Provebs 28
28
1Ravis pipol save ranawe nomata no eniwan aftarem olketa.
Bat stretfala pipol i gohed strong olsem laeon.
2Taem pipol blong wanfala kantri i faetem olketa seleva, hemi garem staka bikman,
bat waes man hu hemi save gud, hemi save stretem.
3Bikman hu hemi mekful long puaman,
hemi olsem saekloun wea i spoelem gaden.
4Olketa hu i les long lo i tokhapi long ravis man,
bat olketa hu i hapi long lo i les long ravis man.
5Olketa man nogud i nating save jaj long stretfala wei,
bat olketa hu tinghae long Yawe i savegud long hem.
6Puaman hu hemi falom stretfala wei,
hemi moabeta winim risman hu hemi falom ravis wei.
7Yanga hu hemi obeim lo hemi garem save,
bat fren blong olketa man nogud hemi meksem long dadi blong hem.
8Yu kamap ris from ravis wei wea yu mekem olketa peim bikfala intres long kaon,
bae yu lusim seleni go long nara man hu save givim go long pua pipol
9Sapos yu les fo herem lo,
Yawe bae les fo herem prea blong yu.
10Yu lidim stretfala man long wei nogud, bae yu kasem trap wea yu mekem.
Bat man hemi barava gud tumas, bae hemi kasem gudfala samting.
11Risman hemi tingse hemi waes,
bat puaman hu hemi save, hemi luksave long risman ya.
12Taem olketa stretfala man i holem paoa, pipol i hapi tumas.
Bat taem olketa man nogud i kasem paoa, pipol i haed.
13Yu haedem sin blong yu, laef blong yu bae nogud.
Bat yu talemaot sin blong yu an lusim hem, God bae kaen long yu.
14Tinghae long Yawe olowe, bae yu save hapi.
Bat sapos yu bikhed, bae yu kasem trabol.
15Ravis bikman hu hemi bos ovarem pua pipol,
hemi olsem laeon wea hemi hanggre tumas, o wael pikpik wea hemi ronem man.
16Bikman hu hemi no garem save, hemi mekful long pipol.
Bat bikman hu hemi les fo ravem eniwan, hemi garem longfala laef.
17Yu no helpem man hu hemi fit fo panis bikos hem bin kilim man dae,
bae hemi no save stap kuaet go kasem taem hemi dae.
18Man falom stretfala wei, bae hemi stap gud.
Bat man falom ravis wei, bae hemi foldaon.
19Man waka long gaden, bae garem plande kaikai.
Bat man waka long drim, bae garem plande trabol.
20Man yu save trastem, bae hemi hapi fogud.
Bat man faetem dola nomoa, bae hemi panis.
21Hemi no stret fo jaj hemi saetem wanfala man long kot,
bat lelebet kaikai nomoa hemi save grisim samfala jaj.
22Man holetaet long olketa samting blong hem an faetem dola nomoa,
hem no save dat seknomoa bae hemi pua tumas.
23Tokstrong long man fo stretem hem, an bae hemi barava tinghae long yu.
Talem suit toktok long hem nomoa, an hemi no tinghae long yu.
24Man hemi tingse hemi stret fo ravem dadi an mami blong hem,
hemi fren wetem olketa hu i kilim man dae.
25Man hemi gridi tumas hemi mekem raoa kamap.
Bat man hemi trastem Yawe hemi mekem gudfala laef kamap.
26Man trastem tingting blong hem seleva, hemi krangge.
Bat man trastem waes tingting, hemi stap sef.
27Yu helpem olketa pua pipol, bae yu no save sot long enisamting.
Bat sapos yu no tingabaotem olketa ya, bae evriwan tokspoelem yu.
28Taem olketa ravis pipol i kasem paoa, pipol i haed.
Bat taem ravis pipol i lus, stretfala pipol kasem paoa.
Currently Selected:
Provebs 28: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.