VAEFESA 5
5
Ku hanya ka vakwetsimi.
1Hikwalaho-ke, mi va vaetisi va Xikwembu, kukotisa vana lava rhandziwaka, 2mi famba erirhandzwini kukotisa loko Kriste, na yena, a mi rhandzile, kutani u tinyiketele hina, a va mhamba ni gandzelo ra ku nun'hwela eka Xikwembu.
3Kambe loko byi ri vuoswi ni vumbhisa hinkwabyo, ni ku navela ka ku fuwa, swi nga tshuki swi vuriwa ni mavito ya swona exikarhi ka n'wina hilaha swi fanelaka vakwetsimi, 4hambi yi ri mhaka ya tingana, hambi ti ri ta vuhunguki, hambi ti ri ta mafenya, ti nga timhaka leti nga faneriki; kambe a ku twakale ku khensa, 5hikuva ma swi tiva leswaku muoswi, hambi yi ri mbhisa, ni la rhandzaka rifuwo, a nga munhu la tirhelaka swikwembu swahava, a nga ka a nga vi na ku averiwa eku fumeni ka Kriste ni Xikwembu. 6Munhu a nga tshuki a mi kanganyisa hi ku vulavula ka swahava, hikuva hikwalaho ka swona leswo, ku kariha ka Xikwembu ku ta ta ehenhla ka vanhu lava nga pfumeriki. 7Hikwalaho mi nga tshuki mi va ni mhaka na vona. 8Hikuva khale a mi ri vamunyama kambe sweswi, mi va ku vonakala eHosini; 9fambani hakona, kukoti swa vana va ku vonakala, 10(hikuva mihandzu ya ku vonakala, i vunene hinkwabyo, ni ku lulama ni ntiyiso), mi siya leswi tsakisaka Hosi; 11kambe mi nga tshuki mi va ni mhaka emitirhweni ya munyama leyo-ke mihandzu, kambe mi yi sandza: 12hikuva swi khomisa tingana loko ku vuriwa ntsena leswi va swi endlaka exihundleni. 13Kambe swilo hinkwaswo leswi sandziwaka swi kombisiwa hi ku vonakala; hikuva hinkwaswo leswi kombisiwaka, i ku vonakala. 14 Hikwalaho-ke, va nge: “Pfuka, wena la etlelaka, pfuka exikarhi ka vafi; kutani: Kriste u ta ku voninga.”
15Loko swi ri tano, tilanguteleni leswaku mi famba hi ku tianakanya, mi nga va tanihi lava nga riki na mano kambe mi va vanhu lava tlhariheke, 16hatliselani mikarhi hikuva masiku ma bihile. 17Hikwalaho-ke, mi nga tshuki mi endla hi ku rivala, kambe mi twisisa swinene leswi rhandziwaka hi Hosi. 18Kutani mi nga tshuki mi pyopyiwa hi vhinyo, hikuva yi ni vuhunguki, kambe mi tala Moya, 19mi khongotelana hi tipisalema, ni tinsimu, ni ku yimbelela swa Moya, mi yimbelelela Hosi mi vuvutela etimbilwini ta n'wina; 20mi khensa hi masiku Xikwembu Tata wa n'wina, hikwalaho ka hinkwaswo hi vito ra Hosi ya hina, Yesu Kriste. 21Titsongahateni, van'wana eka van'wana exichabyeni xa Kriste.
Ku hanyisana ka nuna ni nsati.
22N'wina vavasati, yingisani vanuna va n'wina kukotisa loko mi yingisa Hosi; 23hikuva nuna i nhloko ya wansati, kukotisa leswi Kriste, na yena, a nga nhloko ya Kereke, yena a nga Mukutsuri wa miri; 24kutani kukotisa leswi Kereke yi yingisaka Kriste, vavasati na vona, a va yingise vanuna va vona etimhakeni hinkwato.
25N'wina, vavanuna, rhandzani vasati va n'wina, kukotisa leswi Kriste, na yena, a nga rhandza Kereke, kutani u tinyikete rifu hikwalaho ka yona, 26leswaku a yi kwetsimisa, loko a yi basisile hi ku yi khuvula hi mati hi rito ra yena, 27a ta tiyimisela yona emahlweni ka yena, yi ri Kereke leyo kwetsima, leyi nga riki na xivati ni mikonya, ni loko xi ri xanchumu lexi fanaka na swona; kambe yi ri leyi nga riki na xisandzu. 28Hi mukhuva wolowo, vavanuna va fanele ku rhandza vasati va vona, kukota miri wa vona wa xiviri. La rhandzaka nsati wa yena wa tirhandza. 29Hikuva a ku si va na munhu la nga vengaka nyama ya yena, ni siku ni rin'we, kambe wa yi fihluta, wa yi kufumeta, hilaha Kriste na yena, a endlelaka Kereke hakona, 30hikuva hina hi swirho swa miri wa yena, leswi hi nga nyama ya yena, ni marhambu ya yena. 31 “Hikwalaho-ke, wanuna u ta sukela tata wa yena ni mana wa yena, a namarhela nsati wa yena, kutani hi vumbirhi bya vona yi ta va nyama yi ri yin'we.” 32Xihundla lexi xi kurile, kambe ndzi vulavurisa sweswo hi ku ringanisa Kriste ni Kereke. 33Hi sweswo na n'wina, un'wana ni un'wana a a rhandze nsati wa yena, kukotisa loko a tirhandza; kutani wansati, na yena, a a ve ni xichavo eka nuna wa yena.
Currently Selected:
VAEFESA 5: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.