Provebs 30
30
Waes toktok blong Agua
1Hem nao waes toktok blong Agua, san blong Jake, wea hemi talemaot long Itiel an Ukal.
2Mi krangge tumas winim evriwan.
Mi no garem eni gudfala save.
3Mi no lanem eni waes tingting.
Mi no save long God hu hemi tambu tumas.
4?Hu nao hemi bin go antap long heven, an kamdaon moa?
?Hu nao bin holem win long han blong hem?
?Hu nao bin karim dipsi long kaleko blong hem?
?Hu nao bin makem en blong wol?
?Waswe, yu save long nem blong hem, o nem blong pikinini blong hem?
Yu mekem mi save.
5Evri toktok blong God i barava tru.
Hemi gadem olketa hu i kam long hem fo faendem sefples.
6Yu no sensim toktok blong hem,
nogud hemi tokstrong long yu an som dat yu laea.
Olketa narafala waes toktok
7Lod Yawe, mi laek askem tufala samting long yu.
Mekem tufala long mi taem mi laef.
8Fas samting, mekem mi no save laea.
Mektu samting, mekem wea mi no pua tumas o ris tumas.
Jes mekem mi fo garem inaf kaikai evri de.
9Nogud mi ris tumas an fogetem Yawe.
Nogud mi pua tumas an mi stilim samting an meksem long nem blong God blong mi.
10Yu no tok agensim wakaman blong nara man,
nogud hemi tok fo mekem trabol kam long yu an hemi spoelem yu.
11Samfala man tokspoelem dadi an mami blong olketa.
12Samfala man tingse olketa stret,
bat wei blong olketa i nogud tumas.
13Samfala man i praod tumas,
olketa tingdaonem evriwan.
14Samfala man i olsem wael animol,
olketa laekem tumas fo mekful long pua pipol,
olketa fit nomoa fo spoelem pipol hu garem hadtaem.
15-16Gridi wei hemi garem tufala dota.
Nem blong tufala, Givim an Givim.
Nao trifala samting i stap wea trifala no save hapi,
hem nao ples blong pipol hu i dae, graon wea hemi drae tumas, an woman hemi no bonem pikinini.
Bat mekfoa samting nao hemi nating save talem, “Inaf nao,”
hem nao faea.
17Sapos man luknogud long dadi blong hem,
an les fo herem mami blong hem,
bae olketa igol i kaikaim ae blong hem
an olketa narafala bed kaikaim bodi blong hem.
18-19Nao trifala samting i stap wea mi sapraes long hem,
hem nao wei wea igol hemi flae long skae, wei wea snek hemi save muv long graon, an wei wea sip save go long solwata.
Bat mekfoa samting nao, mi nating save long hem,
hem nao wei wea boe hemi stat fo lavem gele.
20Wei blong woman fo durong hemi olsem,
hemi go slip wetem narafala man an suim,
den hemi sei, “Mi kaikai nomoa.”
21-23Nao trifala samting i stap wea pipol i seksek long hem,
hem nao slev wea hemi kamap king, krangge man wea hemi kamap ris, an woman wea no eniwan laekem bat hemi gohed fo marit.
Bat mekfoa samting nao hemi barava had tumas,
hem nao woman slev hu hemi sensim misis blong hem.
24Fofala samting i stap wea i smol nomoa bat i waes tumas.
25Faswan, olketa anis i no strong, bat olketa redim kaikai blong olketa mekem olketa no sot long taem blong ren.
26Mektu, olketa rat i no strong bat olketa save wakem ples blong olketa long hol blong ston.
27Mektri, olketa grashopa i no garem sif, bat taem olketa flae, olketa muv wantaem olsem olketa soldia.
28Mekfoa, olketa lisad wea yu save holem long han, bat yu save lukim olketa tu long haos blong king.
29-31Nao trifala samting i stap wea wei blong olketa fo wakabaot hemi nambawan,
hem nao laeon wea hemi strong an nating fraetem narafala animol, man kokorako wea hemi wakabaot long ae blong mere kokorako, an man nanigot.
Bat mekfoa samting nao hemi wakabaot long wei wea i praod tumas,
hem nao lida wetem ami blong hem.
32Sapos yu falom krangge wei an tokpraod,
o yu plan fo duim samting nogud,
yu mas stop, no tok moa.
33Yu gagem krim blong milk, bata bae kam.
Yu hitim nous blong man, blad bae kam.
Yu mekem man kros, trabol bae kam.
Currently Selected:
Provebs 30: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.