Mar. 9

1Ataksha Jesus nin chicharuk “Nekas tájarme, shuar játsuk Yus ni kakarmari̱ji̱a̱i̱ aentsu enentái̱n akupkáttana nú tsawantan wáinkiartatna nu ju̱i̱ iiji̱a̱i̱ pujuiniawai” tímiayi.

Jesus nusháa iira ajasma

(Mat. 17:1-13; Ruk. 9:28-36)

2Nuyá̱ sais tsawant naṉkaamasmatai Jesus Pítruncha Jakupuncha Juáṉnasha uunt nainnium júkiarmiayi. Nui̱sha Jesus nusháa iira ajasmiayi. 3Ni pushirísha ti puju jíitsumir ajattsarmiayi. Nuja̱i̱ métek puju awajsatin ju̱ nuṉkanam atsawai. 4Túruna nui̱ Irías, Muisaisja̱i̱ wantinkiar Jesusja̱i̱ chichainian wáinkiarmiayi. 5Nuya̱sha Pítiur Jesusan chicharuk “Uuntá, ii ju̱i̱ pujustin ti péṉkeraiti. Menaintiú aak áminiu tura Muisaisna nuyá̱ Iríasnasha najanatai” tímiayi. 6Jesusa unuiniamuri̱ sapijmainiak Pítiur wariniak titi nekaachmiayi. Nékachu asa nuna tímiayi.

7Tura yuraṉkim káunar mikintiu awajsámiayi. Yuraṉminmaya̱ chichaak “Winia aneamu Uchir ju̱i̱ti. Ni anturkatarum” tímiayi. 8Nuya̱ṉka ni unuiniamuri̱ ayantmar iyaj tukamar aya Jesusnak wáinkiarmiayi. Chíkichkia atsuarmiayi. 9Nuyá̱ náinniumia̱ akainiak Jesus nin chicharuk “Wáinkiarumna nu etserkairap. Wi, Aents Ajasuitjiana ju̱ jakamunmaya̱ nantaatsa̱i̱ṉ nu etserkairap” tímiayi. 10Tutai ni tímian ímiatrusaṉ ú̱karmiayi. Tura “jakamunmaya̱ nantaatsa̱i̱ṉ tana nu, ¿wariniak taa?” nuamtak tunainiarmiayi. 11Tura Jesusan chicharainiak “¿Urukamtai Israerti ii jintinniuri̱sha Irías emka tátiniaiti tuinia?” tiármiayi. 12Tutai Jesus chichaak “Nekas Irías ashí iwiarattsa emka tátiniaiti. ¿Tura Aents Ajasunun Yus Papinium warintiua? ‘Ti wáitsattawai. Nin nakitrartatui.’ Isa. 53:3 13Wi tájarme Irías nekas táwiti. Támatai shuar ashí ni wakeriarmia nuna nin túrawarmiayi. Yusa Papiri̱i̱n Iríasa túrunatniuri̱ aarma amia tímiatrusaṉ túrawarmiayi” tímiayi Jesus.

Jesus iwianchin ji̱i̱ki̱ akupkámu

(Mat. 17:14-21; Ruk. 9:37-43)

14Tura ni unuiniamuri̱ matsatmanum atak wáketuk ti untsurí aents káutkar Israer shuara jintinniuri̱sha niji̱a̱i̱ tunái̱ pujuinian wainkiamiayi. 15Tura aentsush Jesusan wáinkiar warainiak tsékeṉki̱ weriar áujsarmiayi. 16Túrunawarmatai Jesus chicharainiak “¿Warí tunaiyarum?” tímiayi. 17Tutai chikichik aya̱k “Uuntá, winia uchirun ámin itiarjiame. Iwianchruku asa chichachuiti. 18Túmakui̱ íwianch eṉkemtakuṉ paat aji̱a̱r áepeawai túram uchisha saun káput apak nai̱n kátetete awajeawai. Túram kaka̱a̱kcha ajakui ame unuiniamurmin jí̱i̱rtukti tusan seamjai túrasha tujintrutkarai” tímiayi. 19Tutai Jesus chichaak “¡Yusan enentáimtichutirmincha urutmá tsawantak atumji̱a̱i̱ pujustaj tura urutmá katsuntrataj! Uchi itiatárum” tímiayi. 20Takui̱ uchin Jesusai̱ itiariármiayi. Tura íwianch uchin eṉkemta Jesusan wainiak uchin ajakramiayi. Uchisha chichiptur nuṉká iniaan péper péper ajakí̱ wenunam saun apakmiayi.

21Túrunamtai Jesus uchi aparí̱n chichaak “¿Urutá yaunchu áinkiait?” Tutai ni aparí̱ chichaak “Úchichik áinkiaiti. 22Tuma asa tuke ju̱tikiú pujurniuiti. Jiniumsha apemawai tura mátaj tusa entsá aju̱a̱wai. Yaintrukminiaitkiumka waitneasam yáintrukta” tímiayi. 23Tutai Jesus chicharuk “¿Urukamtai yaintrukminiaitkiumka túrutam? Nekaata, shuar Winia nekas enentáimturna nu ashí túramniaiti” tímiayi. 24Tutai uchi aparí̱ kakantar chichaak “Uuntá, nekas enentáimtajme. Nekas enentáimtustinian táasjana nu yáintkiata” tímiayi. 25Tura shuar untsurí kaunainian Jesus wainiak kakantuk “Empeku chichachu awajin iwianchi jiinkitia, tájame. Jiinkim ataksha waya̱waip” tímiayi. 26Tura íwianch jíiniuk untsumak uchin we wérkasá ajakar chichichiptú aepkimiayi. Túram uchi jakaa ímianis tepemiayi. Túrunamtai untsurí shuar “jakayi” tiármiayi. 27Támanak Jesus uwejnum achik awajkimiayi tura uchi nantaki̱ wajakmiayi.

28Tura Jesus je̱á̱ waya̱mtai niṉki pujusár ni unuiniamuri̱ aniasar “¿Urukamtai iisha jí̱i̱ktin tujintkiamaji?” tiármiayi. 29Tutai Jesus chicharainiak “Íwianch jú̱nikkia náṉkamtsuk jí̱i̱kchamniaiti antsu aya Yus áujkur jí̱i̱kminiaiti” tímiayi.

Jesus ataksha ni jákatniuri̱n ujakma

(Mat. 17:22-23; Ruk. 9:43-45)

30Nuyá̱ jíinkiar Kariréanmaani̱ naṉkaamakiarmiayi. Ni unuiniamuri̱n unuinia asa nu naṉkaamamun nekaawara̱i̱ṉ tusa Jesus nakitmiayi. 31Unuiniak ju̱na chichaak “Wi Aents Ajasuitiaj ju̱na mantamnati tusar achirkar surutkartatui. Tura máamuitiatnak iwiarsamunmaya̱n menaintiú tsawant nantaktiatjai” tímiayi. 32Tura nu chichaman nekaacharmiayi. Nékainiachiat anintrústinian arantúkarmiayi.

¿Yaki imiá naṉkamantuit?

(Mat. 18:1-5; Ruk. 9:46-48)

33Nuyá̱ Kapernáumnum jeawarmiayi. Tura Jesus je̱á̱ pujus ni unuiniamuri̱n anintruiniak “¿Atumsha jintiá winisrum warí áujmatmiarum?” tímiayi. 34Tura natsa̱a̱rar pachischarmiayi. Kame jintiá wésar “iiji̱a̱i̱ ¿yaki imiá naṉkamantu ajasat?” tunainiarmiayi. 35Ni unuiniamuri̱ pachischarmatai Jesus pujus ashí tuse unuiniamuri̱n irur chichaak “Shuar nekas naṉkamantu ajastajtsa wakerakka péejchachia nuke enentáimtumar shuara yaintri̱ atí” tímiayi. 36Tura uchin itiá miniakas chichaak 37“Shuar uchin winia naarui̱ shiir awajeakka Winia shiir awajtawai. Tura Winia akuptúkua nunasha shiir awajeawai” tímiayi.

Shuar nakitramachkuṉka iin páchitkiawai

(Mat. 10:42; Ruk. 9:49-50)

38Nuyá̱ Juaṉ Jesusan chicharuk “Uuntá, shuar ame náarmin pachis iwianchin akupea wainkiamji. Tura iiji̱a̱i̱ írutkachu asamtai nu túratin suritkiamji” tímiayi. 39Tutai Jesus chicharuk “Antsu suritkiairap. Shuar winia náarun pachis tujintkiamun túrakka, nu shuar wari tsanumprutratniun tujintkiattawai. 40Shuar iin nakitramachkuṉka iin páchitkiawai. 41Winia nemartaku asakrumin shuar entsaachinkisha ajampramkuṉka ántar túratsui antsu nekasan tájarme, nuka akikma átatui.

42 Tura shuar ju̱ uchin Winia enentáimturas umirtuinia nuna yajauchin túrumtikiamtaiṉkia ti asutniáttawai. Tuma asamtai uchin yajauchin túrumtiktsa̱i̱ṉ kuntujnum kayaja̱i̱ jiṉkiar nayantsanam aju̱ṉmaka maak ainti. 43Ame uwejmek yajauchin túrumtikramamniaitkiuiṉkia tsupikta. Mai̱ uwejtuk wáitsatniunam jeatniuja̱i̱ṉkia chikichík uwejja̱i̱ ju̱ nuṉkanam pujusár tuke iwiaaku pujustinnium jeatin tí shiiraiti. Warí, wáitsatniunmaṉka ji kajinkiashtin awai, 44jákaru akarí̱sha jáiniatsui tura jisha tuke kapa̱a̱wai.Isa. 66:24 45Nawemsha yajauchin túrumtikramamniaitkiuiṉkia nusha tsupikta. Mái̱ nawe̱ntuk wáitsatniunam jeatniuja̱i̱ṉkia chikichík nawe̱ja̱i̱ ju̱ nuṉkanam pujusár tuke iwiaaku pujustinnium jeatin tí shiiraiti. Wáitsatniunmaṉka ji kajinkiashtin awai, 46jákaru akarí̱sha jáiniatsui tura jisha tuke kapa̱a̱wai. 47Ji̱misha yajauchin túrumtikramamniaitkiuiṉkia ukuinkiata. Mai̱ jí̱ntiuk wáitsatniunam jeatniuja̱i̱ṉkia chikichík ji̱ji̱a̱i̱ ju̱ nuṉkanam pujusár Yus akupeana nui̱ jeatin tí shiiraiti, 48wáitsatniunmaṉka jákaru akarí̱sha jáiniatsui tura jisha tuke kapa̱a̱wai.

49 Namaṉ Yus susamu weaktinia áintsaṉ aentstirmesha jiji̱a̱i̱ nekapnastatrume. 50Weesha tí peṉkeraitiat michumárka ¿itiurak jeá jeat átiṉᵏⁱ? Wats, wee jeakua áintsarmek atumek shiir enentáimtunaistarum” tímiayi Jesus.Mat. 5:13-16

Currently Selected:

Mar. 9: jiv

Highlight

Copy