxca wal tiꞌ yalon naj ja cꞌaal José: Jaꞌ Jehová jix jin aon oc yin yaawil yul yet Egipto tiꞌ; yuxan titan yin eymanil, chin jul ja wil titiꞌ. 10Jaꞌ titiꞌ oj jaach caey ecꞌ bꞌey txꞌotxꞌ Gosen, yet watxꞌ cawil ey jaach ecꞌ jin cꞌatan, yetoj cꞌal masanil ebꞌ ja wuninal cꞌal ebꞌ ja witxiquin, cꞌal ja jobꞌbꞌeal noꞌ, yetoj cꞌal masanil tzet ey, ey jaach. 11Jaꞌ titiꞌ oj wakꞌ ja loꞌbꞌe, yetoj masanil ebꞌ ja wuninal cꞌal yetoj masanil mactxequel eyecꞌ ja wetoj; yutol joebꞌto abꞌil oj yakꞌ jun wail tiꞌ. Ta cꞌam chach tita, oj tit mebꞌail ja wibꞌan, cꞌal yetoj ebꞌ jaꞌjun ja wetoj je chi tet cu mam tuꞌ, ẍi naj José. 12Ti jaꞌjun naj kuẍtaj Benjamín tiꞌ je yetoj, tol jain caw chi wal wan kꞌane tiꞌ. 13Che yalwej tet cu mam tuꞌ, tol ey wopiso, yaaw weoc yul yet Egipto tiꞌ, yuxan asiꞌwej iꞌtej naj cu mam tuꞌ yin eymanil, ẍi naj José tet ebꞌ.

14Yet jix xew yalon wan kꞌane naj José tuꞌ, catuꞌ jix oc lakꞌan yin naj Benjamín, catuꞌ jix michꞌcha scꞌul yokꞌi, jacꞌalaꞌ pax Benjamín tuꞌ jix okꞌ cꞌal pax oj. 15Jix lawi tuꞌ, jix slaꞌlen sbꞌa José yetoj ebꞌ yuẍtaj, catuꞌ jix stzꞌubꞌon el stiꞌ naj José ebꞌ naj, catuꞌ jix cꞌoli yokꞌa ebꞌ, yet jun txolan tuꞌ, catuꞌ jix kꞌanabꞌ a ebꞌ tet José.

16Yin eymanil xin, jix apni oc jun kꞌane tiꞌ bꞌey sdespacho naj rey, tol yuẍtaj sbꞌa José yetoj ebꞌ naj jix apni oc tuꞌ. Caw jix tzala a naj rey yetoj masanil ebꞌ eyoc yin yaawil yetoj naj bꞌey sdespacho yet jix yabꞌen ebꞌ. 17Jix yalon naj rey tet naj José jaxca tiꞌ:

—Al tet ebꞌ naj ja wuẍtaj tuꞌ, ya ojabꞌ oc yijatz ẍe ebꞌ naj, catuꞌ chi meltzo ebꞌ naj bꞌey Canaán tuꞌ, 18chi yiꞌontej ja mam ebꞌ naj, yetoj masanil yuninal. Jaꞌ txꞌotxꞌ txꞌotxꞌ watxꞌ bꞌey Egipto tiꞌ oj wakꞌ tet ebꞌ naj, bꞌey caw watxꞌ chi yun awo, yet watxꞌ oj yakꞌ tzalabꞌoj scꞌul ebꞌ slowi. 19Al tet ebꞌ naj tol chi yiꞌtoj carreta ebꞌ titiꞌ yet watxꞌ chi skeꞌ yiꞌontej yistil ebꞌ naj, cꞌal yuninal, yetoj ja mam tuꞌ. 20Cꞌam ojabꞌ chi oc ebꞌ yin bꞌiscꞌulal, yutol jaꞌ tzet caw watxꞌ ey bꞌey Egipto tiꞌ, jaꞌ oj wakꞌ tet ebꞌ, ẍi naj rey tuꞌ tet José.

21Jix yun tzet jix yal naj rey tet ebꞌ scꞌaal naj Israel tuꞌ. Jaꞌ José jix yaontoj wan carreta tuꞌ tet ebꞌ naj, catuꞌ jix aletoj sloꞌbꞌe ebꞌ naj yet chi bꞌeelwi ebꞌ. 22Catuꞌ jix ale pax toj an acꞌ pichile tet ebꞌ, yet chi sqꞌuexon sbꞌa ebꞌ naj. Jal pax naj Benjamín xin, 300 chꞌen tumin jix akꞌle tet naj, catuꞌ jix akꞌle joebꞌ moan spichil naj. 23Catuꞌ jix yaontoj laoncꞌon noꞌ bꞌuru tet smam, caw al jix yun noꞌ yetoj masanil tzetyetal watxꞌ ey bꞌey Egipto tuꞌ, jix aletoj laoncꞌon noꞌ xutx bꞌuru, jix yijtoj tiriw noꞌ, cꞌal ixim pan jix yatoj yet chi sloꞌ naj yul-laj bꞌe yet chi tita. 24Yet jix yalon too sbꞌa ebꞌ yuẍtaj tuꞌ, catuꞌ jix yalon José:

—Cꞌam cꞌal jowal che yun yul-laj bꞌe, ẍi naj.

25Jaꞌ yet jix el ebꞌ naj bꞌey Egipto tuꞌ, jix apni oc ebꞌ bꞌey Canaán bꞌey eyecꞌ smam ebꞌ. 26Jaꞌ yet jix apni oc ebꞌ bꞌey smam tuꞌ, jix yalon ebꞌ tet, tol jaꞌ naj José tol iquis ecꞌ naj, yaaw yeoc naj yul yet masanil Egipto. Tuxa cꞌal jix qꞌueya scꞌul naj Jacob yabꞌeni, cꞌamxa chi naꞌcha yu tzet chi yute kꞌanabꞌ sbꞌa, cꞌam chi yaoc yin scꞌul yin tzet chi yal ebꞌ naj tuꞌ. 27Jaꞌ yet jix yalon ebꞌ naj masanil tzet jix yal naj José, cꞌal yet jix yilon oc naj Jacob jantaj carreta jix apni oc yu ebꞌ naj, tol jix yatoj naj José yet chi iꞌletoj naj, yu jun tuꞌ xin, caw jix tzala a scꞌul naj. 28Jix yalon naj: Kꞌojbꞌil cꞌal tol jix wabꞌe tol iquisto ecꞌ naj jin cꞌaal. Oj toj wil naj yajbꞌan cꞌamto chin cami, ẍi naj.

Currently Selected:

Génesis 45: knj

Highlight

Copy