Mar. 13

Yusa Uunt Je̱e̱ yumpuntratniun Jesus ujakma

(Mat. 24:1-2; Ruk. 21:5-6)

1Yusa Uunt Je̱e̱ya̱ Jesus jiinkimtai unuiniamuri̱ Nin chicharuk “Iisiá, Uuntá, kayasha ti shiir áiniawai. Je̱a̱sha imiá úuntchakait.” 2Tutai Jesus chichaak “Ju̱ imiá uunt je̱a̱ wáinmek. Kaya ekentramua au ashí mash yumpuntrartatui” tímiayi.

Amuukatin tsawant uruku átata

(Mat. 24:3-28; Ruk. 21:7-24; 17:22-24)

3Nuyá̱ Uriwiu nainnium wákar Yusa Uunt Je̱e̱n naka íirtanum Pítrusha, Jakupusha, Juaṉsha, Antressha, níniak Jesusan anintruiniak 4“Uuntá, tímiam nu, ¿urutía túrunatta. Nu túrunatin jeakuisha itiura nekaattajia? Paant ujakratkata” tiármiayi. 5Tutai Jesus chichaak “Aneartarum, anaṉkramawairap. 6Nekaatarum, untsurí winia náarun pachisar winiartatui. Chíkich chíkich ‘Witjiai Kristu’ taku, untsurín anaṉkawartatui. 7Tura mesetan najanainiawai tama ántakrumka tura yajaya̱ meset chicham ántakrumsha sapijmiakairap. Nekas túrunashtinkiait. Núja̱i̱sha amuukatin tsawantka tuke jeatsui. 8Shuar chíkich shuarja̱i̱ mesetan najanawartatui. Uunt nuṉka mátsatkamu chíkich uunt nuṉka mátsatkamuja̱i̱ mesetan najanawartatui. Untsurí nuṉkanam ú̱u̱rkattawai. Tsukasha ártatui, charaatum ajamusha núnisaṉ átatui. Nuja̱i̱ itiurchatka aya yáma naṉkamnak túrunattawai.

9 Túrasha atumek anearum íimiastarum. Warí átumka uuntri̱ iruntai̱niam jukimiu átatrume. Túrutmawarmatai Israer shuar iruntai̱ je̱a̱nam asutniáttarme. Núnisrumek Winia enentáimturkurmin námkaru ainia nui̱sha tura úunt akupniunmasha junaktiatrume. Tura nui̱sha Winia chichamur etserkattarme. 10Nu túmatsa̱i̱ṉ ashí aentsnum Yus Chicham etsernaktiniaiti. 11Atumín surutmaktasar juramainiakuisha warintiajak tusarum ti enentáimsairap. Chichastin jeamtai Yusa Wakaní̱ jintintrámattarmena nu titiarum. Iis, atumí enentái̱ji̱a̱i̱ tíchattarme antsu Yusa Wakaní̱ jintintiam títiatrume. 12Nu tsawantin shuar ni yachi̱n mantamnat tusa suruktatui. Apasha ni uchirí̱n suruktatui. Uchisha aparí̱ncha nukurí̱ncha kajerak jakati tusa suruktatui. Núnisaṉ untsurí shuar túrawartatui.Mik. 7:6; Mat. 10:35-36 13Nuiṉkia Wí shuar asakrumin ashí nakitrámprartatui. Tura shuar yawe̱tsuk katsuntraṉka uwemprattawai” tímiayi.

14Nuyá̱ Jesus chichaak “Shuar ju̱na áujeana nu nekaati. Yúsnan etserin ni naari̱ Taniar, ti yajauch tuke emesin ana nunaTan. 9:27; 11:31; 12:11 yaunchu aar etserkamiayi. Nuka pujushtainiam pujan wáinkiurmesha ashí Jutanam pujarmena nu nainnium pisartarum. 15Je̱a̱ yakiini̱ pujana nu akaikí̱ wariri̱ achiktajtsa je̱e̱n waya̱shti. 16Ajanam pujana nusha ni pushiri̱n jukitiajtsa waketkishti. 17Tura ajamtin áiniana nusha tura kuírchin umuntsainia nusha nu tsawantin timiá itiurchatan wáinkiartatui. 18Tuma asamtai átum pisarmena nui̱ yumitin áchati tusarum Yus seatarum. 19Nu tsawantinkia tí waitsatin átatui. Yama naṉkamtaik Yus nuṉkan najanama nui̱sha, yamaisha ukunmasha timianú wáitsatin peṉké atsuttawai. 20Tura Uunt Yus wáitsatin tsawantan ishichik awajsattajai tíchaitkuiṉkia uwempratin peṉké atsuinti. Tura ni shuari̱n anaikiamia nuna yáiṉtajtsa wakerak nu tsawantan ishichik awajsattawai. 21Nu tsawantai̱ ‘ju̱i̱ti Kristu’ túramkuiṉkia anturkairap. 22Kame ‘Krístuitjiai’ ántar tuinia nu tura ‘Yúsnan etserniuitjiai’ ántar tuinia nusha wantinkiartatui. Wantinkiar Yus anaikiamu shuarnasha anaṉkatai tusar wakeruiniak ni kakarmari̱n iniakmainiak aentsti tujintiamun túriartatui. 23Tura átum aneartarum. Aetak túmatsa̱i̱ṉ ujakchajrumek” tímiayi Jesus.

Aents Ajasu tutai tátin

(Mat. 24:29-35,42-44; Ruk. 21:25-36)

24Jesus tuke unuiniak ju̱na chichaak “Tura nu wáitsatin naṉkaamasmatai etsa̱sha nantusha etsantrashtatui. 25Yaasha nayaimpinmaya̱ kakekartatuiIsa. 13:10; Juir 2:30-31 tura nayaimpiniam kakaram ainia nu muchitrartatui. 26Nuya̱sha ashí aents Winia wáitkiartatui. Wi, Aents Ajasuitjiana ju̱, ti kaka̱ran, ti wincha ajasan yuraṉminiam winiái̱ wáitkiartatui.Tan. 7:13 27Nui̱ nayaimpinmaya̱ suntarun akupkáttajai Wí shuaran ashí nuṉkanmaya̱n irurarat tusan. Arakaani̱ya̱, nuṉkaani̱ya̱, ashí nuṉka náṉkatkamunmaya̱n Wí shuaran irurartatui.

28 Ikiu numi nakumea nu nekaatarum. Ni nukareakui ‘ju̱ nuṉkanam esat jeatémai’ tátsurmek. 29Núnisrumek Wi tájarmena nu wáinkiurmeka ni tátintri̱ jeatéma nu nekaattarme. 30Nekas tájarme yamái aents pujuinia nu kaji̱ṉ amuiniatsa̱i̱ṉ ashí Wi tájana nu túrunatniuiti. 31Nayaimpisha nuṉkasha amuukatniuiti. Tura winia chichampruka amuukashtiniaiti. 32Tura tsawantcha nekanachminiaiti. Nayaimpinmaya̱ suntarsha nékainiatsui, Wisha Yusa Uchirí̱ntiatan nékatsjai. Aya winia Aparuk nékawai. 33Atumsha anearum enentáimprarum Yus áujsarum pujustarum, tsawant nékachu asarum.

34 Tura Wikia ju̱ shuarja̱i̱ méteketjai. Ju̱ shuarsha jeachat wéak ni je̱e̱n ikiuawai. Ikiuak ni shuari̱n waitrukarti tusa apujas ikiuak ashí shuaran takatrí̱n suawai. Tura wáitin wáinniun ‘ameja péṉker wáinkiata’ timiai. 35Wikia nu je̱a̱ nérenniua núnisnak urutái tátataj nékachu asarum anearum pujustarum. Kí̱araimpiash tura ajapkeash atash shiniukaimpiash káshikiash tátaj. 36Nérentin aya aneachmak taa kanúu tepái̱ waitki̱a̱i̱ tusarum aneartarum. 37Wi atumín tájana nu, ashí shuaran tajai anearum pujustarum” tímiayi Jesus.

Currently Selected:

Mar. 13: jiv

Highlight

Copy