Luke 11

Ndiz unꞌa tenazdoodli hubaꞌ hoontꞌoh

1ꞋEt ꞌilhoh dzin, ꞌilhoghun Jesus tenadudli. ꞋEtsul ꞌudija whe ꞌilhoghun yugha hodulꞌeh-un ꞌuyulhni, “John yugha hodulꞌehne tenaduhudli whubodalhꞌeꞌ, nyun tenazdutidli-un whuneoodilhꞌeh.”

2ꞋEt ꞌubulhni, “Nja ndudahni whe tenadoohdli,

‘NeBá yakꞌuz sinda.

Nyooziꞌ dótiꞌ.

Dahoontꞌoh whe lerwe inli,

ꞌet cha netsꞌó tooltsꞌit.

ꞋInkꞌez yakꞌuz tsꞌe hukwaꞌ ninzun dahooja la,

ndi yun kꞌut cha, whuz unꞌa za ꞌet ndúhoneh.

3ꞋAndit dzin ꞌuztiꞌulh-i, negha nínꞌaih.

4ꞋInkꞌez ꞌuyoonne bulh dulhyoh tsꞌuwhulhꞌai de,

buba whunatsꞌodoolnoh.

ꞋEt whuz unꞌa za nelubeshi neba oonaoodolnoh.

Tankꞌus uznintꞌi-un whuchꞌa neghinli.

ꞋInkꞌez ntsiꞌ-un chꞌa néghinli.’”

5ꞋInkꞌez Jesus ꞌubulhni, “Nohni nohtoh mbe ꞌuntꞌoh ookꞌeke hoonli ꞌinkꞌez tuzniz yutsꞌu tíhyalh ꞌinkꞌez ꞌudutánnelh, ‘Skꞌeke lhes ta sghu sinla! 6ꞋEt skꞌeke-un ꞌilhoghun sghu ninya. Nilhzaz de hainya, ꞌaw oogha íyosꞌalh-i lhustꞌi.’

7ꞋInkꞌez la yoh whutsꞌun idóniꞌ, ‘ꞋAw tesudinle iloh. Dati ꞌawet dánadiltsꞌut whe ꞌuntꞌoh. Suzkeh te tsꞌiyawh nenilhꞌaz. ꞋAw dunadósjaꞌ ꞌaitꞌoh. ꞋInkꞌez hoonli ngha óosꞌalh ꞌaitꞌoh.’ 8ꞋEt nohdusni, ꞌaw dunadojaꞌ ꞌaitꞌoh ꞌinkꞌez hoonli yugha óoꞌalh ꞌaitꞌoh, ookꞌeke-un ꞌuntꞌoh. ꞋEt hoontsꞌi whuz yoodulhkut za ꞌuyulhni, ꞌet huwa dunadutádalh ꞌinkꞌez ndai yukaꞌ ninzun tsꞌiyawh yugha ítalelh.

9ꞋEt whuz unꞌa nohdusni, Yakꞌusda ndai ooka yoodulhkut-i nohgha ítaꞌalh. Ookunáhta ꞌinkꞌez nahootáhꞌalh. Dati dunulhkwꞌuz ꞌinkꞌez nohba dáhaꞌ dutikwus. 10ꞋEt mbene Yakꞌusda hoonli hitsꞌu hukwa ꞌutni de, bugha whútakulh. Mbe hoonli hukwunútane, nahuhootáꞌalh. ꞋInkꞌez mbe la dati dunulkwꞌuz-un ooba dáhaꞌ dutikwus.

11Nohbáke nohtoh, ooyeꞌ lhes yutsꞌu ha ꞌutni de, ꞌaw tse yutlꞌa dóoꞌalh ꞌaitꞌoh. Kꞌus lho yutsꞌu ha ꞌutni de, ꞌaw ꞌi kꞌet tlꞌughus yutlꞌa oolelh ꞌaitꞌoh. 12Kꞌus lugok ghez yutsꞌu ha ꞌutni de, ꞌaw ꞌi kꞌet ntsiꞌ-i neoolhtꞌah-i, scorpion huyulhni, ꞌi yutlꞌa yóolhtelh ꞌaitꞌoh. 13Nohni lubeshi ꞌulhꞌenne ꞌahli, ꞌet hoontsꞌi tꞌeoonáhzun unzoo-i nohuzkeh gha tíhlelh. ꞋEt dáwhulcho-i be ꞌon nus ndo yakꞌuz nohBá yoodulhkutne, Ndoni bugha tíꞌalh.”

Ooba ꞌalhaꞌ lheꞌhootꞌohne, ꞌenne hutni, “Jesus, ꞌen netsudule ye ulhtus-i be ꞌutꞌen”

14ꞋEt ntsiꞌ-i nududeh ooyudinda-un ꞌaw yaoolhduk ꞌaitꞌoh whe Jesus dune tsꞌu ha naínanyoot. ꞋEt yutsꞌa ha naínanyoot whe dune yalhulduk-un yawhenilhduk. ꞋEt ꞌilhozdilne buba hooncha. 15ꞋEt whulohne ꞌuhutni, “Beelzebul ntsiꞌ-i nududehne bumoodih be ntsiꞌ-i nududeh-i dune yutsꞌu ha nainanyoot.” 16ꞋEt ꞌuyoonne huyoolhdzih whe huyoodulhkut, “Yakꞌuz tsꞌe whutsꞌun neba huwa ꞌitꞌen tuneꞌ tantꞌen eh, ꞌet whunenilhtun?”

17Daja huninzun-un tꞌeooninzun ꞌinka ꞌet ndúbulhni, “Keyoh whulerwe hoonli-un lhchꞌaz nehúdindil de, gak hutileh. ꞋInkꞌez ꞌilhoghun yoh dilhtsꞌine, lhchꞌaz nehúdindil de, gak hutileh. 18ꞋEt whuz unꞌa za Satan lerwe unli-i, didutchꞌoh lhchꞌaz nedinja de, ntsꞌenꞌa ookwꞌúneꞌ whutꞌen tileh? Lheꞌdahni Beelzebul be ntsiꞌ-i nududeh-i dune tsꞌu ha nánusyukw dahni. 19ꞋEt si Beelzebul be ꞌustꞌen de, ꞌet de sudahni nohni nohyeꞌke mbe be suba ntsiꞌ-i nududeh-i dune tsꞌu ha nábonuyukw? ꞋEt huwa ꞌenne bugha tꞌewhuntihzeh tankꞌus údahni! 20ꞋEt hoontsꞌi Yakꞌusda oolasga be ntsiꞌ-i nududeh-i dune tsꞌu ha nánusyukw de, ꞌet ꞌalha ꞌuhoontꞌoh Yakꞌusda whe lerwe unli-un, ꞌet nohgha whultsꞌut wheꞌ hoontꞌoh.

21ꞋEt dune ulhtus-un lhutigan huba lhadintꞌoh de, duyoh huwunli ꞌinkꞌez ndai la ꞌet yuzdla-i, ꞌaw ootꞌá ꞌonalh ꞌaitꞌoh. 22ꞋEt ꞌuyoon yanus ꞌultus-un yundílhdaꞌ ꞌet whe yuchꞌaꞌ nilhde de, ꞌet dune ye lhutigan-i yutꞌa ninintan-i tsꞌiyawh yugha ha yulya. ꞋEt hukwꞌelhꞌaz mbe la oochꞌaꞌ ninde-un ndai la ꞌet yuzdla-i tsꞌiyawh ꞌuyoonne ba lhkꞌeyanla ꞌinkꞌez butainínla.

23Mbe sulh lheꞌitꞌoh-un schꞌaz ditni wheꞌ ꞌuntꞌoh. ꞋInkꞌez mbe dune sla ꞌilhulhósdlene tsꞌiyawh yahitákulh.”

Dahooja la whe ntsiꞌ-i nududeh-i doo cha za dune buyunaidide de

24“ꞋEt ntsiꞌ-i nududeh-i dune tsꞌu ha nádide ꞌoh te, yun whudizgih-un whuz nududeh natilyis-un hukwunúta. ꞋEt ꞌaw ndoohóontꞌoh-un nalhuhooꞌal ꞌinka dichꞌoh naꞌdudútni, ‘ꞋEt mbe la ooyudisdaꞌ-un, whuz natoosjaꞌ.’ 25Whuz naoodaih te ꞌinkꞌez ꞌet nahooꞌaih dune dudzi yo lhodítsun nawhulhtsi ꞌinkꞌez soo nenaꞌninla. 26ꞋEt ꞌutsꞌun whe dudoh ꞌinkꞌez lhtakꞌantꞌine ntsiꞌ-i nududeh-i yanus ꞌultsiꞌne, dune hiye nádudoh ꞌinkꞌez ꞌet nehúnih. ꞋEt ndun dune hiyudúltsꞌi-un whutsodaꞌ whanus ꞌultsiꞌ ulhi.”

Mbene la Yakꞌusda ooghuni yuditsꞌone ꞌinkꞌez yoontunne, ꞌenne ꞌukꞌenus hoonzoo-un butsꞌu hooltsꞌulh

27ꞋEt Jesus yalhduk whutoh whe ꞌilhozdilne butoh ꞌilhoghun tsꞌeke yutsꞌu hanya, “Mbe la oochan ꞌindaꞌ-un ꞌinkꞌez nye ꞌalhtꞌukw-un, ꞌen tsꞌeke ꞌukꞌenus hoonzoo-un oogha whultsꞌut,” ni.

28ꞋEt hoontsꞌi Jesus ꞌuyulhni, “ꞋEt ꞌon nus hooncha-un ꞌuhoontꞌoh, mbe Yakꞌusda ooghuni yuditsꞌone ꞌinkꞌez yoontunne, ꞌukꞌenus hoonzoo-un bubulh ꞌuhooja!”

Hooncha tuneꞌ whutꞌen-un, ꞌet za hukwaꞌ hitísꞌen

29ꞋEt ꞌilhozdilne lhanꞌun te nus za lheꞌhuniltsuk ꞌinkꞌez bubulh yawhenilhduk, “Njan ꞌandit whudizulhne dune hintsiꞌ. ꞋEt hoonli hooncha tuneꞌ whutꞌen-un ꞌet za huwhuntilhꞌelh hukwaꞌ huninzun. ꞋEt hoontsꞌi ꞌaw huhooꞌen-un bughá holtsꞌit ꞌaitꞌoh. ꞋEt nus hooꞌen-un Jonah bulh dahooja-un, ꞌet za huwhutiꞌelh. 30ꞋEt Nineveh whutꞌenne Jonah be buba whe hóodalꞌen-un suliꞌ, ꞌet whuz unꞌa za ꞌen kꞌunꞌa ꞌandit whudizulhne dune, Yinka Dune Yeꞌ, ꞌen be buba whe hoodalꞌen-un tileh. 31ꞋOh whuya hoozulh-un dzin dune ba nahutideh de, ꞌet whe nyaz de whulerwe tsꞌeke ꞌen buniz dudutáyalh, ꞌet whe buba nahutideh. Ndi yun kꞌut nilhdzaz de hainya lerwe Solomon ye whunih-i yudutátsꞌo ha. ꞋEt hoontsꞌi ꞌilhoghun lerwe Solomon anus ꞌuntꞌoh-un ꞌandit nohtoh usyin. 32ꞋInkꞌez ꞌoh whuya hoozulh-un dzin dune ba nahutideh de, Nineveh whutꞌenne nohni ꞌandit whudizulhne nohtoh do dutádulh ꞌinkꞌez nohba nahotiyeh. ꞋOh daꞌ Jonah bubulh yailhduk daꞌ, tsꞌiyawh dudeni náhondunizdla. ꞋEt ꞌalha ꞌúhoontꞌoh, ꞌilhoghun ꞌen Jonah anus ꞌuntꞌoh-un ꞌandit nohtoh usyin.”

Nena ꞌi ꞌantsꞌi neyustꞌe ba too dizkꞌun ꞌet nduntꞌoh

33“Dune ꞌaw too dizkꞌun naidulhkꞌan ꞌinkꞌez whunistꞌi-un kꞌus chalhyal tꞌah te ꞌaw néyoꞌalh ꞌaitꞌoh. ꞋEt kꞌus too dizkꞌun hukwꞌusꞌai-un, hukwꞌe yiꞌaih. ꞋI gha la dándilhne be hóotꞌen-i hinoolhꞌen. 34ꞋEt whuz unꞌa nohna ꞌi ꞌantsꞌi nohyustꞌe ba too dizkꞌun leꞌ ꞌuntꞌoh. ꞋEt nohna soo ꞌuntꞌoh de, nohyustꞌe ndulcho whe be hootꞌen-i be whudizbun. ꞋEt hoontsꞌi nohna lheꞌízooꞌ de, nohyustꞌe ꞌi cha tsalhgus be dizbun. 35ꞋEt huwa be nohyustꞌe be hootꞌen-i ꞌahli, khun te nohyustꞌe tsalhgus naoodleꞌ junih. ꞋEt whuchꞌa huwohleꞌ! 36ꞋEt huwa nohyustꞌe ndulcho whe be hootꞌen-i dizbun, ꞌinkꞌez ꞌaw hoontsool-unyaz hoontsꞌi tsalhgus ooghu hooloh de, ꞌet de la ndulcho-i be be hootꞌen ooleꞌ. ꞋEt whuz unꞌa be hootꞌen-i ulhtus-i kꞌunꞌa whedindi, ꞌi gha la soo hoohꞌen.”

Duba naꞌudzooꞌne, dawhultsiꞌ-un, ꞌet bugha whútaltsꞌulh

37Jesus ꞌawhuz yalhduk whe ꞌilhoghun Pharisee yoodulhkut, “Slanaintꞌalh syoh tsꞌe.” ꞋEt Jesus yoh daninya ꞌinkꞌez natlꞌa didaꞌ ꞌutiꞌulh wheni. 38ꞋUtiꞌulh whutso lanalheꞌildoh. ꞋEt Pharisee yunilhꞌen ꞌinkꞌez ooba hooncha.

39ꞋInkꞌez neMoodihti ꞌuyulhni, “Nohni Phariseene nohlusyet ꞌinkꞌez lubot bulh, ooka za tunáwhahgus. ꞋEt hoontsꞌi nohdzi yo whe dátni-i cha ꞌinkꞌez ꞌutꞌen ntsiꞌ-i bulh be nohyo tsꞌe whudizbun. 40Whusnine ꞌahli! ꞋAw eh tꞌeoonuzáhzun? Mbe la yoo ꞌaz tsꞌe ꞌuhoonla ꞌinkꞌez bez tsꞌe cha, ꞌen za ꞌuhoonla. 41ꞋEt hoontsꞌi ndai la ahtꞌi-i, ꞌi be ꞌi ooloh telꞌenne be la oohtꞌen. ꞋEt tsꞌiyaitsuk nohba whunaꞌoodeh.

42ꞋEt hoontsꞌi nohni Phariseene ꞌawet dawhultsiꞌ-un ꞌet nohtsꞌu hóoltsꞌulh! Ndai la ha núlhyeh-i, ꞌutꞌan sooltsun-i cha, rue cha huyulhni, ꞌinkꞌez ꞌonghoh-i, ꞌi ooloh, 10%, ꞌi Yakꞌusda ghahꞌaih. ꞋEt ndóhtꞌen hubaꞌ hoontꞌoh. ꞋEt hoontsꞌi tsꞌihꞌun unꞌa neꞌáhtꞌen-un, ꞌinkꞌez Yakꞌusda ye nekꞌentsiꞌ-i, ꞌaw ndulhúzahtꞌen. ꞋEt ndóhtꞌen hubaꞌ hoontꞌoh, ꞌinkꞌez ꞌudun cha whuyit lheꞌzootꞌen.

43Nohni Phariseene dawhultsiꞌ-un ꞌet nohtsꞌu hóoltsꞌulh! Lizwif lugliz dahyaih de, ꞌuhoontꞌoh-un natlꞌa dahdaih, ꞌet za hukwaꞌ nahzun! ꞋInkꞌez ꞌeꞌóoket-un, soo tsꞌiyanne nohodólhtiꞌ hukwaꞌ nahzun.

44ꞋEt nohni Moses be ꞌudustlꞌus ꞌukꞌu nunáguzne ꞌinkꞌez nohni Phariseene, dune nalh duba naꞌahdzooꞌ. Dawhultsiꞌ-un ꞌet nohtsꞌu hóoltsꞌulh! Nohni tsꞌun kꞌut ꞌa dahla-un, ꞌaw dune lhunohisꞌen leꞌ ꞌahtꞌoh, ꞌinkꞌez ꞌa dahla-un dune tꞌehonúszun whe nohkꞌunuhudilh.”

45ꞋEt ꞌilhoghun Moses be ꞌudustlꞌus kꞌut beni hoonli be yalhduk-un, ꞌen Jesus yulhni, “Nehodulhꞌeh-un ndutni-un, wheni cha nebulh ꞌudini, ꞌet huwa neba dzoh ꞌudínja.”

46ꞋEt ꞌuyulhni, “Nohni cha Moses be ꞌudustlꞌus kꞌut beni hoonli be yalhdukne, dawhultsiꞌ-un ꞌet nohtsꞌu hóoltsꞌulh! Nohni nohgha dune ꞌutꞌen howa whúlnaꞌ-un butlꞌa whahle, ꞌaw hoontsool-unyaz whe hoontsꞌi bula oohneh ꞌaitꞌoh.

47Nohni dawhultsiꞌ-un ꞌet nohtsꞌu hóoltsꞌulh! Nohtso daꞌ nus hooꞌenne buba tse bet ꞌahudutilhtelh-un ꞌuwhulhꞌen. ꞋInkꞌez nohbáke ꞌenne bubuhanghan inleꞌ. 48ꞋEt ꞌalhaꞌ nohbáke ꞌet ndahája, ꞌet nohni nohba tsꞌihꞌun ꞌuhoontꞌoh nahzun. Nohbáke nus hooꞌenne ubuhanghan ꞌinkꞌez nohni ꞌahudutilalh-un buba ꞌuwhulhꞌen. 49ꞋEt huwa Yakꞌusda ye whunih-i, ꞌi be ꞌet ndutni, ‘Nus hooꞌenne ꞌinkꞌez whelꞌaꞌne, ꞌenne butsꞌu butisꞌalh. ꞋEnne whulohne dzoh nubotilhdzut ꞌinkꞌez ꞌonghohne cha hubotighan.’ 50ꞋEt yun ꞌudechoo ꞌulya ꞌet whutsꞌun ndunne nus hooꞌenne bubuzkaiꞌ whúzdliꞌne, nohni ꞌandit whudizulhne dune nohni hukwꞌelha whutilhtselh wheꞌ hoontꞌoh. 51Abel buzkaiꞌ whuzdliꞌ-un whutsꞌun ꞌinkꞌez Zacharias buzkaiꞌ whuzdliꞌ daꞌ ꞌuntꞌoh, Zacharias lugliz whucho ꞌinkꞌez loodel eguz ꞌet hizilhghi, ꞌalhaꞌ nohdusni, ꞌoh daꞌ dahooja la, ꞌet ꞌandit whudizulhne dune, nohni hukwꞌelha whutilhtselh whe ꞌahtꞌoh.

52Moses be ꞌudustlꞌus kꞌut daja ni whe beni hoonli be yalhdukne, ꞌawet dawhultsiꞌ-un ꞌet nohtsꞌu hóoltsꞌulh! Dune tꞌehonózin-un, ꞌet bughu nawhúlhchoot! Nohnichꞌoh ꞌaw lhuwhúlhchulh. ꞋInkꞌez mbene la hóolhdzihne, ꞌenne cha kꞌoh úboohtun!”

53ꞋEt ꞌawhuz ꞌoh whúya hiyilh whe, Moses be ꞌudustlꞌus ꞌukꞌu nunáguzne, ꞌinkꞌez Phariseene tube huyóolhdzi. Khun tilah hoonliyaz ꞌutsꞌun unꞌa ꞌudooniꞌ ꞌinka lhelhdun hukwaꞌ huyoodulhkut. 54ꞋAhoolhyiz hinilhꞌen ꞌonilha khun tilah tankꞌus ꞌúdooniꞌ. Hoonli ꞌudija de, ꞌet hikꞌehóotaꞌalh ꞌinka.

Currently Selected:

Luke 11: crx

Highlight

Copy