Génesis 46

Jix Too Naj Jacob Yetoj Ebꞌ Yuninal Bꞌey Txꞌotxꞌ Egipto

1Jix lawi tuꞌ xin, jix oc bꞌeel yu naj Jacob, yetoj masanil tzet ey tet, jaꞌ yet jix apni oc naj bꞌey Beerseba, jix yakꞌ xaambꞌal tet Jehová, sDiosal Isaac, jaꞌton smam. 2Jaꞌ yet jun akꞌbꞌal tuꞌ, jix kꞌanabꞌ Jehová tet yin weyicheal, jix awtele sbꞌi yu Jehová: Jacob, ẍi Naj. Jix takꞌwi naj Jacob:

—Ti ey jin jaach jin Diosal, ẍi naj.

3Jix yalon Jehová tet jaxca tiꞌ:

—Jain ton ja Diosal yetoj ja mam, manche jaach xiw ja too bꞌey Egipto. Jaꞌ yet oj jaach caey ecꞌ tituꞌ, oj jin waꞌne junoj miman conobꞌ yin ebꞌ ja wicꞌaal. 4Oj jin toj cꞌal je yetoj bꞌey Egipto tuꞌ, jaxa yet oj aapnoj stiempoal xin, yet oj jex meltzotej junelxa bꞌey jun je txꞌotxꞌ tiꞌ, oj jin oc cꞌal je yetoj. Jaꞌ yet oj jaach cam xin, oj eecꞌal ecꞌ naj ja cꞌaal José tuꞌ ja cꞌatan, ẍi Jehová tet naj Jacob.

5Jix lawi tuꞌ xin, jix ale atoj Jacob yu ebꞌ cꞌaale tuꞌ cꞌal ebꞌ unin yetoj cꞌal yistil ebꞌ naj yul carreta jix yatej naj sreyal Egipto, jix el ebꞌ bꞌey Beerseba tuꞌ. 6Jix too ebꞌ bꞌey Egipto, catuꞌ jix yiꞌontoj smeꞌ cꞌal swacax ebꞌ, yetoj cꞌal masanil tzet jix yiꞌ ebꞌ yet jix caey ecꞌ ebꞌ bꞌey txꞌotxꞌ Canaán tuꞌ. 7Jix yiꞌontoj masanil ebꞌ scꞌaal, ebꞌ scutzꞌin cꞌal ebꞌ yitxiquin naj Jacob, jix too ebꞌ bꞌey Egipto.

8Jaꞌ sbꞌi ebꞌ yuninal cꞌal ebꞌ yitxiquin naj Jacob jix too yetoj bꞌey Egipto, jaꞌton ebꞌ tiꞌ: Rubén, naj bꞌabꞌel cꞌaale yu Jacob. 9Ebꞌ scꞌaal naj Rubén tuꞌ, jaꞌton Hanoc, Falú, Hesrón, cꞌal naj Carmí.

10Ebꞌ scꞌaal Simeón, jaꞌton Jemuel, Jamín, Óhad, Jaquín, Sóhar, cꞌal naj Saúl, yuneꞌ jun ix a Canaán.

11Ebꞌ scꞌaal Leví: Jaꞌton Guersón, Quehat cꞌal naj Merarí.

12Ebꞌ scꞌaal Judá: Jaꞌton Er, Onán, Selá, Fares, cꞌal naj Zérah. (Naj Er cꞌal naj Onán, jatuꞌ jix cam ebꞌ naj bꞌey txꞌotxꞌ Canaán). Ebꞌ scꞌaal naj Fares tuꞌ: Jaꞌton Hesrón cꞌal naj Hamul.

13Ebꞌ scꞌaal naj Isacar: Jaꞌton naj Tolá, Puvá, Job cꞌal naj Simrón.

14Ebꞌ scꞌaal naj Zabulón: Jaꞌton naj Séred, Elón, cꞌal naj Jahleel.

15Jaꞌ ebꞌ naj tiꞌ scꞌaal Jacob yetoj ix Lía, jix ali ebꞌ naj yet jix eecꞌ naj bꞌey Padán-aram, yetoj pax ix Dina scutzꞌin naj. Masanil ebꞌ tuꞌ, ey 33 ebꞌ yin masanil, eyoc ebꞌ winaj cꞌal ebꞌ ix ix sbꞌisiloj.

16Ebꞌ scꞌaal naj Gad, jaꞌton Sefón, Haguí, Esbón, Suní, Eri, Arodí, cꞌal naj Arelí. 17Ebꞌ scꞌaal Aser, jaꞌton Imná, Isvá, Isví, Beriá, cꞌal yanabꞌ ebꞌ naj chi yij Sérah. Ebꞌ scꞌaal naj Beriá, jaꞌton Héber, cꞌal naj Malquiel. 18Jaꞌton ebꞌ yicꞌaal Jacob yetoj ix Zilpá; ix yakꞌomal servil ix Lía ix tol akꞌbꞌil tet yu naj Labán. Ebꞌ yicꞌaal ebꞌ tuꞌ ey 16 ebꞌ yin masanil.

19Ebꞌ scꞌaal Jacob yetoj yistil chi yij Raquel, jaꞌton José cꞌal naj Benjamín. 20Ebꞌ scꞌaal José yetoj ix Asenat, jaꞌton Manasés yetoj naj Efraín, jatuꞌ jix ali ebꞌ bꞌey Egipto. Jal ix Asenat ix yistil tuꞌ, ix scutzꞌin jun naj chi yij Potifera, yalomal oc stiꞌ ebꞌ ánima tet sdiosal bꞌey jun conobꞌ chi yij On. 21Ebꞌ scꞌaal naj Benjamín, jaꞌton: Bela, Béquer, Asbel, Guerá, Naamán, Ehi, Ros, Mupin, Hupim, cꞌal naj Ard. 22Jaꞌton ebꞌ yuninal naj Jacob jix ali yetoj ix Raquel ey 14 ebꞌ yin masanil.

23Ebꞌ scꞌaal naj Dan, asan naj Husim. 24Ebꞌ scꞌaal naj Neftalí, jaꞌton Jahseel, Guní, Jezer, cꞌal naj Silem. 25Jaꞌton ebꞌ yuninal naj Jacob yetoj ix Bilhá, ix yakꞌomal servil ix Raquel akꞌbꞌil tet yu Labán, jaꞌton smam, ey jujwan ebꞌ yin masanil.

26Ey 66 ebꞌ yicꞌaal Jacob yin masanil, jaꞌton ebꞌ tiꞌ jaꞌjun yetoj yet jix apni oc naj bꞌey Egipto, txꞌoj pax yeoc ebꞌ ix yalibꞌ naj. 27Txꞌoj pax yeoc José yetoj cawan scꞌaal jix ali bꞌey Egipto, yuxan ey 70 sbꞌisil ebꞌ yuninal naj Jacob yin masanil yet eyxa ecꞌ naj bꞌey Egipto.

28Jix chejle bꞌabꞌoj naj Judá yu naj Jacob, yet chi too naj yal yabꞌ José, tol chi tit naj ẍaꞌ smam bꞌey Gosen. Jaꞌ yet jix apni oc naj tuꞌ xin, 29jix yalon naj José tol chi waꞌnele scarruaje yet chi too ẍaꞌon smam bꞌey Gosen tuꞌ. Jaꞌ yet jix apni oc bꞌey sattaj smam, jix oc lakꞌan yin smam tuꞌ, catuꞌ jix oc noan yokꞌ sjolom xicꞌ smam tuꞌ. 30Jix yalon smam tuꞌ tet jaxca tiꞌ:

—Jaꞌ tinaniꞌ xin, tuxa jix wiloc ja win, ilaꞌ tol iquis jaachto, chi xa skeꞌ jin cam tinaniꞌ, ẍi naj.

31Jix lawi tuꞌ xin, jix yalon José tet ebꞌ yuẍtaj, cꞌal tet masanil ebꞌ yicꞌaal naj Jacob:

—Oj toj wal tet naj rey: Masanil ebꞌ wuẍtaj cꞌal masanil ebꞌ yicꞌaal jin mam caan bꞌey Canaán, eyxa ecꞌ ebꞌ wetoj. 32Yetbꞌi oc masanil smeꞌ ebꞌ, cꞌal swacax ebꞌ, cꞌal masanil tzetyetal ebꞌ, yutol jaꞌ smulnail ebꞌ, jaꞌton jobꞌo meꞌ cꞌal wacax, jin chi. 33Jaꞌ yet oj jex awtele yu naj rey tuꞌ, catuꞌ oj skꞌanlen ey jex, tzet mulnail che yunne, 34che yaloni tol jobꞌom jex meꞌ, cꞌal wacax, asan noꞌ meꞌ chi cu jobꞌo cꞌal cu teynen noꞌ yet tax cꞌal kachꞌeal, jaꞌton smulnail ebꞌ cu mam icham jon, je chi. Yu jun tuꞌ, yuxan oj jex akꞌle can bꞌey txꞌotxꞌ Gosen tiꞌ, yutol jaꞌ ebꞌ naj a Egipto tiꞌ ey sowalil ta chi sjunbꞌanen ey sbꞌa ebꞌ naj yetoj ebꞌ jobꞌom meꞌ, ẍi naj José.

Currently Selected:

Génesis 46: knj

Highlight

Copy