LUKA 7
7
Ta hosanyana ya Kapernawume.
1Kuteloko Yesu a hetile ku vulavula timhaka ta yena hinkwato emahlweni ka ntshungu, a nghena eKapernawume. 2Ndhuna ya nyimpi ya dzana a yi ri ni nandza loyi yi n'wi rhandzaka ngopfu, a vabya, a ri ekusuhi ni ku fa. 3Kakuloko yi twa timhaka ta Yesu, yi rhuma Vayuda van'wana lavakulu eka yena, va n'wi khongotela, leswaku a ta horisa nandza wa yona. 4Loko va fika eka Yesu, va n'wi khongela ngopfu, va ku: “U fanele ku endleriwa sweswo, 5hikuva u rhandza tiko ra hina, nakambe u hi akele sinagoga.” 6Kutani Yesu a famba na vona. Kuteloko a ri ekusuhi ni yindlu, ndhuna yi rhuma maxaka eka yena ku n'wi byela, va ku: “Hosi, u nga tikarhati, hikuva a ndzi faneri leswaku u nghena endlwini ya mina. 7Hikuva ndzi tiringanisile la nga faneriki ku ya eka wena, kambe vula rito, nandza wa mina u ta hanya. 8Hikuva mina ndzi munhu la fumiwaka hi van'wana na swona ndzi fuma vanhu; ndzi ri eka un'wana ‘Famba,’ kutani a famba; eka un'wana: ‘Tana,’ kutani a ta; eka nandza wa mina: ‘Endla leswo karhi,’ kutani a swi endla.” 9Loko Yesu a yingisa timhaka teto, a hlamala, kutani a hundzulukela eka ntshungu lowu n'wi landzaka, a ku: “Ndza mi byela leswaku a ndzi si vona ku pfumela lokunghasi, ni le Israeleni.” 10Sweswi lava rhumiweke, loko va tlhelela ekaya, va kuma nandza la vabyaka a hanyile.
Ta Yesu loko a pfuxa n'wana wa noni ya Nayini.
11Hi siku leri tlhandlamaka, Yesu a endzela emutini lowu va nge i Nayini. Vadyondzisiwa va yena lavo talanyana ni ntshungu lowukulu va famba na yena. 12Kakuloko a tshinela ekusuhi ni nyangwa ya muti, maswivo, ku rhwariwa mufi, n'wana a ri swakwe eka mana wa yena la nga noni; vanhu lavo tala va muti a va n'wi landza. 13Kuteloko Hosi yi n'wi vona, yi n'wi twela vusiwana, yi ku eka yena: “U nga rili.” 14Kavaloko a tshinela, a khumba vuhlaka; kutani lava n'wi rhwaleke va yima. Kutani a ku: “Jaha, ndza ku byela, ndzi ri: Pfuka.” 15Kutani mufi a yima, a sungula ku vulavula, Yesu a n'wi nyika mana wa yena. 16Kutani va khomiwa hinkwavo hi ku chava, va dzunisa Xikwembu, va ku: “Muprofeta lonkulu u humelele exikarhi ka hina, Xikwembu xi endzele tiko ra xona.” 17Kutani mhaka leyi, yi twakala hinkwako eYudiya, ni le tikweni hinkwaro ra matlhelo.
Ta Yohane Mukhuvuri loko a rhuma vadyondzisiwa va yena eka Yesu.
18Timhaka ta Yesu hinkwato ti byeriwa Yohane hi vadyondzisiwa va yena. 19Kutani Yohane a vita vadyondzisiwa va yena vambirhi, a va rhuma eka Yesu, a ku: “Xana hi wena la fanekeleke ku ta, kumbe ha ha langutela un'wana?” 20Vanhu lava kuteloko va fikile eka yena, va ku: “Yohane Mukhuvuri u hi rhumile eka wena, a ku: ‘Xana hi wena la fanekeleke ku ta, kumbe ha ha langutela un'wana?’ ”
21Enkarhini wolowo, Yesu a hanyisa lavo tala emavabyini ya vona, ni le mimoyeni ya vona, ni lavo tala lava feke mahlo, a va nyika ku vona. 22Kutani Yesu a va hlamula, a ku eka vona: “Fambani mi ya tivisa Yohane leswi mi swi voneke ni leswi mi swi tweke; hikuva vo fa mahlo va vona, swigono swi famba, va nhlokonho va basisiwa, lavo fa tindleve va twa, vafi va pfuka, Evhangeli yi byeriwa swisiwana. 23Kambe ku katekile la nga tiki khunguvanyeka hikwalaho ka mina.”
24Lava rhumiweke hi Yohane, kuteloko va sukile, Yesu a sungula ku vulavula ta Yohane eka vanhu, a ku: “A mi ya vona yini emananga? Xana a ri ri rihlanga leri tsekatsekisiwaka hi mheho xana? 25Kambe a mi ya vona yini? Xana a a ri munhu la ambaleke tinguvu leto saseka? Vonani, lava ambalaka tinguvu ta vubombi ni lava dyaka leswo nandziha va le tindlwini ta tihosi. 26Kambe a mi ya vona yini? Xana a a ri muprofeta xana? Ina, ndzi vurisa sweswo eka n'wina, ni la tlulaka muprofeta. 27 Hi yena loyi ku nga tsariwa timhaka ta yena loko va te: ‘Vona, ndzi rhuma ntsumi ya mina emahlweni ka mombo wa wena; yi ta ku lunghisela tindlela.’ 28Hikuva ndzi ri eka n'wina: Exikarhi ka lava tswariweke hi vavasati, a ku na muprofeta la tlulaka Yohane; kambe lontsongo eku fumeni ka Xikwembu, u n'wi tlula hi vukulu.” 29Hinkwavo lava nga n'wi yingisa, ni valuvisi lava nga khuvuriwa hi ku khuvula ka Yohane va dzunisile ku lulama ka Xikwembu; 30kambe Vafarisi ni vadyondzisi va nawu va tionhele makungu ya Xikwembu, hikuva a va khuvuriwanga hi yena.
31Hosi yi engeta, yi ku: “Vanhu va rixaka leri, ndzi ta va fanisa na yini? Va fana na yini-ke? 32Va fana ni swihlangi leswi tshamaka entsendzeleni, swi huwelelana, swi ku: ‘Hi mi yimbele nanga, kambe a mi cinanga; hi mi yimbele mahlomulo, kambe a mi rilanga.’ 33Hikuva Yohane Mukhuvuri u tile, a nga dyi vuswa, a nga nwi vhinyo, kambe mi ku: ‘U ni rihuhu.’ 34N'wana wa Munhu, yena u tile, a dya, a nwa, kutani mi ku: ‘Vonani mudyi ni munwi, nakulobye wa valuvisi ni wa vadyohi.’ 35Kambe vutlhari byi khanisiwile hi vana va byona hinkwavo.”
Ta wansati wa xidyohi endlwini ya Simoni.
36Mufarisi un'wana a n'wi kombela ku ta ta dya na yena. Kutani Yesu a nghena endlwini ya mufarisi, a tshama eswakudyeni. 37Kutani wansati wa muti, wa xidyohi, kakuloko a twa leswaku u tshame eswakudyeni endlwini ya Mufarisi, a tisa ximbitana xa alabastera lexi teleke mafurha layo nun'hwela. 38Kutani a khinsama endzhaku ka yena, emilengeni ya yena, a ri karhi a rila, a sungula ku n'wi tsakamisa milenge hi mihloti ya yena, a tlhela a hlangula hi misisi ya nhloko ya yena, a n'wi ntswontswa milenge, a yi tota hi mafurha. 39Mufarisi la nga n'wi vita, kakuloko a vona sweswo, a ehleketa embilwini ya yena, a ku: “Munhu loyi, loko ngi a ri muprofeta, ingi a tivile nsati loyi a n'wi khumbaka, leswaku i mani, ni leswaku i munhu wihi, hikuva i xidyohi.” 40Yesu a n'wi hlamula, a ku eka yena: “Simoni, ndzi ni lexi ndzi nga ta ku byela xona,” yena a ku: “Vulavula, mufundhisi.”
41“A ku ri ni mufuwi loyi vanhu vambirhi ingi va ri ni nandzu eka yena. Un'wana a a ri ni nandzu wa macheleni ya ntlhanu wa madzana, un'wana wa ntlhanu wa makume. 42Kakuloko va pfumala lexi va nga ta riha ha xona, a va tshikela havambirhi. Wa nga ndzi byela, xana hi wihi exikarhi ka vona la nga ta n'wi rhandza ngopfu-ke?” 43Simoni a hlamula, a ku: “Hi la nga tshikeriwa leswo tala.” Yesu a ku eka yena: “U vula swona.” 44Kutani a rhendzelekela ka wansati, a ku eka Simoni: “Nsati loyi, wa n'wi vona-ke? Ndzi nghene endlwini ya wena, a ku ndzi hanga mati ndzi hlamba milenge; yena u tsakamisile milenge yanga hi minyembeti, a hlangula hi misisi ya nhloko yakwe. 45A ku ndzi ntswontswanga; loyi, ka ha ri mpfhuka ndzi nghena, a nga tshikanga ku ndzi ntswontswa milenge. 46A ku ndzi totanga nhloko hi mafurha; loyi u totile milenge ya mina hi mafurha. 47Hikwalaho ndzi ri eka wena; swidyoho swa yena leswo tala swi rivaleriwile, hikuva u rhandzile ngopfu; kambe la nga tshikeriwa lexitsongo u rhandza kutsongo.” 48Kutani a ku eka wansati: “U rivaleriwile swidyoho swa wena.”
49Lava tshameke eswakudyeni na yena, va sungula ku vilela etimbilwini ta vona, va ku: “Loyi i mani la rivalelaka vanhu swidyoho?” 50Kambe Yesu a ku eka wansati: “Ku pfumela ka wena ku ku hanyisile, famba hi ku rhula.”
Currently Selected:
LUKA 7: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
