Ruk. 2

Jesusa akiiniamuri̱

(Mat. 1:18-25)

1Wats Juaṉ akiiniamia nú uwitin úunt akupin Akustu ashí nuṉkanam aentsun nekapmararti tu chichakmiayi. 2Nu nekapmartinian yaunchu túrushtai̱n yamái túriarmiayi. Sírianam Siriniu akupin pujái̱ túrawarmiayi. 3Ni naari̱ áartaj tusa ashí shuar ni nuṉke̱ni̱ṉ wétin ármiayi. 4Tuma asamtai Jusé Kariréanam Nasarét péprunmaya̱ jiinkí̱ Jutanam Piriṉ péprunam wémiayi. Juseka Tawit weanam akiinia asa ni nekas nuṉke̱ṉka Piriṉkiauyayi. 5Nu asamtai ni náari̱n áartaj tusa Jusé Mariji̱a̱i̱ wémiayi. Marisha Jusé núwe̱yayi. Tura tsaniṉcharuyayi. Túmaitiat Marisha ajamtiniuyayi.Mat. 1:18,25 6Tura nui̱ Piriṉnum pujuiniai̱ Marí takustintri̱ jeamiayi. 7Nui̱ uchi áishmaṉkan iwia̱i̱n takusmiayi. Tura uchi penutaiji̱a̱i̱ penuar waaka yurumtainiam aepsamiayi. Írar kanutai pujustin aṉkant atsá asamtai túrawarmiayi.

Murikiun wáinniun Yusa suntari̱ Yus akatar akuptúkma

8Tura Piriṉnum tíjiu̱ch murikiun wáinin kashi murikrí̱n wáiniuk pujuarmiayi. 9Túmainiai̱ Yusa suntar murikiun wáinin matsatainian wantintiukmiayi. Tura Yusai̱ya̱ tsáapnin ni matsatainiamunam etsantramiayi. Túrunamtai murikiun wáinniuka ti ashamkarmiayi. 10Túrasha Yusa suntari̱ chicharuk “Ashamprukairap. Ashí aentsnum ti warastin atí tusan tí peṉker chichaman itiarjiarme. 11Ju̱i̱ti. Yamái tsawantai̱ Tawitia pépruri̱n Piriṉnum yaunchu Yus Uunt anaikiamu KRISTU tutai, Uwemtikkiartin akiintiurmarme. Nu Uchisha ashí aentsun akupniuiti. 12Tura ju̱ja̱i̱ nekaattarme, uchi penutaiji̱a̱i̱ penuarma waaka yurumtainiam tepá wainkiattarme. Nu wainkiarum nekas ju̱i̱ti, tu nekaattarme” tímiayi. 13Nu chichamaik Yusa suntari̱ ti untsurí nayaimpinmaya̱ káunkarmiayi. Túrawar Yusa náari̱n shiir awajainiak

14“Nayaimpinmasha Yus naṉkamantuiti tu enentáimtusarti.

Tura ju̱ nuṉkanmasha Yusja̱i̱ nawamnaikiaru ainia nusha aṉkant pujusárti.” Tu tiármiayi.

15Tura Yusa suntari̱ nayaimpiniam waketkiarmatai murikiun wáinin chichainiak “Wats Piriṉnum wárik wetái. Nu túrunamu Yus túramajnia nu iyumi” tiármiayi.

16Nuna tiar wárik wéarmiayi. Tura Marincha Jusencha wáinkiarmiayi. Tura uchincha waaka yurumtainiam tepan wáinkiarmiayi. 17Wéar nuna wáinkiar Yusa suntari̱ uchi túrunamuri̱n timia nuna etserkarmiayi. 18Tura murikiun wáinin tiarmia nuna anturkaruka ti enentáimtusarmiayi. 19Túrasha Marikia ashí túrunamia nuna ni enentái̱ji̱a̱i̱ṉ enentáimtu pujumiayi. 20Tura murikiun wáinniuka antukarmia nuna enentáimtusar tura íisarmia nunasha enentáimtusar “Yusa suntari̱ ujatmákmajnia tímiatrusaṉ túrunayi” tiármiayi. Tuma ásar Yusa náari̱n shiir awajsar kantampruáwar waketkiarmiayi.

Uchi Jesus Yusa Uunt Je̱e̱n itiamu

21Tura uchi akiiniamu uchu tsawant jeamtai ni túrutairi̱n túrin ásarmatai tsupirnakmiayi. Túrawar Marí ajapratsa̱i̱ṉ Yusa suntari̱ timia nútiksaṉ “Jesus” anaikiarmiayi. 22Tura Muisais akiiniatniunam akupkámia núnisaṉ tsawantri̱ jeamtai Yusa Uunt Je̱e̱n Jerusaréṉnum uchin Yus íktustai tusar júkiarmiayi. 23Kame Yus Papinium ju̱ aarma awai. “Ashí uchi iwia̱i̱ri̱ áishmaṉ akiinkiuṉka Yusna átatui.” Jiin. 13:2,12,15 24Tuma asamtai Marí Yusa Uunt Je̱e̱n wá̱i̱tsuk pujamu waya̱tniuri̱ jeamtai uchin Yus iistí tusa Yusa Uunt Je̱e̱n Jerusaréṉnum pujana nui̱ itiarmiayi. Tura yampitsan jímiaran súsarmiayi. Muisais akupkámun umiiniak nuna túrawarmiayi.Riw. 12:2-8

25Nu tumai̱ Semiun náartin áishmaṉ Jerusaréṉnum pujumiayi. Simiuncha Yusa Wakaní̱ pujurma asa péṉker áishmaṉkauyayi. Yusan nekas enentáimtiniuyayi. Yusa anaikiamuri̱ji̱a̱i̱ Israer shuar aṉkant ajastin jeatí tusa jintia íimpriniuyayi. 26Kame Tunaarincha Wakan tu jintintiámu asa nu áishmaṉ Uunt Yusa KRÍSTURI̱ tutain wáintsuk jákashtinian nekamamiayi. 27Simiuncha Yusa Wakaní̱ wetá tutai Yusa Uunt Je̱e̱n wémiayi. Tura nú tsawantai̱ Muisais timia núnisaṉ umirkatai tusar Marisha Jusesha uchin Jesusan Yusa Uunt Je̱e̱n itiariármiayi. 28Itiariarmatai Simiun Uchin jusa miniakas Yusan áujuk

29“Yamaikia, Uuntá, turutmiamna nu ímiatrusmek umikiu asam ame takartámin áujmamas shiir waketkit akupkata.

30-31Ju̱ Uchi ashí aents uwemtikrarta tusam susamna nuna yamái imia winia jí̱ruja̱i̱ wainkiajai.

32 Israer shuarcha ainia nu tsáapninium wekasarat tusa akuptúkmaiti ju̱ Uchi. Isa. 9:2; 42:6; 49:6 Tura Israer shuar Áminiuram ájinia nuna ashí aents shiir enentáimtikrarti tusam ju̱ Uchi akuptúkmaitji. Nuna wainkian shiir enentáimsan jákatniuitjiai” tímiayi.

33Tura Simiun Uchiniun tu chicharkui Jusesha Jesusa nukurí̱sha ti enentáimprarmiayi. 34Semiuncha chichaak “Yus shiir enentáimturmasarti” ti Marin chicharuk “Nekaata. Ju̱ Uchin Israer shuartisha untsurí nakitrar iniarartatji. Tura chíkich Israer shuartikia ju̱ Uchin shiir enentáimtusar ti wararsartatji. Tura Uchiram Yusa kakarmari̱n ti paant iniakmastatui. Tuma ai̱ṉ untsurí Aun yajauch chichariartatui. 35Nuja̱i̱ shuar ni enentái̱n warinia enentáimia nu, paant átatui. Maaj, ashí nu túmakui̱ ijiumua núnismek ame enentáimin ti wáitsattame, Mariya” tímiayi Simiun.

36Nuwa̱sha Ana náartin nui̱ Yusa Uunt Je̱e̱n pujumiayi. Nisha Yúsnan etserniuyayi. Ni aparí̱nkia Panuiruyayi tura Aser shuarauyayi nu nuwa̱. Nisha tí uuntchiyayi. Yama nuatnaikiamuja̱i̱ siati uwí ni áishri̱ji̱a̱i̱ tsaniṉ pujusármiayi. 37Tura waje̱ma uchaintikuátru uwí pujusmiayi. Núnisaṉ Yusa Uunt Je̱e̱ya̱ jíintsuk káshisha tsawai̱sha ijiarma tuke Yusan áujniuyayi. 38Simiun tuasua amikmatai Anasha taa, Uchin wainiak Yusan yumiṉsamiayi. Tura Jerusaréṉnum Yus uwemtikrampratai tusa nákarmia nuna áujkuṉka uchin áujmat wémiayi.

Nasarétnum waketkiarma

39Nuyá̱ Yus timia nuna ashí túrawar umikiar Kariréanam kame ni pujumia nú peprunam Nasarétnum Jusesha Marisha Uchisha waketkiarmiayi. 40Uchi Jesus tsakaki̱ kakaram ajakí̱ tura nú naṉkaamas nekaki̱ wémiayi. Tura Yus Nin ti shiir awajsámiayi.

Jesus Yusa Uunt Je̱e̱n túrunamuri̱

41Jusesha, Jesusa nukurí̱sha tuke uwitin Paskua námper jeakui Jerusaréṉnum wéu ármiayi. 42Ni túrutairi̱ túruiniak Jerusaréṉnum weak Jesusan tuse uwí jeamtai júkiarmiayi. 43Námper amukámtai ni nukurí̱sha Jusesha nékachmanum Jesuska Jerusaréṉnum juákmiayi. 44Marisha Jusesha “wí shuarja̱i̱ winiawai” tusa núnaka e̱a̱tsuk chikichík tsawant wekasarmiayi. Nuyá̱ wáinkiataj tukamá ni shuari̱i̱n tura ni nékamunam e̱a̱karsha 45wáinkiacharmiayi. Nuiṉkia Jerusaréṉnum ataksha waketrukiarmiayi e̱a̱ktai tusar. 46Tura menaintiú tsawant e̱a̱kar Yusa Uunt Je̱e̱n Yus akupkámun jintinian anturak anintrú pujan wáinkiarmiayi. 47Tura nui̱ ashí Jesusan anturkarmiania nu nisha ti nékakui tura áimtanash ti péṉker aimkiui ti enentáimturarmiayi. 48Ni aparí̱sha nukurí̱sha tumá pujan wáinkiar ti enentáimprarmiayi. Tura ni nukurí̱ chichaak “Uchiru, ¿ausha urukamtai itiurchat enentáimtikrurmam? Ame apasha wisha urukayik tusar ti e̱a̱kjame” tímiayi. 49Tutai Jesus chichaak “¿Urukamtai e̱a̱trum? Winia Aparnan túratniuitjiana nuka nékatsrumek” tímiayi.

50Tura timia núnaka peṉké nekaacharmiayi. 51Nuyá̱ Jesus niji̱a̱i̱ Nasarétnum waketkimiayi. Niṉkia tuke umiriarmiayi. Ashí nu túrunamun Marikia tuke enentáimtu pujumiayi. 52Jesuska tsakaki̱ tura nekaki̱ wémiayi. Yussha tura aentssha Nin shiir enentáimtiarmiayi.

Currently Selected:

Ruk. 2: jiv

Highlight

Copy