Salāmo 96
96
O le Apoapoa‘iga ‘ia Fa‘afetaia le Atua
(1 No 16.23-33)
1‘Ia ‘outou pepese atu i le ALI‘I i le pese fou;
le lalolagi uma e, ‘ia ‘outou pepese atu i le ALI‘I.
2‘Ia ‘outou pepese atu i le ALI‘I,#Isai 52.7
‘ia ‘outou fa‘afetaia lona suafa;
‘ia ‘outou tala‘i atu lana fa‘aolataga i lea aso ma lea aso.
3‘Ia ‘outou ta‘uta‘u atu lona mamalu i nu‘u ‘ese,
ma ona vāvega i nu‘u uma lava.
4Auā e silisili le ALI‘I,
e tusa fo‘i ‘ona matuā vi‘ia o ia;
e sili ‘ona mata‘utia o ia i atua uma.
5Auā o atua uma o nu‘u o tupua lava ia;#Kene 1.1; Sala 115.4; Isai 42.5; Iere 10.12; Sapa 2.18-20; Galu 19.26
a o le ALI‘I, na ia faia le lagi.
6O lo‘o i ona luma le vi‘iga ma le matagofie;
o lo‘o i lona malumalu le malosi ma le mamalu.
7‘Outou o itū‘āiga o le nu‘u,#Sala 29.1-2
‘ia ‘outou avatua i le ALI‘I,
‘ia ‘outou avatua i le ALI‘I le vi‘iga ma le malosi.
8‘Ia ‘outou avatua i le ALI‘I le vi‘iga o lona suafa;
‘ia ‘outou avatu taulaga ma ‘outou ō atu i ona lotoā.
9‘Ia ‘outou ifo atu i le ALI‘I i le malumalu e matagofie;
‘ia ‘outou gatete i ona luma le lalolagi uma.
10‘Ia ‘outou fai atu i nu‘u ‘ese,#Sala 9.8; 93.1
“‘Ua fai le ALI‘I ma tupu;
e fa‘atumauina ai le lalolagi ne‘i fa‘agae‘etia;
na te fa‘amasinotonuina le nu‘u.”
11‘Ia fiafia le lagi, ‘ia ‘oli‘oli fo‘i le lalolagi;
‘ia ta‘alili mai le sami ma mea ‘ua tumu ai.
12‘Ia fiafia lava le lau‘ele‘ele ma mea uma o i ai;#Isai 35.1; 55.12
‘ona ‘alalaga fiafia ai lea o la‘au uma o i le vao matua,
13i luma o le ALI‘I; auā o lo‘o afio mai,#Isai 11.1-5
auā o lo‘o afio mai e fa‘amasino le lalolagi;
na te fa‘amasinoina le atu laulau i le amiotonu,
‘atoa ma nu‘u i lona fa‘amaoni.
Currently Selected:
Salāmo 96: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
