Mar. 15

Jesus Piratuí̱ ejemu

(Mat. 27:1-2,11-14; Ruk. 23:1-5; Jṉ. 18:28-38)

1Tura kashin káshik Yúsnan pujurniu uuntri̱, Israer shuara úuntri̱ji̱a̱i̱, Israer shuara jintinniuri̱ji̱a̱i̱ ashí naamka armia nuja̱i̱ irunturar chichaman jurusármiayi. Túrawar Jesusan jiṉkiamun Piratuíi̱n ejeniarmiayi. 2Ejeniarmatai Piratu aniasmiayi “¿Amesha Israer shuara Úuntri̱ṉkiaitiam?” tutai Jesussha “Amek tame” tímiayi.

3Nuyá̱ Yúsnan pujurniu uuntri̱ ti tsanumprurarmiayi. 4Ataksha Piratu aniasmiayi “¿Áimsatin peṉké tujintiamek? Ti untsurí etserturmainiatsuk” tímiayi. 5Tura Jesus nunasha ái̱kchamiayi. Túmakui̱ Piratu ti enentáimpramiayi.

Jesus mantamnati tiarma

(Mat. 27:15-31; Ruk. 23:13-25; Jṉ. 18:38—19:16)

6-7Shuar ámiayi ni naari̱ Parapás. Nisha ni shuari̱ji̱a̱i̱ meset ámanum shuaran maa asamtai sepunam eṉkeamuyayi. Tura námper tsawantai̱ Piratu sepunmaya̱ chikichík shuarnak ji̱i̱ki̱ akupniuyayi, aents seawarmia nuna. 8Nui̱sha untsurí shuar Piratun káutkar nampertin tuke túratniua nuna túrawarti tusar seawarmiayi. 9-10Yúsnan pujurniu uuntri̱ Jesusan kajerkaru ásar surukarmiayi. Piratusha nuna nekáa chicharainiak “Israer shuartiram ¿atumí akupniuri̱n ji̱i̱ki̱ akupkáttajak? ¿Nu wakerarmek?” tímiayi. 11Tutai Yúsnan pujurniu uuntri̱ aentsun chichainiak “Antsu Parapás jí̱i̱kim akupkata titiarum” tiármiayi. 12Tutai Parapásan seawarmatai Piratu ataksha chicharainiak “Jesusnasha, átum ii akupniúri̱ tárumna nuna ¿itiurkattaja?” tímiayi. 13Ataksha ni kakantar chichainiak “Krúsnum mantamnati” tiármiayi.

14Piratusha nin ininiak “¿Warí tunaana túriniait?” tiármiayi. Takui̱ nisha nú naṉkaamas kakantar chichainiak “Krúsnum mantamnati” tiármiayi. 15Tuma asamtai aents shiir enentáimprarti tusa Piratu tunáa shuaran, Parapásan ji̱i̱ki̱ akupkámiayi. Tura Jesusnasha katsumkarum krúsnum ajintrurtarum tusa suntaran tsaṉkatkamiayi. 16Tiniu asamtai suntar Jesusan jukiar suntara uuntri̱ je̱e̱n awayá̱warmiayi. Nu je̱a̱ naari̱ Piritiúriuiti. Túrawar untsurí suntaran untsukarmiayi. 17Ashí káunkar pushin kapanniun Jesusan áentsrarmiayi. Tawasap jaṉki najanamun etseṉkrumtikiarmiayi. 18Nui̱sha Jesusan áujsar “Shíiraitme Jesusá, Israer shuara akupniuri̱yá” wishikiainiak tiármiayi. 19Muuknumsha sapapja̱i̱ awatiármiayi nuyá̱ usukiáwarmiayi. Túrawar ántar tikishmátrarmiayi. 20Tura Jesusan wishikrar amukar kapantin pushin áitkiar ni pushiri̱n áentsrarmiayi. Túrawar krúsnum ajintrurtai tusar jí̱i̱kiarmiayi.

Jesus jakamu

(Mat. 27:32-44; Ruk. 23:26-43; Jṉ. 19:17-27)

21Semuṉ Serini nuṉkanmaya̱ shuarauyayi. Arejántruncha, Rupuncha aparí̱yayi. Semuṉkan takatnumia̱ winian suntar emetawarmiayi, Jesusa krúsri̱n yanakí̱ jukiti tusar. 22Jesusnasha Kúrkuta nainnium júkiarmiayi. Kúrkuta shuar chichamja̱i̱nkia, muuka ukunch naint, tutainti.

23Jeawarmatai karía mira kuṉkuinji̱a̱i̱ pachimprar áartaj tusa Jesusan súsarmiayi. Túrasha umarchamiayi. 24-25Nantu yakí̱ jatemsamtai krúsnum ayapá̱r ajintrurar ikiusármiayi. Túrawar suntar yaki jukit tusar nakurútaiji̱a̱i̱ nakurúsar Jesusa pushiri̱n yaruakarmiayi. 26Urukamtai máamuit ashí aents nuna nekaawarat tusa ni krúsri̱n ju̱ áarmauyayi ISRAER SHUARA AKUPNIURI̱.

27Nu nainnium jimiará kasa shuaran Niji̱a̱i̱ máwarmiayi. Chikichik Jesusa untsuurí̱ni̱ krúsnum, chikichik ni menaari̱ni̱ krúsnum máwarmiayi. 28Yus Papinium aarma ana nuja̱i̱ uminkiauyayi. Nui̱ “tunáa shuarja̱i̱ nekapmarmauyayi.” Isa. 53:12

29Shuar naṉkaamainiak muuke̱n pe̱a̱shim Jesusan katsekainiak chicharainiak “Iisiá, amesha ‘Yusa Uunt Je̱e̱n yumpuṉtiatjai tura menaintiú tsawantai̱ ataksha je̱a̱mkattajai’ tichakaitiam. 30Amek krúsnumia̱ akaikim uwemprata” tiármiayi. 31Núnisaṉ Yúsnan pujurniu úuntri̱sha, Israer shuara jintinniuri̱sha Jesusan wishikrar chicharnaisarmiayi “Chikichan uwemtikraitiat Niṉki uwempratniun tujintiawai. 32Yusa anaikiamuri̱ Krístuashit, ii akupniúri̱niashit. Wats, yamái krúsnumia̱ akaikiti, iisha nu íisar nekas Krístuiti titiái tusar” wishikiainiak núnaka tiármiayi. Jesusja̱i̱ krúsnum ajintruamusha Nin wishikiarmiayi.

(Mat. 27:45-56; Ruk. 23:44-49; Jṉ. 19:28-30)

33Tutupin jeamtai ashí nuṉkanam ti kiritin ajasmiayi. Tura nantu nuṉkach ajasmatai ataksha tsáapnirmiayi. 34Nuiṉ Jesus kakantar untsumuk chichaak “Iruí, Iruí, rama sapaktáni.” Nuka shuar chichamja̱i̱ṉkia “Yusru, Yusru, ¿urukamtai ajapa ikiurkiniam?” tawai.YKan. 22:1 35Shuar nui̱ pujuarmia nu, nú chichaman nékachu ásar nuna antukar “Iríasan untsúawai” tiármiayi. 36Chikichik shuar churuinian uruchji̱a̱i̱ ajamper sapapja̱i̱ ijiú mukunati tusa susamiayi. Tura tímiayi “Wajastarum, Irías Nin jukitiaj tusa winishtimpiash. Iistái” tímiayi.

37Nuiṉkia Jesus kakaram untsumak jakamiayi. 38Túramtai Yusa Uunt Je̱e̱n tarach ejamu jímiapetek yakiya̱ nuṉkaani̱ ja̱a̱nakmiayi. 39Suntara uuntri̱ Jesusan ayamtus wajamia nu Jesus kakaram untsumak jáamun iis chichaak “Nuka ti nekas Yusa Uchirí̱yayi” tímiayi.

40Nuwa̱sha arant ii pujuarmiayi. Nu nuwa̱ja̱i̱ Máktaranmaya̱ Marí, chíkich Marisha, Sarumáisha pujuarmiayi. Chíkich Marisha uchich Sántiaknasha tura Jusencha nukurí̱yayi. 41Nú nuwa̱ka, Kariréanam Jesus wekaimia nui̱ Nin nemarsar yáiṉtaitsar wekasarmiayi. Untsurí chíkich nuwa̱sha Jesusja̱i̱ Jerusaréṉnum wéar nu nuwa̱ja̱i̱ arant ii pujuarmiayi.

Jesus iwiarsamu

(Mat. 27:57-61; Ruk. 23:50-56; Jṉ. 19:38-42)

42Ki̱atemamtai ayampratin tsawant jeatsa̱i̱ṉ námper iwiaratin tsawant asamtai 43Arimatéanmaya̱ Jusé arantutsuk kakaram ajas Piratuí̱ jeá Jesusa aya̱shi̱n seatajtsa utuamiayi. Nu Jusencha ashí irunin ainia nu anturin ármiayi. Nisha Yus ju̱ nuṉkanam akupin ajasat tusa nákasmiayi. 44Tura Jesusa aya̱shi̱n seam Piratusha “wárik jaka” tímiayi. Tuma asa suntara úuntri̱n untsurak “¿Nekas jakayik?” tímiayi. 45Tutai uuntri̱ “Ee” takui̱ Jesusa aya̱shi̱n Jusen tsaṉkatkamiayi. 46Jusesha riniu tarach waṉkarman sumarak Jesusa aya̱shi̱n itiar áepas penuarmiayi. Tura yamaram kaya táurmanum ikiusmiayi. Ikius wáitiniam kayan atutmiayi. 47Tura Máktaranmaya̱ Marí Jusé nukurí̱ Mariji̱a̱i̱ ni ikiuamun ii wajarmiayi.

Currently Selected:

Mar. 15: jiv

Highlight

Copy