Provebs 27
27
1Nogud yu tokpraod long samting wea bae yu duim tumoro,
yu no save wanem bae kamap.#Jemes 4:13-16.
2No tokpraod long yu seleva,
moabeta nara man tokhae long yu.
3Olketa ston an sanbis i hevi tumas,
trabol wea krangge man mekem i hevi moa.
4Man hemi kros, save spoelem samting,
bat man hemi joles, hemi barava spoelem evrisamting.
5Moabeta fo talemaot rong blong man,
winim yu no somaot lav long hem.
6Yu save trastem fren hu hemi stretem yu,
bat keakea long enemi hu hemi trae fo suit long yu.
7Yu kaikai tumas, bae yu les long wanem hemi suit.
Yu hanggre tumas, bae yu laekem wanem hemi saoa.
8Man hemi stap farawe long hom,
hemi olsem bed wea hemi lusim ples blong hem.
9Insens an naesfala oel save mekem yu hapi,
bat fren hemi save mekem yu hapi moa.
10Yu no fogetem fren blong famili blong yu.
Taem trabol hemi kam, no go long wantok.
Neiba blong yu hemi moabeta winim wantok hu hemi stap farawe.
11Pikinini blong mi, sapos yu kamap waes, bae mi hapi,
an bae mi save ansarem eniwan hu hemi tokspoelem mi.
12Man garem save, hemi lukim trabol, hem go long sef ples.
Man no garem save, hem gohed long trabol, an hemi safa.
13Sapos man hemi promis fo peim kaon blong strensa,
yu holem kaleko blong hem taem man no sensim kaon.
14Yu singaotem wanfala naes toktok long neiba long eli moning,
bae hemi tingim yu tokspoelem hem.
15Waef wea hemi raoa, hemi olsem lelebet ren i kamtru long ruf.
16Fo stopem hem, hemi olsem yu stopem win, o yu holem oel long han.
17Fael sapanem naef.
Man sapanem tingting blong nara man.
18Lukaftarem frut tri, bae yu kaikaim frut.
Lukaftarem masta blong yu, bae yu kasem biknem.
19Olsem fes blong man long pul,
tingting blong man bae som hem aot.
20Man hu hemi gridi fo enikaen samting,
hemi olsem ples blong olketa man wea i dae, hemi no save fulap.
21Man save testem gol an silva long faea.
Olketa save testem man long wei wea hemi tokhae.
22Nomata yu barava panisim krangge man tumas,
yu no save aotem krangge wei blong hem.
23Barava lukaotem olketa sipsip an buluka blong yu,
24bikos olketa save mekem yu risman,
bat risis an biknem no save stap olowe.
25Evri yia, yu mas katem gras wea hemi grou gud long fil fo mekem olketa animol i kaikaim long hadtaem.
26Den olketa sipsip save grou gud an givim olketa hea fo yu wakem kaleko.
An bae yu save salem olketa nanigot fo garem plande seleni.
27An bae olketa nanigot save givim plande milk fitim famili blong yu an wakamere blong yu tu.
Currently Selected:
Provebs 27: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
