Mar. 14

Jesus chícham jurusma

(Mat. 26:1-5; Ruk. 22:1-2; Jṉ. 11:45-53)

1Jímiarchik tsawant ajasmiayi Paskua tutai námper jeatin. Paskua nampertincha karin eṉketáchma páṉkan yúatin nampernasha métek najanin ármiayi. Yúsnan pujurniu úuntri̱sha tura Israer shuara jintinniuri̱sha Jesusan anaṉka achikiar maatai tusar wakeriarmiayi. 2Túrasha “Námper tsawantin túrachmi aents charaatum ajara̱i̱ṉ tusar” tiármiayi.

Nuwa̱ Jesusan kuṉkuinian ukatramu

(Mat. 26:6-13; Jṉ. 12:1-8)

3Jesussha Petanianam tunamáru Semuṉka je̱e̱n ekentsa yurumtainiam pujan nuwa̱ tarimiayi. Nartu kuṉkuinian arapástru tutai kaya najanamunam piákun itiamiayi. Nu kuṉkuin tí kuitiaiti. Mutí chuchuke̱ kupik Jesusa muuke̱n kuṉkuinian ukatramiayi. 4Tura nui̱ pujuarmia nu, kajerar tunaiyarmiayi “¿Urukamtai ju̱ kuṉkuinian ántar wasurea? 5Ju̱nasha súrakka menaintiú sian kuítnium surukminiuyi. Nu kuitcha kuítrinchan súsaṉka maak” tiármiayi tusa nuwa̱n kajerkarmiayi. 6Antsu Jesus chicharainiak “Iniaisatarum. ¿Urukamtai au kajerarum? Winia shiir túrutayi. 7Kuítrincha atumji̱a̱i̱ tuke íruntsuk. Wakerakrumka tuke péṉker awajsatniuitrume. Antsu Wikia atumji̱a̱i̱ tuke pujushtatjai. 8Ju̱ nuwa̱ ashí ni túramnia núnaka umikiai. Wi jákatin jeatsa̱i̱ṉ iwiarsatin kuṉkuinian shiir ukatrurai. 9Nekas tájarme, ashí nuṉkanam Yus Chicham etsernaktatna nui̱ ju̱ nuwa̱ túramuri̱sha etsernaktatui, nin kajinmatkiara̱i̱ṉ tusa” tímiayi.

Jútas Jesusan suruktaj timia

(Mat. 26:14-16; Ruk. 22:3-6)

10Nuyá̱ Jútas Iskariúti, Jesusa unuiniamuri̱ntiat Yúsnan pujurniu úuntri̱n werimiayi Jesusan suruktaj tusa. 11Nisha nuna antukar warasar “Kuit amastatji” tiármiayi. Jútassha Jesusan itiurak yúpichuch tsaṉkamkattaj tusa enentáimias wekaimiayi.

Jesusja̱i̱ iruntrar yurumáwarma

(Mat. 26:17-29; Ruk. 22:7-23; Jṉ. 13:21-30; 1 Kur. 11:23-26)

12Karinji̱a̱i̱ pachimprachma páṉ yutai̱ námper náṉkamma tsawant tsawa̱rmatai Paskua nampertin yúatin murik mátin jeamtai Jesusa unuiniamuri̱ iniasarmiayi “Páskuatin murik yúatin iwiaratai tusar ¿tui̱ wétatajⁱ. Tui̱ yurumáttam?” tiármiayi. 13Tutai Nisha jimiará unuiniamuri̱n akatar akupeak “Péprunam wetarum. Nui̱ áishmaṉ yumin jukí̱ wea wainkiattarme. Nu áishmaṉ nemarsatarum. 14Waya̱na nui̱ je̱á̱ nérenniuri̱ chicharkuram ‘¿Wisha unuiniamurja̱i̱ tui̱ yurumáttaj? Uunt túramui’ titiarum. 15Nu nérentin yakí̱ uunt tesamunam ashí iwiaramun iniakturmastatrume. Nui̱ námper ii najanatin iwiaratarum” tímiayi. 16Ni unuiniamuri̱ wéar péprunam jeawar Jesus timia núnisaṉ wáinkiarmiayi. Tuma ásar Paskua namperan iwiararmiayi.

17Nuyá̱ kí̱akui̱ Jesus ni tuse unuiniamuri̱ji̱a̱i̱ waya̱warmiayi. 18Nisha ekentsa yurumtainiam pekamak yurumáiniak pujusár Jesus chicharainiak “Nekas tájarme, chikichík shuar Wiji̱a̱i̱ yurumna nu surutkattawai” tímiayi. 19Nuja̱i̱ kúntuts enentáimprarmiayi. Chíkich chíkich Jesusan aniasar “wíashitiaj” tiármiayi. 20Jesus chichaak “Túsenmaya̱ chikichik nu piniṉnumaṉ jimiartukan yuajna nu Winia surutkattawai. 21Nekas Wi Aents Ajasuitjiana ju̱ jákatniunam wéajai áarturma áintsanak. Tura áishmaṉ súrutna nu ti wáitsattawai. Nisha akiinmainchu ajakuiti” tímiayi.

22Yurumáiniak Jesus Yusan yumiṉkias yurumkan achik puuk chicharainiak “Achiktarum, ju̱sha winia aya̱shruiti” tímiayi. 23Piniṉnasha achik Yusan yumiṉkias ni unuiniamuri̱n súsarmiayi. Ashí umararmiayi. 24Umararmatai Jesus chicharainiak “Ju̱i̱ti winia numpar untsurí aentsun yáiṉkiartinian puártatna nu. Nuja̱i̱ Yamaram Chichaman Yus najanaiti. 25Nekasan tájarme, yamaikia ju̱ya̱ṉka uwa yumiri̱nkia atakka peṉké umarchattajai. Antsu tsawant jeattana nui̱ Yus akupeamunam yamarman umartatjai” tímiayi.

Pítiur Jesusan natsantratin ujakma

(Mat. 26:30-35; Ruk. 22:31-34; Jṉ. 13:36-38)

26Yus kantan kantamáwar jíinkiar Uriwiu nainnium wéarmiayi. 27Nuiṉkia Jesus nin chicharuk “Ju̱ kashi átum natsantrurtatrume. ‘Murikiu wáinniun máattajai túramtai murik tsakiṉmakartatui’ tu áarchamukait.Sak. 13:7 28Tura ukunam Wi nantakin atumín Kariréanam émtuktiajrume” tímiayi. 29Tutai Pítiur chicharuk “Ámin ashí natsantramainiakuisha, wikia natsantrashtatjame” tímiayi. 30Tutai Jesus chichaak “Nekas tájame, ju̱ kashi atash jimiará shiniatsa̱i̱ṉ natsantrurtatme. ‘Núnaka nékatsjai’ menaintiú turuttiatme” tímiayi. 31Tutai Pítiur kakaram chichaak “Ámiji̱a̱i̱ métek mántuiniakuisha núnaka peṉké tíchattajai” tímiayi. Ashí ni unuiniamuri̱ núnisaṉ tiármiayi.

Jesus ajanam Yusan áujsamu

(Mat. 26:36-46; Ruk. 22:39-46)

32Nuyá̱ Jitsemaní ajanam jeawar ni unuiniamuri̱n chicharainiak “Wikia Yusan áujsataj tusa pujái̱ átumka ju̱i̱ pujustarum” tímiayi. 33Nuyá̱ Pítrun, Jakupuncha, Juáṉnasha jukimiayi. Tura Jesuska tí kuntuts enentáimiar wake mesetan juármiayi. 34Tura nin chicharuk “Wi tí kuntuts enentáimjiai tura jakamnia nekapeajai. Ju̱i̱ imia pujutarum” tímiayi. 35Jesussha ishichik arantach we nuṉká piniakumar tepes Yusan áujmiayi. “Ju̱ wáitsatin átatna nu túrutatniuitkiuiṉkia iniaitiusta” tu seamiayi. 36Tuke áujuk chichaak “Apawá, ashí tujinchaitme. Piniṉnumia̱ ashí umartinia ántsaṉ ti nekapsatajna nú waitsatin jurutkitia. Antsu Wi wakeraj nucha, ame wakeramuram túrunati” tímiayi. 37Tura ni unuiniamuri̱n tarí kanúu tepenan wainkiamiayi. Pítrun chicharuk “¿Semuṉka kánamek. Kanutsuk ishichkisha imia pujustin tujintkiamek? 38Anearum Yus áujsatarum, tunaanum iniaara̱i̱j tusarum. Atumí wakaní̱i̱n kakarmaitrume antsu atumí aya̱shí̱i̱n kakarmachuitrume” tímiayi.

39Ataksha we, nuik Yusan áujsama núnisaṉ áujsamiayi. 40Ataksha waketruki̱ ni unuiniamuri̱n kanúu tepenan tarimiayi. Kari̱ ti pujá asamtai Jesusan áujsatniun tujintkiarmiayi. 41Jesus ataksha we tarí chicharainiak “Kanarum ayampratarum. Máakete. Jeayi. Wi, Aents Ajasuitjiana ju̱, tunáa shuarnum surukmaitjiai. 42Nantaktiarum, wemí. Iis, Winia súrutna nu nuntumsai” tímiayi Jesus.

Jesus achikma

(Mat. 26:47-56; Ruk. 22:47-53; Jṉ. 18:2-11)

43Jesus nuna chicháa pujá unuiniamuri̱ Jútas tarimiayi. Niji̱a̱i̱ untsurí aents puyá̱ takaku tura numincha takaku káutkarmiayi. Yúsnan pujurniu uuntri̱ nuyá̱ Israer shuara jintinniuri̱ tura Israer shuara uuntri̱ akupkarma asa káutkarmiayi. 44Káuntsa̱i̱ṉ Jútas chicharainiak “Wi áujkin mukunataj núiti Jesus. Achikrum péṉker emetarum jukitiarum” tímiayi. 45Tura Jesusan tarí mukunuk áujas “Uuntá, Uuntá” tímiayi. 46Túramtai aentssha Jesusan achikiar emetawarmiayi. 47Túruiniakui nui̱ wajatusha puya̱ri̱ úkuitsaṉ Yúsnan pujurniu uuntri̱ takarniúri̱n awati ni kuishi̱n tsupirkamiayi.

48Túram Jesus aentsun chicharuk “Kasakaitiaj. Puya̱ja̱i̱ numiji̱a̱i̱ kasá nútiksarmek achirkatai tusarum tarutniurme. 49Ashí tsawant atumji̱a̱i̱ Yusa Uunt Je̱e̱n waya̱n unuiniakun pujuchmakaj. Tumai̱ nui̱ achirkachmarme. Tura Yus timia nu uminkiat tusa ju̱ túrunayi” tímiayi. 50Nuiṉkia ashí ni unuiniamuri̱ Níniak ikiuiniak pisararmiayi.

Natsa pisarma

51Tura áishmaṉ natsach aya tarachin penumas Jesusan atamprimiayi. Tura natsachin suntar achikiam 52tarachrí̱n ajapa ikiuak misú tsékeṉkimiayi.

Jesus Yúsnan pujurniu úuntri̱i̱n jukimiu

(Mat. 26:57-68; Ruk. 22:54-55,63-71; Jṉ. 18:12-14,19-24)

53Yúsnan pujurniu úuntri̱i̱ṉ Jesusan ejeniarmiayi. Nui̱ Yúsnan pujurniu úuntri̱sha, Israer shuara jintinniuri̱sha, Israer shuara úuntri̱sha irunturarmiayi. 54Tura Pítiur íikiaṉ nemarki̱ Yúsnan pujurniu je̱e̱n a̱a̱ch jeá Yúsnan pujurniu suntari̱ji̱a̱i̱ jinia anamuk pujumiayi. 55Yúsnan pujurniu uuntri̱ ashí naamka uunt armia nuja̱i̱ iruntrar maatai tusar wakeruiniak shuar Jesusan tsanumprurat tusar e̱a̱tkarmiayi. Nu chichamja̱i̱ mantamnati, tiármiayi. Túrasha wáinkiacharmiayi. 56Túrasha untsurí shuar Jesusan tsanumpruiniayataṉ yapaji̱á yapaji̱á chichainia ásarmatai wáinkiacharmiayi. 57Nuyá̱ chíkich wajakiar wáitruiniak ju̱na tiármiayi 58“‘Yusa Uunt Je̱e̱n, aents je̱a̱marmia nuna yumpuṉtiatjai. Túran menaintiú tsawantai̱ chikichan aents je̱a̱mchamun je̱a̱mtatjai’ tau antukmaji” tiármiayi. 59Tura tuke yapaji̱áwar tiármiayi.

60Nui̱sha Yúsnan pujurniu uuntri̱ ajapén wajaki̱ Jesusan chicharuk “¿Áimsatin peṉké tujintiamek. Warinia turamainia?” tímiayi. 61Tura Jesus tákamtak áimtsuk pujumiayi. Yúsnan pujurniu uuntri̱ atak chicharuk “¿Ame nekas Yusa Anaikiamuri̱nkaitiam. Ii Yusri̱ Uunt tájinia nuna Uchirí̱nkaitiam?” 62Tutai Jesus chichaak “Ee, núitjiai. Winia, Aents Ajasu tutaintiajna nu Kakaram Yusa untsuurí̱ni̱ pujái̱ waitkiattarme.YKan. 110:1 Tura nayaimpinmaya̱ yuraṉminiam winiái̱ waitkiattarme” tímiayi.Tan. 7:13 63Tutai Yúsnan pujurniu uuntri̱ kajek ni pushiri̱n ja̱a̱k chichaak “¿Chíkich títincha warí atsumajⁱ? 64Ni tana nuja̱i̱ Yusan kátsekeamu antukurme. ¿Warintia enentáimprum?” Takui̱ “jakamniaiti” ashí tiármiayi. 65Chíkich chíkich Jesusan usukiáwarmiayi. Ji̱n epetkar awatiar “¿Ya áitkiarma? etserkata” tiármiayi. Yúsnan pujurniu suntarí̱sha yapiniam awatiármiayi.

Pítiur Jesusan natsantramu

(Mat. 26:69-75; Ruk. 22:56-62; Jṉ. 18:15-18,25-29)

66Núnaka túruiniai̱ Pítruka je̱a̱ á̱a̱ri̱n nuṉká pujái̱ Yúsnan pujurniu uuntri̱ takarniúri̱ nuwa̱ támiayi. 67Nisha Pítiur jinia anamu pujan wainiak iis chicharuk “Amesha Nasarétnumia̱ Jesusja̱i̱ wekaichmakum” tímiayi. 68Tutai Pítiur chicharuk “Nékatsjai. Ame támena nuna nékatsjai” tímiayi. Tura a̱a̱ wá̱i̱ti̱a̱i̱niam jiinkimiayi. Tumai̱ atash shiniukmiayi.

69Nu nuwa̱sha Pítrun ataksha wainiak shuar nui̱ pujuinian chicharuk “Ju̱i̱ti ni shuari̱.” 70Tura ataksha “atsá” tímiayi. Ishichik árusaṉ shuar nui̱ pujuarmia nu ataksha Pítrun chicharuk “Nekas ní shuari̱nme. Kariréanmaya̱ shuarchakaitiam. Auya̱ shuara nuní̱ chichaame” tiármiayi. 71Tutai Pítrusha kakantar chichaak “Ju̱ áishmaṉnaka átum tárumna núnaka nékatsjai. Wáitrakuiṉkia Yus íirsati” tímiayi. 72Nuyá̱ ataksha atash shiniukmiayi. Pítrusha Jesus nuik timian enentáimmiayi. Iis, Jesus nuik tíchamka “Atash jímiar shiniatsa̱i̱ṉ, ame, núnaka nékatsjai, menaintiú turuttiatme” tíchamka. Pítiur nuna enentáimias tí utmiayi.

Currently Selected:

Mar. 14: jiv

Highlight

Copy