Kenese 19

O le mū o Sotoma

1‘Ua o‘o atu agelu e to‘alua i Sotoma i le afiafi, a o nofo Lota i le faitoto‘a o Sotoma, ‘ua iloa atu e Lota, ‘ona tula‘i lea e fa‘afetaia‘i ‘iā te i lā‘ua; ‘ona ifo to‘ele lea o ia. 2‘Ua fai atu fo‘i o ia, “Le Ali‘i e, fa‘auta mai, se‘i ‘oulua afe mai i le fale o la ‘oulua ‘au‘auna, ma tofā ai, se‘i mulumulu fo‘i o ‘oulua vae; i le ala usu ai la ‘oulua malaga.”#Kene 18.4; Luka 24.28; Epe 13.2

‘Ona tali mai lea o i lā‘ua, “Sōia, auā ma te momoe pea i fafo.”

3‘Ona pulunaunau atu lava lea o ia ‘iā te i lā‘ua; ‘ona la ō ane lea ma ia ma ulufale atu i lona fale; ‘ona saunia lea e ia o le mea e ‘ai ma i lā‘ua, ma ‘ua tunu areto e lē fa‘afefeteina, ‘ona la ‘a‘ai ai lea.

4A o le‘i ta‘o‘oto i lā‘ua ‘ua si‘omia le fale e tagata o lea ‘a‘ai, o tagata lava o Sotoma, o taulele‘a ‘atoa ma toeaina o le nu‘u uma lava mai itū uma. 5‘Ua latou vala‘au ‘iā Lota, ‘ua fa‘apea atu, “O ifea ‘ea tagata na ō mai ‘iā te oe i le pō nei? Tu‘u mai ia i lā‘ua ‘iā te i matou nei, ‘ina ‘ia matou iloa i lā‘ua.”#Fa‘ama 19.22-24

6‘Ona ulufafo lea o Lota i le faitoto‘a ‘iā te i latou, ‘ua pupuni le faitoto‘a i ona tua, 7‘ua fa‘apea atu, “O‘u uso e, ‘aua lava tou te agaleaga. 8Fa‘auta mai, o ‘iā te a‘u o‘u afafine e to‘alua, e le‘i iloa tane e i lā‘ua, se‘i ou tu‘uina mai i lā‘ua ‘iā te ‘outou, e faitalia lava ‘outou ‘iā te i lā‘ua; a o na tagata, ‘aua tou te faia se mea ‘iā te i lā‘ua, auā o le mea lava lea na ō mai ai i lalo ifo o lo‘u fale.”

9‘Ona fa‘apea mai lea o i latou, “Alu ‘ese ia!” ‘Ua fa‘apea ane fo‘i i latou, “‘Ua sau lenā tagata e ta‘asē, a o le a fai o ia ma fa‘amasino, o lenei, o le a sili le leaga matou te faia ‘iā te oe ‘ae itiiti ‘iā te i lā‘ua.” ‘Ua latou matuā fetuleni mai lava ‘iā Lota ma ‘ua fa‘alatalata mai e sofa‘i i le faitoto‘a.#19.9 sofa‘i i le faitoto‘a: po o talepe le faitoto‘a. 10A ‘ua fetāgofi atu ia tagata ‘iā Lota, ‘ua ‘aumai i le fale o i ai i lā‘ua, ‘ona la pupuni lea o le faitoto‘a. 11A o tagata sa i le faitoto‘a o le fale, ‘ua la fa‘atauaso ‘iā te i latou o tama ‘atoa ma ē matutua; ‘ona lailoa ai lea o i latou i sā‘ili le faitoto‘a.#2 Tu 6.18

‘Ua Tu‘ua e Lota o Sotoma

12‘Ona fai atu lea o ia tagata ‘iā Lota, “O ai ‘ea nisi o lou ‘āiga o ‘i‘inei? O se tane a sou afafine, po o sou atali‘i, po o sou afafine, ‘atoa ma i latou uma ē ‘ua ‘iā te oe o i le ‘a‘ai, ‘inā ‘ave ‘ese ia i le mea nei? 13Auā o le a ma fa‘aumatia lenei mea auā ‘ua tele lo latou ‘alaga i luma o le ALI‘I; ‘ua ‘a‘auina mai fo‘i i mā‘ua e le ALI‘I e fa‘aumatia ai.”

14‘Ona alu atu lea o Lota ma tautala atu i tane a ona afafine, o ē ‘ua fai avā i ona afafine, ‘ua fa‘apea atu, “‘Inā tutū ia, ‘inā ‘outou ō ‘ese i lenei mea, auā o le a fa‘aumatia e le ALI‘I lenei ‘a‘ai.” A o ia ‘ua pei se tagata faianaga i le manatu o tane a ona afafine.#19.14 A o ia ‘ua pei se tagata faianaga…o tane a ona afafine: po o sa fa‘apea manatu o tane o afafine o Lota o se tala fa‘asuasua po o tala pepelo.

15‘Ua malama a‘e le taeao ‘ona nanati lea o agelu ‘iā Lota, o lo‘o fa‘apea atu, “‘Inā tula‘i ia, ‘ave lau avā ma ou afafine e to‘alua, o lo‘o ‘i‘inei, ‘ina ne‘i malaia oe i le sala a le ‘a‘ai.” 16‘Ua fa‘atuatuai o ia, ‘ona fetāgofi lea o ia tagata i lona lima, ma le lima o lana avā, ma lima o ona afafine e to‘alua, ‘ina ‘ua alofaina o ia e le ALI‘I; ‘ua la ta‘ita‘i atu fo‘i ‘iā te ia, ma tu‘u atu ‘iā te ia i tua o le ‘a‘ai.#2 Pete 2.7 17‘Ua ta‘ita‘iina i latou e i lā‘ua i tua, ‘ona fa‘apea atu lea o ia, “‘Inā sōsōla ia ‘outou, tou te ola ai, ‘aua tou te tepa i tua ‘aua fo‘i tou te tutū i se mea o le fanua laugatasi; a ‘ia sōsōla lava i le mauga ‘ina ne‘i malaia ‘outou.”

18‘Ona tali mai lea o Lota ‘iā te i lā‘ua, “Le Ali‘i e, ‘aua lava; 19fa‘auta mai, ‘ua alofagia lau ‘au‘auna e oe, ‘ua e fa‘ateleina mai fo‘i lou alofa ‘ua e alofa mai ai ‘iā te a‘u, i lou fa‘aola mai ‘iā te a‘u ‘ou te lē lavā sola i le mauga, ne‘i maua a‘u i le leaga, i le ‘ou oti ai. 20Fa‘auta mai ‘ea, o le ‘a‘ai lelā e lata mai, ‘ou te sola i ai, o si ‘a‘ai itiiti fo‘i lea; se‘i ‘ou sola ane i ai, e lē o si ‘a‘ai itiiti ‘ea? ‘Ona ola ai lea o a‘u.”

21‘Ona fa‘apea atu lea o ia, “Fa‘auta, ‘ua ‘ou talia fo‘i lou mana‘o i lenā mea, ‘ou te lē fa‘aumatia lenā ‘a‘ai ‘ua e fai mai ai. 22‘Inā e sola atu ia i ai, ‘ia vave; auā ‘ou te lē mafaia ‘ona fai o se mea se‘ia e o‘o atu i ai.”

E i ai ‘ona fa‘aigoa ai o lea ‘a‘ai o Soara.#19.22 Soara: mai le gagana Eperu “la‘ititi.”

O le Fa‘atafunaga o Sotoma ma Komoro

23‘Ua alu a‘e le lā i luga o le lalolagi ma ‘ua o‘o Lota i Soara. 24‘Ona fa‘atotō fa‘aua ifo lea e le ALI‘I i Sotoma ma Komoro o le teiō ma le afi mai le ALI‘I mai le lagi.#Mata 10.15; 11.23-24; Luka 10.12; 17.29; 2 Pete 2.6; Iuta 7 25Na ia fa‘aumatia o ia lava ‘a‘ai, ma le fanua laugatasi uma, ma i latou uma sa mau i ia ‘a‘ai, ‘atoa ma mea na tutupu i le ‘ele‘ele. 26‘Ua tepa i tua lana avā sa mulimuli atu ‘iā te ia, ‘ona liua lea o ia ma tupua masima.#Luka 17.32

27‘Ua ala usu Aperaamo i le taeao i le mea sa tu ai o ia i luma o le ALI‘I; 28‘ua ia va‘ai atu i Sotoma ma Komoro, ma le fanua laugatasi uma, ‘ua iloa atu fa‘auta fo‘i, ‘ua alu a‘e le asu o le nu‘u e pei o le asu o se umu. 29‘Ua fa‘aumatia e le Atua o ‘a‘ai o le fanua laugatasi, ‘ona manatua lea e le Atua o Aperaamo, ma ‘ona ‘auina o Lota ai le malaia, ‘ina o fa‘aumatia e ia o ‘a‘ai sa mau ai Lota.

O le Tupuga o Tagata Moapi ma Tagata Amoni

30‘Ua alu a‘e fo‘i Lota nai Soara, ‘ona mau ai lea o ia i le mauga, fa‘atasi ma ona afafine e to‘alua; auā ‘ua fefe o ia i mau i Soara; ‘ua mau fo‘i i le ana, o ia ma ona afafine e to‘alua, 31‘Ona fai atu lea o lē matua i le itiiti, “‘Ua toeaina lo tā‘ua tama, e leai fo‘i se tane i le nu‘u e sau ‘iā te i tā‘ua e pei o le masani a le lalolagi uma.#19.31 lalolagi uma: po o lenei lau‘ele‘ele. 32Sau ia, se‘i tā fa‘ainua lo tā tamā i le uaina, ‘ona tatou ta‘o‘oto ai lea ma ia, ‘ina ‘ia tutupu ai ‘iā te i tā‘ua ni fānau ai lo tā tamā.” 33‘Ua fa‘ainua e i lā‘ua lo la tamā i le uaina i lea lava pō, ‘ona alu ane ai lea o lē matua, ma la ta‘o‘oto ma lona tamā; a ‘ua lē iloa e ia ‘ona ta‘oto o ia ma ‘ona toe tula‘i.

34‘Ua o‘o i le taeao, ‘ona fai atu ai lea o lē matua i le itiiti, “Fa‘auta mai, o anapō na ma ta‘o‘oto ai ma lo tā tamā; se‘i tā toe fa‘ainu ‘iā te ia i le uaina i le pō nanei, i le ē alu ane ai fo‘i lua te ta‘o‘oto ma ia, ‘ina ‘ia tutupu ai ‘iā te i tā‘ua ni fānau ai lo tā tamā.” 35‘Ua la toe fa‘ainua fo‘i lo la tamā i le uaina i lea po, ‘ona tula‘i ane lea o lē itiiti, ma la ta‘o‘oto ma ia; ‘ua lē iloa fo‘i e ia ‘ona ta‘oto o ia, ma ‘ona toe tula‘i. 36‘Ona totō ai lea o afafine e to‘alua o Lota, i lo la tamā. 37‘Ua fānau e lē matua o le tama tane, ma ‘ua fa‘aigoa ‘iā te ia, o Moapi;#19.37 Moapi: mai le gagana Eperu “mai lo‘u tamā.” o ia o le tupuga o sa Moapī; ‘ua o‘o mai i nei ona po. 38O lē itiiti fo‘i, na fānau o ia o le tama tane, ma ‘ua fa‘aigoa ‘iā te ia o Pename;#19.38 Pename: mai le gagana Eperu “o le tama tane o lo‘u ‘āiga.” o ia o le tupuga o le fānauga a Amoni ‘ua o‘o mai i nei ona po.

Currently Selected:

Kenese 19: RSCB

Highlight

Copy