Hechos 11

Jaꞌ Tzet Jix Yal Naj Pedro Tet Ebꞌ Creyente Ey Bꞌey Jerusalén

1Jix yabꞌen skꞌumal ebꞌ ẍejabꞌ Jesús cꞌal ebꞌ creyente a Judea tol ey ebꞌ man Israeloj jix yaoc scꞌul yin skꞌane Dios. 2Yuxan, jaꞌ yet jix apni Pedro bꞌey Jerusalén junelxa, catuꞌ jix al-le tet yu wan ebꞌ creyente a Israel, tol man watxꞌoj jix yute sbꞌa. 3Jix yal ebꞌ jaxca tiꞌ:

—¿Tzet yuxan jix jaach bꞌet kꞌanabꞌ yetoj ebꞌ man Israeloj, catuꞌ jix jaach low yetoj ebꞌ? ẍi ebꞌ.

4-5Catuꞌ jix yalon el naj Pedro masanil tzet jix yun tituꞌ. Jix yalon jaxca tiꞌ:

—Ey jin ecꞌ bꞌey conobꞌ Jope. Lalan jin txali yet jun cꞌual, catuꞌ jaxca weyiche jix wute wilon yeyol jun jaxca miman sábana bꞌey satcan. Eyoc spixbꞌanil scanebꞌal xiquin, catuꞌ jix eyol tꞌununoj bꞌey ey jin ecꞌ tituꞌ. 6Catuꞌ jix jin oc tꞌanan yin, yet watxꞌ chi wil tzet eyoc yul. Jaꞌ yet jix wilon an, ey wan noꞌ noꞌ canebꞌ yajan eyoc yul. Ey noꞌ ey smey. Ey labꞌa, ey pax wan noꞌ chi ecꞌ jenenoj satcan. 7Catuꞌ jix wabꞌen skꞌanabꞌ jun mactxequel, jix yalon jaxca tiꞌ: “Pedro, aan linanoj. Makꞌ cam wan noꞌ tiꞌ, catuꞌ cha chiꞌoni,” ẍi. 8Jix jin takꞌwi jaxca tiꞌ: “Cꞌamaj, Mamin, yutol cꞌamto juneloj chin loꞌ ma chin chiꞌ junoj awas ẍiꞌlei, cꞌal junoj tzetyetal cꞌam chi skeꞌ sloꞌle yu sley Moisés,” jin chi tet. 9Jix yalon eytej bꞌey satcan junelxa ey jin jaxca tiꞌ an: “Jaꞌ tzetyetal chi yal Dios tol cꞌam sleyal, manche ja wakꞌ sleyal jaach tiꞌ,” ẍi. 10Oxel jix yal jaxca tuꞌ. Catuꞌ jix iꞌle paxa jun jaxca sábana tuꞌ satcan. 11Yet xacꞌal jun txolan tuꞌ, jix apni oxwan winaj bꞌey na bꞌey ey jin ecꞌ tituꞌ. Jaꞌ oxwan winaj tuꞌ, jaꞌ bꞌey Cesarea jix tit ebꞌ, jix jin seyle ecꞌ yu ebꞌ bꞌey conobꞌ Jope. 12Jix yalon Yespíritu Dios ey jin jaxca tiꞌ an: “Asiꞌ yetoj ebꞌ. Aoc yin ja cꞌul ja too yetoj ebꞌ,” ẍi. Jix too pax wajwan kuẍtaj tiꞌ wetoj an. Yet jix cu apni jon xin, jix cu oc yul sna jun winaj. 13Jix yalon ey jon, tol jix yil jun ángel yul sna. Jix yabꞌen yalon tet jaxca tiꞌ: “Chejtoj jaywanoj winaj bꞌey conobꞌ Jope, tol chi too tit naj Simón yu ebꞌ, naj chi yij pax Pedro. 14Jaꞌ oj jul alon ey jaach, tzet oj yun ja colchai, cꞌal jantaj ebꞌ eyecꞌ ja wetoj bꞌey ja na,” ẍi jun ángel tuꞌ tet naj. 15Jaꞌ yet jix jin chaꞌon el yich jin kꞌanabꞌ snan xol ebꞌ, catuꞌ jix eyol Santo Espíritu yibꞌan ebꞌ, jaxca jix yun yeyol kibꞌan yet sbꞌabꞌelal. 16Jix jin naꞌontej tzet albꞌilcan yu Naj Kaawil tuꞌ, yet jix yalon jaxca tiꞌ: “Yel toni, jaꞌ naj Juan jix akꞌwi bautizar yetoj jaꞌ. Jal jex jaex tiꞌ, oj akꞌle Santo Espíritu ey jex, jaxca tol oj jex akꞌle bautizar yetoj,” ẍi Naj Kaawil. 17Jix yakꞌ Santo Espíritu tet ebꞌ, jaxca jix yute yakꞌon ey jon, yet jix kaon oc Naj Kaawil Jesucristo yin cu cꞌul. Yuxan, ¿tumi oj skeꞌ jin tenon oc tucan tzet chi el yunen Santo Espíritu tuꞌ? ẍi naj Pedro tet ebꞌ.

18Jaꞌ yet jix yabꞌen wan tiꞌ ebꞌ creyente a Jerusalén tuꞌ, cꞌamxa tzet jix yal ebꞌ. Asanxane tol jix yal watxꞌ kꞌane ebꞌ tet Dios. Jix yal ebꞌ jaxca tiꞌ:

—Jaꞌ ebꞌ man Israeloj, ey ebꞌ jix akꞌle snaꞌ sbꞌa scꞌul yu Dios, yet watxꞌ chi ẍaꞌ skꞌinal ebꞌ tol ey cꞌal yin tobꞌalkꞌinal ketoj, ẍi ebꞌ.

Skꞌaneal Ebꞌ Creyente A Conobꞌ Antioquía

19Jaꞌ yet jix kꞌojchꞌennele cam naj Esteban catuꞌ jix ẍaꞌon el yich yilon syaꞌil masanil ebꞌ creyente. Yuxan jix sajlemtoj ebꞌ. Ey ebꞌ jix too masantaꞌcꞌal jix apni bꞌey Fenicia, yetoj bꞌey Chipre, cꞌal bꞌey Antioquía.#11:19 Jaꞌ Antioquía tiꞌ jun miman conobꞌ eyoc yul yet Siria. Ey junxa Antioquía yul yet Pisidia. Catuꞌ jix cꞌoli yalon can el skꞌaneal yet colbꞌanile ebꞌ tet ebꞌ yet Israelal bꞌey jix apni ebꞌ. Cꞌam pax cꞌal tzet jix yal can el ebꞌ tet ebꞌ man Israeloj. 20Ey pax jaywan ebꞌ creyente a Chipre jix apni bꞌey Antioquía yetoj jaywan ebꞌ a Cirene. Jix yalon can el skꞌaneal Naj Kaawil Jesucristo ebꞌ snan xol ebꞌ man Israeloj tituꞌ. 21Jix oc Naj Kaawil yetoj ebꞌ creyente tuꞌ. Yuxan, ecꞌal ebꞌ ánima jix sqꞌuexbꞌone snaꞌbꞌal, catuꞌ jix yaon oc scꞌul ebꞌ yin Naj Kaawil.

22Jix yabꞌ skꞌumal jun tuꞌ ebꞌ creyente a Jerusalén, yuxan jix chejletoj naj Bernabé yu ebꞌ bꞌey Antioquía tuꞌ. 23Jaꞌ yet jix apni, jix yiloni, tol miman swatxꞌcꞌulal Dios jix yakꞌ yibꞌan ebꞌ. Yuxan, caw jix yiꞌ stzalacꞌulal yin ebꞌ, catuꞌ jix cꞌoli yiptzele masanil ebꞌ yu. Jix yalon tet ebꞌ, tol caw tecꞌan cꞌal chi yute sbꞌa ebꞌ, catuꞌ chi yaon cꞌal oc scꞌul ebꞌ tobꞌalkꞌinal yin Naj Kaawil. 24Queytuꞌ jix yute cuywa sbꞌa naj Bernabé tuꞌ tet ebꞌ, yutol watxꞌ snaꞌbꞌal. Caw eyoc Santo Espíritu yetoj. Caw chi yaoc scꞌul yin Cristo. Yuxan, ecꞌal ebꞌ a conobꞌ tuꞌ jix yaoc scꞌul yin Naj Kaawil yu naj.

25Catuꞌ jix too naj Bernabé tuꞌ bꞌey conobꞌ Tarso, yu stoo seyon ecꞌ naj Saulo naj tituꞌ. Yet jix ilcha yu, catuꞌ jix yiꞌontoj bꞌey conobꞌ Antioquía tuꞌ. 26Jun abꞌil jix eecꞌ ebꞌ yetoj ebꞌ creyente tituꞌ. Jix cuywa ebꞌ tet ebꞌ creyente tuꞌ. Jaꞌ bꞌey jun conobꞌ tuꞌ jix bꞌabꞌi akꞌle yij ebꞌ creyente yin Cristiano.#11:26 Cristiano chi yal yeloc apnoj “yaliẍ Cristo ebꞌ”, yutol laan sbꞌeybꞌal ebꞌ jaxca sbꞌeybꞌal Jesús. 27Jaꞌ yet jun tiempoal tuꞌ, ey jaywan ebꞌ chi yakꞌbꞌalne Dios yin yalon el skꞌane. Jaꞌ bꞌey Jerusalén jix tit ebꞌ, catuꞌ jix apni ebꞌ bꞌey Antioquía tuꞌ. 28Ey jun yetbꞌi ebꞌ chi yij Agabo. Jix a linan snan xol ebꞌ creyente tuꞌ, catuꞌ jix akꞌle yal yu Yespíritu Dios jaxca tiꞌ:

—Ey jun miman wail oj jul yibꞌan masanil yul yibꞌankꞌinal tiꞌ, ẍi naj Agabo. Jaꞌ yet jix yunen tzet jix yal naj, jaꞌ naj chi yij Claudio eyoc yaawil yet tuꞌ. 29Yuxan jix el yin scꞌul ebꞌ creyente a Antioquía scolwatoj tet ebꞌ creyente a Judea. Jatacꞌalaꞌ jantaj tzet chi skeꞌ yakꞌon junjun ebꞌ. 30Yuxan, queytuꞌ jix yute yaontoj saꞌbꞌeal ebꞌ tuꞌ tet ebꞌ anciano a Judea. Jaꞌ naj Bernabé yetoj naj Saulo jix iꞌontoj jun saꞌbꞌeal tuꞌ.

Currently Selected:

Hechos 11: knj

Highlight

Copy