Sams 147
147
Singsing fo preisim Yawe hu hemi garem evri paoa
(Toktok go long olketa pipol.)
1Yumi preisim Yawe!
Hemi gud fo yumi preisim God blong yumi.
Ya, hemi barava fitim fo yumi singsing fo preisim hem.
2Yawe hemi gohed fo bildimap moa Jerusalem.
Ya, hemi gohed fo tekem kambaek olketa pipol blong yumi hu i slev long narafala kantri.
3Hemi mekem olketa hu i sore fo hapi moa,
an hemi mekem olketa soa blong olketa fo kamap gud moa.
4Hemi makem namba blong olketa sta,
an hemi givim nem long olketa evriwan.
5Ya, Masta blong yumi, hemi hae tumas an hemi garem evri paoa,
an no eniwan save makem waes blong hem.
6Yawe hemi helpem olketa hu pipol i mekem olketa safa fo spoelem laef blong olketa,
bat hemi spoelem finis olketa nogud pipol.
7Yumi mas singsing fo preisim Yawe.
Ya, yumi mas singsing wetem olketa gita fo mekhae long God blong yumi.
8Hemi mekem olketa klaod fo stap long skae,
hemi givim kam ren long graon,
an hemi mekem olketa gras fo grou long olketa hil.
9Hemi givim kaikai long olketa animol,
an hemi fidim olketa pikinini blong bed, taem olketa hanggre an krae fo kaikai.
10Yawe hemi no hapi long olketa hu i dipen long olketa strongfala hos,
an trastem olketa soldia fo gadem olketa.
11Bat hemi barava hapi long olketa pipol hu i tinghae long hem,
an olketa hu i trastem hem bikos hemi tinghevi long olketa olowe.
12Yumi olketa pipol blong Jerusalem wea narafala nem blong hem nao Saeon, yumi mas preisim Yawe.
Ya, yumi olketa pipol blong Saeon yumi mas preisim God blong yumi.
13Hemi mekem olketa doa long wolston long Jerusalem fo hemi strong,
an hemi gohed fo blesim yumi evriwan.
14Hemi mekem yumi fo stap gudfala insaet long kantri blong yumi,
an hemi givim olketa barava gudfala kaikai long yumi fo mekem yumi hapi.
15Taem hemi tok nomoa long disfala wol ya, wanem hemi talem hemi hapen nao.
16Long taem blong tukol, hemi mekem diu fo kamap olsem aes long graon,
an hemi mekem snou fo kavaremap olketa ples olsem blangket.
17Hemi mekem ston long aes fo foldaon kam olsem bikfala ren.
?Hu nao hemi fitim fo stanap strong taem wea hemi mekem tukol fogud?
18Taem hemi tok nomoa, olketa aes i kamap wata nao,
an taem hemi mekem win fo blou, aes ya hemi stat fo ran moa olsem wata.
19Yawe hemi talemaot olketa toktok blong hem an olketa lo blong hem fo tisim yumi olketa pipol long Israel.
20Hemi no duim samting ya fo olketa pipol long olketa narafala kantri,
bikos olketa no save long olketa gudfala tising blong hem.
!Yumi preisim Yawe!
Currently Selected:
Sams 147: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
