MARKA 12
12
Ta xifaniso va varimi.
1Kutani a sungula ku vulavula hi swifaniso, a ku: “Munhu a simekile vhinya ensin'wini, a yi biyerile hi rihlampfu, a cele xikhuvutelo, a aka ni tshala; kutani a yi lerisela varimi, yena a ya ku endzeni. 2Hi nkarhi wa kona, a rhuma nandza eka varimi leswaku a ya teka mihandzu ya vhinya eka vona. 3Kambe va n'wi khoma, va n'wi ba, kutani va n'wi tlherisa a nga ri na nchumu. 4A tlhela a rhuma nandza un'wana eka vona; kambe yena, va n'wi khandla hi maribye va n'wi balesa nhloko, kutani va n'wi tlherisa hi tingana. 5A engeta a rhuma un'wana; yena, va n'wi dlaya. Kutani a rhuma van'wana lavo tala; ku biwa van'wana, van'wana va dlawa. 6Kambe, hikuva a ha ri ni n'wana wa yena a ri swakwe la rhandziwaka, na yena, a n'wi rhuma eka vona, a ri wa makumu, a ku: ‘Va ta chava n'wananga.’ 7Kambe varimi va byelana, va ku: ‘Mudyandzhaka hi loyi; tanani, hi n'wi dlaya, ndzhaka yi ta va ya hina.’ 8Kutani va n'wi khoma, va n'wi dlaya, va n'wi cukumeta ehandle ka nsimu ya vhinya. 9Xana n'wini wa nsimu u ta endla yini xana? U ta ta, u ta lovisa varimi, kutani nsimu ya vhinya, u ta yi nyika van'wana.
10 “Xana a mi si hlaya tsalwa le ri nge: ‘Ribye leri vaaki va nga ri nyenya, hi rona le ri nga endliwa ribye ra masungulo ya yinhla? 11Swi endlisiwe sweswo hi Hosi, i mhaka leyi hlamarisaka emahlweni ka hina’?” 12Hi laha va rhandzaka ku n'wi khoma, kambe va chava vunyingi, hikuva va tivile leswaku u ringanisile vona loko a vula xifaniso lexi; kutani va n'wi tshika, va tifambela.
Ta ndzuvo wa Khezari.
13Kutani va rhuma eka yena van'wana va Vafarisi ni Vaheroda leswaku va n'wi phasa hi marito. 14Vona va ta, va ku eka yena: “Mufundhisi, ha tiva leswaku u vula lexi tiyeke, ni leswaku a ku na vutoya ha munhu, hikuva a ku languti nghohe ya vanhu, kambe ndlela ya Xikwembu u yi dyondzisa hi ku tiyisa, Xana swa hi fanela ku humesela Khezari ndzuvo, kumbe a hi swona-ke? Xana hi ta humesa, kumbe hi nga humesi?” 15Kambe yena, hi ku xiya ku kanganyisa ka vona, a ku eka vona: “Mi ndzi ringela yini? Ndzi tiseleni denari, ndzi yi vona.” 16Va yi tisa. A ku eka vona: “Xifaniso lexi, i xa mani, ni ku tsala loku, i ka mani xana?” Va ku eka yena: “I swa Khezari.” 17Kavaloko Yesu a va hlamula, a ku: “Tlheriselani Khezari leswi nga swa Khezari, ni Xikwembu leswi nga swa Xikwembu.” Kutani va n'wi hlamala ngopfu.
Ta ku pfuka ka vafi.
18Vasaduki lava vulaka leswaku ku hava ku pfuka ka vafi, va ta eka yena va n'wi vutisa va ku: 19“Mufundhisi, Muxe u hi tsalele, a ku: ‘Makwavo wa munhu, loko a file, a siye nsati, kambe a nga siyanga vana, makwavo a ta teka nsati wa yena, a pfuxela makwavo rixaka.’ 20Kambe a ku ri ni munhu loyi ngi a ri ni vana va ntlhanu na vambirhi, lo wa hosi a teka nsati, kutani a fa, a nga siyanga vana. Wa vumbirhi, na yena, a n'wi teka, kutani a fa, a nga siyanga n'wana; ni ka wa vunharhu swi va tano. 21Kutani va n'wi teka va ri va ntlhanu na vambirhi, kambe va nga siyanga vana. 22Endzhaku ka vona hinkwavo, wansati na yena a fa. 23Hi siku ra ku pfuka, loko va pfukile, xana wansati loyi, u ta va wa mani ka vona xana, hikuva a tekiwile hi vona va ntlhanu na vambirhi?”
24Yesu a va hlamula, a ku: “Xana a mi lahlekanga hi leswi mi nga tiviki Matsalwa, ni loko ma ri matimba ya Xikwembu xana? 25Hikuva kutakuloko va pfukile eku feni, a va nga ha teki, ni loko ku ri ku tekiwa kambe vanhu va ta va tanihi tintsumi ematilweni. 26 Loko va ri vafi, ni leswi va nga ta pfuka, xana a mi hlayanga ebukwini ya Muxe, hilaha Xikwembu xi nga vulavula na yena exihlahleni, xi ku: ‘Hi mina Xikwembu xa Abrahama, Xikwembu xa Isaka, Xikwembu xa Yakobo’? 27Xona, a hi Xikwembu xa vafi, kambe i Xikwembu xa lava hanyaka. Loko swi ri tano, n'wina mi lahlekile ngopfu.”
Ta nawu lowukulu.
28Un'wana wa vatsari la nga va twa loko va hlamulana, kuteloko a vone leswaku u va hlamurile swinene, a n'wi tshinelela ku n'wi vutisa, a ku: “Nawu lowo rhanga eka milawu hinkwayo, hi wihi xana?” 29Yesu a n'wi hlamula, a ku: “Nawu lowo rhanga hi lowu nge: ‘Yingisa, Israele: Hosi, Xikwembu xa hina, i Hosi yi ri yoxe. 30 Kutani: Rhandza Hosi, Xikwembu xa wena, hi mbilu ya wena hinkwayo, ni moya wa wena hinkwawo, ni ku anakanya ka wena hinkwako, ni matimba ya wena hinkwawo’; hi wona nawu lowo rhanga. 31 Kutani wa vumbirhi lowu fanaka na wona, hi lowu nge: ‘Rhandza warikwenu, kukota loko u tirhandza’; a ku na nawu lowukulu eka yona yoleyo.” 32Mutsari a ku eka yena: “Hi swona mufundhisi, u vurile swinene loko u te: Xikwembu i xin'we, kambe a ku na xin'wana loko xi nga ri xona; 33kutani ku xi rhandza hi mbilu hinkwayo, ni ku anakanya hinkwako, ni moya hinkwawo, ni matimba hinkwawo, ni ku rhandza warikwavo tanihi loko munhu a tirhandza, swi tlula magandzelo hinkwawo.” 34Yesu loko a vona leswaku u hlamule hi ku anakanya, a ku eka yena: “A ku kule ni ku fuma ka Xikwembu.” Kutani a ka ha vanga na munhu la tiyisaka mbilu ku n'wi vutisa.
Kriste, i n'wana mani?
35Yesu, loko a ri karhi a dyondzisa etempeleni, a vulavula, a ku: “Vatsari va vurisa ku yini leswaku Kriste i n'wana Davhida-ke? 36 Kasi yena Davhida u vurile hi Moya lowo kwetsima, a ku: ‘Hosi yi te eka Hosi yanga: Tshama evokweni ra mina ra xinene, ndzi kondza ndzi endla valala va wena vunavelo bya milenge ya wena.’ 37Xana loko yena Davhida a n'wi vula hosi, a nga va n'wana wa yena hi mukhuva wihi xana?” Kutani ntshungu lowunyingi a wu n'wi yingisa hi ku tsaka.
Ta Yesu loko a sandza vatsari.
38Eku dyondziseni ka yena, a ku eka vona: “Chavani vatsari lava rhandzaka ku tifambela hi tinguvu leto leha ni ku xewetiwa emitsendzeleni; 39lava rhandzaka switshamo swa le mahlweni emasinagogeni, ni switshamo leswo rhanga emikhubyeni; 40va mita tindlu ta tinoni, kambe va endla swikhongelo leswo leha, leswaku va tivonakarisa ntsena. Va ta avanyisiwa hi ku avanyisa loku tlurisaka.”
Ta nhlengo wa noni.
41Yesu, kakuloko a tshamile kusuhi ni laha ku hlayisiwaka nhlengo, a languta hilaha vanhu va hoxaka mali enhlengweni; kambe vafuwi lavo tala va hoxa ngopfu. 42Ku ta ni noni ya xisiwana, yi hoxa swipambatana swimbirhi leswi ringanaka fadeni. 43Kuteloko a vitanile vadyondzisiwa va yena, a ku eka vona: “Kunene ndzi ri eka n'wina: Noni leyi ya xisiwana, yi humesile ku tlurisa hinkwavo lava nga humesa nhlengo. 44Hikuva hinkwavo va tekile eku taleriweni ka vona, kambe loyi u humesile evusiwaneni bya yena, hinkwaswo leswi ngi a ri na swona, hinkwaswo leswi a nga ta hanya ha swona.”
Currently Selected:
MARKA 12: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
