Provebs 29
29
1Man hemi gohed fo bikhed nomata olketa tokstrong long hem plande taem,
seknomoa, bae hem bagarap, an no enisamting save sevem hem.
2Taem olketa stretfala man i holem paoa, pipol i hapi tumas.
Taem olketa ravis man i holem paoa, pipol i krae tumas.
3Man laekem waes tingting, dadi blong hem i hapi.
Man laekem olketa jiukong, evrisamting blong hem i lus.
4Taem bikman falom stretfala wei, kantri blong hem bae stanap strong.
Taem bikman laek fo tekem nila, kantri blong hem bae foldaon.
5Man os-os long eniwan,
hem mekem net fo kasem hem seleva.
6Sin blong ravis man hemi holem hem taet olsem wanfala trap,
bat stretfala man i fri an save singsing.
7Stretfala pipol i wari long raet blong pua pipol,
bat ravis man hemi no save long disfala raet.
8Man fo tokspoelem nara man hemi mekem taon fo bone,
bat waes man save aotem faea blong raoa.
9Sapos waes man hemi tekem krangge man go long kot,
hem no save stap kuaet bikos krangge man bae tokdaonem hem an toksuea long hem.
10Olketa hu laek fo faet i heitem eni gudfala man,
an trae fo kilim olketa stretfala pipol.#29:10 Long Hibru Baebol, mining blong disfala ves hemi no klia.
11Krangge man barava somaot kros blong hem,
bat waes man hemi kontrolem kros blong hem.
12Taem bikman lisin long laea,
evri wakaman long gavman blong hem bae kamap nogud.
13Nomata puaman o man hu i spoelem puaman, tufala semsem nomoa.
Yawe mekem tufala evriwan fo lukluk.
14Taem bikman jajem pua pipol long stretfala wei,
bae hemi save lidim pipol olowe.
15Panisim pikinini fo mekem hem waes.
Pikinini wea no eniwan i stretem hem,
bae hemi meksem long mami blong hem.
16Taem olketa ravis man kamap strong,
olketa ravis wei i kamap strong,
bat stretfala pipol bae lukim olketa foldaon.
17Stretem pikinini blong yu,
bae yu stap gud, an bae hemi mekem yu hapi.
18No falom toktok blong Yawe, pipol bae mektrabol.
Falom lo long Yawe, pipol bae hapi.
19Nomata wakaman blong yu hemi smat,
toktok nomoa no save stretem hem.
20Sapos yu lukim man hu hemi toktok kuiktaem nomoa,
oraet, krangge man hemi garem moa sans fo kasem save winim kaen man ya.
21Sapos yu kaen tumas long wakaman blong yu,
bae hemi mekem yu krae.#29:21 Long Hibru Baebol, mining blong disfala ves hemi no klia.
22Man fo kros, hemi statem raoa,
wei blong hem, sin olowe.
23Pipol tinghae long hambol man,
praod man bae hemi sem fogud.
24Yu helpem nara man fo stil, yu heitem yu seleva,
bikos taem yu long kot yu no save toktru so trabol bae kasem yu.
25Fraetem man, bae yu trabol.
Trastem Yawe, bae yu sef.
26Plande man laek toktok long sif,
bat Yawe nomoa save mekem man garem raet blong hem.
27Stretfala pipol i les long ravis pipol.
Ravis pipol i les long stretfala pipol.
Currently Selected:
Provebs 29: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.