Sams 146
146
Singsing fo preisim Yawe hu hemi sevem yumi
(Singsing ya i go long olketa pipol.)
1!Yumi preisim Yawe!
!Mi laekem tumas fo preisim hem!
2Oltaem long laef blong mi, bae mi gohed fo preisim Yawe.
Hemi God blong mi, an oltaem bae mi gohed fo singsing fo preisim hem.
3Yufala mas no trastem olketa lida blong wol ya.
Ya, yufala mas no dipen long eni man,
bikos olketa ya i no save sevem yufala.
4Taem olketa ya i dae, olketa gobaek moa long graon,
an evri plan blong olketa hemi nating save kamap nao.
5-6Yawe hemi God blong Jekob.
Hemi mekem skae, an graon, an solwata, wetem evrisamting wea i stap long trifala ples ya.
An man wea hemi tingting strong long hem,
bae hemi hapi, bikos Yawe hemi gohed olowe fo kipim olketa promis blong hem.
7Taem Yawe hemi mekem kot,
hemi gohed fo helpem olketa wea pipol i spoelem olketa.
An oltaem hemi gohed fo givim kaikai long olketa wea i hanggre.
An Yawe hemi gohed fo mekem olketa man wea i stap long prisin fo gofri.
8Yawe hemi gohed fo openem ae blong olketa blaen pipol.
An oltaem hemi gohed fo liftimap olketa wea laef blong olketa i barava godaon.
An hemi gohed fo lavem olketa pipol wea wei blong olketa hemi stret.
9Hemi gohed fo lukaftarem olketa strensa wea i stap long ples blong yumi,
an hemi gohed fo helpem olketa wido an long olketa pikinini wea dadi blong olketa hemi dae finis.
Bat hemi gohed fo spoelem olketa plan blong olketa nogud pipol.
10Yawe, hemi King olowe.
Yumi olketa pipol long Saeon,
rul blong God blong yumi ya bae hemi no save finis.
!Yumi preisim Yawe!
Currently Selected:
Sams 146: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
