MARKA 11
11
Ta Yesu loko a nghena eYerusalema.
1Kuteloko va tshinelele Yerusalema, va ri ekusuhi na Betefage, na Betaniya, eNtshaveni ya Mitlhwari, a rhuma vadyondzisiwa va yena vambirhi, 2a ku eka vona: “Fambani emutini lowu mi wu kongomaka, kutakuloko mi nghenile eka wona, mi ta kuma ximbhongolwana lexi kulekiweke, lexi nga siki khandziyiwaka hi munhu, xi tshunxeni, mi xi tisa la. 3Kungakuloko munhu a ku eka n'wina: ‘Mi endlisela yini sweswo?’ Mi ta ku: ‘Hosi ya xi lava, kutani u ta hatlisa a xi rhumela halenu.’ ”
4Kutani va famba, va ya kuma ximbhongolwana xi kulekiwile ehandle enyangweni, emahandzeni ya tindlela, kutani va xi tshunxa. 5Van'wana lava yimeke kwalaho va ku eka vona: “Mi endla yini hi ku tshunxa ximbhongolwana lexi xana?” 6Vona va va byela leswi Yesu a nga va lerisa swona, kutani va va tshika va famba. 7Loko va yisile ximbhongolwana eka Yesu, va andlala tinguvu ta vona ehenhla ka xona, Yesu a xi khandziya.
8Kutani lavo tala va andlala tinguvu ta vona endleleni, van'wana va tsema mahlampfu emirhini, va ma andlala endleleni. 9 Lava rhangaka emahlweni, ni lava landzaka, va huwelela, va ku: “Hosanna! A ku vongiwe la taka hi vito ra Hosi! 10A ku dzunisiwe ku fuma loku taka eka tata wa hina, Davhida! Hosanna ematilweni la ma nga ehenhlahenhla.” 11Kutani Yesu a nghena eYerusalema, ni le tempeleni, kuteloko a rhalarhalile hinkwako, wu ri nkarhi wa madyambu, a huma, a ya eBetaniya, a ri ni la va khume na vambirhi.
Ta ku rhuketeriwa ka murhi wa nkuwa.
12Nimpundzu, loko va huma eBetaniya, a twa ndlala. 13Kutani a vona, a ri kule, murhi wa nkuwa lowu nga ni matluka; a hambuka a kamba kumbe a nga kuma nchumu eka wona; kambe loko a fika eka wona, a nga kumanga nchumu, loko ma nga ri matluka ntsena, hikuva a wu nga ri nkarhi wa makuwa. 14Kutani Yesu a ku eka wona: “Ku sungula sweswi, a ku nga ha vi na munhu la nga ta dya mihandzu ya wena hi laha ku nga heriki!” Vadyondzisiwa va yena a va ri karhi va swi twa.
Ta Yesu loko a hangalasa vaxavisi etempeleni.
15Kutani va fika eYerusalema. Kuteloko Yesu a nghenile etempeleni, a sungula ku hlongola lava xavisaka ni lava xavaka etempeleni, a wisa matafula ya lava bindzurisaka mali ni switshamo swa lava xavisaka matuva. 16Na swona a nga pfumelelanga munhu ku tsemakanya tempele a rhwele xanchumu. 17 Kutani a dyondzisa, a ku eka vona: “Xana a ku tsariwanga leswaku: ‘Yindlu ya mina yi ta vuriwa yindlu ya xikhongelo ya matiko hinkwawo!’ Kasi n'wina mi yi endlile bako ra makhamba.” 18Kambe vatsari ni vaprista lavakulu, loko va n'wi twa a vula sweswo va lava hilaha va nga ta n'wi lovisa hakona; hikuva a va n'wi chava, hikuva tiko hinkwaro a ri hlamala dyondzo ya yena. 19Kuteloko ri perile, a huma emutini.
Ta murhi wa nkuwa.
20Ni mixo, loko va hundza, va vona murhi wa nkuwa wu omile hinkwawo, ku sungula hi timitsu. 21Kutani Petro a anakanya, a ku eka yena: “Rabi, vona murhi wa nkuwa lowu u nga wu rhuketela, wu omile.” 22Yesu a hlamula, a ku eka vona: “Vanani ni ku pfumela eka Xikwembu! 23Ndzi tiyisile, ndzi ri eka n'wina: Un'wana ni un'wana la nge eka ntshava leyi: ‘Suka, u ya tihoxa elwandle,’ a nga vileri embilwini ya yena, kambe a pfumela leswaku leswi a swi vulaka swi nga endleka, u ta endleriwa hinkwaswo leswi a swi vuleke, hambi yi ri yini na yini. 24Hikwalaho ndzi ri eka n'wina: Hinkwaswo leswi mi swi kombelaka hi ku khongela, pfumelani leswaku mi swi nyikiwile, kutani swi ta endleriwa n'wina. 25Kungakuloko mi yima mi khongela, rivalelani loyi mi nga va ni mhaka na yena leswaku na yena Tata wa n'wina la nga ematilweni, a mi rivalela ku dyoha ka n'wina. 26Hikuva loko mi nga rivaleri van'wana Tata wa n'wina la nga ematilweni na yena, a nga ka a nga mi rivaleri ku dyoha ka n'wina.”
Matimba ya Yesu, laha ma humaka kona.
27Kutani va tlhela, va ya Yerusalema, kuteloko a ri karhi a tifambela etempeleni, vaprista la vakulu ni vatsari ni vakulukumba va ta eka yena; va ku: 28“Xana leswi, u swi endla hi matimba wahi xana? Matimba walawo ma nyikiwile hi mani ku endlisa sweswo?” 29Yesu a va hlamula, a ku: “Ndzi ta mi vutisa mhaka, na mina, mi ta ndzi hlamula, hi kona ndzi nga ta mi byela matimba lawa ndzi endlaka leswi ha wona. 30Ku khuvula ka Yohane xana ku hume etilweni, kumbe ka vanhu xana? Ndzi hlamuleni.” 31Vona, va tsundzuxana va ku: “Loko hi ku: ‘Ku hume etilweni,’ u ta ku: ‘Loko swi ri tano, a mi pfumelanga ha yini-ke?’ 32Kambe loko hi ku: ‘Eka vanhu,’ a va chava tiko; hikuva hinkwavo a va ku: ‘Yohane i muprofeta wa xiviri.’ ” 33Kutani va hlamula, va ku eka Yesu: “A hi swi tivi.” Yesu a va hlamula a ku: “Na mina, ndzi nga ka ndzi nga mi byeri matimba lawa ndzi endlaka swilo leswi ha wona.”
Currently Selected:
MARKA 11: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
