Mar. 11

Jesus Jerusaréṉnum waya̱mu

(Mat. 21:1-11; Ruk. 19:28-40; Jṉ. 12:12-19)

1Jerusaréṉnum wésar tura Petpajáisha Petaniasha Uriwiu naint íṉkiuasmak ámanum jeawar Jesus jimiará unuiniamuri̱n émtikiamiayi. 2Tura émtikiuk chicharuk “Aatunini̱ pépruchiniam werum nuiṉ umpuru uchich jiṉkiamu wainkiattarme. Nu umpuruka tuke entsamprukchamuiti. Nu atíarum utitiarum. 3Tura ‘¿Urukamtia áitkiarum?’ turamainiakuisha ‘ii Uuntri̱ wakerawai’ titiarum” tímiayi. 4Tutai wéarmiayi. Tura umpurun wáitiniam a̱a̱ni̱ jiṉkiamun jintiá yantamnum wajan wáinkiar atíawarmiayi. 5Nui̱ pujuarmia nu “¿Warí áitkiarum. Urukamtai umpuru atíarum?” tiármiayi. 6Takui̱ nisha Jesus timia nu ujakam suritkiacharmiayi. 7Tura umpurun Jesusan itiariar pushiri̱n umpurunam awantkarmiayi. Túram Jesus entsamkamiayi. 8Tura untsurí shuarsha pushiri̱n jintianam ayapá̱r áintkiarmiayi. Chíkitcha jintiá yantamnumia̱n nukan juuk jintianam áintrarmiayi. 9Eem wéarmia nusha uku winiarmia nusha warainiak

“Jusanna”#11:9 Nuka Ipríu chichamja̱i̱ “Yamái uwemtikrurta” tawai. untsumkarmiayi.

“Yusa náari̱i̱n winiana nu imiá péṉkeraiti. YKan. 118:25-26

10Ii uuntri̱ Tawitia akupeamuri̱ tátatna nu imiá peṉker atí.

Ii Yusri̱ naari̱ shiir atí.” Tu untsumki̱ wéarmiayi. 11Tura Jesus Jerusaréṉnum jeamiayi. Jeá, Yusa Uunt Je̱e̱n waya̱miayi. Tura ashí iyasua amik kintiampra̱i̱j tusa ni tuse unuiniamuri̱ji̱a̱i̱ tíjiu̱ch Petanianam wéarmiayi.

Jesus íkiun yumiṉkramu

(Mat. 21:18-19)

12Kashin tsawa̱r Petanianmaya̱ jintia wesa Jesus tsukammiayi. 13Tura arant wajan ikiu numiri̱n núkenniun wainiak nereatsuash tusa iyumiayi. Tura nereshtai̱ri̱n asamtai neren peṉké wainkiachmiayi. 14Nuyá̱ ikiu numin yumiṉkiak “Ame nerem peṉké yunashti” tímiayi. Ni unuiniamuri̱sha nuna táman antukarmiayi.

Yusa Uunt Je̱e̱n wariṉsha suruktinian Jesus surimkiamu

(Mat. 21:12-13; Ruk. 19:45-46; Jṉ. 2:13-22)

15Nuyá̱ atak Jerusaréṉnum jeawarmiayi. Nui̱ Jesus Yusa Uunt Je̱e̱n wayá̱ suruktai tusar pujuarmia nuna ji̱i̱ki̱ akupkatasa naṉkammiayi. Kuítian yapaji̱n armia nuna ekentsa yurumtain tura yampitsan súrin armia nuna kutaṉkri̱ncha ayanturmiayi. 16Tura kijin entsakí̱ Yusa Uunt Je̱e̱n naṉkaamaktinian suritkiarmiayi. 17Nuyá̱ “‘Yus áujsatai tusar ashí shuar Yusa je̱e̱n waya̱mnia átatui’ tú aarchamukait Yusa Papiri̱i̱n. Antsu átumka Yusa je̱e̱ kasa matsamtaiya nútikiarme” tímiayi.Isa. 56:7; Jrm. 7:11 18Aents nui̱ matsamármia nu Jesusa chichame̱n antukar ti enentáimprarmiayi. Tuma asamtai Yúsnan pujurniu úuntri̱sha Israer shuara jintinniuri̱sha nuna nekaawar Jesusan ashamainiak mantamnati tusar chichaman jurusármiayi. 19Nuyá̱ kí̱akui̱ Jesus Jerusaréṉnumia̱ jiinkimiayi.

Ikiu káarun wainkiamu

(Mat. 21:20-22)

20Kashin káshik naṉkaamainiak ikiu numin kaṉkaptuk jaka wajan wáinkiarmiayi. 21Tura Pítiur enentáimias Jesusan chichaak “Uuntá, iistá, ikiu Ame yumiṉkramam nu kaṉkaptuk káarchaik” 22tutai Jesus chichaak “Yus nekas enentáimtustarum. 23Iis, nekas tátsujrumek shuar ‘Yus nekas túratpiash’ tútsuk tura ‘wi tájana nuna Yus nekas túrattawai’ tu enentáimsar ju̱ náintian ‘jiinkí̱ nayantsanam iniaṉti’ tákuiṉkia páchitsuk iniaṉtatui. 24Tuma asamtai tájarme ashí Yus áujkuram searmena nuna suramsattarme. ‘Wi seajna nuna yamái takakjai’ tu enentáimkiurmeka wainkiattarme. 25Tura Yus áujkuram pujarmena nu, kajernaiyamuram ákuiṉkia tsaṉkurnáiratarum. Atumí Aparí̱ nayaimpiniam pujana nu atumí tunaari̱n tsaṉkurturti tusarum túratarum. 26Atumsha tsaṉkurnáiyachkurminkia núnisaṉ atumí Aparí̱ nayaimpiniam pujana nu atumí tunaari̱n tsaṉkurtámprashtatrume” tímiayi Jesus.

Yusa kakarmari̱ji̱a̱i̱ Jesus takasma

(Mat. 21:23-27; Ruk. 20:1-8)

27Ataksha Jerusaréṉnum waketkiarmiayi. Jesus Yusa Uunt Je̱e̱n wekái̱ Yúsnan pujurniu úuntri̱sha Israer shuara jintinniuri̱sha Israer shuara iruntai̱ je̱e̱ úuntri̱sha Nin káutkarmiayi. 28Káutkar Jesusan chicharainiak “¿Yana kakarmari̱ji̱a̱i̱ ju̱ túram. Ame túramna nuna ya tsaṉkatrama?” tiármiayi. 29Tuíniakui Jesus chichaak “Chikichkiniak aniastatjarme. Ái̱rkatarum. Túrakrumni̱ṉkia Wisha winia takastinian tsaṉkatrukmia nuna ujaktatjarme. 30Wats, turutiarum, ¿ya Juaṉ imiaitniun tsaṉkatkama? ¿Shuar tsaṉkatkamka? ¿Yus tsaṉkatkamka? ái̱rkatarum” tímiayi. 31Tura nisha enentáimprar “‘Yus akupkaiti’ tákurni̱ṉkia ‘¿urukamtia umirkachuram?’ turamchattajik. 32Antsu ‘shuar tsaṉkatkaiti’ tákurkia ashí shuar ashamaji” tunainiarmiayi. Ashí aents Juaṉ nekas Yúsnan etserniuiti, tu enentáimainiakui ashammiarmiayi. 33Nuyá̱ Jesusan chichaak “Iikia nékatsji.”

Tutai Jesus chichaak “Wisha núnisnak yana kakarmari̱ji̱a̱i̱ takaaj nuna ujakchattajrume” tímiayi.

Currently Selected:

Mar. 11: jiv

Highlight

Copy