VAEFESA 3
3
Ntirho lowu Pawulo a vekeriweke wona.
1Hikwalaho-ke, mina Pawulo, ndzi nga mubohiwa wa Yesu Kriste hikwalaho ka n'wina vahedeni. 2Loko ngi mi yingisile ku averiwa ka tintswalo ta Xikwembu leti ndzi nga nyikeriwa n'wina, 3hi laha ndzi tivisiweke xihundla lexi hi ku hlavuteriwa, kukotisa lexi ndza ha ku mi tsalelaka hi marito ma nga ri mangani; 4hilaha, loko mi hlaya, mi nga twa ku twisisa loku ndzi nga na kona eka xihundla xa Kriste. 5Xihundla xolexo a xi kombisiwanga vana va vanhu etinxakeni ti n'wanyana hilaha xi hlavuteriweke hakona emikarhini leyi, hi Moya, eka vaapostola va yena lavo kwetsima ni ka vaprofeta, 6xi nga leswaku vahedeni i vadyandzhaka swin'we ni Vaisraele va miri wu ri wun'we va ni ku averiwa kun'we eku tshembiseni ka Yesu Kriste eEvhangelini, 7yoleyo ndzi endliweke mutirheri wa yona hi ku nyika ka tintswalo ta Xikwembu leti ndzi ti nyikiweke hi mitirho ya matimba ya xona; 8mina yeloyi, ndzi nga lontsongo eka vakwetsimi hinkwavo; ndzi nyikiwile tintswalo leti ta ku tivisa vamatiko ku fuwa loku nga ringanisiwiki eka Kriste, 9ni ku vonakarisa emahlweni ka hinkwavo, ku averiwa ka xihundla lexi ngi xi fihliwile, ka hari mpfhuka wo sungula, eka Xikwembu lexi nga endla hinkwaswo, 10leswaku vutlhari bya Xikwembu lebyi mikhuva ya byona yi nga tala hilaha ku nga hlayiwiki, byi kombisiwa sweswi hi Kereke, eka vakulukumba ni ka vafumi va le matilweni, 11hi makungu lawa xi ma endleke ka hari emikarhini ya ku sungula, xi ma hetisela ha Yesu Kriste, Hosi ya hina, 12yeloyi hi pfumeleriweke ha yena ku tshinelela Xikwembu hi ku tshemba, hi ku pfumela eka yena. 13Hikwalaho ndza kombela, ndzi ri: Ku nga herisiwi timbilu hi nhlomulo lowu nga ndzi humelela hikwalaho ka n'wina, hikuva i ku dzunisiwa ka n'wina.
Pawulo a khongelela vamakwavo.
14Hikwalaho ndzi khinsamaka hi matsolo emahlweni ka Tatana, 15loyi rixaka rin'wana ni rin'wana leri nga etilweni ni le misaveni ri vitaniwaka eka yena, 16ndzi kombela leswaku a mi nyika hi rifuwo ra ku kwetsima ka yena, ku tiyisiwa hi matimba emunhwini la nga xikarhi, hi Moya wa yena, 17ni leswaku Kriste a aka etimbilwini ta n'wina hi ku pfumela, 18ni leswaku, loko mi simekiwile erirhandzwini, ni loko mi tshamile emasungulweni ya rona, mi va lava twisisaka swin'we ni vakwetsimi hinkwavo, ku anama ka rona ni ku leha ka rona, ni ku enta ka rona, ni ku tlakuka ka rona, 19mi ta tiva rirhandzu ra Kriste leri tlurisaka ku tiva hinkwako, mi va mi tatiwa hi ku tala hinkwako ka Xikwembu.
20Kambe eka yena, loyi a nga endlaka ku tlurisa ngopfungopfu hinkwaswo leswi hi nga swi kombelaka, ni leswi hi nga swi ehleketaka hi matimba lama tirhaka eka hina, 21eka yena a ku ve ku kwetsima eKerekeni leyi nga eka Yesu Kriste, etinxakeni hinkwato hi mikarhi ni mikarhi. Amen!
Currently Selected:
VAEFESA 3: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
