LUKA 6
6
Ta Savata.
1Hi siku ra Savata leri vuriwaka lera vumbirhi eka lera ku sungula, Yesu a hundza exikarhi ka mavele kutani vadyondzisiwa va yena va tshova min'oko, va swoswa hi mandla, va dya. 2Vafarisi van'wana va ku eka vona: “Mi endlela yini leswi nga faneriki ku endliwa hi Savata?” 3Yesu a va hlamula, a ku: “Xana a mi hlayanga leswi nga endliwa hi Davhida siku a twaka ndlala ni lava ngi a ri na vona? 4Hilaha a ngheneke endlwini ya Xikwembu, a teka swinkwa swa mhamba, a dya, a nyika ni lava ngi a ri na vona, hambi swi nga faneriki ku dyiwa hi vanhu, loko va nga ri vaprista ntsena.” 5Kutani a ku eka vona: “N'wana wa Munhu u fuma na rona Savata.”
6Hi siku rin'wana ra Savata, Yesu a nghena esinagogeni a dyondzisa; kutani munhu a a ri kona, loyi voko ra yena ra swinene ri khwanyaleke. 7Vatsari ni Vafarisi va n'wi siya, va languta xana u ta n'wi hanyisa hi Savata, leswaku va kuma lexi va nga n'wi hehlaka ha xona. 8Kambe a a tiva miehleketo ya vona, kutani a ku eka munhu wa voko ro khwanyala: “Pfuka, u yima exikarhi.” 9A pfuka a yima. Yesu a ku eka vona: “Ndzi ta mi vutisa mhaka: Xana hi siku ra Savata ku lulame xihi, ku endla swinene, kumbe ku endla swo biha; ku hanyisa munhu, kumbe ku n'wi dlaya?” 10Kavaloko a va rhalarhala hinkwavo a ku eka munhu loyi: “Tshambuluta voko ra wena”; a endlisa sweswo, kutani voko ra yena ri ololoka, ri va rinene tanihi lerin'wana. 11Kwalaho va tala vukari, va kanela swin'we leswi va nga ta swi endla eka Yesu.
Ta ku hlawuriwa ka vaapostola lava khume na vambirhi; ku horisiwa vavabyi.
12Emasikwini lawa Yesu a ya entshaveni ku ya khongela; kutani a tshama a khongela Xikwembu vusiku hinkwabyo. 13Loko ri xile, a vitana vadyondzisiwa va yena, kutani a hlawula xikarhi ka vona lava khume na vambirhi; valavo a va thya vaapostola (varhumiwa). 14I Simoni, loyi a n'wi thyaka Petro, na Andriya makwavo, na Yakobo, na Yohane, na Filipi, na Bartolomi, 15na Matewu, na Tomasi, na Yakobo, n'wana Alfiya, na Simoni la nga thyiwa Muhiseki; 16na Yuda makwa Yakobo, na Yudasi Iskariyota, la nga hundzuka muxengi.
17Kuteloko a rhelele na vona entshaveni, a yima erivaleni, kutani vunyingi bya vadyondzisiwa va yena, ni vunyingi lebyikulu bya vanhu lava pfaka etikweni hinkwaro ra Yudiya, na Yerusalema, ni matlhelo ya Tiri na Sidoni, a va tile ku n'wi yingisa ni ku horisiwa emavabyini ya vona; 18ni lava karhatiweke hi mimoya leyo biha, na vona a va horisiwa. 19Vunyingi hinkwabyo a byi rhandza ku n'wi khumba, hikuva matimba a ma tshama ma huma eka yena, ma va horisa hinkwavo.
Ta Yesu loko a dyondzisa entshaveni.
20Kutani Yesu a tlakusa mahlo, a languta vadyondzisiwa va yena, a ku: “Mi katekile n'wina swisiwana, hikuva ku fuma ka Xikwembu ku le ka n'wina. 21Mi katekile n'wina mi nga ni ndlala sweswi, hikuva mi ta xurhisiwa. Mi katekile n'wina mi rilaka sweswi, hikuva mi ta tsaka. 22Mi ta va ni ku kateka siku vanhu va mi vengaka, va mi humesaka exikarhi ka vona, va mi rhuketelaka, ni loko va sandza vito ra n'wina tanihi loko ingi ri bihile, hikwalaho ka N'wana wa Munhu. 23Emikarhini yoleyo, tsakani mi tsakisisa, hikuva hakelo ya n'wana yi ta va leyikulu etilweni naswona vatata wa vona va endlisile sweswo eka vaprofeta.
24“Kambe mi ni khombo n'wina vafuwi, hikuva mi vonile ku chaveleriwa ka n'wina. 25Mi ni khombo n'wina mi xurheke, hikuva mi ta va ni ndlala; mi ni khombo n'wina mi hlekaka sweswi, hikuva mi ta rila, mi va mi kolola. 26Mi ni khombo n'wina siku vanhu hinkwavo va mi dzunisaka, hikuva vatata wa vona va endlisile sweswo eka vaprofeta va mavunwa.
27“Kambe ndzi ri eka n'wina lava ndzi yingisaka: Rhandzani valala va n'wina, mi endla swinene eka lava mi vengaka. 28Mi katekisa lava mi rhukanaka, mi khongelela lava mi pfukelaka matimba. 29La ku phakataka rhama, u n'wi kangatela ni rin'wana; la ku tekelaka nguvu, u nga n'wi aleli ni xingubyana. 30Nyika un'wana ni un'wana la kombelaka eka wena; ni loko munhu a ku tekela swa wena, u nga tshuki u swi kombela eka yena. 31Leswi mi rhandzaka leswaku vanhu va mi endlisa xiswona, va endliseni xiswoleswo na n'wina. 32Hikuva loko mi rhandza lava mi rhandzaka ntsena, ku khensiwa ka n'wina ku ta va kwihi xana? Kasi vadyohi na vona, va rhandza lava va va rhandzaka. 33Kutani loko mi endla swinene eka lava mi endlaka swinene, ku khensiwa ka n'wina ku ta va kwihi xana? Kasi vadyohi, na vona, va endlisa sweswo. 34Ni loko mi lombana ni lava mi tshembaka leswaku mi ta engeta mi teka eka vona, ku khensiwa ka n'wina ku ta va kwihi xana? Kasi vadyohi, na vona, va lombana ni vadyohi, va ta engeta va kuma leswi ringanaka swa vona. 35Kambe n'wina, rhandzani valala va n'wina, mi endla vanhu swinene, mi lomba mi nga tshembi ku ta tlheriseriwa, kutani ku hakeriwa ka n'wina ku ta va lokukulu; mi ta va vana va La nge henhlahenhla, hikuva yena u ni tintswalo eka lava nga khensiki ni ka lavo biha. 36Kutani sweswi mi va ni nsovo kukotisa leswi, Tata wa n'wina, na yena a nga ni nsovo.
37“Kambe mi nga avanyisi leswaku mi nga ti avanyisiwa; mi nga vekeli van'wana milandzu, leswaku na n'wina mi nga ti vekeriwa milandzu; tsetselelanani, kutani mi ta tsetseleriwa. 38Hananani, mi ta hananiwa; va ta mi nyika exifuveni hi mpimo lowukulu, lowu congiweke, lowu hlunguhliweke, lowu halakaka; hikuva ku ringanisa loku mi ringanisaka van'wana hakona, mi ta ringanisiwa hakona na n'wina.”
39A engeta a va byela xifaniso, a ku: “Xana lowo fa mahlo a nga swi kota ku fambisa un'wana la feke mahlo xana? Xana a va nga weli ekheleni havambirhi xana? 40Mudyondzisiwa a nga tlurisi hi vukulu mufundhisi wa yena; kambe mudyondzisiwa un'wana ni un'wana la hetisekeke u ta va tanihi mufundhisi wa yena.
41“U langutela yini xilavi lexi nga le tihlweni ra makwenu, kasi a ku tsundzuki ntsandze lowu nga kona etihlweni ra wena? 42Kumbe u nga vurisa ku yini eka makwenu, u ku: ‘Tshika, ndzi pfuta xilavi etihlweni ra wena,’ kasi wena a ku voni ntsandze lowu nga le tihlweni ra wena? N'wamanyunyu, rhanga u pfuta ntsandze lowu nga le tihlweni ra wena, hilaha u nga ta vona ku pfuta xilavi lexi nga le tihlweni ra makwenu.
43“A ku na murhi lowunene lowu vekaka mihandzu leyo biha, ni loko wu ri murhi lowo biha lowu vekaka mihandzu leyo nandziha. 44Kunene, murhi wun'wana ni wun'wana wu tiviwa hi mihandzu ya wona. Hikuva makuwa ma nga ka ma nga khiwi emitweni, ni vana va vhinya, va nga ka va nga khiwi eswigatlwini. 45Munhu lonene u humesa leswinene exumeni lexinene lexi nga embilwini ya yena; munhu lowo biha u humesa leswo biha exumeni lexo biha xa mbilu ya yena; hikuva nomu wu vulavula hi leswi mbilu yi teleke swona.
46“Xana mi ndzi vulela yini: ‘Hosi, Hosi,’ kasi a mi endli leswi ndzi mi byelaka swona? 47Un'wana ni un'wana la taka eka mina, kutani a yingisa marito ya mina, a va a ma endla, ndzi ta mi ringanisela la fanaka na yena. 48U fana ni munhu la akaka yindlu; yindlu leyi, ku nga te loko a ake masungulo, a cele khele, a yi sungula etambeni; kutani, kakuloko xihuhuri xi ta, ni loko boboma ri ba yindlu leyi, a yi tsekatsekanga, hikuva yi akiwile swinene. 49Kambe la yingisaka, kutani a nga endli, a fana ni munhu la akeke yindlu ya yena esaveni, yi nga ri na masungulo; kungakuloko boboma ri yi ba, yi hatlisa ku wa, kutani ku lova ka yindlu leyi ku va lokukulu.”
Currently Selected:
LUKA 6: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
