LUKA 9

Ta ku rhumiwa ka vaapostola va khume na vambirhi.

1Yesu a hlengeleta vadyondzisiwa va yena va khume na vambirhi, kutani a va nyika matimba ni vuhosi ehenhla ka mademona hinkwawo, ni matimba ya ku horisa mavabyi. 2Kutani a va rhuma ku ya vula ku fuma ka Xikwembu ni ku hanyisa vavabyi. 3A ku eka vona: “Loko swi ri swa ndlela, mi nga tshuki mi longa nchumu, ni loko yi ri nhonga, ni loko wu ri nkwama, kumbe vuswa kumbe mali; na swona, mi nga teki tinguvu timbirhi. 4Kutani yindlu yihi ni yihi leyi mi nga ta nghena eka yona, tshamisani kona, mi ko mi suka. 5Kambe lava nga mi amukeriki, kutakuloko mi huma emutini wolowo, mi phumunha ntshuri wa milenge ya n'wina, leswaku byi va vumbhoni eka vona.” 6Kwalaho va huma, va famba hi miti ni swimitana, va ri karhi va dyondzisa Evhangeli, va horisa vavabyi hinkwako.

Heroda.

7Hosi Heroda a twa hinkwaswo leswi endliweke hi Yesu, kutani a tshuka ngopfu, hikuva van'wana a va ku: “Yohane u pfukile eku feni.” 8Van'wana va ku: “Eliya u humelele,” van'wana va ku: “Un'wana wa vaprofeta va khale u pfukile eku feni.” 9Kambe Heroda a ku: “Loko a ri Yohane ndzi n'wi tsemile nhloko; a nga va mani loyi ndzi twaka timhaka ta yena letonghasi?” Kutani a a rhandza ku n'wi vona.

Ta ku andzisiwa ka swinkwa.

10Kuteloko vaapostola va tlherile, va byela Yesu hinkwaswo leswi va swi endleke, kutani a va teka, a ya hitlhelo emananga, ekusuhi ni muti lowu vuriwaka Betsayida. 11Kuteloko vunyingi byi swi tivile, va n'wi landza, kutani a va amukela, a va byela timhaka ta Xikwembu, a horisa lava lavaka ku horisiwa.

12Kakuloko dyambu ri lava ku pela, lava khume na vambirhi va ta eka yena, va ku: “Tlherisa vunyingi leswaku va ta tiva ku ya emitini ni le swimitaneni leswi hi rhendzeleke, leswaku va ya kuma byetlelo ni swakudya kona, hikuva la i mananga.” 13Kambe a ku eka vona: “Va phameleni mi ri n'wina.” Vona va ku: “A hi na nchumu loko ku nga ri ntlhanu wa swinkwa ni tinhlampfi timbirhi, loko swi nga ri leswaku hi ya xavela vanhu lava hinkwavo swakudya!” 14Hikuva a va lava ku va vanhu va ntlhanu wa makume ya madzana. Kambe a ku eka vadyondzisiwa va yena: “Va tshamisiseni, hi mitlawa ya ntlhanu wa makume.” 15Kutani va endlisa sweswo, va va tshamisisa hinkwavo. 16Kutani a teka swinkwa swa ntlhanu, ni tinhlampfi timbirhi, a languta ehenhla, a khensa, kutani a phema swinkwa, a nyika vadyondzisiwa va yena leswaku va avela mitshungu. 17Kutani va dya, va xurha hinkwavo; kutani va rhola mahlanhla lama seleke, swi ri swirhundzu swa khume na swimbirhi.

N'wana wa Munhu i mani?

18Kakuloko a khongela etlhelweni, vadyondzisiwa va hlengeletana eka yena; kutani a va vutisa, a ku: “Vanhu va ri ndzi mani xana?” 19Va hlamula, va ku: “Van'wana va ri: U Yohane Mukhuvuri; van'wana va ri: U Eliya; kambe van'wana va ri: Un'wana wa vaprofeta va khale u pfukile eku feni.” 20Kutani a ku eka vona: “N'wina-ke, mi ri ndzi mani?” Simoni Petro a hlamula, a ku: “U Kriste wa Xikwembu.” 21Kutani a va laya ngopfu leswaku va nga tshuki va byela munhu mhaka leyi. 22Kambe a ku: “Swi fanele leswaku N'wana wa munhu a twisiwa ku vaviseka lokukulu, a soriwa hi vakulu ni vaprista lavakulu ni vatsari, a dlawa, kutani a pfuka eku feni hi siku ra vunharhu.”

Ta ku landza Yesu.

23Kambe a va byela hinkwavo, a ku: “Kungakuloko un'wana a rhandza ku ndzi landza, a a titshike, a tirhwexa xihambano xa yena hi siku rin'wana ni rin'wana, kutani a ndzi landza. 24Hikuva la rhandzaka ku hlayisa vutomi bya yena, u ta lahlekeriwa hi byona, kambe la lahlekeriwaka hi vutomi bya yena hikwalaho ka mina, u ta byi hlayisa. 25Loko swi ri sweswo, munhu swi nga n'wi pfuna yini ku fuwa misava hinkwayo, loko a tilovisa, kumbe loko a tionha. 26Hikuva un'wana ni un'wana la khomiwaka hi tingana hikwalaho ka mina ni timhaka ta mina, N'wana wa Munhu u ta khomiwa hi tingana hikwalaho ka yena, siku a taka eku vonakaleni ka yena ni ka Tata wa yena, ni ka tintsumi leto kwetsima. 27Ndzi vurisile ndzi ri eka n'wina, van'wana va kona eka lava yimeke kwala lava nga tiki nantswa rifu, va nga si vona ku fuma ka Xikwembu.”

Ta ku hundzuka ka Yesu entshaveni.

28Endzhaku ka timhaka leti, loko masiku ma lava ku endla ntlhanu na manharhu, Yesu a famba na Petro, na Yohane, na Yakobo, a tlhandlukela entshaveni ku ya khongela. 29Kakuloko a ha khongela, xivumbeko xa mombo wa yena xi hundzuka, tinguvu ta yena ti basa, ti vangama. 30Kutani ku humelela vavanuna vambirhi lava vulavulaka na yena; a a ri Muxe na Eliya. 31Va humelele eku vonakaleni; a va vulavula ta ku huma ka yena, loku a nga ta suka hakona eYerusalema. 32Kambe Petro ni lava ngi a ri na vona, a va khomiwile hi vurhongo; kakuloko va pfuka, va vona ku vonakala ka yena, ni vavanuna lavambirhi, lava ngi va ri na yena. 33Kakuloko va n'wi sukela, Petro a ku eka Yesu: “N'wini, swi nga saseka loko hi tshama kwala; a hi akeni mitsonga minharhu; wun'wana wu va wa wena, wun'wana wa Muxe wun'wana wa Eliya,” kambe a a nga tivi lexi a xi vulaka. 34Kakuloko a vurisa sweswo, papa ri humelela, ri va funengeta; kuteloko va ha ku nghena epapeni, vadyondzisiwa va khomiwa hi ku chava. 35Kutani rito ri huma epapeni, ri ku: “Hi loyi N'wananga, loyi ndzi n'wi rhandzhaka; n'wi yingiseni.” 36Kuteloko rito leri ra ha vulavula, Yesu a voniwa a ri swakwe. Kutani vadyondzisiwa va miyela, va nga byeri munhu, leswi va swi voneke emikarhini leyi.

Ta Yesu loko a horisa munhu loyi ngi a ri ni demona.

37Siku leri tlhandlamaka, loko va ngirimele entshaveni, vunyingi lebyikulu byi hlangana na yena. 38Kutani munhu un'wana exikarhi ka vunyingi a huwelela, a ku: “Mufundhisi, ndza ku khongela, languta n'wananga hikuva i wa swakwe ka mina. 39Moya wu n'wi khoma, kutani a tshuka a huwelela, wu n'wi xanisa hi matimba, wu n'wi tlutlisa xikhuvi, kambe wu ala ku n'wi sukela loko wu n'wi karhatile ngopfu. 40Ndzi komberile ka vadyondzisiwa va wena, ndzi ku va wu hlongola, kambe va tsandzekile.” 41Yesu a hlamula, a ku: “Ha! Rixaka leri nga pfumeriki, lero homboloka ndzi ta va na n'wina ku yisa kwihi, ndzi ta mi tsetselela ku ya fika kwihi? Tisa n'wana wa wena kwala.”

42Kakuloko a tshinela, demona ri n'wi tlatlalata, ri n'wi xanisa hi matimba, kambe Yesu a tshinya moya lowo biha, kutani a horisa n'wana, a n'wi nyika tata wa yena. 43Kutani hinkwavo va hlamala vuhosi lebyikulu bya Xikwembu.

44Kakuloko hinkwavo va hlamala hinkwaswo leswi Yesu a swi endleke, a byela vadyondzisiwa va yena, a ku: “Loko mi ri n'wina, yingisisani swinene marito lawa: N'wana wa Munhu u ta nyiketiwa emavokweni ya vanhu.” 45Kambe a va twisisanga marito lawa, a ma siveriwa ka vona, leswaku va nga tshuki va ma twisisa; kutani va chava ku n'wi vutisa mhaka leyi.

Lonkulu i mani?

46Kutani ku humelela ku kanetana exikarhi ka vona, ku tiva la nga nkulukumba wa vona. 47Kuteloko Yesu a vona miehleketo ya timbilu ta vona, a teka xihlangi, a xi veka ekusuhi na yena, kutani a ku eka vona: 48“Un'wana ni un'wana la amukelaka xihlangi lexi hi vito ra mina, wa ndzi amukela; kutani la ndzi amukelaka, u amukela la ndzi rhumeke. Hikuva lontsongo exikarhi ka n'wina hinkwenu, hi yena la nga ta va lonkulu.”

49Kutani Yohane a vulavula, a ku: “N'wini, hi vonile un'wana la hlongolaka mademona hi vito ra wena, kutani hi n'wi arisile, hikuva a nga ku landzi swin'we na hina.” 50Yesu a ku eka yena: “Mi nga tshuki mi n'wi arisa hikuva la nga lwiki na hina wa hi lwela.”

Ta Vasamariya loko va ala ku amukela Yesu.

51Kakuloko nkarhi wa ku tlakusiwa ka yena wu lava ku fika, a tiyisa mombo wa yena ku ya Yerusalema. 52Kutani a rhuma tintsumi leswaku ti n'wi rhangela emahlweni; kutani va suka, va nghena emutini wa Vasamariya ku n'wi lunghisela kona. 53Kambe a va n'wi amukelanga, hikuva mombo wa yena a wu kongoma eYerusalema. 54Vadyondzisiwa va yena, Yakobo na Yohane, loko va swi vona, va ku: “Hosi, xana wa swi rhandza leswaku hi ku, ndzilo wu xika hi le tilweni, wu va hisa, tanihi leswi Eliya a nga swi endla xana?” 55Kambe Yesu a rhendzeleka, a va laya, a ku: “A mi wu tivi moya lowu mi nga na wona! 56Hikuva N'wana wa Munhu u tile, ku nga ri ku lovisa vanhu kambe ku va hlayisa.” Kutani va ya emutini wun'wana.

Ta ku landza Yesu.

57Kakuloko va ha famba endleleni, munhu a ku eka yena: “Hosi, ndzi ta ku landza hinkwako laha u nga ta ya kona.” 58Kambe Yesu a ku eka yena: “Vahlati va ni micele, ni tinyanyana ta tilo ti ni swisaka, kambe N'wana wa Munhu a nga na laha a nga seketelaka nhloko ya yena kona.”

59Yesu a ku eka un'wana: “Ndzi landze.” Yeloyi a ku: “Hosi, wanga ndzi pfumelela ndzi rhanga ndzi ya lahla tatana.” 60Yesu a ku eka yena: “Tshika vafi va lahla vafi va vona; kambe wena famba u ya vula ku fuma ka Xikwembu.”

61Un'wana a ku: “Ndzi ta ku landza. Hosi, kambe ndzi pfumelele ndzi rhanga ndzi ya lela ve ekaya ka mina.” 62Yesu a ku eka yena: “La vekaka voko ra yena exikon'wini, kutani a rhendzeleka a languta endzhaku, a nga lulameri ku fuma ka Xikwembu.”

Currently Selected:

LUKA 9: TSO29

Highlight

Copy