Mar. 6

Jesus Nasarétnum pujusma

(Mat. 13:53-58; Ruk. 4:16-30)

1Jesus nuyá̱ jiinkí̱ ni nuṉke̱n waketkimiayi. Ni unuiniamuri̱sha nemariarmiayi. 2Nui̱sha ayampratin tsawant jeamtai Israer shuar iruntai̱niam wayá̱ unuiniamiayi. Tura Jesusan anturkarmiania nu ti enentáimsarmiayi. “¿Ju̱sha tui̱ unuimiáruit. Ni nekaatniuri̱ncha yaki súsait. Tura aentsti tujintiajnia nuna Nisha itiurak tura? 3Ju̱sha numiji̱a̱i̱ takachukait. Marí uchirí̱nchukait. Ni yachi̱sha Sántiaksha, Jusesha, Jútassha, Semuṉsha nékatsjik. Tura ni umai̱sha ju̱i̱ iiji̱a̱i̱ pujuiniatsuk” tiármiayi. Túrawar Nin nekas enentáimtustinian tujintkiarmiayi. 4Túrasha Jesus nin chicharuk “Yúsnan etserniun chíkich nuṉkanmaya̱ṉka shiir anturainiawai. Antsu ní nuṉke̱ya̱ṉka ní shuarsha anturainiatsui” tímiayi.

5Tura nui̱sha ni nuṉke̱nkikia aentsti tujintiamun túratniun tujintkiamiayi. Antsu jaancha aya ishichik ni uwejé̱ja̱i̱ antiṉ tsuármiayi. 6Tura nekas enentáimtacham “¿urukamtai nusha?” tu enentáimsamiayi.

Nuya̱sha chíkich péprunam wayá̱ chíkich péprunam wayá̱ Yus Chichaman unuiniakní̱ wekaimiayi.

Jesus etserkarat tusa akuprámu

(Mat. 10:5-15; Ruk. 9:1-6)

7Tuse unuiniamuri̱n untsuk jímiar jímiar werum Yus Chicham etserkatarum tusa akupkarmiayi. Tura iwianchin nupetkarat tusa ni kakarmari̱n súsarmiayi. 8Tura chicharuk “Jintiá yurumátniusha jukiirap, u̱yuntrumiincha kuitcha eṉkearum jukirap. Antsu aya ánik wai̱ jukirum wetarum. 9Sapat awekatarum tura entsartincha jímiar jukirap. 10Tura je̱a̱ waya̱rmena nui̱ṉ pujustarum, pujá pujakuarum nuyá̱ chíkich peprunmasha wetarum. 11Tura náṉkamas aents atumín awa̱intiámainiachkuisha, anturtamainiachkuisha nuyá̱ jiinkirum nu shuar yajauch áiniawai tusarum atumí nawe̱ya̱ nuṉka akakekrum ikiuktiarum. Kame Yus aentsun nekapsattana nú tsawant jeamtai nu shuarnaka asutiáttawai. Sutumanmaya̱ aentsja̱i̱ tura Kumuranmaya̱ aentsja̱i̱sha naṉkaamas nin asutiáwartatui” tímiayi Jesus.

12Nuyá̱ Jesusa unuiniamuri̱ jíinkiar aentsun ujakar ené enentáimiá ajasár Yusai̱ enentáimtumarat tusar etserkarmiayi. 13Tura iwianchruku enentái̱ya̱ iwianchin ji̱i̱rki̱ akupkarmiayi tura asuitiji̱a̱i̱ yakarar untsurí jáinian tsuararmiayi.

Juaṉ jakamu

(Mat. 14:1-12; Ruk. 9:7-9)

14Jesusa náari̱n tura ni túramuri̱n ashí aents áujmatin ásarmatai úunt akupin Irutis nuna antukmiayi. Irutiska “Imiakratin Juaṉ jakamunmaya̱ nantakní̱. Tuma asa ti kakaram takaawai” tímiayi. 15Tura chíkich shuar “Iríasaiti” tiármiayi. Chikicha “Yúsnan etserniuiti, yaunchu etserniuya núkete” tiármiayi. 16Irutis nuna antuk “Nekas Juáṉkaiti. Ni muuke̱n tsupiktinian akupkámiaj nu, jakamunmaya̱ nantakniuiti” tímiayi. 17-19Kame úunt akupin Irutis ni yachi̱ Jirip nua̱ri̱n nuatkamiayi. Nu nuwa̱ naari̱ Jirutíasaiti. Juaṉsha úunt akupniun Irutisan chicharuk “Yatsumi nua̱rí̱ akintrukchatniuitme” tímiayi. Tutai nuwa̱ Jirutías Juáṉkan ti kajerkámiayi. Tura Juáṉkan mátaj tusa wakerimiayi. Túrasha úunt akupin Irutis nuna surimkiamiayi. Antsu Juaṉ achikrum sepunam eṉkeatarum tusa akupkámiayi. 20Juaṉsha tuke enentáiji̱a̱i̱ Yusa jinti̱n wekainiuyayi. Irutis, ni esetar enentáimniun neka asa Juáṉkan ashamak Jirutías wakeramuri̱n túrawa̱i̱ṉ tusa suritkiamiayi. Kame Irutis Juaṉ étserman nékachuitiat antuktinian wakerimiayi.

21Jirutías itiurak máwaj tu pujái̱ úunt akupin Irutis ni akiiniamu tsawantri̱ jeamtai ni suntari̱ncha Kariréanmaya̱ úuntri̱ncha kuítrintin armia nunasha untsukar namperan najanamiayi. 22Nui̱sha Jirutíasa nawantri̱ wayá̱ jantsemámtai Irutis tura niji̱a̱i̱ nampernum matsamármia nusha shiir enentáimsarmiayi. Túramtai úunt akupin nuwa̱chin chicharuk “Ame wakeram nu seattiá. Wi amastatjai. 23Nekas tájame, ashí ame seatmena núnaka amastatjai. Wats, seatkumni̱ṉkia takakjana nuna jímiapetek nakakán amastatjai” tímiayi. 24Tutai nuwa̱ch jiinkí̱ ni nukurí̱n Jirutíasan chicharuk “¿Wariniak seattaj?” Tutai “Imiakratin Juaṉka muuke̱ seatá” tímiayi. 25Nu chichamaik nuwa̱ch wari wayá̱ Irutisan chicharuk “Yamaikia uunt amamkunam Imiakratin Juaṉka muuke̱n wakerajai” tímiayi.

26Nuna takui̱ úunt akupin tí kuntuts enentáimpramiayi. Tura ni tiniu asa ni amikri̱ matsatainia nu antukaru ásarmatai surimkiatniun tujintkiamiayi. 27Tuma asa úunt akupin Juaṉka muuke̱ itiata tusa ni suntari̱n wárikmas akupkámiayi. 28Túramtai suntar wari we sepunam Juaṉka muuke̱n tsupikmiayi. Tsupik amamkunam itiá nuwa̱n susamiayi. Túram achik ni nukurí̱n susamiayi. 29Juaṉ mámun antukar ni unuiniamuri̱ ni aya̱shi̱n iwiarsatai tusar júkiarmiayi.

Seṉku mir áishmaṉkan Jesus ayurawarma

(Mat. 14:13-21; Ruk. 9:10-17; Jṉ. 6:1-14)

30Tura Jesusa unuiniamuri̱ Ni akupkarma nu ataksha waketki̱ kaunak irunturarmiayi. Ashí ni túrawarmia nuna unuiniararmia nunasha ujakármiayi. 31Tura untsurí shuar táiniakui nisha aṉkant ajastinniasha yurumátniuncha tujintkiarmiayi. Tuma asamtai Jesus chichaak “Iiji̱a̱i̱ wemí aents atsuiniamunam nui̱ ishichik ayamprarmi” tímiayi. 32Nuyá̱ Jesus ni unuiniamuri̱ji̱a̱i̱ kanunam eṉkemprar aents atsuiniamunam jeatái tusar jíinkiarmiayi. 33Túrasha shuar ni wéenan wáinkiarmiayi. Tura “Jesusaiti” tiármiayi. Tuma ásar ashí péprunmaya̱ untsurí shuar tseke ashintiukar ni jeatniunam nákakarmiayi. 34Jesus kanunmaya̱ jiinkí̱ ti untsurí aents iruntrar matsatun wainkiamiayi. Murik péṉker wáinchatai̱ya núnisaṉ matsatu ásarmatai Jesus nin wáitnentrarmiayi. Tura núkap unuiniararmiayi. 35Nuyá̱ kí̱akui̱ ni unuiniamuri̱ Jesusan tariar chicharainiak “Atsamunam pujatsjik tura yamái kí̱atsuk. 36Shuar wari akupkarta. Tíjiu̱ch péprunam shuarnumsha wéarti, ni yurumkari̱ sumarmakaratⁱ” tiármiayi. 37Tutai Jesus chichaak “Atumek ayuratarum” tutai “Iisha ju̱ shuar ayuratai tusar ¿jimiará sian kuitji̱a̱i̱ yurumak sumaktai tusar wétinkiaitiajⁱ?” tiármiayi. 38Tura Jesus ni unuiniamuri̱n chicharainiak “Paṉ takakrum nu iistarum ¿urutmak aa?” tímiayi. Tutai nekapmarar chichainiak “Paṉka séṉkuchikiti tura namaksha jímiarchikiti” tiármiayi. 39Tutai Jesus chichaak “Ju̱ shuar chírichriniam pujusárti tusar akupkatarum” tímiayi. 40Aṉkant aṉkant sian siancha seṉkuintia seṉkuintia iruntrar matsamsarmiayi. 41Jesuska seṉku páṉkan jímiar namaknasha jusa yakí̱ nayaimpinmaani̱ íimias Yusan yumiṉsamiayi. Tura yurumkan púurmiayi. Puur ni unuiniamuri̱n súsarmiayi. Namaknasha puur súsarmiayi ashí shuaran ajamsarat tusa. 42Ashí yurumáwar ejemararmatai 43puunaruncha namak ampirmancha achikiar tuse chaṉkinian áimkiar júkiarmiayi. 44Nu yurumkan ti untsurí yurumáwarmiayi. Aya áishmaṉkak seṉku mir ármiayi.

Jesus entsá pátatek wekasamu

(Mat. 14:22-27; Jṉ. 6:16-21)

45Nuyá̱ Jesus ni unuiniamuri̱n chicharainiak “Kanunam eṉkemprarum katiṉkrum amain émaa ajatarum Petsaitianam Wisha ju̱ shuaran áujsan ikiukiartaj” tímiayi. 46Shuaran áujas ikiukí̱ Yusja̱i̱ chichastaj tusa nainnium wémiayi.

47Tura kirit ajasmanum kánuka antumiaṉnum ajapén nanamiayi. Jesuska niṉki juákmiayi. 48Jesusa unuiniamuri̱sha wiá wiantainiakua ti pimpikiarmiayi, nase tukumma ásar. Nuna Jesus wainiak tsawa̱rtin ishichik ajasmatai entsá pátatek wekas nin jeariármiayi. Tura naṉkaamaktiasa wea núnisaṉ wémiayi. 49Jesus entsá wekaan ni unuiniamuri̱ wáinkiar wakanchashit, tu enentáimprarmiayi. Túrawar ti untsumkarmiayi. 50Ashí wáinkiar ti ashamkarmiayi. Tura Jesus nú chichamaik nin chicharainiak “Kakaram ajastarum, Witjiai ashamprukairap” tímiayi. 51-52Nuiṉkia kanunam eṉkempramtai nasesha majaantmiayi. Ni unuiniamuri̱nkia enentái̱ kiritia áintsaṉ ásarmatai Jesus yurumkan núkap awajsámia núja̱i̱sha núnaka paant nekaatniun tujintkiarmiayi. Tuma ásar yamái túrunamu itiurak ankia tusar ti enentáimprar sapijmiakarmiayi.

Jesus Jinisarítniumia̱n tsuarma

(Mat. 14:34-36)

53Nuya̱ṉka katiṉkiar Jinisarít nuṉkanam jeawarmiayi. Jeawar kanun aju̱i̱niarmiayi. 54Kanunmaya̱ jíintrarmatai nu nuṉkanmaya̱ shuar Jesusan nekaawarmiayi. 55Tura “Jesus pujawai” táman antukar ashí je̱a̱nmaya̱ jaan peakri̱ntiuk Jesus pujamunam itiaarmiayi. 56Tura Jesus wekaak wemia nui̱sha péprunmasha shuar matsatmanumsha ishichik mátsatkamunmasha jaan itiariar jintiá aeprusarmiayi. Túmainiak Jesusan pushirmin antiṉtaj tusar seawarmiayi. Tura ashí antiṉkiarmia nuka péṉker ajasármiayi.

Currently Selected:

Mar. 6: jiv

Highlight

Copy