Salāmo 103
103
‘Ua Vi‘ia le ALI‘I ‘ona o lona Alofa
O le salāmo a Tavita
1Lo‘u agaga e,
‘ia e fa‘amanū atu i le ALI‘I,
o mea uma fo‘i o i totonu ‘iā te a‘u,
‘ia fa‘amanū i lona suafa pa‘ia.
2Lo‘u agaga e,#Teu 6.12; 8.11; Eso 15.26; 34.7; Isai 33.24; Iere 17.14; Mare 2.5; Luka 7.47
‘ia e fa‘amanū atu i le ALI‘I,
‘aua fo‘i ne‘i galo se mea e tasi o ana mea alofa.
3O lē fa‘amāgaloina a‘u amio leaga uma lava;
o lē fa‘amālōlōina ‘ou ma‘i ‘atoa uma.
4O lē fa‘aolaina mai lo‘u ola a‘i le tu‘ugamau;
o lē fa‘apaleina oe i le alofa ma le alofa mutimutivale.
5O lē e malie ai lo‘u mana‘o i mea lelei;#Sala 107.9; Isai 40.31
o lē fa‘afouina lo‘u taule‘ale‘a fa‘apei o le aeto.
6E faia e le ALI‘I mea tonu ma fa‘amasinoga,
mo ē ‘ua sauāina uma lava.
7Na ia fa‘ailoa ona ala ‘iā Mose,#Eso 33.13; 34.10
o ana galuega i le fānauga a Isaraelu.
8E alofa mutimutivale ma alofa fua mai le ALI‘I;#Iako 5.11
e telegese lona to‘asā, ‘ae tele lona alofa.
9E lē a‘oa‘i mai pea lava ia,#Isai 57.16; Iere 3.5, 12; Mika 7.18
e lē fa‘amoemoe fo‘i lona to‘asā e fa‘avavau.
10E le‘i faia e ia ‘iā i tatou e tusa ma a tatou agasala;
e le‘i taui mai fo‘i o ia ‘iā i tatou e tusa ma a tatou amio leaga.
11Auā e pei ‘ona maualuga o le lagi i le lalolagi,
e fa‘apea ‘ona tele o lona alofa i ē matata‘u ‘iā te ia.
12E pei ‘ona vāvā mamao o sasa‘e ma sisifo,#Isai 38.17; Mika 7.19
e fa‘apea lava ‘ona fa‘amamao e ia ‘iā i tatou o a tatou solitulafono.
13E fa‘apei ‘ona alofa mutimutivale o le tamā i lana fānau,
e fa‘apea lava ‘ona alofa mutimutivale o le ALI‘I i ē matata‘u ‘iā te ia.
14Auā ‘ua silafia lava e ia le mea na fai a‘i i tatou;#Kene 3.19; Sala 78.39; Fai 12.7
‘ua manatu ia o le efuefu lava i tatou.
15O le tagata, e pei o le mutia ona aso;
e pei o le fuga o le vao,
e fa‘apea ‘ona fuga mai o ia;
16auā a agi mai i ai le matagi ‘ona leai lea o ia;#Iopu 7.10; Isai 40.7
‘ua lē toe iloa fo‘i o ia i le mea sa i ai.
17A o le alofa o le ALI‘I, mai le vavau lava lea,
e o‘o i le fa‘avavau i ē matata‘u ‘iā te ia;
o lana amiotonu fo‘i e o‘o i le fānau a latou fānau,
18i ē tausi i lana feagaiga,#Teu 7.9
o ē manatua fo‘i ana poloa‘iga e fai ai.
19‘Ua fa‘atumauina e le ALI‘I o lona nofoāli‘i i le lagi;#Sala 47.2; 93.2
‘ua pule aoao fo‘i lona mālō.
20Fa‘amanū atu ia i le ALI‘I ‘outou ana agelu#Sala 148.2; Mata 6.10; Luka 2.13
o ē malolosi tele, o ē faia lana afioga,
o lo‘o fa‘alogo i lona si‘ufofoga.
21Fa‘amanū atu ia i le ALI‘I ‘outou ana ‘au uma lava,#Kene 32.2; Tani 7.10; Epe 1.14
o ‘outou ana ‘au‘auna, o ē faia lona finagalo.
22Fa‘amanū atu ia i le ALI‘I o mea uma na ia faia,
i mea uma lava ‘ua pule i ai o ia.
Lo‘u agaga e,
‘ia e fa‘amanū atu i le ALI‘I.
Currently Selected:
Salāmo 103: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
