Popular Bible Verses from Ruk. 3

Share

Nu túruntsa̱i̱ṉ Juaṉsha ashí nú nuṉkanmaya̱ aentsun imiak pujurainai̱ Jesussha imiantmiayi. Nisha Yusan áujuk pujái̱ nayaimpisha uranmiayi. Tura Yusa Wakaní̱ yámpits najanar paant tarurmiayi. Tura Yus nayaimpinmaya̱ chicharuk “Amek winia aneamur Uchiruitme, Ámin ti wararjame” tímiayi.

Tumai̱ Juaṉ ashí aentsun chicharainiak “Wikia aya entsá ímiajrume. Tura wiji̱a̱i̱ naṉkaamas kakaram winiawai. Tuma asamtai ni sapatri̱ jiṉkiamuri̱nkisha atitrachminiaitjiai. Nisha taa imiantinia ánis tura jiya ánis Yusa Wakaní̱n eṉketramprattarme.

‘Iikia Aprajám weaitji tuma asakrin Yus shiir enentáimturmaji’ tu enentáimtumasairap. Antsu enentáim yapaji̱ámuitkiuiṉkia péṉker wekaamurmiji̱a̱i̱ paant iniakmastarum. Warí Yus wakerakka ju̱ kayan Aprajáma shuari̱n páchitsuk najankainti.

Aneartarum. Numi ajaktinian kampuwá̱ri̱n jacha atuttsamuiti. Numi péṉker nereatsna nuka ajakar jinium apeamu ártatui” tímiayi.

Nu ujakman Isayas yaunchu ju̱na áarmiayi. Atsunum wekaana nu untsumun ántuiniawai. Ni untsumuk ju̱na tawai. Atumí enentái̱ Uuntá jinti̱ iwiarturtarum, naka awajsatarum. Jápaaka ainia nusha áimkiamu ártí. Naint ainia nusha paka awajsamu ártí. Jintia ipijiáru ainia nusha naka ji̱i̱kmia ártí. Tura pujutrin ainia nusha métekrak paka awajsamu ártí. Túrunamtai ashí nuṉkanmaya̱ aents Yusai̱ya̱ uwempratin aan nekaawartatui.