Ruk. 4

Jesus nekapsamu

(Mat. 4:1-11; Mar. 1:12-13)

1Jesusa enentái̱n Yusa Wakaní̱ pimiutkamiayi. Jesussha Jurtan entsanmaya̱ waketkimtai Yusa Wakaní̱ kampuntin atsú nuṉkanam jukimiayi. 2Tura nui̱sha kuaraintia tsawant pujusmiayi. Tura íwianch Nin tunaanum aju̱a̱raintiajtai tusa pujurmiayi. Nu kuaraintia tsawant Jesus yurumtsuk pujá asa ti tsukammiayi. 3Nuiṉkia íwianch chicharuk “Amesha nekas Yusa Uchirí̱ntkiumka ju̱ kaya apatuk najanata” 4tutai Jesus chichaak “Yus Papinium tawai ‘Aya apatkuja̱i̱ṉ shuar iwiaaku pujuschamniaiti. Antsu ashí Yus Chicham tana nuja̱i̱ nekas iwiaaku pujusminiaiti’ Muis. 8:3 tawai” tímiayi. 5Tura nuyá̱ íwianch naint yakí̱ wájakmanum jukí̱, ashí nuṉka ainia nuna ju̱ chichamaik iniaktusmiayi. 6-7Tura chicharuk “Ashí ju̱ nuṉka wáinmena nu wíniaiti. Tura wi wakerajna nú shuaran súsatniuitjiai. Tuma asamtai tikishmátrurakminkia ju̱ nuṉkanam ashí akupkatniun susattajme. Tura ashí áminiu átatui” 8tutai Jesus chichaak “Yus Papinium tawai ‘Aya Niṉki Yus ame Úuntrum tikishmátram enentáimtustiniaitme.’” Muis. 6:13 tímiayi.

9Nuyá̱ ataksha íwianch Jesusan Jerusaréṉnum jukimiayi. Tura Yusa Uunt Je̱e̱ yakiini̱ iwiak chicharuk 10“Yus Papinium chichaak

‘Yuska ni suntari̱n wáinkiata tusa akuptúrmaktatui.

11 Kayanam ajintra̱i̱ṉ tusa ni uwejé̱ja̱i̱ weṉkurmaktatui.’ YKan. 91:11-12

Tuma asamtai nekas Yusa Uchirí̱nkiumka ju̱yá̱ akaikim iniaata.” 12Tutai Jesus áimiuk “Yus Papinium ju̱nasha tawai Yus ame Úuntrum nekapsataj tiip” tímiayi.Muis. 6:16 13Tuma asamtai íwianch peṉké tujintiak ishichik tsawant Jesusan iniaisámiayi.

Kariréanam Jesus ni takatrí̱n náṉkamma

(Mat. 4:12-17; Mar. 1:14-15)

14Jesus ni enentái̱n Yusa Wakaní̱ kakarmari̱ pimiutkamu asa Kariréanam waketkimiayi. Nu nuṉkanam naṉkamantu túramuri̱n áujmatiarmiayi. 15Nu nuṉkanam ashí péprunam Israer shuar iruntai̱ je̱a̱ armia nui̱ unuiniarmiayi. Tura anturkarmia nuka ni náari̱n shiir awajsarmiayi.

Jesus Nasarétnum pujusma

(Mat. 13:53-58; Mar. 6:1-6)

16Ni tsakarmari̱i̱n Nasarétnum Jesus wémiayi. Tura Israer shuara ayampratin tsawantri̱n iruntai̱ je̱a̱nam waya̱miayi tuke túrin asa. Tura wayá̱ Yus Papin áujsataj tusa wajakmiayi. 17Nui̱ṉkia Yúsnan etserin Isayasa áarmari̱n súsarmiayi. Nuna urak nui̱ ju̱na áarman wainkiamiayi,

18 Yusa Wakaní̱ winí̱ pujurtawai. Shuar warainiachun shiir chichaman ujaktinian anaitiukuiti. Kúntuts enentáimiar wake mesek pujuinian tsuártinian akuptúkuiti. Achira yaruakma ainia nusha aṉkant awajsaruiti tura ji̱ kusurúncha íimtiktinian tura yajauch awajsamu ainia nuna péṉker awajsatniuncha

19 tura Uunt Yus shuaran yáiṉtin tsawant jean etserkatniuncha akuptúkuiti. Isa. 61:1-2

20Nu áarman áujsua amik papin nukukmiayi. Tura iruntai̱ je̱a̱nam yáimin pujan susa iniais Niṉkia etserkataj tusa pujusmiayi. Tura ashí shuar pujuarmia nu émamkes ii pujuarmiayi. 21Jesussha chicharuk “Yus Chicham yamái antukurmena nu yamái tsawantin túrunayi” tímiayi.

22Jesusan ashí péṉker áujmatiarmiayi. Tura Jesus ti shiir chichaakui ti enentáimprar “Ju̱ka Jusé uchirí̱nchukait” tiármiayi. 23Tu enentáimiainiakui Jesus chicharuk “Atumsha shuar tuke tuinia núnisrumek ‘tsuákratniuitkiumka amek tsuámarta’ turuttiatrume. Kapernáumnum aentsti túrachmin túramamna núnismek ju̱i̱sha túrata tusarum nu turuttiatrume. 24Túrasha nekas tájarme Yúsnan etserniun ni nuṉke̱nkikia ni tana nuna anturainiatsui. 25Nuya̱sha tájarme Irías pujumia nú tsawantin menaintiú uwí naṉkaamas yumi yutukcha asamtai ashí Israernum ti tsuka amia nui̱ ti untsurí waje̱ irunmiayi. 26Tuma ai̱ṉ nu waje̱n yaiṉtí tusa Yus Iríasan akuptúkchamiayi. Antsu chíkich nuṉkanmaya̱ waje̱n Sareptanam pujumia nuna yaiṉtí tusa akuptúkmiayi. Sarepta pépruka Setunnum tíjiu̱chiti. 27Núnisaṉ ii nuṉke̱sha Iriséu pujumia nu tsawantin ti untsurí tunamáru iruniarmiayi. Tura núnaka tsuárcharmiayi. Antsu chíkich nuṉka, Sírianmaya̱ Naamanan tsuármiayi” tímiayi Jesus.

28Israer shuarsha iruntai̱ je̱e̱n pujuarmia nu, nuna antukar ti kajerkarmiayi. 29Tura wajatkiar Jesusan ji̱i̱ki̱ péprunmaya̱ akupkarmiayi. Tura pepru amia nui̱ naint yakí̱ náṉkatkamunam nuyá̱ akaki̱ aju̱a̱tai tusar júkiarmiayi. 30Túrasha Jesuska irunar matsatainiamunmaṉ etempraktak jiinkí̱ wémiayi.

Jesus iwianchrukun tsuarma

(Mar. 1:21-28)

31Nuyá̱ Jesus Kariréanam Kapernáum péprunam wémiayi. Tura Israer shuar ayamtai̱ tsawant tuke etserki̱ wémiayi. 32Yusa kakarmari̱n takaku asa nuja̱i̱ etserkamiayi. Tuma asamtai “Yusa kakarmari̱ji̱a̱i̱ unuitiamtsujik” tiar ti enentáimprarmiayi. 33Chíkich tsawantai̱ áishmaṉ iwianchruku Israer shuar iruntai̱ je̱a̱nam pujumia nu untsumuk chichaak 34“Inikiartusta. Iikia Áminkia pachistin nakitiaji. ¿Warí iincha amukratkataj tusam táchamek? Wikia nékajme. Ámeka tí peṉker Tunaarincha nuitme” 35tutai Jesus iwianchin kakantar chicharuk “Takamatsata. Ju̱ áishmaṉ ikiuktia” tutai nu chichamaik íwianch áishmaṉnumia̱ jiinkí̱ weak nuṉká aju̱a̱nt ikiukmiayi. Túrasha nekas yajauch awajtsuk ikiukmiayi. 36Ashí pujuarmia nu ti enentáimiar mái̱ tunai ajarmiayi. “¿Ju̱sha warí chichamait? Ju̱ aishmaṉ Yusa kakarmari̱ji̱a̱i̱ iwianchin ji̱i̱ki̱ awematsuk” tiármiayi. 37Tura ashí nú nuṉkanam Jesusa túramuri̱n áujmatiarmiayi.

Pitru tsatsarí̱n Jesus tsuarma

(Mat. 8:14-15; Mar. 1:29-31)

38Jesussha Israer shuar iruntai̱ je̱a̱nmaya̱ jiinkí̱ Semuṉka je̱e̱n wémiayi. Semuṉka tsatsarí̱ tsue̱r ti jáamiayi. Ti jaakui Jesusan “tsuárturta” tiármiayi. 39Tutai Jesus jaa tepan tarí tsuntsumpruá tsué̱mun kakantramiayi. Tura nú chichamaik nuwa̱sha michatramiayi. Tura péṉker ajas nú chichamaik nuwa̱ nantaki̱ ayurkamamiayi.

Untsurí jáinian Jesus tsuarma

(Mat. 8:16-17; Mar. 1:32-34)

40Etsa̱ akaikin ai̱ ni shuari̱ náṉkamas suṉkurja̱i̱ jaarmia nuna Jesusan ikiaatkarmiayi. Jesussha jáinian chikichkiniak chikichkiniak uwejé̱ja̱i̱ antiṉkiar tsuararmiayi. 41Ti untsurí iwianchruku armia nunasha iwianchri̱n jí̱i̱rkiarmiayi. Tura íwianch jíinkiar untsumainiak “Ámeka Yusa Uchirí̱nme” Jesusan tiármiayi. Tura nisha Jesuska Yusa anaikiamuri̱nti tu nékainiakui Jesus kakantar chicharak itiatmamtikiarmiayi.

Jesus Kariréanam étserma

(Mar. 1:35-39)

42Kashin káshik Jesus péprunmaya̱ jiinkí̱ atsamunam wémiayi. Tura shuarsha e̱a̱kiar pujan jeariármiayi. Tura iiji̱a̱i̱ tuke pujusat tusar emetatai tusar wakeriarmiayi. 43Túmai̱ṉ Jesus chichaak “Yus ii enentái̱n akupkátajtsa wakera nú shiir chichaman chíkich péprunam matsatainia nunasha ujaktiniaitjiai. Nu túrata tusa akupkámuitjiai” tímiayi. 44Tuma asamtai Kariréanam Israer shuar iruntai̱ je̱a̱nam Jesus tuke etserki̱ wémiayi.

Currently Selected:

Ruk. 4: jiv

Highlight

Copy