VAEFESA 4
4
Vun'we bya vupfumeri.
1Hikwalaho-ke, mina ndzi nga mubohiwa eHosini ndza mi khongotela, ndzi ri: Fambani hi mukhuva lowu fanelaka ku vitiwa loku mi vitiweke hakona, 2hi ku titsongahata hinkwako ni vunene, ni ku yingisela, mi ri karhi mi yingiselana hi rirhandzu, 3mi chivirika ku hlayisa vun'we bya Moya hi xiboho xa ku rhula. 4Ku ni miri wun'we ni Moya wun'we, kukotisa leswi mi vitaneriweke xitshembo xin'we eku vitiweni ka n'wina; 5ku ni Hosi yin'we, ni ku pfumela kun'we, ni ku khuvuriwa kun'we; 6ni Xikwembu xin'we, Tata wa hinkwavo, la nga ehenhla ka hinkwavo, ni le ka n'wina hinkwenu.
7Kambe tintswalo ti nyikiwile un'wana ni un'wana wa hina hi mpimo wa ku nyika ka Kriste, 8 hilaha va nga te: “Kuteloko a tlhandlukele ehenhla, u byisile vakhomiwa, u nyike vanhu tinyiko.” 9Kambe leswi va nge “u tlhandlukile”, hi leswo yini, loko swi nga ri leswaku a rhangile a xikela etindhawini leti nga ehansi ka misava? 10Loyi ingi a xikile, wa ha ri yena yeloyi a tlhandlukeke ehenhla ka matilo hinkwawo, hileswaku a tata swilo hinkwaswo.
11Kutani wa ha ri yena la nyikeke van'wana va va vaapostola, van'wana vaprofeta van'wana vavuri va Evhangeli, van'wana varisi ni vadyondzisi, 12va ta hetisa vakwetsimi, va endla ntirho wa vurisi, va akisa miri wa Kriste, 13hi ta kondza hi fika hinkwerhu evun'weni bya vupfumeri ni bya ku tiva N'wana wa Xikwembu; ni le vukulukumbeni bya wanuna la hetisekeke; ni le mpin'weni wa xiyimo lexi hetisekeke xa Kriste, 14hileswaku hi nga ha ti tshama hi va swihlangi leswi nga ni ku kanakana ni ku tsekatsekisiwa hi mheho yihi ni yihi ya dyondzo, hi ku dyelela ka vanhu, ni mano ya vona yo hambukisa hi mavunwa; 15kambe a hi endleni leswinene hi rirhandzu, hi ta tiva ku kula ematlhelweni hinkwawo eka loyi a nga nhloko, yena Kriste, 16yeloyi miri hinkwawo wa yena lowu hlanganeke swinene, ni ku tiyisana swinene hi ku hlangana ka swirho swa wona, wu kuma ku kula hi matimba lama enetaka xirho xin'wana ni xin'wana, leswaku wu akiwa erirhandzwini.
Ku hanya ka vakwetsimi ni ku hanya ka vahedeni.
17Lexi ndzi xi vulaka, ni lexi ndzi xi tiyisaka eHosini, hileswaku mi nga tshuki ma ha famba kukotisa vahedeni lava fambaka hi miehleketo ya hava ya vona, 18volavo va nga nyamisiwa emiehleketweni ya vona, kutani va le kule ni vutomi bya Xikwembu hi ku ka va nga tivi nchumu hikwalaho ka ku nonon'hwa ka timbilu ta vona. 19Kutani a va ha twi nchumu, va tinyiketile vuhunguki, ku tirha vumbhisa hinkwabyo, hi ku navela loku nga korwiki. 20Kambe loko mi ri n'wina, a mi dyondzanga sweswo eka Kriste, loko kunene mi n'wi yingisile, 21ni loko mi dyondzisiwe eka yena hilaha ntiyiso wu nga eka Yesu hakona, 22hileswaku, loko ku ri ku famba ka n'wina ka khale, mi tintshunxa eka munhu wa khale, la onhiweke hi ku navela loku dyelelaka, 23ni leswaku mi hundzuka lavantshwa emoyeni wa miehleketo ya n'wina; 24ni leswaku mi ambala munhu lontshwa, la vumbiweke hi xifaniso xa Xikwembu, eku lulameni ni le ku kwetsimeni ka ntiyiso.
25Hikwalaho-ke, tshikani vunwa, mi vulavula leswi tiyeke, un'wana ni un'wana eka warikwavo, hikuva hi swirho van'wana eka van'wana.
26 Kungakuloko mi kariha, mi nga tshuki mi dyoha; dyambu ri nga peleli vukari bya n'wina; 27mi nga muki mi nyika Diyavulosi nkarhi.
28Loyi a nga tshama a yiva, a a nga ha engeti a yiva, kambe a a tikarhate ku tirha leswinene hi mavoko ya yena a ta tiva ku nyika eka loyi a nga evusiwaneni.
29Ku nga tshuki ku huma emilon'wini ya n'wina rito ra tingana, hambi ri ri rin'we, kambe a ku hume rito ro nandziha ra ku akisa hi mfanelo, ri nga rito leri humeselaka lava yingisaka vunene byin'wana. 30Kutani mi nga tshuki mi khomisa Moya lowo Kwetsima wa Xikwembu tingana, wolowu mi funghiweke ha wona siku ra ku kutsuriwa ka n'wina.
31Ku vilela hinkwako, ni ku hlundzuka hinkwako, ni ku kariha hinkwako, ni pongo hinkwaro, ni ku hlevana hinkwako, ni mona hinkwawo, a swi susiwe exikarhi ka n'wina, 32kambe mi yingiselana mi tsetselelana, mi rivalelana, kukotisa leswi Xikwembu, na xona, xi mi rivaleleke ha Kriste.
Currently Selected:
VAEFESA 4: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.