LUKA 5

Ta ku phasiwa ka tinhlampfi; Yesu a vitana vadyondzisiwa lavo rhanga.

1Kakuloko a yimile eribuwini ra tiva ra Genesareta, ntshungu wu n'wi susumeta ku yingisa rito ra Xikwembu; 2kutani a vona mabarika mambirhi ma yimile eribuwini ra tiva; vaphasi a va humile eka wona, va hlantswa tinkoka ta vona. A nghena eka rin'wana leri nga ra Simoni, 3kutani a n'wi kombela leswaku a ri tshineta kutsongo eribuwini; kutani loko a tshamile ebarikeni, a dyondzisa mitshungu.

4Kuteloko a hetile ku vulavula, a ku eka Simoni: “Tlutelani exidziveni, mi hoxa tinkoka ta n'wina, mi phasa.” 5Kambe Simoni a hlamula, a ku eka yena: “N'wini, hi tirhile vusiku hinkwabyo, byi ko byi xa, a hi phasanga nchumu; kambe hi ku vula ka wena, ndzi ta hoxa rikoka.” 6Va endlisa sweswo kutani va phasa tinhlampfi leto tala, rikoka ri ko ri handzuka. 7Kutani va koweta vanakulobye lava nga ebarikeni rin'wana leswaku va ta, va ta va pfuna. Vona va ta, kutani va tata mabarika mambirhi walawo ma ko ma lava ku mbombomela. 8Simoni Petro, kuteloko a swi vona, a khinsama emilengeni ya Yesu a ku eka yena: “Hosi, suka eka mina hikuva ndzi mudyohi.” 9A a vula sweswo, hikuva a a chava, swin'we ni hinkwavo lava ngi va ri na yena, hikwalaho ka ku phasa ka tinhlampfi leti; a swi ri tano na Yakobo na Yohane, vana va Zebediya, lava ngi va ri vanakulobye va Simoni. 10Kutani Yesu a ku eka Simoni: “U nga chavi, ku sungula sweswi, u ta va muphasi wa vanhu lava hanyaka.” 11Kuteloko va tlherisile mabarika eribuwini, va siya hinkwaswo, va n'wi landza.

Ta ku horisiwa ka wa nhlokonho.

12Kakuloko a ri emutini wun'wana wanuna la teleke nhlokonho, loko a vona Yesu, a tiwisa ehansi emombyeni, a n'wi khongela, a ku: “Hosi, loko u swi rhandza, u nga ndzi basisa.” 13Yena a tshambuluta voko, a n'wi khumba, a ku: “Ndza swi rhandza, basisiwa!” Hi nomu lowu, nhlokonho yi suka eka yena. 14Kutani a n'wi lerisa, a ku: “U nga tshuki u byela munhu, kambe famba u ya tikombisa eka muprista, u khensa ku basisiwa ka wena hilaha Muxe a leriseke hakona, byi ta va vumbhoni eka vona.” 15Kutani ku twakala ka yena ku engeteleka ku hangalaka; vunyingi lebyikulu byi ta ku n'wi yingisela ni ku horisiwa hi yena mavabyi ya vona. 16Kambe yena a tiyela emananga, a ya khongela.

Ta ku horisiwa ka munhu la khwanyaleke swirho.

17Siku rin'wana, Yesu a a dyondzisa; Vafarisi ni vadyondzisi va nawu lava humeke emitini hinkwayo ya Galeliya na Yudiya na Yerusalema, a va ri kona; kutani matimba ya Hosi ma tikombisa ku va horisa. 18Kutani ku ta vavanuna lava rhwalaka hi masangu munhu la khwanyaleke swirho; va ringeta ku n'wi nghenisa endlwini ku n'wi veka emahlweni ka Yesu. 19Kakuloko va nga kumi hilaha va nga n'wi nghenisaka hakona hikwalaho ka vunyingi, va khandziya ehenhla ka yindlu, va n'wi nembeleta exikarhi emahlweni ka Yesu, a ri emasangwini ya yena. 20Yesu, kuteloko a vona ku pfumela ka vona, a ku eka yena: “Munhu, u rivaleriwile swidyoho swa wena.” 21Kutani vatsari ni Vafarisi va sungula ku kanela etimbilwini ta vona, va ku: “Loyi, i mani, la vulaka swisandzu? I mani la nga rivalelaka munhu ku dyoha, loko xi nga ri Xikwembu ntsena?” 22Kambe Yesu, hi ku tiva miehleketo ya vona, a va hlamula, a ku: “Mi kanetela yini sweswo etimbilwini ta n'wina xana? 23Xana loko ku ri ku vula: ‘U rivaleriwile swidyoho swa wena,’ kumbe: ‘Yima u famba,’ ku olova xihi xana? 24Sweswi, mi ta tiva leswaku N'wana wa Munhu u ni matimba emisaveni ku rivalela vanhu swidyoho.” Kutani a ku eka la khwanyaleke swirho: “Ndzi ri eka wena: Yima, u teka masangu ya wena, u famba endlwini ya wena.” 25Kutani a hatlisa a yima emahlweni ka vona, a teka masangu lawa a a etleleke eka wona, a tifambela endlwini ya yena, a ri karhi a dzunisa Xikwembu. 26Kwalaho va hloleriwa hinkwavo, va dzunisa Xikwembu, va tala hi ku chava, va ku: “Namuntlha hi vonile swihlamariso.”

Ta ku vitaniwa ka Levhi.

27Endzhaku ka swona, a huma, kutani a vona muluvisi lo va nge i Levhi, a tshamile endlwini ya ndzuvo, a ku eka yena: “Ndzi landze.” 28Kutani yena a tshika hinkwaswo, a suka, a n'wi landza. 29Kutani Levhi a n'wi endlela nkhuvo lowukulu endlwini ya yena, kambe a ku ri ni ntshungu lowukulu wa valuvisi ni wa van'wana lava tshameke na vona eswakudyeni. 30Kutani vatsari ni Vafarisi va hleva, va ku eka vadyondzisiwa va yena: “Xana mi dyela yini ni valuvisi ni vadyohi, mi nwela yini na vona?” 31Yesu a va hlamula, a ku: “Lava hanyaka a va lavi n'anga, kambe yi laviwa hi lava vabyaka. 32A ndzi telanga ku vitana lava lulameke eku hundzukeni, kambe vadyohi.”

Ta ku titsona swakudya.

33Kutani va ku eka yena: “Xana vadyondzisiwa va Yohane va titsonela yini hakanyingi swakudya, va endlela yini ni swikhongelo; Vafarisi, na vona, va endlisela yini sweswo? Kasi vadyondzisiwa va wena va dya, va nwa?” 34A ku eka vona: “Xana mi nga ku: ‘Vanakulobye va muteki va fanela ku titsona swakudya loko muteki a ha ri na vona’ xana? 35Kambe nkarhi wa ta lowu muteki a nga ta susiwa eka vona, hi kona va nga ta titsona swakudya emikarhini yoleyo.” 36A engeta a va byela xifaniso, a ku: “A ku na munhu la nga handzulaka xitiva eka nguvu leyintshwa, a xi rhungela eka leyi hlakaleke; loko va endlisa sweswo, lexintshwa xi ta handzula lexa khale, hikuva na xona xitiva lexintshwa a xi pfumelelani ni lexi hlakaleke. 37A ku na munhu la chelaka vhinyo leyintshwa eminkwameni ya khale; hikuva vhinyo leyintshwa, yi nga handzula mikwama, yi halaka; mikwama na yona yi handzuka. 38Kumbe vhinyo leyintshwa yi cheriwa eminkwameni leyintshwa kutani yi hlayisana swin'we na yona. 39Kambe a ku na munhu, kungakuloko a nwile vhinyo ya khale, a nga hatlisaka a lava leyintshwa, hikuva u ta ku: ‘Ya khale yi tlula leyintshwa hi ku nandziha.’ ”

Currently Selected:

LUKA 5: TSO29

Highlight

Copy