Ruk. 3

Imiakratin Juaṉ etserkamu

(Mat. 3:1-12; Mar. 1:1-8; Jṉ. 1:19-28)

1Kame Tiwiriu Sésar úunt akupin pujamu kinse uwí jeamtai Jutanam Punsiu Piratu akupin pujumiayi. Tura Kariréanam Irutis akupin pujumiayi. Itiureanam Trakunítinmasha ni yachi̱ Jirip akupin pujumiayi. Tura Apirínianam Risanías akupin pujumiayi. 2Tura nu uwitin Anassha Kaipiassha Yúsnan pujurniu uuntri̱ pujuarmiayi. Nu uwitin Sakaríasa uchirí̱ Juaṉ atsú nuṉkanam pujái̱ Yusai̱ya̱ chichaman antukmiayi. 3Nuna antuk Jurtan supichik aents matsamárma nuna Juaṉ wekaatus ujainiak “Winia tunaarun Yus tsaṉkurturat tusarum ené enentáimiá ajasrum enentáim yapaji̱árum imiantiarum” tu ujakármiayi. 4Nu ujakman Isayas yaunchu ju̱na áarmiayi.

Atsunum wekaana nu untsumun ántuiniawai. Ni untsumuk ju̱na tawai. Atumí enentái̱ Uuntá jinti̱ iwiarturtarum, naka awajsatarum.

5 Jápaaka ainia nusha áimkiamu ártí. Naint ainia nusha paka awajsamu ártí. Jintia ipijiáru ainia nusha naka ji̱i̱kmia ártí. Tura pujutrin ainia nusha métekrak paka awajsamu ártí.

6 Túrunamtai ashí nuṉkanmaya̱ aents Yusai̱ya̱ uwempratin aan nekaawartatui. Isa. 40:3-4

7Untsurí aents imiatit tusar tariarmia nuna Juaṉ chicharainiak “Napia ániutirmincha, ti asutniátin jeatemáttana nuyá̱ uwempratarum tusa ¿ya ujatmákuram? 8‘Iikia Aprajám weaitji tuma asakrin Yus shiir enentáimturmaji’ tu enentáimtumasairap. Antsu enentáim yapaji̱ámuitkiuiṉkia péṉker wekaamurmiji̱a̱i̱ paant iniakmastarum. Warí Yus wakerakka ju̱ kayan Aprajáma shuari̱n páchitsuk najankainti. 9Aneartarum. Numi ajaktinian kampuwá̱ri̱n jacha atuttsamuiti. Numi péṉker nereatsna nuka ajakar jinium apeamu ártatui” tímiayi. 10Tutai aentska enentáimprar “¿Nuiṉkia itiurkatjik?” tiármiayi. 11Tutai Juaṉ chichaak “Jimiará pushin takakna nu takaktsuna nuna chikichan susati. Yurumkan takakna nusha takaktsuna nuna ajamsati” tímiayi.

12Uunt akupniu kuítri̱n juu armia nú shuar imiantiaj tusar Juáṉkan weriar aniasarmiayi. “Uuntá, ¿iisha warí itiurkatjik?” tiármiayi. 13Tutai Juaṉ chichaak “Kuit úunt akupniunu juwarmena nuyá̱ iniaṉkakrum achikiairap” tutai 14núnisaṉ suntarsha aniasarmiayi “Uuntá, ¿iisha warí itiurkatjik?” tuíniakui Juaṉsha chichaak “Ame kakarmarmiji̱a̱i̱ chikichnia atankirap tura tsanumprurairap. Núnisrumek úunt akupin akirmana núja̱i̱ṉ warastarum” tímiayi. 15“Ju̱ Juaṉ Yusa anaikiamuri̱nchuashit” tu enentáimsar paant nekaataitsar nákarmiayi. 16Tumai̱ Juaṉ ashí aentsun chicharainiak “Wikia aya entsá ímiajrume. Tura wiji̱a̱i̱ naṉkaamas kakaram winiawai. Tuma asamtai ni sapatri̱ jiṉkiamuri̱nkisha atitrachminiaitjiai. Nisha taa imiantinia ánis tura jiya ánis Yusa Wakaní̱n eṉketramprattarme. 17Tura shuar arusan awa̱jtia núnisaṉ, nusha yajauch ana nuna ajapa aya péṉkernak júuktatui. Neren ikiustatui tura yajauchinkia ji tuke kaji̱nchatainiam apeattawai” tímiayi.

18Juaṉ nu arant shiir chichaman aentsun ti núkap ujakármiayi. 19Tura nuya̱sha akupin Irutisan chicharkamiayi. Ni yachi̱ Jiripi nua̱ri̱n Jirutíasan kasarak nuatkui tura chíkich yajauchincha túrakui chicharkamiayi. 20Tura Irutis núnaka ántutsuk chíkich yajauchin túramiayi. Juáṉkan achik sepunam eṉkeamiayi.

Jesus imiaimiu

(Mat. 3:13-17; Mar. 1:9-11)

21Nu túruntsa̱i̱ṉ Juaṉsha ashí nú nuṉkanmaya̱ aentsun imiak pujurainai̱ Jesussha imiantmiayi. Nisha Yusan áujuk pujái̱ nayaimpisha uranmiayi. 22Tura Yusa Wakaní̱ yámpits najanar paant tarurmiayi. Tura Yus nayaimpinmaya̱ chicharuk “Amek winia aneamur Uchiruitme, Ámin ti wararjame” tímiayi.

Jesukrístu shuari̱

(Mat. 1:1-17)

23Jesus traintia uwí takaku asa ni takatrí̱n naṉkamamiayi. “Jusé uchirí̱nti” tiniu ármiayi. Jusesha Iría uchirí̱yayi. 24Irisha Matata uchirí̱yayi, Matat Riwí uchirí̱yayi, Riwí Mirkí uchirí̱yayi, Mirki Jana uchirí̱yayi. Jana Jusé uchirí̱yayi, 25Jusé Matatíasa uchirí̱yayi, Matatías Amusa uchirí̱yayi, Amus Naúma uchirí̱yayi, Naúm Esrí uchirí̱yayi, Esri Nakaia uchirí̱yayi, 26Nakai Maata uchirí̱yayi, Maat Matatíasa uchirí̱yayi, Matatías Semái uchirí̱yayi, Semái Jusé uchirí̱yayi, Jusé Jutáa uchirí̱yayi, 27Jutá Juanaa uchirí̱yayi, Juana Resa uchirí̱yayi, Resa Surupapíra uchirí̱yayi, Surupapír Saratiára uchirí̱yayi, Saratiár Nerí uchirí̱yayi, 28Neri Mirkí uchirí̱yayi, Mirki Atí uchirí̱yayi, Atí Kusama uchirí̱yayi, Kusam Irmutama uchirí̱yayi, Irmutam Ira uchirí̱yayi, 29Ir Jusuí uchirí̱yayi, Jusuí Irieséra uchirí̱yayi, Iriesér Jurema uchirí̱yayi, Jurem Matata uchirí̱yayi, 30Matat Riwí uchirí̱yayi, Riwí Semiuna uchirí̱yayi, Semiun Jutáa uchirí̱yayi, Jutá Jusé uchirí̱yayi, Jusé Junana uchirí̱yayi, Junan Iriakímia uchirí̱yayi, 31Iriakím Mirea uchirí̱yayi, Mirea Mainiána uchirí̱yayi, Mainián Matata uchirí̱yayi, Matata Natana uchirí̱yayi, 32Natan Tawitia uchirí̱yayi, Tawit Isái uchirí̱yayi, Isái Uwitia uchirí̱yayi, Uwit Puasa uchirí̱yayi, Puas Sarmuna uchirí̱yayi, Sarmun Nasuna uchirí̱yayi, 33Nasun Aminiatápa uchirí̱yayi, Aminiatáp Arama uchirí̱yayi, Aram Esruna uchirí̱yayi, Esrun Páresa uchirí̱yayi, Páres Jutáa uchirí̱yayi, 34Jutá Jakupa uchirí̱yayi, Jakup Isaka uchirí̱yayi, Isak Aprajáma uchirí̱yayi, Aprajám Taráia uchirí̱yayi, Tarái Nakura uchirí̱yayi, 35Nakur Seruka uchirí̱yayi, Seruk Ríua uchirí̱yayi, Ríu#3:35 Chíkich áarmari̱n Rakaua tura Rakau áarmaiti. Pirikia uchirí̱yayi, Pirik Epera uchirí̱yayi, Eper Séraj uchirí̱yayi, 36Sara Kainiana uchirí̱yayi, Kainian Arpaksata uchirí̱yayi, Arpaksat Sema uchirí̱yayi, Sem Nuwáii uchirí̱yayi, Nuwái Ramikia uchirí̱yayi, 37Ramik Matusarínia uchirí̱yayi, Matusarín Enuka uchirí̱yayi, Enuk Jaritia uchirí̱yayi, Jarit Maararíira uchirí̱yayi, Maararíir Kainiana uchirí̱yayi, 38Kainian Enusa uchirí̱yayi, Enus Seta uchirí̱yayi, Set Ataṉka uchirí̱yayi tura Ataṉ Yus najanamuyayi.

Currently Selected:

Ruk. 3: jiv

Highlight

Copy