MARKA 13
13
Ta ku avanyisiwa ka Yerusalema.
1Loko a ha ku suka etempeleni, un'wana wa vadyondzisiwa va yena a ku eka yena: “Mufundhisi, languta maribye layonghasi, ni tindlu tonghasi!” 2Yesu a hlamula, a ku eka yena: “Xana wa languta tindlu letikulu leti-ke? A ku nga tshikiwi ribye ehenhla ka ribye rin'wana le ri nga ta tshama ri nga mbundzuxiwi.”
3Kuteloko a tshamile Ntshaveni ya Mitlhwari, a langutene ni tempele, Petro na Yakobo, na Yohane, na Andriya, va n'wi vutisa etlhelweni va ku: 4“Hi byele nkarhi lowu timhaka leti ti nga ta humelela ha wona, ni xikombiso xi ta va xihi xa nkarhi lowu hinkwaswo leswo swi nga ta hetisiwa ha wona?”
5Yesu a sungula ku va byela, a ku: “Tilanguteleni leswaku mi nga tshuki mi xisiwa hi munhu. 6Hikuva lavo tala va ta ta hi vito ra mina, un'wana ni un'wana a ku: ‘Hi mina Kriste’ kambe va ta hambukisa lavo tala. 7Kutakuloko mi twa tinyimpi ni mimpfumawulo ya tinyimpi, mi nga tshukeni, hikuva leswi, swi fanele ku humelela; kambe a hi wona makumu. 8Hikuva tiko rin'wana ri ta pfukela tiko rin'wana matimba, ku fuma kun'wana ku ta lwa ni ku fuma kun'wana; ku tsekatseka ka misava ku ta va kona hi matlhelo layo tala, ni tindlala ti ta va kona ni madzolonga. Leswo i ku sungula ka mahlomulo.
9“Kambe n'wina, tilanguteleni; hikuva va ta mi yisa etihubyeni ni le masinagogeni; mi ta biwa, mi yimisiwa emahlweni ka tindhuna ni tihosi hikwalaho ka mina, mi va timbhoni eka vona. 10Kambe swi fanele leswaku Evhangeli yi rhanga yi byeriwa ematikweni hinkwawo. 11Kambe siku va mi kokaka ku mi yisa eku avanyisiweni, mi nga tshuki mi vilela hi leswi mi nga ta swi vula, mi nga tshuki mi swi anakanya; kambe vulani leswi mi nga ta swi nyikiwa enkarhini wolowo, hikuva a hi n'wina mi nga ta vulavula, kambe i Moya lowo Kwetsima.
12“Makwavo wa munhu u ta nyiketa makwavo eku dlaweni, tata wa munhu a endlisa n'wana wa yena hi sweswo; ni vana va ta pfukela vaveleki va vona matimba, va va dlaya. 13Mi ta vengiwa hi hinkwavo hikwalaho ka vito ra mina, kambe la tiyiselaka ku fikela emakumu, hi yena la nga ta ponisiwa.
14“Kutakuloko mi vona manyala ya ku hlaseriwa lama vuriweke hi muprofeta Daniele, ma yimile laha ma nga faneriki (la hlayaka a a tsundzuke); enkarhini wolowo, lava nga eYudiya a va tsutsumele etintshaveni; 15la nga ehenhla ka yindlu, a nga ha xikeri endlwini, a nghena ku ya teka nchumu endlwini ya yena; 16ni la nga emasin'wini, a nga ha tlheleri ekaya ku ya teka nguvu ya yena. 17Ku ta va ni khombo eka vavasati lava tikeke, ni lava an'wisaka emikarhini yoleyo. 18Kambe khongelani leswaku ku baleka ka n'wina ku nga humeleri nivuxika. 19Hikuva emikarhini yoleyo, ku ta va ni nhlomulo lowonghasi, ka hari mpfhuka wa ku sungula ka leswi vumbiweke, leswi Xikwembu xi nga swi tumbuluxa, ku fikela sweswi, lowotano wu nga si va kona, kutani wu nga ka wu nga vi kona ni siku ni rin'we. 20Na swona loko ngi Hosi yi nga hungutanga masiku walawo, a ku nga ti hanya munhu, kambe hikwalaho ka vahlawuriwa lava a va hlawuleke, u hungutile masiku walawo.
21“Enkarhini wolowo, loko munhu a ku ha n'wina: ‘Vonani, Kriste u la,’ kumbe, ‘U lahaya,’ mi nga tshuki mi pfumela; 22hikuva ku ta humelela vakriste vo hemba lavo tala, ni vaprofeta va mavunwa; va ta endla masingita ni swikombiso leswi nga ta hambukisa na vona vahlawuriwa, loko swa endleka. 23Loko mi ri n'wina tilanguteleni; vonani, ndzi mi byerile hinkwaswo eku sunguleni.
Ta ku vuya ka Yesu Kriste.
24“Kambe emikarhini leyo, endzhaku ka nhlomulo wolowo, dyambu ri ta endla ntima, n'weti wu ta pfumala ku vonakala, 25ni tinyeleti ti ta wa hi le tilweni, ni leswa matimba swa le tilweni swi ta tsekatseka. 26Hilaha va nga ta vona N'wana wa Munhu a ta hi mapapa, hi matimba lamakulu ni ku kwetsima. 27U ta rhuma tintsumi ta yena, u ta hlengeleta vahlawuriwa va yena emimoyeni ya mune, ku sungula eku heteleleni ka misava, ku yisa emakun'wini ya tilo.
28“Dyondzani xifaniso lexi hi murhi wa nkuwa: marhavi ya wona, loko ma olova, ni loko ma humesa matluka, mi tiva leswaku rihunga ri kusuhi. 29Hi mukhuva wolowo, na n'wina loko mi vona sweswo swi humelela, tivani leswaku N'wana wa Munhu u kusuhi, u le nyangweni. 30Kunene ndzi ri eka n'wina: Rixaka leri ri nga ka ri nga hundzi hinkwaswo leswo swi nga si humelela. 31Tiko ni misava swi ta hundza, kambe marito ya mina ma nga ka ma nga hundzi.
32“Loko ri ri siku lero ni nkarhi lowu, a ku na loyi a wu tivaka, hambi ti ri tintsumi ta le tilweni, hambi a ri N'wana; wu tiviwa hi Tatana ntsena.
33“Tivoneleni, mi hiteka, mi va mi khongela, hikuva a mi tivi leswaku nkarhi wu ta va rini. 34Swi kotisa munhu loko a ya endza, a sukela yindlu ya yena a lerisile malandza ya yena un'wana ni un'wana ntirho wa yena, a lerisile ni mulanguteri wa nyangwa ku langutela. 35Hitekani-ke, hikuva a mi tivi nkarhi n'wini wa yindlu a nga ta ta ha wona, kumbe nimadyambu, kumbe nivusiku lebyikulu, kumbe loko nkuku wu ringa, kumbe nimixo; 36hikuva loko a fika hi ku mi tshuketa, a nga tshuki a mi kuma mi etlele. 37Kambe leswi ndzi mi byelaka swona ndzi byela hinkwavo, ndzi ri: Hitekani!”
Currently Selected:
MARKA 13: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
