Hechos 10

Jaꞌ Skꞌaneal Naj Pedro Yetoj Naj Cornelio

1Ey jun winaj bꞌey conobꞌ Cesarea chi yij Cornelio. Jaꞌ jun winaj tuꞌ, yaawil jun bꞌulan ebꞌ soldado chi yij “A Italia.” 2Caw eyoc scꞌul jun winaj tuꞌ yin Dios. Ey xiwcꞌulal tet Dios, yetoj masanil sfamilia. Miman tzet chi el saꞌon tet ebꞌ mebꞌa xol ebꞌ Israel. Caw chi yiꞌatej scꞌul xali tet Dios. 3Jaꞌ yet junel, jaxca weyiche jix yute yilon jun yángel Dios yet mi a las tres yet slawi chuman. Jix julecꞌ jun ángel bꞌey jun cuarto tuꞌ, catuꞌ jix yalon tet naj jaxca tiꞌ:

—Cornelio, ẍi jun ángel tet naj.

4Jix oc tꞌanan naj Cornelio tuꞌ yin, caw jix xiwa naj yu.

—¿Tzet ja chi, Mamin? ẍi naj tet.

Jix yalon tet jaxca tiꞌ:

—Jix yabꞌ Dios ja txa. Jix yil pax ja saꞌbꞌeal tet ebꞌ mebꞌa. Jaꞌ wan tiꞌ, ma to qꞌueycꞌulal yu Dios tuꞌ. 5Jaꞌ tinaniꞌ xin, chejtoj jaywanoj winaj bꞌey Jope, catuꞌ chi too yiꞌon naj Simón ebꞌ, naj chi yij Pedro. 6Jatuꞌ eyecꞌ naj bꞌey sna naj chi ijon pax Simón, jaꞌ naj waꞌnem tzꞌuum. Jaꞌ sna naj tuꞌ, jatuꞌ ey bꞌey stiꞌ jaꞌ mar. Jaꞌ naj Pedro tuꞌ oj jul alon ey jaach tzetyetal sowalil cha wunne, ẍi jun ángel tuꞌ tet naj Cornelio.

7Jaꞌ yet jix too jun ángel tuꞌ xin, jix yawtentej cawan ebꞌ smooso, yetoj jun soldado yakꞌomal servil. Jaꞌ jun soldado tuꞌ, asan yin Dios eyoc snaꞌbꞌal. 8Masanil cꞌal tzet jix al-le tet yu jun ángel tuꞌ, jix yal tet ebꞌ. Catuꞌ jix chejletoj ebꞌ yu bꞌey conobꞌ Jope.

9Yewial tuꞌ xin, yet chumanxa cꞌu, lalanxa yapni ebꞌ scawilal bꞌey Jope tuꞌ, catuꞌ jix atoj naj Pedro txaloj yibꞌan spananil ẍumuc#10:9 Jaꞌ wan na yet tiempo tuꞌ, panan ẍumuc ebꞌ. Ey bꞌey chi atoj ebꞌ ánima xew yibꞌan sna tuꞌ. sna naj Simón tuꞌ. 10Jaꞌ yet eyatoj naj tituꞌ, catuꞌ jix tit swail. Yajbꞌan chi waꞌxi sloꞌbꞌe tuꞌ, ey tzet jix akꞌle yil jaxca junoj weyiche. 11Jix yil jaxca tol jix jajcha spuertail satcan. Ey jun tzetyetal jaxca junoj miman sábana jix jul eytej tꞌununoj jix yil naj. Ey cꞌal oc spixil scanebꞌal xiquin, catuꞌ jix eyol bꞌey spananil ẍumuc na tuꞌ, bꞌey eyatoj naj Pedro tuꞌ. 12Jaꞌ yul jun jaxca sábana tuꞌ, eyoc masanil stujanil noꞌ noꞌ, noꞌ canebꞌ yajan, noꞌ labꞌa, cꞌal noꞌ chi ecꞌ jenenoj yetoj xicꞌ.#10:12 Ey wan noꞌ noꞌ eyoc yul sábana tuꞌ, cꞌam chi skeꞌ ẍiꞌon ebꞌ Israel, yutol jaxca tuꞌ yalon sley ebꞌ. 13Jaꞌ yet jix eyol tꞌununoj xin, jix yabꞌen Pedro tuꞌ junoj jix kꞌanabꞌ yetoj:

—Pedro, aan linanoj, makꞌ cam wan noꞌ tiꞌ, catuꞌ cha chiꞌoni, ẍi.

14Jix yalon Pedro tuꞌ jaxca tiꞌ:

—Cꞌamaj Mamin, yutol cꞌamto juneloj chin loꞌ ma chin chiꞌ junoj tzꞌiltaj yul sat ley, cꞌal junoj tzetyetal cꞌam chi skeꞌ sloꞌlei yu sley Moisés, ẍi naj Pedro.

15Yuxan jix yal junelxa jaxca tiꞌ:

—Jaꞌ tzet chi yal Dios tol saj, manche ja wal tol tzꞌil, ẍi. 16Oxel jix yabꞌ naj Pedro jun tiꞌ, catuꞌ jix iꞌle paxa jun jaxca sábana tuꞌ satcan. 17Lalanto snaꞌon Pedro tzet chi yal yeloc apnoj wan jix yil tuꞌ, catuꞌ jix apni ebꞌ ẍejabꞌ Cornelio stiꞌ na. Lalan skꞌanlen ebꞌ sna naj Simón yet chi tit cꞌal ebꞌ yul-laj bꞌe. 18Jix apni ebꞌ xin, catuꞌ jix skꞌanlen ebꞌ jaxca tiꞌ:

—¿Jam titiꞌ eyecꞌ naj Simón, naj chi yij pax Pedro? ẍi ebꞌ.

19Jacꞌalaꞌ tocꞌal jix snaꞌoꞌtanen Pedro tzet ye wan jix akꞌle yil tuꞌ, jix yalon Santo Espíritu tet jaxca tiꞌ:

—Ey oxwan winaj chach kꞌanlen ecꞌoj. 20Aan linanoj, catuꞌ chach eytoj. Asiꞌ yetoj ebꞌ. Aoc yin ja cꞌul ja too yetoj ebꞌ, yutol jain jix jin chejtej ebꞌ an, ẍi tet naj Pedro.

21Yuxan jix eytej naj, catuꞌ jix eyol bꞌey eyecꞌ ebꞌ ẍejabꞌ Cornelio tuꞌ. Catuꞌ jix yalon naj tet ebꞌ jaxca tiꞌ:

—Jain ton chin ja kꞌanle ecꞌoj. ¿Tzet ẍi je chejbꞌanil ey jin an, yuxan chex juli? ẍi naj tet ebꞌ.

22Jix yalon ebꞌ jaxca tiꞌ:

—Ey jun naj yaawil ebꞌ soldado chi yij Cornelio. Caw watxꞌ sbꞌeybꞌal naj. Chi xiw naj tet Dios. Watxꞌ naj yul sat masanil ebꞌ Israel. Ey scamcꞌulal ebꞌ yin. Ey jun yángel Dios jix alon tet naj, tol chi ẍejtoj ẍejabꞌ naj, tol chach jul iꞌletoj, catuꞌ chach too bꞌey sna, yet watxꞌ chi yabꞌ can oc tzet oj ja wal tet, ẍi ebꞌ tet Pedro tuꞌ.

23Jix iꞌle octoj ebꞌ yul na yu naj Pedro tuꞌ. Jatuꞌ jix wey ebꞌ, jaꞌ yet junxa cꞌual, jix too yetoj ebꞌ. Jix too pax jaywan creyente a Jope yetoj ebꞌ.

24Yewial to tuꞌ, jix apni ebꞌ bꞌey conobꞌ Cesarea. Echbꞌanebꞌil yapni ebꞌ yu Cornelio tuꞌ. Yamanxa ecꞌ jantaj yican, cꞌal jantaj ebꞌ yamigo. 25Jaꞌ yet jix apni Pedro tituꞌ, jix eltej naj Cornelio tuꞌ ẍaꞌoni, catuꞌ jix ey kaan sattaj naj. Jix yiꞌon ey sbꞌa tet Pedro tuꞌ. 26Jix cꞌal quetzle a linan naj, jix yalon Pedro tet jaxca tiꞌ:

—Aan linanoj, yutol ket animail cu bꞌa, ẍi Pedro tet naj.

27Jix kꞌanabꞌ ebꞌ, catuꞌ jix octoj ebꞌ yul na. Jix yilon Pedro tol ecꞌal ebꞌ yamanxa ecꞌoj. 28Catuꞌ jix yalon tet ebꞌ jaxca tiꞌ:

—Je yotaj, jaon Israel jon tiꞌ, cꞌam sleyal chi cu junbꞌane cu bꞌa yetoj junoj txꞌoj conobꞌal. Cꞌam sleyal chi cu oc yul sna. Jal pax Dios xin, jix yakꞌ wotajne el an, tol cꞌam chi skeꞌ walon an, ta ey junoj cꞌam sleyal chin yambꞌa jin bꞌa yetoj an. 29Yuxan, cꞌam tzet jix wal an, yet jix jin bꞌet je yakꞌon titoj. Jaꞌ tinaniꞌ xin, chi woche chi wabꞌ an, ¿tzet yuxan jix jin bꞌet je yakꞌ tit an? ẍi naj tet ebꞌ.

30Jix yalon naj Cornelio tuꞌ tet Pedro jaxca tiꞌ:

—Jam jaxca hora tiꞌ yet oxi, lalan jin txali yul jin na tiꞌ an, catuꞌ ey jun mac jix xꞌoxa sbꞌa ey jin an, caw chi tzejeji spichil. 31Jix yal jaxca tiꞌ ey jin an: “Cornelio, jix yabꞌ Dios ja txa, catuꞌ jix snaꞌontej wan ja saꞌbꞌeal cha wakꞌ tet ebꞌ mebꞌa. 32Jaꞌ tinaniꞌ xin, chejtoj jaywanoj winaj bꞌey conobꞌ Jope, catuꞌ chi too yiꞌon naj Simón, naj chi yij Pedro. Jatuꞌ eyecꞌ naj bꞌey sna naj chi yij pax Simón, naj waꞌnem tzꞌuum. Jaꞌ sna naj tuꞌ jatuꞌ ey bꞌey stiꞌ jaꞌ mar. /Jaꞌ naj Pedro tuꞌ, ey tzet oj jul yal ey jaach,/” ẍi ey jin an. 33Catuꞌ jix jin chejontoj ebꞌ jin chejabꞌ tuꞌ, yu jaach too seyon ecꞌoj. Yuwal dios ey jaach, jix jaach tita. Jaꞌ tinaniꞌ, ey jon ecꞌ cu masanil sattaj cu Mam Dios. Yuxan chi koche cha wal ey jon masanil tzet albꞌilcan ey jaach yu Naj Kaawil, ẍi naj tet Pedro.

Cuybꞌanile Jix Yakꞌ Pedro Bꞌey Sna Naj Cornelio

34Catuꞌ jix ẍaꞌon el yich skꞌanabꞌ naj Pedro snan xol ebꞌ jaxca tiꞌ:

—Jaꞌ tinaniꞌ, wotaj an, tol caw yel laan cꞌal yeloc apnoj masanil ánima yul sat Dios. 35Yal cꞌal mac ey Dios yul sat, caxcꞌal man Israeloj, caw chi tzala yetoj ebꞌ, ta watxꞌ tzet chi yunne. 36Jaꞌ Dios jix akꞌon can skꞌane ey jon, jaon Israel jon tiꞌ. Yalnaj can ey jon chi xa skeꞌ tol ey watxꞌcꞌulal snan cu xol yetoj Dios yu Jesucristo, Naj Kaawil cu masanil. 37Jaex tiꞌ, je yotaj xa tzet jix el yunen Dios bꞌey cu txꞌotxꞌ jaon Israel jon tiꞌ. Jaꞌ bꞌey Galilea elnaj can yich, yet jix lawi yalon el skꞌane Dios naj Juan cꞌal yet jix lawi yakꞌwi bautizar ánima naj. 38Je yotaj, tzet utbꞌil tol jaꞌ Dios, yakꞌnaj Santo Espíritu tet Jesús a Nazaret. Catuꞌ yakꞌnaj pax yipal tet. Je yotaj pax oj, tol jix colwa Naj Jesús yin ebꞌ ánima. Masanil cꞌal mac etexnaj yu diablo, jix akꞌle can waꞌxoj scꞌul ebꞌ. Jix skeꞌ yunen masanil wan tuꞌ, yutol eyoc Dios yetoj. 39Jaon tiꞌ, chi kakꞌ cu bꞌa testigoal yin wan tzet jix el yunen tuꞌ. Yin masanil tzet jix el yunen bꞌey Judea yetoj bꞌey conobꞌ Jerusalén, caw jix kilaꞌ. Yet jix lawi wan tuꞌ xin, jix tꞌunbꞌale a naj yin culus yu ebꞌ ket Israelal. Queytuꞌ jix yute cam ebꞌ. 40Jal yet yox cꞌual tuꞌ, jix pitzcꞌu a yu yipal Dios, catuꞌ jix xꞌoxa sbꞌa ey jon. 41Man pax masaniloj ánima bꞌey jix xꞌoxa sbꞌa. Asanne ey jon jix xꞌoxa sbꞌa, yutol jaꞌ tax peyxa, sicꞌbꞌil jon el yu yet chi kakꞌon cu bꞌa testigoal yin. Catuꞌ jix cu low yetoj yet jix pitzcꞌu a xol ebꞌ camnaj tuꞌ. 42Jix yal can ey jon, tol sowalil chi ecꞌ kalel skꞌaneal tet ebꞌ ánima, tzet utbꞌil tol jaꞌ Dios jix akꞌon yopiso yu snaꞌon oc yin masanil ánima, ebꞌ iquis, cꞌal ebꞌ camnaj. 43Jaꞌ yet peyxa, yin eyojto jix yalon can el skꞌaneal Jesús ebꞌ ẍejabꞌ Dios. Yalnaj can junjun ebꞌ, tol masanil cꞌal mac oj yaoc scꞌul yin, oj akꞌle can lawoj spenail ebꞌ yu Jesús, ẍi naj Pedro tet ebꞌ.

Jix Ey Can Jul Santo Espíritu Yin Ebꞌ Man Israel Oj

44Jaꞌ yet lalan skꞌanabꞌ naj Pedro tuꞌ, catuꞌ jix eyol Santo Espíritu yibꞌan masanil ebꞌ chi abꞌen tzet chi yal naj. 45Caw jix qꞌueya scꞌul ebꞌ creyente Israel eyecꞌ yetoj Pedro tuꞌ, yutol jix yakꞌ pax Santo Espíritu tet ebꞌ man Israeloj tuꞌ. 46Jix yabꞌ ebꞌ tol chi kꞌanabꞌ ebꞌ yin wan txꞌoj tiꞌeal. Catuꞌ jix yabꞌen pax ebꞌ yalon watxꞌ kꞌane ebꞌ tet Dios. 47Catuꞌ jix yalon Pedro jaxca tiꞌ:

—Jix akꞌle Santo Espíritu tet ebꞌ jaxca jix yun yakꞌle ey jon. Yuxan, ¿tumi ey mac chi skeꞌ yaloni, tol cꞌam chi skeꞌ chi yakꞌ bautizar sbꞌa ebꞌ? ẍi naj Pedro.

48Yuxan jix yal naj Pedro tol chi akꞌle bautizar ebꞌ yin sbꞌi Jesucristo. Jaꞌ yet jix akꞌle bautizar ebꞌ tuꞌ, catuꞌ jix oc tean ebꞌ yin Pedro tol chi can jayebꞌoj cꞌu yetoj ebꞌ.

Currently Selected:

Hechos 10: knj

Highlight

Copy