Ruk. 1

1Nekas iiní̱ túramia nuna “ímiatrusnak áartatjai” untsurí aents tiármiayi. 2Yámankamtaikniumia̱ṉ íisarmia nú shuar tura Yus Chichaman etserkatniun yaiṉkiarmia nusha iin unuitiamprarmia nútiksaraṉ áartinian wakeriarmiayi. 3Wisha núnisnak esettsaran enentáimsan yámankamtaikniumia̱ nuna nekaamjai. Tuma asan túrunamia nuna ímiatrusnak amincha áatratajtsan wakerimjiame, winia úuntur Tiúpiru. 4Jintintrámawarma nú naṉkaamas nekaata tusan wakerakun áatjame.

Imiakratin Juaṉ akiiniatin ujakma

5Jutanam úunt akupin Irutis akupkámia nú tsawantin Israer shuar Yúsnan pujurin ámiayi, ni naari̱ Sakarías. Nisha Aptías weauyayi. Ni nuwe̱sha Irisapít Araun weauyayi. Irisapítia úuntri̱sha Israer shuar Yúsnan pujurin ármiayi. 6Yúsja̱i̱sha Sakaríassha Irisapítcha mái̱ metek péṉker ármiayi. Yus akupkámia nunasha umirin ármiayi. Tuma asamtai peṉkesha chíkich nin yajauch chicharkatin atsuarmiayi. 7Yusja̱i̱ péṉker wekainiayat Irisapít kaa asa takuchuyayi. Túrasha mái̱ uuntach ármiayi.

8-9Israer shuar Yúsnan pujurin chíkich weanmaya̱ nuyá̱ chíkich weanam aṉkant aṉkant Yusa je̱e̱n takáu ármiayi. Chíkich tsawant Sakarías wea takastin amia nui̱ Sakaríaska kuṉkuinian ekemáktaj tusa init waya̱tniuyayi. 10Init kuṉkuinian ekeemai̱ untsurí aents a̱a̱ni̱ matsamsar Yusan áujtak pujuarmiayi. 11Sakarías init pujái̱ kuṉkuin áestutai̱niam untsuurnumaani̱ aya aneachma Uunt Yusa suntari̱ wajamiayi. 12Nuna wajan wainiak Sakaríaska purushnarmiayi. 13Túrasha nayaimpinmaya̱ suntar chicharuk “Sapijmiakaip Sakaríasa. Nekaata, ame seamna nuna Yus anturtamkayi. Tura Irisapít ame nuwem uchin takustatui. Ni akiiniamtai ‘Juaṉ’ anaikiata. 14-15Ame uchiram akiiniattana nuka Yúsja̱i̱sha naṉkamantu átatui. Tuma asamtai akiiniamtai amesha shiir enentáimsam warastatme. Tura chíkich aents untsurí warasartatui. Ame uchirmesha karía ainia nuna umarchattawai. Tura aetak akiinchanak Yusa Wakaní̱ pimiutkattawai. 16Tura ni shuari̱n Israer shuar áiniana nuna ii Uuntri̱ Yusja̱i̱ ataksha nawamtikiartatui. 17Úunt Yusai̱ya̱ akatrámu átatui. Yaunchu Yúsnan etserin Irías kakaram etserkamia núnisaṉ nisha etserkattawai. Nuja̱i̱ shuaran ni uchirí̱ji̱a̱i̱ nawamtikiartatui.Mks. 4:5-6 Tura umichu ainia nuna eseer enentáimtikrartatui. Ni Uuntri̱ taakui ni enentái̱ iwiaramu ártí tusa etserkattawai” tímiayi Yusa suntari̱.

18Nuna takui̱ Sakarías Yusa suntari̱ chicharuk “¿Nunasha wariji̱a̱i̱ṉ paant nekaataj? Wisha nua̱rja̱i̱ mái̱ metek tí uuntchichukaitiaj” tímiayi. 19Tutai Yusa suntari̱ chicharuk “Wikia Kapriaraitjiai, Yusa suntari̱ntjiai. Ni akattúrmatai chichastájam tusan tura nu shiir chichaman ujaktájam tusan tarijme. 20Túrasha wi tájamna nu ‘nekasaiti’ tu enentáimprachume. Tura asam uchiram akiintsa̱i̱ṉ muut ajastatme. Chichastin peṉké tujintkiattame. Tura wi tájana nu tsawant jeamtai túrunattawai” tímiayi. 21Nuna tumai̱ Yusa je̱e̱n a̱a̱ni̱ pujusár Sakaríasan nákas pujuarmiayi. “¿Urukamtaik init we imiá meṉkaka?” tu enentáimprarmiayi. 22Nuyá̱ Sakarías jiinkimtai áujsartaj tukamá tujintkiarmiayi. Sakaríaska muut ajasu asa aya úwijmiasaṉ chichamiayi. Túmakui̱ Sakarías init pujus Yusai̱ya̱n ímiaja̱i̱k wainkiamun nekaawarmiayi.

23Yusa je̱e̱n takastin tsawant amukámtai Sakaríaska ni je̱e̱n waketkimiayi. 24Nuyá̱ ukunam ni nua̱rí̱ Irisapít ajaprukmiayi. Tura seṉku nantu aya je̱a̱n pujusmiayi. 25Je̱á̱ pujus “Aents wishikiartin armia nuyá̱ winia natsantrun jurutkitiaj tusa uchi takustinian Yus tsaṉkatrukai” tu enentáimpramiayi Irisapít.

Jesus akiiniatniun Yusa suntari̱ étserma

26Nu seṉku nantu naṉkaamasmatai Yus ni suntari̱n Kapriaran Kariréanam Nasarét peprua nui̱ akupkámiayi. 27Nasarétnumia̱ nuwa̱n, naari̱ Marí, iyuti tusa akuptúkmiayi. Nú nuwa̱ka áishmaṉja̱i̱ tsaniṉchauyayi. Nisha Juseja̱i̱ nuatnaikiatsa anajmanair pujumiayi. Juseka uunt Tawit weauyayi. 28Wats Yusa suntari̱ Marí pujamunam wayá̱ chicharuk “Yus péṉker enentáimturma asamtai ámin winitjiame, Mariyá. Yuska ámin nemartamuk ashí nuwa̱ naṉkaamas péṉker awajtamui” tímiayi.

29Tura Marisha Yusa suntari̱n wainiak chichaamun nékatsuk “Urukamtaik tu chicháa” tu enentáimpramiayi. 30Nuyá̱ Yusa suntari̱ chicharuk “Mariyá, sapijmiakaip. Yus shiir enentáimturmawai. 31Antukta. Amesha ajapruktatme. Túram Uchi takustatme.Isa. 7:14 Nusha ‘Jesus’ anaikiata. 32-33Nisha uunt átatui. Nincha ‘Uunt Naṉkamantu Yusa Uchirí̱’ tiártatui. Tura Uunt Yuska yaunchu Tawitian úunt akupniuri̱ awajsámia núnisaṉ ame Uchirmin áme shuarumin Israer tutain Uunt akupin awajsattawai. Ni akupeamuri̱sha Yus susamu asa peṉké amuukashtiniaiti” tímiayi.

34Yusa suntari̱ tutai Marí chichaak “Nusha winia áishur atsai̱sha ¿itiurak túrunataj?” 35Tutai Yusa suntari̱ Marin chichaak “Yusa Wakaní̱ tarutrámtatui. Tura yuraṉmia núnisaṉ Uunt Yusa kakarmari̱ ijirmattawai. Nu tuma asamtai Uchi akiiniattana nu Yusai̱ya̱ asamtai ‘Yusa Uchirí̱nti’ tiártatui. 36Tura Irisapít ame kaná kaimia nusha núnisaṉ weamtánam ajaprukai. Iis, ‘uchin takuchuiti’ tiarmia nu yamaikia sais nantu pujawai ajamtin. 37Yúsja̱i̱ṉkia itiurchatka peṉké atsawai” tímiayi. 38Tutai Marí chicharuk “Wikia Yus wakeramun túriniaitjiai. Ame támena nuna Yus wakerana nuna túrutati, tajai” tímiayi. Nuna tímiatai Yusa suntari̱ṉkia wémiayi.

Irisapítian Marí iyumu

39-40Nu tsawant Marí wárikmas muranam Jutanam ni kaná kain Irisapítian iyutaj tusa wémiayi. Sakaríasai̱ jeá ni je̱e̱n wayá̱ Irisapítian áujsamiayi.

41Irisapít Marí áujeamun antukmatai uchi init muchitkiamiayi. Tumai̱ Irisapítian Yusa Wakaní̱ ni enentái̱n pimiutkamiayi. 42Nuiṉkia kakantar Marin chicharuk “Yus amincha ti shiir awajtámsaiti. Tura Uchiram akiiniattana nusha Yus shiir awajsamuiti. 43¿Kairu, ame winia Uuntru nukurí̱ ámini̱ṉ Yus winia ti waitnentra asa áujuta tusa ámin akuptámkachaik? 44Warí wisha ame áujtamna nuna ántakui init uchi waras muchitrutkayi. 45Amesha Yus túramia nu umikiu asam shiir pujame. Yus timia nu túrunattawai” tímiayi. 46Nuna tinia iniaisamtai Marí ju̱na chicharuk

“Wikia tuke enentái̱rja̱i̱ ‘Yus timiá uuntaiti’ tajai.

47Tura Uunt Yuska winia Uwemtikruru asamtai ti waraajai.

48-49Wisha péejchach ai̱ṉ ni wakeramuri̱n umiktajtsan wakerakui winia enentáimturayi. Tuma asamtai ashí aents ‘Marincha Yus shiir awajsaiti’ tuke turutiartatui. Yuska imiá peṉker tura imiá kakaram ana nu winia tí uuntan túrutaiti. Tuma asamtai ashí aents ‘Marincha Yus shiir awajsaiti’ turutiartatui. Núnaka yamái naṉkamamunak tuke turutú ajartatui.

50 Tura Nin umirkatniun wakerana nunasha Yus tuke waitnentrartatui. YKan. 103:17

51Niṉkia aentsti túrachminia nunasha páchitsuk túraiti. Naṉkamantuitjiai tu enentáimtumainia nuna tsakiṉmakaruiti.

52Ashí kakaram ainia nuna pujutái̱ri̱nia̱ akakiáruiti. Tura íksaṉ péejchach ainia nuna uunt awajsaruiti.

53 Tsukamainia nuna Yus péṉkeran súsaruiti. YKan. 107:9 Tura antsu ‘ashí takakjai’ tuinia núnaka aya jú̱nik awajsaruiti.

54Israer shuar Niniu ájinia núnaka waitnentratniun kajinmáttsuk yaintmakuitji.

55Yaunchu ii Uuntri̱ Aprajáman tura ní shuarnasha ‘túrattajai’ timia nuna ímiatrusaṉ tuke túraiti.” Nuní̱ tímiayi Marí.

56Marikia Irisapítji̱a̱i̱ menaintiú nantu pujus ni je̱e̱n waketkimiayi.

Imiakratin Juaṉ akiiniamu

57Nuyá̱ ni takustin tsawant jeamtai Irisapít uchi áishmaṉkan takusmiayi. 58Tura ní shuari̱sha ni írutramuri̱sha “Irisapítian Yus ti shiir yáiṉkiuiti” tuíniak nin iyuwarmiayi. Tura mái̱ metek warasarmiayi.

59Israer shuar túrutai̱ jú̱nisaiti, uchi akiiniamuri̱ uchu tsawant jeamtai tsupirnaktin awai. Yus nuna tú tiniu asamtai tuke túrin ármiayi. Wats Irisapítia uchirí̱ akiiniamuri̱nia̱ uchu tsawant jeamtai tsupirkatai tusar ni je̱e̱n jearmiayi. Nuiṉkia ni aparí̱ naari̱ Sakarías anaikiataitsar wakeriarmiayi. 60Tura ni nukurí̱ chichaak “Atsá. Antsu ni naari̱ Juaṉ átatui.” 61Tutai chichainiak “¿Nusha urukamtia? Amé shuarumsha nu náartincha áwak” tiármiayi. 62Nuiṉkia uchi aparí̱n “¿Warí anaikiatajtsam wakeram?” tusar aya úweje̱ja̱i̱ṉ iniasarmiayi. 63Tutai uchí aparí̱sha “Nakash surusta, áartaj tusan wakerajai” tusa aya úweje̱ja̱i̱ṉ iniakmamiayi. Takui̱ nakash susam ni naari̱ Juáṉkaiti, tu áarmiayi. Nuna wáinkiar “Áyawá̱ urukakuṉ taa” tu enentáimprarmiayi. 64Nú chichamaik Sakarías chichatsuk pujamun chichakmiayi. Tura nuiṉ Yusa náari̱ncha shiir awajsámiayi. 65Nuiṉkia ni írutramuri̱sha ashamkarmiayi tura ashí Jutanam murá amia nui̱ nu túrunamun ujakam ashí nekaawarmiayi. 66Nu túrunamun antukar ti enentáimsarmiayi. Tura “ju̱ uchin Yus nekas pujurtsuk. Tuma asamtai uunt ajas ¿urukuk ati?” tu enentáimprarmiayi.

Sakarías Yus jintintiam timia

67Uchí aparí̱ Sakarías Yusa Wakaní̱ pimiutkam tura Yus jintintiam chicharukJuir 2:28

68“Israer shuarti ii Yusri̱ naari̱ shiir awajsatniuitji. Ii Yusri̱sha tarutmaitji. Tura uwemtikrampraitji.

69Yaunchu ii uuntri̱ Tawit Yusa wakeramuri̱ji̱a̱i̱ úunt akupin áchamkia. Tura ni úkuri̱n ti kakaram Uwemtikkiartinian suramsaitji.

70-72Yuska ii nemasri̱ya̱ tura iin nakitramainiajnia nuyá̱ uwemtikrampratniun enentáimsamia nunaYKan. 106:10 yaunchu ni etserniuri̱ péṉker armia nuna ujakmiayi. Winia tí peṉker chichamprun tájana nuna yapají̱tsuk umirkan tuke waitnentratajrume yaunchu ii úuntri̱n tímiania nunasha ni etserniuri̱n ujakármiayi. Yaunchu nu ujakma yamái iisha wainji.

73-75Nu ujakman Yuska yámankamtaik imiá yaunchu ii uuntri̱ Aprajáman tíchamkia. Aprajáman ujakmia nu ju̱i̱ti ‘Wi wakeraj nútiksaran Winia umirtukar péṉker wekainia nuna ni nemasri̱ya̱ uwemtikrattajai. Sapijmiatsuk winia tuke takartusarat tusan túrattajai’ Yus tímiayi Aprajáman. Iisha ni shuari̱ asakrin nuna taku iincha turamaji.

76Tura amincha uchiru, ‘Uunt Yusna etserniuiti’ turamartatui. Amesha ni tátintri̱ iwiarataj tusam Uuntai̱ émkim wétatme.Isa. 40:3-5; Mks. 3:1; 4:5

77Ni shuari̱ ni tunaarí̱ tsaṉkurnar uwemprarat tusam túrattame.

78-79Yuska ashí shuaran anea asa iincha waitnentramak ni pujamunmaya̱ ni tsáapnintri̱n suramsaitji. Ni enentái̱n kiritniunam wekainia nuna mesertinnium jeatéma ásarmatai ni tsáapnintri̱ jeatⁱ tusa túraiti.Isa. 9:2 Tura ashí iincha ii enentái̱n imiatkinchanum wekasarmí tusa túraiti.” Isa. 59:8

Nuní̱ tímiayi Sakarías.

80Uchisha tsakarmiayi. Tura Yusan nekaki̱ nekaki̱ wémiayi. Israer shuarnum etserkatin tsawantri̱ jeatsa̱i̱ṉkia atsamunam pujuyayi.

Currently Selected:

Ruk. 1: jiv

Highlight

Copy