LUKA 8
8
Ta Yesu loko a dyondzisa eGaleliya.
1Endzhaku ka swona, Yesu a famba hi miti ni swimitana a ri karhi a dyondzisa, a vula Evhangeli ya ku fuma ka Xikwembu; na vona lava khume na vambirhi a va ri na yena, 2swin'we ni vavasati van'wana lava horisiweke mimoya leyo biha ni vuvabyi; a a ri Mariya, la vuriwaka wa Magadala, loyi mademona ya ntlhanu na mambirhi ma humeke eka yena, 3na Yohana, nsati wa Khuza, ndhuna ya Heroda, na Suzana, ni van'wana lavo tala lava n'wi tirheleke hi leswi ngi va ri na swona.
Xifaniso xa muhaxi.
4Kakuloko vunyingi lebyikulu byi hlengeletanile eka yena, swin'we ni vanhu lava humaka emitini yin'wana ni yin'wana, a vulavula na vona hi xifaniso, a ku:
5“Muhaxi u humile ku ya haxa mbewu; kakuloko a haxa, timbewu tin'wana ti wela endleleni, ti kandziyiwa hi vanhu, kutani tinyanyana ta le henhla ti dya hinkwato. 6Tin'wana ti wela emaribyeni, kutani loko ti mila, ti vuna, hikuva ti pfumale ndzhongo. 7Tin'wana ti wela emitweni, kutani mitwa yi mila swin'we na tona, yi ti hungela, ti fa. 8Kambe tin'wana ti wela emisaveni leyinene; kuteloko ti mirile ti veka ka dzana.” Kakuloko a vurile sweswo a huwelela, a ku: “La nga ni tindleve ku yingisa, a a yingise.”
9Kutani vadyondzisiwa va yena va n'wi vutisa xifaniso lexi, leswaku xi ri yini. 10Yena a ku: “N'wina mi nyikiwile ku tiva swihundla swa ku fuma ka Xikwembu, kambe van'wana va swi twa hi swifaniso, leswaku hambi va vona, va nga vonisisi, hambi va twa, va nga twisisi. 11Kambe xifaniso lexi hileswaku: Timbewu, i rito ra Xikwembu. 12Lava nga endleleni, hi lava yingisaka; endzhaku, Diyavulosi a ta, a teka rito etimbilwini ta vona leswaku va nga tshuki va pfumela, va hlayiseka. 13Lava nga haxiwa emaribyeni, hi lava ingi loko va yingisile va amukela rito hi ku tsaka, kambe va pfumala timitsu, va pfumela hi nkarhi wun'wana ntsena; siku ra ndzingo, loko ri fika va tshika. 14Leswi weleke emitweni, hi lava yingiseke rito, kambe va famba, va ri tshika ri funengetiwa hi ku vilela, ni ku rhandza ku fuwa, ni ku titsakela ka vutomi lebyi, kutani va nga ha veki mihandzu leyi vupfaka. 15Leswi nga wela emisaveni leyinene, hi lava yingisaka rito, va ri hlayisa etimbilwini leto lulama, letinene, kutani va veka mihandzu hi ku tiyisela.
16“A ku na munhu loyi, kungate loko a lumekile rivoni, a ri funengeta hi mbita, kumbe a ri veka ehansi ka mubedo; kambe a ri tlhoma ekandelarini, leswaku lava nghenaka, va vona ku vonakala. 17Hikuva a ku na xilo lexi nga exihundleni, lexi nga tiki tiviwa ni ku humelela erivaleni. 18Hikwalaho, tivoneni hilaha mi yingisaka hakona; hikuva ku ta nyikiwa la nga ni xilo; kambe la pfumalaka, u ta tekeriwa na xona lexi a xi tshembaka leswaku u na xona.”
Ta Mana wa Yesu ni vamakwavo.
19Mana wa Yesu ni vamakwavo va ta eka yena, kambe va hluleka ku n'wi tshinelela hikwalaho ka vunyingi. 20Kutani van'wana va n'wi tivisa, va ku: “Mana wa wena ni vamakwenu va yime ehandle, va rhandza ku ku vona.” 21Kambe a hlamula, a ku eka vona: “Manana, ni vamakwerhu hi lava yingisaka rito ra Xikwembu, va va va endla hakona.”
Ta ku miyetiwa ka xihuhuri.
22Hi siku rin'wana, a nghena ebyatsweni ni vadyondzisiwa va yena, kutani a ku eka vona: “A hi peleleni hase, entsungeni.” Kutani va suka. 23Va ko va ha famba, a tietlelela; kutani xihuhuri xi va pfukela etiveni byatso byi ko byi tala hi mati, kutani a va ri ekhombyeni. 24Kutani va tshinelela, va n'wi pfuxa evurhongweni, va ku: “N'wini, n'wini, ha lova!” Kutani a pfuka, a yima, a tshinya moya ni magandlati, kutani swi miyela, ku rhula ku va kona. 25Kutani a ku eka vona: “Ku pfumela ka n'wina ku kwihi?” Vona va chava, va hlamala, va byelana, va ku: “Loyi i mani la tshinyaka moya ni lwandle, swi va swi n'wi yingisa?” 26Kutani va fika etikweni ra Vagadara leri langutaneke na Galeliya.
Ta ku horisiwa ka munhu wa rihuhu etikweni ra Gandara.
27Kakuloko Yesu a xikela eribuwini, a hlangana ni wanuna un'wana wa muti, la ngheniweke khale hi mademona, a nga funengelanga nguvu, a nga tshami endlwini, kambe a tshama emasirheni. 28Kuteloko a vonile Yesu, a huwelela, a tiwisela emahlweni ka yena, a huwelela hi rito lerikulu, a ku: “U ni mhaka yihi na mina, Yesu, N'wana wa Xikwembu lexi nge henhlahenhla? Ndza ku khongela, u nga ndzi xanisi.” 29Hikuva Yesu a a lerise moya lowo biha ku huma emunhwini loyi; hikuva a ku ri khale wu n'wi xanisa; a tshama a bohiwa hi timpecana ni khotso, kambe yena a tshova swona, a susumeteriwa emananga hi rihuhu. 30Yesu a n'wi vutisa, a ku: “Vito ra wena u mani?” A ku: “Ndzi Vandla.” Hikuva mademona layo tala a ma nghenile eka yena. 31Kutani ma n'wi khongela leswaku a nga tshuki a ma lerisa ku ya ekheleni.
32Ntlhambi lowukulu wa tinguluve a wu ri kona entshaveni, wu dya. Kutani mademona ma n'wi khongela leswaku a ma pfumelela ku nghena eka wona, kutani a ma pfumelela. 33Kavaloko mademona ma huma emunhwini yeloyi, ma nghena etingulubyeni kutani ntlhambi wu tsutsuma wu ya tihoxa exidziveni xa lwandle, wu nwela kona. 34Varisi va wona, kuteloko va vona leswi humeleleke, va tsutsuma, va ya amba mhaka leyi emutini ni le tikweni. 35Kutani vanhu va huma, va ya vona leswi humeleleke. Kuteloko va fika eka Yesu, va kuma munhu loyi mademona ma nga huma eka yena, a tshamisile emilengeni ya Yesu, a ambele, a ri munhu; kutani va chava ngopfu. 36Lava voneke timhaka leti, va va byela hilaha munhu loyi wa rihuhu a hanyisiweke hakona.
37Kutani vanhu hinkwavo va matlhelo ya tiko ra Vagadara, va khongela Yesu leswaku a suka eka vona, hikuva a va khomiwile hi ku chava lokukulu. Kutani Yesu a nghena ebarikeni, a tlhela.
38Kutani munhu loyi, mademona ma humeke eka yena, a n'wi khongela leswaku a n'wi pfumelela ku famba na yena, kambe Yesu a n'wi tlherisa, a ku: 39“Tlhelela eka rikwenu, u ya vula leswikulu leswi Xikwembu xi ku endleleke swona.” Kutani a ya byela va muti hinkwavo leswi a swi endleriweke hi Yesu.
Ta Yesu loko a pfuxa n'wana Yayiro.
40Kuteloko Yesu a tlherile, a amukeriwa hi vunyingi, hikuva a va n'wi langutela hinkwavo. 41Kutani ku ta wanuna la vuriwaka Yayiro, la nga hosi ya sinagoga; a wa emilengeni ya Yesu, a n'wi khongela leswaku a nghena endlwini ya yena; 42hikuva a a ri ni wanhwanyana a ri un'we, loyi malembe ya yena ma lavaka ku endla khume na mambirhi, a lava ku fa.
A hanyisa wansati la nga ni vuvabyi bya switlhandla.
43Kakuloko Yesu a ya kona, a kamanyetiwa hi ntshungu. Kutani wansati loyi ingi a ri ni vuvabyi bya switlhandla, a vabyile malembe ya khume na mambirhi, a hetile mali ya yena hinkwayo hi tin'anga, kambe a ku vanga na yin'we leyi nga n'wi hanyisa, 44a tshinelela Yesu hi le ndzhaku, a khumba makumu ya nguvu ya yena, kutani vuvabyi bya yena byi siveka kan'we. 45Yesu a ku: “Ndzi khumbiwile hi mani?” Kakuloko va kaneta hinkwavo, Petro ni lava ngi a ri na vona, va ku: “N'wini, vunyingi bya ku kamanyeta, byi ku rhendzele.” 46Kambe Yesu a ku: “Munhu u ndzi khumbile hikuva ndzi twile leswaku matimba ma hume eka mina.” 47Kuteloko wansati loyi a vona leswaku u tiviwile, a ta hi ku rhurhumela, a khinsama emilengeni ya yena a tivula emahlweni ka vanhu leswi a n'wi khumbeleke swona, ni laha a horisiweke kan'we. 48Kutani Yesu a ku eka yena: “N'wananga, ku pfumela ka wena ku ku hanyisile, famba hi ku rhula.”
49Kakuloko a ha vulavula, ku fika un'wana la humeke eka n'wini wa sinagoga, a ku eka yena: “N'wana wa wena u file, u nga ha karhati mufundhisi.” 50Kambe Yesu loko a swi twa, a ku eka yena: “U nga chavi, pfumela ntsena, u ta hanya.” 51Kuteloko a fikile endlwini, a nga pfumelelanga ni un'we ku nghena, loko a nga ri Petro, na Yohane, na Yakobo, ni tata wa wanhwanyana ni mana wa yena. 52Kambe a va rila hinkwavo, va n'wi rilela; kutani Yesu a ku: “Mi nga rili a nga fangi, u etlele.” 53Kutani va n'wi hleka hikuva a va tiva leswaku u file. 54Kambe yena a va humesela ehandle hinkwavo, kutani a n'wi khoma hi voko, a tlakusa rito, a ku: “Nhwanyana, pfuka.” 55Xikan'wekan'we moya wa yena wu tlhelela eka yena, a hatlisa ku pfuka; kutani a va byela leswaku va n'wi nyika swakudya.
56Kutani vaveleki va yena va hlamala ngopfu; kambe a va lerisa leswaku va nga byeli munhu leswi humeleleke.
Currently Selected:
LUKA 8: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
