Luke 12

Phariseene bules be untuldoh-i, ꞌet whuchꞌa khohdleꞌ

1ꞋOh daꞌ whe lhane dune ꞌilhuhozdil. Huldlai kꞌet lhkꞌunuhúdilh chaꞌ hutꞌen. Mbene la yugha hodulꞌehne, ꞌenne cho ndubulhni, “Phariseene bules be untuldoh-i, ꞌi chꞌa soo cho howahli. ꞋI dune nalh ye dúba naꞌudzooꞌ-i, ꞌi ꞌuntꞌoh. 2ꞋEt ndai la tsꞌiyawh whunistꞌi-un, tsꞌiyawh tsꞌet ha óotikulh. ꞋEt ndai la whuꞌiz ꞌuntꞌoh-i, ꞌi cha tsꞌiyawh tꞌentidzeh. 3ꞋEt huwa ndet la tsalhgus yo tsꞌe be yalhduk-i, ꞌet hootꞌen-un hidutatsꞌo. ꞋEt yoh whez tsꞌe ꞌuyoon yudzeh khuni inꞌaih daja daniꞌ-un, ꞌet bun kꞌut whutsꞌun khuniti be howu yatilduk.”

Yakꞌusda ꞌen za be noolhjut

4“ꞋInkꞌez skꞌekene nohdusni, mbene la nohyustꞌe ughanne ꞌinkꞌez ꞌaw ꞌon ꞌun hoonliyaz ꞌuhooneh ꞌaitꞌoh. Nduntꞌohne bube noolhjut junih. 5ꞋEt hoontsꞌi mbe la be ntilhjut-un, ꞌen bunóhuntistun. Mbe la nohyustꞌe silhghi-un, ꞌet hukwꞌelhꞌaz, ꞌen oobaꞌ hoontꞌoh whe kwuncho yo tsꞌe cha nohtinoh, ꞌen za be noolhjoot! ꞋAlhaꞌ nohdusni, ꞌen be noolhjut! 6ꞋAlhaꞌ eh kwulaiꞌ ꞌuchas, ꞌi nanki sooniya tsꞌuditiꞌ-i be ꞌóket? ꞋInkꞌez ndi dutꞌaiyaz Yakꞌusda ꞌaw ꞌilho hoontsꞌi yunalhodulhnoh wheꞌ hoontꞌoh. 7ꞋInkꞌez daltsuk nohtsighaꞌ ꞌi hoontsꞌi tsꞌiyawh tꞌeinínzun. ꞋEt huwa whenoolhjut junih! Nohni ꞌuchas anus dáhtiꞌ whé ꞌahtꞌoh!”

Dune nalh Jesus ꞌen schꞌeꞌ ꞌuntꞌoh ꞌuzdooniꞌ

8“ꞋInkꞌez ꞌet cha nohdusni, mbe la dune nalh, Jesus Christ ꞌen oochꞌeꞌ usdli ni-un, ꞌen Yinka Dune Yeꞌ Yakꞌusda oolizas ubudutánelh, ndun ꞌen schꞌeꞌ unli whe ꞌuntꞌoh. 9ꞋEt hoontsꞌi mbe dune nalh stsꞌooditdlaine, Yakꞌusda oolizas bunalh butsꞌoodutásdlai. 10ꞋInkꞌez mbe la Yinka Dune Yeꞌ chꞌaz ditni be yalhdukne, buba ꞌun whutilhdulh. ꞋEt hoontsꞌi mbe la Ndoni chꞌaz ditni be yalhduk-un, ꞌaw ooba ꞌun whutookat ꞌaitꞌoh.

11ꞋInkꞌez lizwifne lugliz, kꞌus nahiyilhne, kꞌus moodihne cha bubut nenohonilhya de, daja dutihnelh-un, ꞌet huwu ni oohleꞌ junih. 12Soo ꞌet whudizulh-un Ndoni whunoh untilhtun daja dutihnelh-un.”

Khuni be nawhutnuk-i dune whusni-un ghun

13ꞋEt dune toh ꞌilhoghun dune ꞌutni, “Whuneoodulhꞌeh-un nedusneke bukꞌélhutizkat-i, ꞌi sulhutsin di schꞌeꞌ unli, ꞌi stlꞌa yóolelh sba dini!”

14ꞋEt Jesus ꞌuyulhni, “Dune, mbe ꞌusinla nohba nahiyilh-un, kꞌus nohba yatilhduk-un sulhtsi?” 15ꞋInkꞌez Jesus ꞌubulhni, “Huwahli! ꞋUyoon dune chꞌeꞌ haꞌ noohzin junih! Dune daltsuk hoonli yutꞌi ndi yun kꞌut, ꞌohwhi ꞌantsꞌi ꞌúntꞌoh whe ꞌuntꞌoh.”

16ꞋInkꞌez ꞌet khuni oogha whutsꞌodulꞌeh huwun bubulh yalhduk whe ndutni, “ꞋIlhoghun dune hoonzoo ꞌuntꞌoh-un, ooyun kꞌut tsꞌiyaitsuk soo ha níyeh. 17ꞋInkꞌez didutchꞌoh ꞌuninzun, ‘Ntsꞌenꞌa cha la daoosneh? Ha níyeh-i bayoh whudizbun. ꞋAw ꞌon ꞌun ꞌuyoo dánosdzaih ꞌaitꞌoh.’

18ꞋInkꞌez ꞌet ndutni, ‘Njan dutísnelh lhat-un ha niyeh-i yoh nanáꞌwhuduntisyus ꞌinkꞌez ꞌon nus ꞌuhoolcho-un naꞌwhutisdlelh. ꞋEt ha nísyai-i ꞌinkꞌez ꞌustꞌi-i, tsꞌiyawh tísdlalh. 19ꞋInkꞌez la szul dosniꞌ, lhai unzoo-i mba ꞌilhozkat, lhat yus kꞌut whuba. ꞋInka nailyis, ꞌinꞌalh, taintnai, ꞌinkꞌez whunílhni.’

20ꞋEt hoontsꞌi Yakꞌusda ꞌuyulhni, ‘Whusni-un inli! ꞋAndit ꞌúlhdzis nzul naitálchulh. ꞋInkꞌez di ꞌintꞌi-i, mbe tsꞌu tíkulh?’

21ꞋEt whuz unꞌa mbe lhai duba ꞌilhozdla-un ꞌinkꞌez Yakꞌusda ba hoonli lhitꞌiꞌ.”

Yinka dúlhtsꞌi-un huwu ni oohleꞌ junih

22ꞋInkꞌez yugha hodulꞌehne ꞌubulhni, “ꞋEt huwa nohdúsni, yinka dúlhtsꞌi-un, ndai la tihꞌulh-i ꞌinkꞌez be sóo nadutihtneh-i, ꞌi tsꞌiyawh ooghuni oohleꞌ junih! 23ꞋUtꞌalh-i, ꞌinkꞌez naih cha, ꞌohwhi ꞌantsꞌi unli whe ꞌuntꞌoh. Yinka sahda-un ꞌinkꞌez nohyustꞌe cha ꞌi ꞌon nus díztiꞌ. 24Datsancho daintꞌoh la ooghu nuni nahzut. ꞋAw ꞌalhéꞌhunusdle ꞌinkꞌez ꞌaw ha lhéꞌhunusdle chaꞌ hintꞌoh. ꞋInkꞌez ꞌaw ꞌuzdla bayoh ꞌinkꞌez ha níyeh-i yoh cha lhuhuhóotꞌiꞌ. ꞋEt hoontsꞌi Yakꞌusda bugha ꞌáꞌaih. ꞋInkꞌez nohni dutꞌai anus dáhtiꞌ whe ꞌahtꞌoh. 25Mbe nohtoh dalcho tileh howu ni unli? ꞋAw ꞌet huwa ꞌon nus ꞌulyiz ooleꞌ ꞌaitꞌoh. 26Hoontsool-unyaz hoontsꞌi ꞌoohoohleh ꞌaitꞌoh de, ꞌet di ha ꞌudun cha howu ni ꞌahli?

27ꞋInkꞌez ꞌindaiyaz, ntsꞌenꞌa ha níyeh, howu nuni nahzut. ꞋAw lheꞌustꞌen ꞌinkꞌez ꞌaw hoonliyaz hiye soo nadootnih-i cha lheꞌhusdle. Lerwe Solomon naih diztiꞌ ꞌi be soo nadutꞌih te, ꞌet hoontsꞌi ꞌaw ꞌindaiyaz anus lheꞌíldzooꞌ whe ꞌuntꞌoh. 28ꞋEt Yakꞌusda tlꞌo unzoo-i yilhꞌi. ꞋAndit dzin tlꞌo kꞌut ha níyeh ꞌinkꞌez bunde ꞌi tsehidutilhkulh. ꞋEt nohni dalcho-i be ꞌon nus soo nanohdooleh. Tube ntsool-i be nohba ꞌalha ꞌuhoontꞌoh. 29Tihꞌulh-i ꞌinkꞌez tihtnelh-i cha, ooka daóohtni ꞌinkꞌez ooghuni oohleꞌ junih. 30ꞋEt ndi yun kꞌut whutꞌenne ꞌet za hukó nuta. ꞋInkꞌez Yakꞌusda nohBá ndai la be ndunahdzit-i tsꞌiyawh tꞌeinínzun whe ꞌuntꞌoh. 31ꞋEt hoontsꞌi Yakꞌusda whe lerwe unli-un, ꞌet za hukwa itahꞌen de, ndohwhi tsꞌiyawh nohgháꞌ tikulh.

32Se ꞌusbai ꞌilhoh núlhꞌas-i, noolhjut junih! NohBá whe lerwe unli-un, hoontꞌiꞌ whe nohgha óotaꞌalh. 33Ndai ahtꞌi-i be ꞌóhket ꞌinkꞌez telꞌenne bugha yohlelh. Sooneya zus ninta lheꞌustꞌi-i ꞌudulhneh. ꞋInkꞌez di la unzoo-i ꞌilhiz wheni oolatoh hoolóh-i, ꞌi be yóohlelh, ꞌi la yakꞌuz tsꞌe neóohlelh. ꞋAw whuz ꞌundunutꞌih-un daooyaꞌ ꞌaitꞌoh ꞌinkꞌez ꞌaw yun nulhꞌas-i nintaꞌyolhꞌen ꞌaitꞌoh. 34ꞋEt oonáhtꞌiꞌ-i lhoozáhla, ndet la ꞌusdla-un, nohdzi cha ꞌet dutáꞌalh.”

Lhazdootꞌeꞌ, ꞌaw tꞌetsꞌonúszun nkede la neMoodihti whusanátidalh

35“Nohnaih be ꞌáhtꞌen-i be náhdilh ꞌinkꞌez nohtoo dizkꞌun-i cha dókꞌun. 36ꞋInkꞌez nohnichꞌoh dune dumoodih ba sulhꞌine bukꞌunꞌa oohtꞌeꞌ. Dune lhghuske tsꞌe ha nája, ꞌinkꞌez dati dunulkwꞌuz de, ꞌaho la hiba dáhaꞌ dootan. 37ꞋEt moodih whusanaja de, ꞌinkꞌez be ꞌulhnane hika tse hooli, ꞌinkꞌez hika ítisꞌen. Moodih ndutꞌenne bunilhꞌen de, ꞌukꞌenus hoonzoo-un bugha whultsꞌut. ꞋAlhaꞌ nohdúsni, bumoodih soo nadutitneh ha, ꞌinkꞌez dude ꞌulhnane nátlꞌa dulhtsꞌi budutánelh, ꞌinkꞌez bubut néꞌtilelh. 38ꞋEt moodih tuzniz atꞌen kꞌus tuzniz hukwꞌelhꞌaz atꞌen, ꞌet whusanatidalh ꞌinkꞌez be ꞌulhnane hika tse hooli, ꞌinkꞌez hika ítisꞌen, ꞌet whuz unꞌa moodih ndutꞌenne bunilhꞌen de, ꞌukꞌenus hoonzoo-un bugha whultsꞌut. 39ꞋInkꞌez tꞌeoonahzeh, yoh whumoodih ntsꞌowhuya whudizulh-un ꞌundunutꞌih-un whusatíyalh, ꞌet tꞌewhuninzun de, ꞌet daꞌ huwoleꞌ, ꞌinkꞌez ꞌaw hiyoh daꞌ óoyis ꞌaitꞌoh. 40ꞋEt huwa nohni cha lhadóohtꞌeꞌ. Ntsꞌowhuya ꞌuhunitꞌoh-un ꞌet ookatselhúwhahlih-un, ꞌet Yinka Dune Yeꞌ whusanátidalh,” ni Jesus.

41ꞋInkꞌez ꞌet Peter ꞌuyulhni, “NeMoodihti, ndi khuni oogha whutsꞌodulꞌeh-i be yailhduk, ꞌi wheni za tilah kꞌus tsꞌiyanne ba tilah ꞌudini?”

42ꞋInkꞌez neMoodihti ꞌutni, “Kꞌus mbe tsꞌihꞌun ꞌuntꞌoh ꞌinkꞌez whunih-un unli whe yoh huwunli? ꞋEn oomoodih duyoh whumoodih yutilhtselh. ꞋEt neooduzuk de, ꞌet de la ꞌonghohne hitiꞌulh-i bugha náꞌtitꞌaih? 43ꞋEt oomoodih whusanaja de, ꞌinkꞌez hibe ꞌulhna-un whuz unꞌa ndutꞌen yunilhꞌen de, ꞌet de yoh whumoodih yulhtsi-un, ꞌen ꞌukꞌenus hoonzoo-un bulh ꞌuwhútanelh. 44ꞋAlhaꞌ nohdusni ndun oomoodih di yutꞌi-i, tsꞌiyawh kꞌuneꞌ yulꞌen-un yutlꞌa óotiꞌalh. 45ꞋEt hoontsꞌi ndun be ꞌulhna-un dichꞌoh dudzi yo whe ꞌet nduninzun de, ‘Smoodih saꞌ stla whusanádaih.’ ꞋInkꞌez ꞌet dune oomoodih yuba ꞌutꞌenne ꞌinkꞌez tsꞌekoo yuba ꞌutꞌenne cha whéboonilhtsus. ꞋInkꞌez whéꞌ niꞌulh ꞌinkꞌez tatnai, ꞌinkꞌez tanutnih, 46ꞌoh de ndet dzin, be ꞌulhna-un ꞌaw yuka tsꞌe lhúhooli ꞌinkꞌez ntsꞌowhuya ꞌuhunitꞌoh-un ꞌutinelh ꞌaw tꞌeoonuszun, ꞌet ꞌoh whuya ꞌuhunitꞌoh whe oomoodih whusanátidalh. ꞋAntsꞌi lhulcho kꞌeitatꞌus leꞌ yutilelh ꞌinkꞌez Yakꞌusda kꞌunulheꞌustꞌenne butsꞌítikulh-i bugha óotatꞌalh.

47ꞋInkꞌez mbe ꞌulhna-un oomoodih ndet yutsꞌu hukwaꞌ ninzun-un, tsꞌiyawh tꞌeooninzun, ꞌet hoontsꞌi ꞌaw wheni lhálhditꞌoh ꞌinkꞌez yukꞌunulheꞌustꞌen, ꞌet huwa lhat whe ootaltsus. 48ꞋEt hoontsꞌi mbe tꞌeoonúszun dumoodih ndet la yutsꞌu hukwaꞌ ninzun-un, ꞌinkꞌez dude ꞌutꞌen kꞌoh huwa ootaltsus huba, dzoh tsulyaz za ootaltsus. ꞋEt mbe la dune lhai oogha ntꞌai-un, ꞌen lhat-un yutsꞌu hukwaꞌ ntizilh. ꞋInkꞌez mbe la lhat-un ootlꞌa hoolya, ꞌon nus lhat-un yutsꞌu hukwaꞌ untizilh.”

Jesus ꞌutni, “Dune lhchꞌaz nehúdutadalh ꞌet hukwa whusasya”

49“Ndi yun kwun ookwꞌítasꞌalh ha whusasya. ꞋUdaꞌ ncha duzkꞌan. 50ꞋEt hoontsꞌi be dune too be ꞌulꞌen-i be too beꞌ tiznelh hubaꞌ hoontꞌoh. ꞋEt lhaoodutanelh whutsꞌun ꞌet huwa tube tsꞌodi be tewhéndunilne. 51Tsꞌiyanne lhtsꞌun tsꞌihꞌun ꞌúhootꞌeꞌ, ꞌet hukwa ndi yun kꞌut whusasya nahzun eh? ꞋAwundooh! ꞋEt nohdusni, dune lhchꞌaz nehúdutadulh ꞌet hukwa whusasya. 52ꞋEt ꞌandit whutsꞌun kwulane ꞌilhughun yoh dilhtsꞌine lhchꞌaz nehúdutadulh. Tane, nane chꞌaz nehudutadulh, ꞌinkꞌez nane, tane chꞌaz nehúdutatꞌus. 53Bubá duyeꞌ chꞌaz nédutadalh, ꞌinkꞌez ooyeꞌ dubá chꞌaz nedutadalh. Buloo cha dutseꞌ chꞌaz nedutadalh, ꞌinkꞌez ootseꞌ duloo chꞌaz nedutadalh. ꞋInkꞌez oobiz cha duyasꞌat chꞌaz nedutadalh, ꞌinkꞌez ooyasꞌat ꞌen cha dubiz chꞌaz nedutadalh.”

Jesus Christ whusanatidalh-un soo cho ooka tse tsꞌúholeꞌ

54ꞋEt lhane ꞌilhozdilne, ꞌet cha ꞌubulhni, “ꞋEt nooz de kwꞌus whúzdliꞌ nulhꞌen de, ꞌet ꞌaho ꞌudahniꞌ, ‘Dzoh tselyaz naootilhtelh.’ ꞋInkꞌez ꞌet nduwhútꞌi. 55ꞋInkꞌez nꞌaz tiztsꞌi te ꞌet ꞌudahni, ‘Tube whúntalwus wheꞌ whutꞌen,’ ꞌinkꞌez ꞌet nduwhútꞌi. 56Nohni dune nalh duba naꞌudzooꞌne ꞌahtꞌoh! Ndi yun kꞌut ꞌinkꞌez yat cha dawhutanelh-un tꞌeoonahzun. ꞋEt hoontsꞌi dáhoontꞌoh huwa dawhutanelh ꞌaw tꞌeoonuzáhzun?

57ꞋInkꞌez nohnichꞌoh dahoontꞌoh huwa ntsꞌenꞌa tsꞌihꞌun unꞌa ꞌuhoontꞌoh-un, ꞌaw tꞌeoonuzáhzun? 58Mbe la nchꞌaz ditni-un, ꞌen nahiyilh-un but nenyutalhtelh, ꞌet whuz ahꞌus whe ꞌet tube ootsꞌun lhanaoodonleh hukwa ꞌontꞌen. Doo ka la nahiyilh-un but nényutalhtelh ꞌinkꞌez nahiyilh-un neilhchuk-un tlꞌa nyutilhtelh, ꞌinkꞌez neilhchuk-un ꞌanyutiꞌalh. 59ꞋEt nohdusni ndi sooniya ntꞌum-iyaz hoontsꞌi tsꞌiyawh ookwꞌelha whutalhtselh, ꞌet whutsꞌun ꞌadutanꞌalh.”

Currently Selected:

Luke 12: crx

Highlight

Copy