Naṉ. 34

Tiinia yajauch awajsámunam yapajmiákma

1Chíkich tsawantai̱ Tiinia, Ría nawantri̱ Jakup yajutmarmia nu, nú nuṉkanmaya̱ nuwa̱n iyuumiayi. 2Nui̱ Jamura uchirí̱ Sekim Tíinian wainkiamiayi. Kame Jamurka Jep shuarauyayi tura nú nuṉkanam akupniu uchirí̱yayi. Tura Sekimsha Tíinianka anaṉka jukí̱ yajauch awajsámiayi. 3Túmaitkiuisha niṉkia aneak nuwa̱sha anentat tusa ti shiir awajmiayi. 4Tura Sekimsha aparí̱n Jamuran chichareak “Au nuwa̱n nuatkattsan wakerajai. Ni aparí̱i̱n weme sumartukta” tímiayi.

5Tura Jakupka ni nawantri̱n Tíinian Sekim yajauch awajsámun nekaamiayi. Nékayat ni uchirí̱ṉkia taṉkun wainiainiak pujurainia ásarmatai ni kaunmam páchitsuk iniaisámiayi. 6Nuyá̱ Sekimia aparí̱ Jamurka Jakupan chichastaj tusa werimiayi.

7Tura Jakupa uchirí̱sha Tíinian Sekim tsanirma táman antukar ní shuari̱ji̱a̱i̱ṉkia peṉké yajauch asamtai ti kajerkarmiayi. 8Jamursha nin chicharainiak “Winia uchir Sekim atumí umai̱n ti aneawai. Tuma asamtai wait aneasrum nuatkat tusarum tsaṉkatrutkatarum. 9Túrarum ii shuar ajastarum. Atumí nawantri̱ ii nuatkartai tura atumsha ii nawantri̱ nuatkatarum. 10Túrarum átumsha iiji̱a̱i̱ pujustarum. Núṉkaka aṉkant awai. Ju̱i̱ pujakrum núṉkentin ajasrum wariṉkish súrakrum kuit waitmaktarum” tímiayi.

11Tura aparí̱ chichas umirmatai Sekimsha Tiinia aparí̱n tura umai̱ncha chicharainiak “Atumsha ayu turutiuk tusan seajrume. Túrarum átum warí wakerarum seattiarum. Núnaka amastajrume. 12Kame nuwa̱ nuateakur tuke súnaitiaisha tura nuna naṉkaamassha surusta túrutkurmincha páchitsuk amastajrume. Túrasha núwa̱ka tsaṉkatruktarum nuatkataj” tímiayi. 13Túrasha Jakupa uchirí̱ṉkia umái̱ yajauch awajtúsma ásar Sekimian tura ni aparí̱ Jamuran anaṉkainiak 14“Tujintiaji. Warí íi shuartikia tsupirkachmaja̱i̱ nuwa̱ nuatmamtikiatniuka muí̱jmiainti. 15Antsu iiji̱a̱i̱ métek atumsha tsupirkamuitkiurminkia ayu tíminiaitji. 16Núja̱i̱ṉkia atumsha ii nawantri̱ nuatkamniaitrume tura iisha núnisrik atumí nawantri̱ nuatkaintji. Túrunar iisha iruntrar chikichík aents ajasáraintji. 17Tura atumsha nu nakitiakrumninkia ju̱yá̱ wéakur ii umai̱sha jukittiaji” tiármiayi.

18Tuíniakui Jamursha ni uchirí̱ Sekimji̱a̱i̱ “Nekas péṉkeraiti” tiármiayi. 19Sekimkia Jakupa nawantri̱n nuatkataj tusa ti wakera asa wárik tsupimiakmiayi. Nu arantcha Jamura uchirí̱ya̱ṉka Sekim imiá paantniuyayi. 20Tura wí túramun chikicha umirkartatui tú enentáimias nisha ni aparí̱ji̱a̱i̱ pepru wá̱i̱ti̱a̱i̱ri̱n áujmatkatin amia nui̱ chichastai tusar wéarmiayi.

21Tura jeawar chichainiak “Israer shuar iiji̱a̱i̱ nawamnaikia áiniawai tura ii nuṉke̱sha ti waṉkarmachukait. Ju̱i̱ iiji̱a̱i̱ matsamsarti túrawarmatai iiji̱a̱i̱ sunaisarmi, iisha ni nawantri̱ nuatrukartai tura nisha ii nawantri̱n nuatkarti. 22Tura chikichík aents ajastai tusar túramjinia nu tímiatrusrik tsupirnaktiniaitji. Aya núja̱i̱ṉ pujurtamsartatji. 23Ni turamainiaj nu ayu tiartai. Túrawakrinkia ashí ni taṉkurí̱sha tura warirí̱sha iiniu áchartatuak. Núja̱i̱ṉkia iiji̱a̱i̱ matsamsartatui” tiármiayi. 24Tuíniakui nú peprunam ashí áishmaṉ suntarnum wétinian jeá armia nu Jamur tura uchirí̱ Sekim chichaamun antukar tsupirnakarmiayi.

25Tura menaintiú tsawant naṉkaamasmanum Jakupa uchirí̱ Semiuncha Riwisha Tiinia umái̱ armia nu puya̱ri̱n júkiar Jamura shuari̱ matsatmanum wéarmiayi. Tura nisha tsupirnakaru tuke najaimiainia ásar mánaiktinian jeainiachuk kajinmas pujuinian ashí áishmaṉkan máwar amukármiayi. 26Núnisaraṉ Jamurnasha tura uchirí̱ Sekimniasha puya̱ja̱i̱ máwar Tíinianka Sekimia je̱e̱n pujan júkiar wéarmiayi. 27Nuyá̱ Jakupa uchirí̱ chíkich armia nusha káunkar jaka tepearmia núnaka páchitsuk ni warirí̱n yarurkarmiayi. Nuja̱i̱ ni umái̱ yajauch awajsámun yapajmiákarmiayi. 28Núnisaṉ murikniasha waakancha umpuruncha tura ashí péprunam irunmia nunasha tura ajanam irunmia nunasha yarurkarmiayi. 29Nuya̱sha je̱á̱ irunmia nunasha ashí wariri̱ntiuk yarumainiak nuwa̱ncha tura uchincha achirar misatkan yaruakarmiayi.

30Túrawarmatai Jakupsha uchirí̱n Semiunan Riwiji̱a̱i̱ chicharainiak “Atumek wíniaka makurtiatrume. Átum túramunam Píris aentska tura Kanaannumia̱ aentssha, ju̱yá̱ aents ainia nu kajertamkartatji. Warí, yamaikia irunturmarar iikia ishichik asakrin winiasha tura íi shuarnasha ashí amutmakchartatjik” tímiayi. 31Tutai nisha aparí̱n chicharainiak “¿Nuikia ii umai̱nkia tsanirmatai nuwa̱a nútiksar yajauch awajsatniukait?” tiármiayi.

Currently Selected:

Naṉ. 34: jiv

Highlight

Copy