Kenese 18

O le Atali‘i ‘ua Folafolaina mo Aperaamo

1‘Ua fa‘aali mai le ALI‘I ‘iā te ia i aluna o Mamere, a o nofo o ia i le faitoto‘a o lona fale ‘ie i le aoauli.#Kene 13.18 2‘Ua tepa a‘e fo‘i o ia ma iloa atu, fa‘auta fo‘i, o lo‘o tutū mai ‘iā te ia tagata o to‘atolu; ‘ua ia iloa atu, ‘ona momo‘e atu ai lea nai le faitoto‘a o lona fale ‘ie e fa‘afetaia‘i ‘iā te i latou, ‘ona ifo to‘ele lea o ia.#Epe 13.2 3‘Ua fa‘apea atu fo‘i o ia, “Le ali‘i e, ‘āfai ‘ua alofaina mai nei a‘u e oe, ‘aua ne‘i e maliu loa ‘iā te a‘u lau ‘au‘auna; 4se‘i ‘aumaia sina vai e mulumulu ai o ‘outou vae, ma ‘outou mālōlō i lalo o le la‘au. 5‘Ou te ‘aumai fo‘i sina mea e ai ‘ia fa‘amalosi ai o ‘outou loto, ‘ona ‘outou ō ai lea; auā o le mea lea ‘ua ‘outou ō mai ai i la ‘outou ‘au‘auna.”

‘Ona latou tali mai lea, “‘E te faia lava pei ‘ona e fai mai ai.”

6‘Ona vave ane lea o Aperaamo i le fale ‘ie ‘iā Sara ma fa‘apea atu, “‘Ia vave ‘ona ‘ave sea o falaoa, o falaoa lelei se tolu, ‘ia palu ma fai a‘i ni pōtoi areto.” 7‘Ona momo‘e lea o Aperaamo i lona lafu povi, ‘ua ‘aumai ai le tama‘i povi, e mu‘amu‘a ma le lelei, ‘ua avatu i le taule‘ale‘a; ‘ona ia fa‘avave lea ona gaosia. 8‘Ua na ‘ave fo‘i o suāsusu to‘a, ma suāsusu ma le tama‘i povi sa gaosia e ia, ‘ua laulauina atu ai i o latou luma; a o ia, ‘ua tu ane ‘iā te i latou i lalo o le la‘au, ‘ona latou ‘a‘ai lea.

9‘Ua latou fai atu ‘iā te ia, “O fea o i ai lau avā o Sara?”

‘Ona tali mai lea o ia, “Fa‘auta, o lo‘o i fale o ia.”

10‘Ona fa‘apea atu lea o ia, “‘Ou te toe fo‘i mai lava ‘iā te oe i lelā tausaga;#18.10 ‘Ou te toe fo‘i mai…lelā tausaga: O nisi o fa‘aliliuga; ‘ou te toe fo‘i mai pe a uma masina e iva. fa‘auta fo‘i, e fānau mai lau avā o Sara o le tama tane.”#Roma 9.9

A o fa‘alogologo ane fo‘i o Sara i le faitoto‘a o le fale ‘ie sa i ona tua. 11O Aperaamo fo‘i ma Sara ‘ua matutua i lā‘ua, ‘ua tele o la tausaga; ‘ua mavae fo‘i ‘iā Sara le tu o fafine.#18.11 ‘ua mavae ‘iā Sara le tu o fafine: po o ‘ua te‘a lona taimi fānau po o ‘ua te‘a lona ma‘i masina. 12‘Ona ‘ata‘ata lemū lea o Sara, ‘ua fa‘apea, “‘Ua ‘ou lo‘omatua, o ‘iā te a‘u ‘ea le fiafia, o la‘u ali‘i fo‘i ‘ua toeaina ia?”#1 Pete 3.6

13‘Ona fetalai atu lea o le ALI‘I ‘iā Aperaamo, “Se a le mea ‘ua ‘ata‘ata ai Sara, o lo‘o fa‘apea, ‘E moni ‘ea, a ‘ou fānau o a‘u le lo‘omatua?’ 14E i ai ‘ea se mea e faigatā i le ALI‘I? O ona pō ‘ua tu‘upoina ‘ou te toe fo‘i mai ai ‘iā te oe, i lelā tausaga, e maua mai ai e Sara, le tama tane.”#Luka 1.37

15‘Ona fa‘afiti mai lea o Sara, ‘ua fa‘apea mai, “‘Ou te le‘i ‘ata‘ata lava a‘u,” auā ‘ua fefe o ia.

‘Ona tali atu lea o ia, “E leai, na e ‘ata‘ata lava.”

‘Ua ‘Ai‘oi Aperaamo mo Sotoma

16‘Ona tula‘i lea o ia tagata nai lea mea ma fa‘asaga atu i Sotoma; ‘ua latou ō fo‘i ma Aperaamo na te molimolia i latou. 17‘Ona fetalai ane lea o le ALI‘I, “‘Ou te natia ‘ea ‘iā Aperaamo le mea o le a ‘ou faia?#Sala 25.14; Amo 3.7; Ioane 15.15 18Auā fo‘i o Aperaamo o le a fai o ia ma tupuga o le nu‘u tele ma le malosi; e manuia fo‘i ‘iā te ia o nu‘u uma o le lalolagi. 19Auā ‘ua ‘ou iloa o ia na te poloa‘i atu i ana fānau ma lona ‘āiga pe a mavae atu o ia; latou te tausia le ala o le ALI‘I, i lo latou fai amiotonu ma fa‘amasinoga, ‘ina ‘ia fa‘ataunu‘uina e le ALI‘I ‘iā Aperaamo le mea ‘ua ia fetalai atu ai ‘iā te ia.”

20‘Ona fa‘apea lea a le ALI‘I, “O le ‘alaga mai Sotoma ma Komoro ‘ua tele ma ‘ua matuā tele lava a latou agasala; 21o le mea lea ‘ou te alu ifo ai, ‘ia iloa po ‘ua faia lava e i latou e pei o le ‘alaga ‘ua o‘o mai ai ‘iā te a‘u; ‘āfai fo‘i ‘ua leai, ‘ou te iloa lava.”

22‘Ona tu‘ua lea o lea mea e nei tagata, ‘ua ō atu i Sotoma; a o Aperaamo ‘ua tu pea o ia i luma o le ALI‘I. 23‘Ona fa‘alatalata atu lea o Aperaamo, ‘ua fa‘apea atu, “‘E te fa‘aumatia ‘ea ē ‘ua amiotonu fa‘atasi ma ē amio leaga?#Kene 20.4; Nume 16.22; 2 Samu 24.17 24Pe ‘āfai o i le ‘a‘ai tagata e to‘alimagafulu o ē amiotonu, ‘e te fa‘aumatia ‘ea ‘ae lē fa‘asaoina le nu‘u ‘ona o le to‘alimagafulu o ē amiotonu o i ai? 25‘Ia mamao lava ‘iā te oe ‘ona e faia fa‘apea e fasioti i ē amiotonu fa‘atasi ma ē amio leaga; ma ona fa‘agatusa ē amiotonu ma ē amio leaga, ‘ia mamao lava lea ‘iā te oe. O lē na te fa‘amasinoina le lalolagi uma, e lē faia ‘ea e ia le fa‘amasinoga tonu?”

26‘Ona fa‘apea mai lea o le ALI‘I, “‘Āfai ‘ou te maua i Sotoma tagata amiotonu e to‘alimagafulu i le ‘a‘ai, ‘ona ‘ou fa‘asao ai lea o le nu‘u uma ‘ona o i latou.”#Iere 5.1; Eseki 22.30; Mata 24.22

27‘Ona tali atu lea o Aperaamo, ‘ua fa‘apea atu, “Fa‘auta mai o a‘u nei o le efuefu ma le lefulefu, ‘ua ‘ou fa‘amalosi e tautala atu i le ALI‘I; 28‘āfai ‘ua toe to‘alima ē fa‘a‘atoa ai le to‘alimagafulu o tagata amiotonu, ‘e te fa‘aumatia ‘ea le ‘a‘ai uma ‘ona o le to‘alima?”

‘Ona tali mai lea o ia, “‘Āfai ‘ou te maua ai se to‘afagafulu ma le to‘alima ‘ou te lē fa‘aumatia lava.”

29‘Ona toe fai atu lea o Aperaamo ‘iā te ia, ‘ua fa‘apea atu, “Pe ‘āfai ‘ua maua ai le to‘afagafulu e a ‘ea?”

‘Ona fetalai mai lea o ia, “‘Āfai ‘ou te maua ai le to‘afagafulu ‘ou te lē faia lava ‘ona o i latou.”

30‘Ona fai atu lea o ia, “‘Aua ne‘i to‘asā mai le Ali‘i, ‘ae se‘i ‘ou toe fai atu, ‘Āfai ‘ua maua ai se to‘atolugafulu e a ‘ea.?”

‘Ona fetalai mai lea o ia, “‘Āfai ‘ou te maua ai se to‘atolugafulu ‘ou te lē faia lava.”

31‘Ona fai atu lea o ia, “Fa‘auta mai, ‘ua ‘ou fa‘amalosi e tautala atu i le Ali‘i, ‘Āfai e maua ai se to‘aluafulu e a ‘ea.?”

‘Ona fetalai mai lea o ia, “Pe a o i ai le to‘aluafulu ‘ou te lē fa‘aumatia lava ‘ona o i latou.”

32‘Ona fai atu lea o ia, “‘Aua ne‘i to‘asā mai le Ali‘i, ‘ae se‘i ‘ou fai atu le toe ‘upu lea, ‘Āfai e maua ai se to‘asefulu e a ‘ea?”

‘Ona tali mai lea o ia, “Pe a o i ai le to‘asefulu ‘ou te lē fa‘aumatia lava ‘ona o i latou.” 33‘Ona afio lea o le ALI‘I ‘ina ‘ua fa‘ai‘u ana fetalaiga ‘iā Aperaamo; ‘ona toe fo‘i lea o Aperaamo i le mea e mau ai.

Currently Selected:

Kenese 18: RSCB

Highlight

Copy