Mar. 10

Nuwa̱ ajapatniun Jesus chichasma

(Mat. 5:31-32; 19:1-12; Ruk. 16:18)

1Jesus Kapernáumnumia̱ jiinkí̱ Jutanam naṉkaamaki̱ Jurtan entsa amain jeamiayi. Nui̱ pujái̱ aents ataksha Nin irunturarmiayi. Iruntrarmatai tuke túrin asa ataksha unuiniamiayi. 2Tura Pariséu Jesusan nekapsatai tusar wakeruiniak Nin chicharainiak “¿Áishmaṉ ni nua̱rí̱ ajapatin tsaṉkamkamukait?” tiármiayi. 3Tutai Jesus chichaak “¿Muisais wariniak timia?” 4Tutai “Papiji̱a̱i̱ iin ajapatniun tsaṉkatramkamiaji” tiármiayi.Muis. 24:1,3 5Tutai Jesus chichaak “Atumí enentái̱ kátsuram asamtai nu chichaman atumín tsaṉkatramkamiarme. 6Tura Yus yámankamtaik ashí najanamia nui̱, áishmaṉnasha nuwa̱ncha najanamiayi.Naṉ. 1:27; 5:2 7Tuma asamtai áishmaṉ ni aparí̱nia̱ nukurí̱nia̱ kanakí̱ ikiuak ni nua̱ri̱ji̱a̱i̱ṉᵏⁱ tsaniṉtiniaiti. 8Warí, áishmaṉ nua̱ri̱ji̱a̱i̱ jímiaraitiat chikichik ajasártatui.Naṉ. 2:24 Tuma asamtai yamái jímiarchaiti antsu chikichik ajasuíti. 9Tuma asa Yus atsaṉkia nuna aents akankashtiniaiti” tímiayi.

10Tura urum je̱á̱ waya̱war Jesusa unuiniamuri̱ nu chichaman ataksha aniasarmiayi. 11Tuíniakui Jesus chichaak “Shuar ni nua̱ri̱n ajapa ikiuak chikichan nuatkaṉka emka nua̱ri̱n yajauch awajás ikiuak tsanirmayi. 12Nuwa̱sha ni aishri̱ ajapa ikiuak chikichja̱i̱ niniurtukka nisha tsanirmayi” tímiayi.

Jesus uchin shiir awajma

(Mat. 19:13-15; Ruk. 18:15-17)

13Antiṉkiarat tusar uchin Jesusan itiariármiayi. Túruiniakui Jesusa unuiniamuri̱ “itiairap” tiármiayi. 14Tura Jesus nuna wainiak kajek chichaak “Uchi Winí̱ winitin tsaṉkatruktarum. Suritkiairap. Iis, shuar ju̱ uchia núnisaṉ péejchach enentáimtumainia nu Yusa akupeamuri̱n pachinkiamniaiti. 15Nuní̱ asamtai tájarme, uchia núnisaṉ Yusa akupeamuri̱n shuar enentáimtumainiachuka pachinkiachminiaiti” tímiayi. 16Nuyá̱ uchin miniakas péṉker pujutnum yumiṉkramiayi.

Kuítrintin Jesusan aujma

(Mat. 19:16-30; Ruk. 18:18-30)

17Ukunam Jesus nuyá̱ weai̱ shuar tseke Nin tarimiayi. Tarí tikishmátar chicharuk “Uuntá, Amesha tí peṉkeraitme. Tuma asam turuttia ¿warinia túrakna tuke iwiaaku átataj?” tímiayi. 18Tutai Jesus chichaak “¿Urukamtai Winia péṉkeraitme túrutam? Shuar chikichkisha péṉkerka atsawai. Aya Yusak péṉkeraiti. 19Yus akupkámu nékatsmek. Ju̱ áiniawai, tsanirmawairap, maṉkartuawairap, kasamkairap, chíkich shuar tsanumprurairap, anaṉkartuawairap, apasha nukusha umirkatarum. Nu áiniawai” tímiayi.Jiin. 20:12-16; Muis. 5:16-20 20Tutai kuítrintin chichaak “Uuntá, núnaka úchichik mash umiki̱ tsakaruitjiai” tímiayi. 21Tutai Jesus iis wáitnenmai chichaak “Chikichik táasume. Weme ashí áminiu ana nu surukta. Túram nu kuit kuítrincha súsarta. Túrakum nayaimpiniam kuítrum ikiauṉkattame. Túram winitiá krus yanaktinia áintsamek itiurchatrum ai̱ṉ nemartusta” tímiayi. 22Tura kuítrintin nu chichaman antuk wake mesek kúntuts enentáimiar wémiayi, tí kuitrintin asa.

23Ni wématai Jesus ashí ni téntakmari̱n iis ni unuiniamuri̱n chicharuk “Kuítrintin ainia nu Yusa akupeamuri̱n pachinkiatin ti itiurchataiti” tímiayi. 24Takui̱ ni unuiniamuri̱ nuna antukar niisháa enentáimprarmiayi. Túramtai Jesus tímiayi “Uchiru antuktarum. Shuar kuítriniak enentáimtuinia nuka Yusa akupeamuri̱n pachinkiatin peṉké itiurchataiti. 25Auja ji̱n úunt kamiyu waya̱mniakait. Túrasha kuítrinniuka Yusa akupeamuri̱n waya̱tniuka nuna naṉkaamas itiurchataiti” tímiayi.

26Nuna antukar nú arant niisháa enentáimprarmiayi. “¿Nuiṉkia yaki uwempramniait?” nuamtak tunaiyarmiayi. 27Tura Jesus nin iisar chichainiak “Aents niṉki túrachminiaiti antsu Yus túramniaiti. Yuska ashí túramniaiti” tímiayi. 28Nuyá̱ Pítiur Nin chicharuk “Iis, iikia ashí ikiukir némartsujik” tímiayi. 29Tutai Jesussha chichaak “Nekas tájarme, shuar Winia nemartak Yus Chichamnasha ipiampártasa wakerak ni je̱e̱ncha, yachi̱ncha, umai̱ncha, aparí̱ncha, nukurí̱ncha, nua̱ri̱ncha, uchirí̱ncha, nuṉke̱ncha uyu̱matsuk ikiuakka, 30nu shuar ju̱ nuṉkanam sian patatnas je̱e̱ncha, yachi̱ncha, umai̱ncha, nukurí̱ncha, uchirí̱ncha, nuṉke̱ncha, ju̱ nuṉkanam wáitiayat sunastatui. Tura ukunam, nuṉka amukámtai nu shuarsha jáchatainium tuke péṉker pujustatui. 31Tura untsurí shuar yamái peṉkeri̱ ainia nu, ukunam ukunmaani̱ pujusártatui tura íksaṉ untsurí shuar yamái ukunmaya̱ ainia nu, ukunam eem pujusártatui” tímiayi Jesus.

Jesus ni jákatniuri̱ ataksha ujakma

(Mat. 20:17-19; Ruk. 18:31-34)

32Nuyá̱ arak Jerusaréṉnum wénak jintiak wéarmiayi. Jesuska émak wémiayi. Ni unuiniamuri̱sha niisháa enentáimprarmiayi. Ashamainiayataṉ Jesusan nemarsarmiayi. Túmainiai̱ atak ni nekas unuiniamuri̱n akankiar ni túrunatniuri̱n ujakmiayi. 33Ujaak chicharainiak “Antuktarum, arak Jerusaréṉnum wéaji. Nui̱ Winia, Aents Ajasuitjiana ju̱na, Yúsnan pujurniu úuntri̱n jintinniunmasha surutkartatui. Nisha apachnium mantamnati tusar surutkartatui. 34Nusha Winia wishikrurar katsumprukar usukruawar mantuawartatui. Túramaitiatnak menaintiú tsawantai̱ nantaktiatjai” tímiayi.

Jakupu Juaṉja̱i̱ seawarma

(Mat. 20:20-28)

35Sepetéu uchirí̱ Jakupusha Juaṉsha Jesusan taruntarmiayi. Taruntar “Uuntá, ii seattajnia nu túrak tusar wakeraji” tiármiayi. 36Tutai Jesus chicharainiak “¿Warí itiurtukat tusam wakerutam?” 37Tutai “Ame nupetmaktin tsawantrum jeamtai iisha ámiji̱a̱i̱ pujustaitsar wakeraji, wi untsuurumini̱, winia yatsursha menaarmini̱. Nu tsaṉkatrukta” tiármiayi. 38Tura Jesus chichaak “Átum seatrumna nu nékatsrume. Wi umartatjana nu umarminkiaitrum. Tura Wi imiantiatjana núnisrum imiantminkiaitrum” tímiayi. 39Takui̱ “Túramniaitji, páchitskea” tuíniakui Jesus chichaak “Wats, Wi umartatjana nu umartatrume tura Wi imiantiatjana núnisrumek imiantiatrume. 40Túrasha winia untsuurui̱ni̱, menaaruini̱sha átum pujustinian Wikia súsashtiniaitjiarme antsu Yus wakerana nu nuiṉ apujsattawai” tímiayi.

41Tura chíkich tias unuiniamuri̱ nuna anturkar Jakupuncha, Juáṉnasha ti kajerkarmiayi. 42Tura Jesus ni unuiniamuri̱n irur chicharainiak “Ju̱ nékarme, Yus shuarchanum akupniuitjiai tuinia nu waantu enentáimtumas ni shuari̱n ti akupeawai tura uunt ainia nusha ashí shuaran ti takamtikiainiawai. 43Antsu atumji̱a̱i̱ núnisaṉ atsutniuiti. Átumka, wi unuiniamutiram, uunt ajastaj tusarum wakerakrumka ashí yáimin ajastiniaitrume. 44Shuar atumí peṉkeri̱ ajastajtsa wakerakka takarniua nuke ajas umirtamkati. 45Wisha, Aents Ajasuitjiana ju̱, shuar takartusarat tusan táchamjai, antsu ashí shuaran yáiṉtaj tusan táwitjiai. Wisha jarukan shuaran uwemtikratajtsan táwitjiai” tímiayi.

Jesus Partimiásan tsuarma

(Mat. 20:29-34; Ruk. 18:35-43)

46Jesus ni unuiniamuri̱ji̱a̱i̱ tura chíkich untsurí aentsja̱i̱ Jirikiúnam jeawarmiayi. Nuyá̱ Jirikiúnmaya̱sha jíinkiar wenai̱ Timiasa uchirí̱ Partimiás kusuru amia nu, jintiá yantam kuítian seamu pujumiayi. 47Nisha Nasarétnumia̱ Jesusaiti táman antuk untsumuk “Uunt Jesusá, Amesha Úunt Akupin Tawit weachukaitiam Yus anaikiachmakaitiam. Winiaja waitnentrurta” tímiayi.

48Tura untsurí nui̱ matsamármia nu nin chicharainiak “Takamatsata” tiármiayi. Nisha nú naṉkaamas untsummiayi “Tawit weá Jesusá, winia waitnentrurta” tímiayi. 49Nuna antuk Jesus wajatas chichaak “Untsuktarum” tímiayi. Takui̱ shuar kusurun untsuiniak “Kakaram ajasta. Wajaktia. Untsurmawai” tiármiayi. 50Tuíniakui nisha esekmatai̱ri̱n ajapa ikiuak wajaki̱ Jesusan tseke tarimiayi. 51Tura Jesus nin chicharuk “¿Winia itiurtukat tusamea wakerutam?” tímiayi. Tutai kusuru chicharuk “Uuntá, íimtiasan wakerajai” tímiayi. 52Tutai Jesus chichaak “Shiir wetá. Winia nekas enentáimtursa asam péṉker ajasume” tímiayi. Tura nu chichamaik iimpramiayi. Tura Jesusan nemarki̱ wémiayi.

Currently Selected:

Mar. 10: jiv

Highlight

Copy